Ŋúnuyɔ 92
92
Kiī pɔ́rigɔ bèri Yewe gbùʔɔrɔ́ wè
1Ŋúnudanʔa gáà pe ŋú nɛ́ yakpuɔnrɔ ní dè. Cɛndɛnigɛ cɛngɛ ŋúnugo gī.
2Kiī pɔ́rigɔ bèri muɔ gbùʔɔrɔ́ Yewe,
béri yakpuɔnrɔ kpúɔn dè bèri muɔ míʔɛ tòbiló gè,
muɔ ŋáà wī Duniya wi Mìɛni Nyùgo nɛ̄ gè,
3ʔaan, béri muɔ bànguɔ dɛ́nigɛ jáari gè sínbinimɛ táanni bè,
nɛ́ muɔ kányiʔɛ kaala ní lè, pìlige nī gè,
4nɛ́ màʔagɛlɛ kiɛ gɔri ní wè nɛ́ gɔripile ní lè,
nɛ́ fàri màʔagɛlɛ kiɛ bɔ̀licɛrigɛ nɛ̄ gè.
5ʔé, Yewe yo, gàa muɔ 'kpíʔile gè, ki 'mi fungo nyì gè fundaanra nɛ̄ dè;
mi nɛ fundaanra yékpoli wáari lè muɔ kiyɛ kakpiʔiligele nɛ̄ gèle.
6Yewe yo, muɔ kakpiʔiligele kiyē kpoligolo,
a muɔ sɔ̀ngirɔ ti 'kpúʔɔ nɛ̀ tóri bè ti cɛ́n.
7Ledogo kiì gbɛ̀ ti cɛ́nʔ;
sícilibile wè lelabiligɛ mɛ́ gèʔ bè ti còʔ.
8A ki cɛ́nì nyaa siɛncuʔɔlɔ piyē nɛ niʔɛgi bɛ̀ nyàpiʔi tíɛlɛ gè,
a kapiigbiʔilile pe mìɛni nɛ yúʔɔri bèle, kire yē pe ba cúʔɔ péwu wī.
9Nɛ̀ ki yaʔa muɔ Yewe wè,
muɔ kàfɔlimɔ piī baa súuri !
10ʔé Yewe, ki n'gɛ muɔ leguulo bèle !
Ki n'gɛ, muɔ leguulo bèle piyē nɛ tungu nɛ kúu !
Muɔ 'kapiigbiʔilile pe mìɛni cɛrigɛ.
11Nɛ̀ ki yaʔa muɔ 'ŋɔri kɛn m'mɛ́ bɛ̀ nyàʔanɛpiɛlɛ tíɛlɛ.
Muɔ 'nùdaanna sùnmɔ wo mi nɛ̄#92.11 Ki yé buu siɛnnɛ bálì mɛ́ bèle kaliɛlɛ, a pe 'muɔ yeri baa lìile tiʔɛ nī gè, pe nɛ̂ sùnmɔ wo muɔ nyùgo nɛ̄ gè bè muɔ kpúʔɔ (wéli baa 23.5; Luk 7.46)..
12Mi nyɛ́nì mi palilɛfɔlilɔ pe tuugɛnmɛ nyaa bè;
bàli pe 'yɛ̀ mi kúrugu bè tún nɛ́ mi ní wè,
mi ngbúʔulo kiyē nɛ pe kòkuuwaara lúru dè.
13Nɛ̀ ki yaʔa siɛnsinminɛ piyē nɛ yúʔɔri bɛ̀ siʔɛdiiye tíɛlɛ,
piyē nɛ yɛ̀gí bɛ̀ sɛdiri tiikpaʔaliyɛ tíɛlɛ nyàa yī Liban kùlo nī lè#92.13 Tiiye kɛnmɛ báà pi nyu náʔa gè, kire yē bè ki tìɛ siɛnsinminɛ kele ke béri nyuʔɔ súuri, níɛ ki tìí siɛnpiile peli bèle pe bé nyuɔ nɛ̀ ki yaʔa kiǐ je mɔgɔʔ (wéli baa Kàs 11.28). Siʔɛdiiye yiī nɛ jàʔá nɛ waama sórigi bè, sɛdiri tiikpaʔaliyɛ yire nɛ nyaguruyo wiire sórigi dè baa Liban kùlo nī lè..
14Piyē bɛ̀ tiiye tíɛlɛ nyàa yiī cɔ́riyɔ Yewe kpáa nī gè,
yiī nɛ sɛngi weli Kulocɛliɛ dàliyɛ nɛ̄ yè.
15Yi béri sɛngi súuri yi liɛrɛ lɛ̀lɛ ní lè,
tùnmɔ bè kò yi nī, wɛbiride bé puu yi nɛ̄ súuri.
16Kire nɛ̄ pe béri ki jáari bè ki tìɛ Yewe nyɛ́nì sín.
Wiī mi kàdɛnigbaala, kolimɔ wè wi nɛ̄ʔ !
Currently Selected:
Ŋúnuyɔ 92: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
