Ŋúnuyɔ 94
94
Yewe bé kàyuʔu juu siɛnpiile nɛ̄ bèle
1 Yewe yo, Kulocɛliɛ ŋáà wiī nɛ fuʔɔ tɔ́ngi gè,
ma mìɛ tìɛ muɔ kpìɛnmɛ nī bè, Kulocɛliɛ,
muɔ ŋáà ma muɔ fuʔɔ tɔ́ngi gè.
2Cíʔ ! Duniya kàyuʔujuufɔli, ma yɛ̀ yo !
Mari báan ma pa fungbuʔɔfɔlilɔ pe sàri kɛn wè pe mɛ́ !
3Yewe yo, fúɔ lɛ̀lɛ jori nī
siɛnpiile bálì pe béri pìye kpóri nɛ́ pe funbinʔɛ ní gè ?
Fúɔ lɛ̀lɛ jori ?
4Nìɛnyiɛnigɛfɔlilɔ bálì piyē nɛ nyawaala siɛnrɛ nyu dè,
kire kapiigbiʔilile bálì pe mìɛni bèle, piyē nɛ pìye nyíɛnɛ.
5Yewe yo, piyē nɛ muɔ siɛnnɛ muʔɔrɔ bèle níɛ pe wuʔɔ,
bàli bīɛlɛ muɔ kɔrigɔ gè.
6Pe nɛ̂ lakicɛlilɛ kpúu bèle nɛ́ nabɔnminɔ ní bèle,
pe nɛ̂ círile pe sìi kúɔ wè pe mɛ́.
7Pe nɛ̂ ki juu nîɛ jo: Yewe wi wè ki nyaʔaʔ,
Yakuba Kulocɛliɛ wè, wi cɛ wè nɛ ki ciʔige nɛ wéli púloʔ !
8Bɛ̀ sí ki yē gè, yeri yìye ciʔige díɛ, yeli bálì bīɛlɛ lelabiliyɛ yè.
Nɛ́ yeli bálì bīɛlɛ ledoyo yè, gáa cɛngɛ yeli bága cìlige ?
9Ŋàa wi 'ngbóli faan lè o, wiǐ gari lúruʔ í ?
Ŋàa míɛni wi 'nyapile kpíʔile lè o, wiǐ gari nyaʔaʔ í ?
10Ŋàa wi kùlogolo nári gèle, wiǐ ga jáa bè kùlogolo wuʔɔ gèle léʔ,
wire ŋáà wi siɛnnɛ tɛnmɛ bèle sícilimɛ nɛ̄ bè ?
11Yewe nyɛ́nì lewiiwe wi sɔ̀ngirɔ cɛ́n dè;
tiī káfaligɛ yákuɔ wī#94.11 Ki siɛnrɛ ti 'juu baa Kor1 3.20..
12Yewe yo, wi wuʔu kiī tànʔa, siɛn ŋáà muɔ nɛ̂ nàʔa wè
nîɛ wi tɛnmɛ muɔ Fànʔa Siɛnrɛ nɛ̄ dè
13kire ga buu wi‑ kò yanyige nɛ̄ kapiʔi cɛngɛ nī gè,
fúɔ bè taa kàwiʔi káà ba túgu kire ga buu siɛnpiile pe- tuu ki nī.
14Nɛ́ ki cɛ́n Yewe wi wè nɛ wi siɛnnɛ yɛri bèleʔ;
wi wè nɛ kàduʔu wáari wi kɔrigɔ mɛ́ gèʔ !
15Nɛ́ ki cɛ́n kàyuʔu ki bága juu nɛ́ sínmɛ ní;
bàli funyɔ yi 'sín yè, pe mìɛni bé yéri ki nɛ̄.
16Ŋáa wi bé yɛ̀ pe kúrugu mi mɛ́, bàli pe kapiʔi kpínʔini gè ?
Ŋáa wi bé mi sáʔa kapiigbiʔilile bálì nɛ̄ bèle ?
17A Yewe sì cé mi sáʔa wèʔ,
ki yé kò cɛ̀ri dí mi sí jíin kusiʔi ki pìirimɛ nī bè.
18Lɛ̀lɛ líì nī mi 'ki juu nɛ́ jo:
«Mi tɔliyɔ yiī nɛ caa bè yiri mi láara wè,»
a Yewe 'mi sáʔa wi bànguɔ dɛ́nigɛ kire kɛnmɛ nɛ̄.
19Bà sɔ̀nginiʔɛrɛ ti yé mi fungo nyì gè cómi wè,
a wi 'mi fìɛlɛ, a mi 'fundaanra taa.
20Fànʔafɔlilɔ bálì pe kapiʔi kpínʔini gè o,
muɔ bé gbɛ̀ wúɔ nɛ́ pe ní lé,
bàli pe wuʔɔgɔ cáanri siɛnnɛ nɛ̄ bèle
bè Kulocɛliɛ fànʔa kele pari gèle ?
21Pe nɛ̂ wúɔ siɛnsinminɛ nɛ̄ bèle,
nîɛ kàyuʔu juu kanaasingbiʔiliwe nɛ̄ wè nɛ̀ wi kpúu.
22Nɛ̀ ki yaʔa Yewe yē mi líʔirejodiʔɛ,
ʔaan, mi Kulocɛliɛ wiī mi kàdɛnigbaala náà nī mi làridiʔɛ gè.
23Wi bé pe kapiʔile yaʔa gèle ke‑ tuu pe nɛ̄,
bé ní koli bè pe muʔɔrɔ pe kapiʔi kɛnmɛ nɛ̄ bè,
Yewe weli Kulocɛliɛ wi bé pe muʔɔrɔ péwu.
Currently Selected:
Ŋúnuyɔ 94: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
