Ŋúnuyɔ 99
99
Kùlofɔli Yewe wiī tiɛlɛ fùn
1 Yewe wiī Kùlofɔli! Kùlogolo siɛnfeliye yiī nɛ fún nɛ yàʔará.
Wi kùlofɔlilɔ kácunʔɔ kiī seribɛnnɛ naamɛ gè#99.1 Wéli baa Yir 25.18-22; Sam2 6.2; Ŋún 80.2..
Dàala niī nɛ cúungu.
2Yewe wire wī kpuɔwɔ wè, Siyɔn kàʔa nī gè.
Wiī naamɛ wómiwomi nɛ̀ tóri kùlogolo siɛnnɛ pe mìɛni nɛ̄.
3Ki 'yɛli peri muɔ kpóri,
muɔ ŋáà ma 'kpúʔɔ á muɔ míʔɛ ki ní fíɛrɛwuʔu gè !
ʔaan, Yewe wiī tiɛlɛ fùn !
4Kùlofɔli wiī ŋɔri ní;
ki 'wi dɛ́ni kàyuʔujuumɔ pi de kpínʔini nɛ́ sínmɛ ní.
ʔaan, Yewe muɔ ma 'kányiʔɛ kele sɔ́migɔ gèle nɛ̀ tɛ́ngɛ,
muɔ ma 'ki kpíʔile Yakuba siimɛ pi‑ kàyuʔu nyu gè
nɛ síngi nɛ kasingele kpínʔini.
5Yeri Yewe weli Kulocɛliɛ kpóri wè,
yé tuu ye cúbulo wi tɔliyɔ taʔadiʔɛ ki yiʔɛ mɛ́ gè !
ʔaan, Yewe wiī tiɛlɛ fùn !
6 Misa nɛ́ Arawɔn pe yé puu wi kacuɔnrilɔ pálì#99.6 Náʔa gè pe Misa yeri wè kacuɔnriwɔ nɛ́ ki cɛ́n wire mɛ́ Yewe 'puu nɛ tóri nɛ̀ nyakungɛngɛ kpíʔile gè (wéli baa Yir 24), wire míɛni wi yé Arawɔn wàli wè nɛ̀ tɛ́ngɛ (wéli baa Lev 8). Wire wi 'puu kàsuluwo wè Yewe nɛ́ wi siɛnnɛ sunʔɔmɔ nī bè (wéli baa Yir 17; 32).,
Samiyɛli wire yé puu nɛ́ bìli ní pe wi náari wè.
Pe 'puu nɛ Yewe náari; Yewe nɛ̂ pe náarigɛ cò gè#99.6 Siɛnnɛ bálì taanri bèle pe 'pe sɔ́migɔ nɛ̀ cɛ́n; pe yé puu nɛ náari lèbaanna ní (wéli baa Yir 17.11-13; 32.11-14,30-34; Tɔ́r 12.13; 16.4-7; Sam1 7.8-9; 12.16-23; Ŋún 106.23; Zer 15.1.).
7Wi 'puu kàsadibagɛ nī gàa ki 'tɔni nɛ̀ cùungu gè, a wi 'juu nɛ́ pe ní#99.7 Wéli baa Yir 13.21-22; 33.7; Tɔ́r 12.5-6.;
pe 'puu nɛ lúru wi nyakungɛngɛ siɛnrɛ mɛ́ dè
nɛ́ wi fànʔa kaala ní lè nàa wi yé tìɛ pe nɛ̄ lè.
8Yewe weli Kulocɛliɛ, muɔ wī ma nyɛ́nì lúʔu pe mɛ́.
Muɔ yé puu pe mɛ́ Kulocɛliɛ ŋáà wi ki yɛri gè,
nɛ̀ ki yaʔa muɔ cé puu nɛ pe kapiʔile fuʔɔ tɔ́ngi gè#99.8 Wéli baa Tɔ́r 20.12,24; 27.14; Fàn 3.25-27. pe nɛ̄.
9Yeri Yewe weli Kulocɛliɛ kpóri wè,
yé tuu ye cúbulo wi nyagurugo wàlidɛngɛgɛ yiʔɛ mɛ́ gè.
Nɛ́ ki cɛ́n Yewe weli Kulocɛliɛ wiī tiɛlɛ fùn !
Currently Selected:
Ŋúnuyɔ 99: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
