Ŋúnuyɔ 9
9
Yewe wiī kàyuʔujuuwo
1Ŋúnuŋuminɔ yiɛginiwɛ wuʔu gī, gàa pe 'ŋú jaafɔli kùugo nɛ̄ gè. Dawuda ŋúnudanʔa gī gàa pe ŋú nɛ́ yakpuɔnrɔ ní dè#9.1 Ki bé gbɛ̀ nyaa faʔa gè, Ŋúnuyɔ 9 nɛ́ 10 ní wè, yi yé puu ŋúnugo nigbe, bɛ̀ kiī nɛ nyaʔa girɛki siɛnliɛrɛ nī dè. Yi mìɛni siin pínɛ nɛ̀ ŋúnugo nigbe ŋú, siɛnkanʔana gboli ó gboli nɛ séligi nɛ́ sɛbɛkaanna láà ní; sɛbɛkanʔana ó sɛbɛkanʔana ke taanni kìye táanni nɛ̀ yɛli nɛ́ Eburulo alifabe ní wè. Ŋúnuyɔ yáà míɛni nyɛ́nì sɛbɛ bɛ̀ nyàa tíɛlɛ yè: 25, 34, 111, 112, 119, 145..
2ʔé Yewe yo, je m'béri muɔ síɛri nɛ́ mi fungo ki mìɛni ní,
m'béri muɔ kakpoliyo yi mìɛni nyu.
3M'béri fundaanra kpínʔini muɔ kɛnmɛ nɛ̄ bè,
m'béri muɔ míʔɛ ŋú gè,
muɔ ŋáà wī Duniya wi Mìɛni Nyùgo nɛ̄ gè.
4A mi leguulo pe kɛ́nì koli kàduʔu mɛ́ gè
nɛ́ kúrugo nɛ̀ láʔa nɛ̀ tuu muɔ yiʔɛ mɛ́ gè, siɛn sǐ ní pe nyaaʔ.
5Nɛ́ ki cɛ́n muɔ nyɛ́nì kàyuʔu juu gè nɛ̀ tànʔa kɛn m'mɛ́.
Muɔ nyɛ́nì tɛ́ni muɔ kùlofɔlilɔ kácunʔɔ nɛ̄ gè
nɛ kàyuʔu nyu gè nɛ́ sínmɛ ní.
6Muɔ 'fuu nɛ̀ kpɛ̀ni kùlogolo nɛ̄ gèle,
nɛ̀ siɛnpiile kpúu bèle péwu, muɔ 'pe míʔɛ tɔ́n gè súuri.
7Leguulo pe woli ni 'cúʔɔ nɛ̀ kúɔ wī péwu;
muɔ nyɛ́nì kàaya yɛ̀gɛ yè yi tɛ́nidiɛyɛ nī yè,
siɛn sǐ ní sɔ̀ngi daa nɛ́ yi ní cíginiʔ.
8Nɛ̀ ki yaʔa Yewe wire yē tɛ́niwɛ súuri wi kùlofɔlilɔ kácunʔɔ nɛ̄ gè;
wi 'ki tɛ́ngɛ nɛ̀ ki yérige bèri siɛnnɛ kàyuʔu nyu gè.
9Wire wiī nɛ duniya siɛnnɛ kàyuʔu nyu gè nɛ síngi,
níɛ kùlogolo siɛnfeliye nári nɛ́ sínmɛ ní.
10Yewe wire wī wuʔɔgɔfɔlilɔ líʔirejodiʔɛ gè,
wi líʔirejodiʔɛ gè fùrɔgɔ lɛ̀lɛ nī lè.
11Bàli pe 'muɔ míʔɛ cɛ́n gè, pe nɛ̂ pe sɔ̀ngirɔ taʔa dè muɔ nɛ̄,
nɛ́ ki cɛ́n muɔ Yewe wè,
bàli pe 'muɔ caa wè, muɔ̌ ga tíi fɛ̀ bè pe wáaʔ.
12Yeri ŋú yeri Yewe gbùʔɔrɔ́ wè,
wire ŋáà wī tɛ́niwɛ fànʔa nɛ̄ gè Siyɔn kàʔa nī gè;
yeri wi kakpiʔiligele nyu gèle kùlogolo kálì siɛnnɛ mɛ́ bèle.
13Nɛ́ ki cɛ́n wi wè nɛ cìʔí wuʔɔgɔfɔlilɔ pe kɔnwaara nɛ̄ dèʔ.
Wire wi nɛ̂ taʔa siɛnkpuuwo nɛ̄ wè bè wi kapiile fuʔɔ tɔ́n gè wi mɛ́,
nɛ́ ki cɛ́n wiī nɛ sɔ̀ngí nɛ taʔa nɛ́ bìli ní wi 'kpúu bèle.
14Yewe yo, ‑nyinimɛ taa mi nɛ̄,
‑ki wéli bɛ̀ pe 'wuʔɔgɔ taʔa gè mi nɛ̄ wè, bàli mi 'biɛn bèle,
muɔ ŋáà ma bé gbɛ̀ mi suɔ bè láʔa kùu wìile nɛ̄ lè !
15‑Mi suɔ, kire ga buu mi de muɔ gbùʔɔrɔ́
Siyɔn kàʔa wìile nyuɔ nɛ̄ gè, Siyɔn siɛnnɛ yiʔɛ mɛ́ gè.
16Kùlogolo siɛnfeliye yiī nɛ tun kàwiʔi nī gè gàa pe 'túgu gè,
pe tɔliyɔ yi nɛ̂ cò jùɔ nī wè ŋàa pe 'cáan wè#9.16 Wéli baa 7.16-17..
17Yewe nyɛ́nì wìi tìɛ; wi 'kàyuʔu juu gè.
Yewe 'ki kɔ̀rirɔ a siɛnpiiwe wi 'wìi cò
wi tíimɛ kakpiʔiligele nɛ̄ gèle. Yakpuɔnrɔ tùnmɔ#9.17 Yakpuɔnrɔ tùnmɔ: Kiì fílige nɛ̀ cɛ́nʔ. Eburu siɛnrɛ nī dè, ki kɔri wi bé gbɛ̀ puu yakpuɔnrɔ tùnmɔ, kire ga laa ŋɔ́daatiɛlɛ náà ni tɔni cɛ̀ri, á kire bɛ̀ʔ bèri ŋú nyuɔ laamɛ nī. Gìi ki 'fílige nɛ̀ cɛ́n gè, ki bé gbɛ̀ nyaa yéridiʔɛ káà gī gàa ki 'kpúʔɔ «yéri cɛ̀» nɛ̄ wè.. Ye‑ ŋɔ́ cɛ̀.
18Siɛnpiile pe mìɛni bèle,
nɛ́ kùlogolo kálì siɛnnɛ pe mìɛni ní bèle,
bàli pe cî fìʔɛ nɛ́ Kulocɛliɛ ní wè,
peli pe nɛ̂ koli nɛ waa kusiʔi mɛ́ gè.
19Nɛ́ ki cɛ́n Kulocɛliɛ wi nɛ̌ ga fìʔɛ nɛ́ fùrɔgɔfɔlilɔ ní bèleʔ;
wuʔɔgɔfɔlilɔ bálì pe 'pe sɔ̀ngirɔ taʔa dè wi nɛ̄ wè,
pe sɔ̀ngirɔ taʔadiʔɛ kiǐ ga cúʔɔʔ.
20Yewe yo, yɛ̀! Fǎga ki yaʔa siɛnnɛ pe fànʔa taaʔ !
Ma kùlogolo kálì siɛnnɛ kàyuʔu juu gè muɔ yiʔɛ mɛ́ gè !
21Yewe, ‑fíɛgbuɔrɔ wáa pe nɛ̄,
kire ga buu kùlogolo kálì siɛnnɛ
pe‑ ki cɛ́n peli yē siɛnnɛ yákuɔ wī. Ye‑ ŋɔ́ cɛ̀.
Currently Selected:
Ŋúnuyɔ 9: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
