Ŋúnuyɔ 76
76
Kulocɛliɛ wi 'wi leguulo jáa bèle
1Ŋúnuŋuminɔ yiɛginiwɛ ŋúnugo gī. Asafi ŋúnudanʔa gī gàa pe ŋú nɛ́ yakpuɔnrɔ ní dè, gɔrilɔ bèle#76.1 Wéli baa 50.1 kaliwɛgɛ ki táanmɛ gè..
2Kulocɛliɛ wiī cɛ́nwɛ Zuda kùlo nī lè;
wi míʔɛ ki 'kpúʔɔ Isirayɛli kùlo nī lè.
3Wi fobile niī Salɛmi kàʔa nī gè,
á wi kòridiʔɛ ní gè Siyɔn kàʔa nī gè#76.3 Salɛmi kàʔa kiī Zerizalɛmi kàʔa míɛliʔɛ gè (wéli baa Sél 14.18). Ki kɔri wire wī «yanyige,» kire kɛnmɛ nɛ̄ ki míʔɛ ki yē ŋúnuyɔ tiʔɛ gáà nī gè bɛ̀ kiī nɛ nyu kapiɛnnɛ wuʔu nɛ̄ gè. Siyɔn kàʔa míɛni kiī Zerizalɛmi kàʔa míʔɛ káà..
4Kire tiʔɛ nī wi 'wi leguulo pe kàsun ŋaaya kabari yè,
nɛ́ pe timɔzigeye ní yè, nɛ́ kapiɛngbuɔn ŋɔsiile ní bèle,
nɛ́ kapiɛngbuɔn yasɛnrɛ ní dè. Ye‑ ŋɔ́ cɛ̀.
5Kulocɛliɛ, muɔ yē nɛ nyíʔɛnɛ nɛ́ ní kpìɛnmɛ;
muɔ kpuɔmɔ pi 'tóri nyaguruyo nɛ̄ yè nyàa yī faʔa faʔa wè#76.5 Siɛnnɛ pálì nɛ̂ tiʔɛ gáà siɛnrɛ yiʔɛ dè nɛ̀ yɛli nɛ́ girɛki siɛnliɛrɛ ní dè nɛ́ jo: muɔ kpuɔmɔ pi 'tóri nyaguruyo nɛ̄ yè nyàa nɛ̄ nyàʔayɛrɛ ti yē dè..
6Kapiɛngbuɔn sànbalilɛ bèle, pe yé pe fùʔuro;
peli 'pe ŋɔ́nizɛnmɛ ŋɔ́ni bè.
Kire nàgaliriye nyáà yi mìɛni,
yiì gbɛ̀nɛ jáa nɛ́ yi kiyɛ yɛ̀gɛ yèʔ.
7 Yakuba Kulocɛliɛ yo,
bà pe kɛ́nì muɔ kapiɛngbuɔn yékpoli lúʔu lè,
suɔnfɛbilɛ bèle nɛ́ suɔnyɔ ní yè, a yi 'tuu nɛ̀ círige.
8Cíʔ ! Muɔ wè, muɔ yē fíɛrɛ wuu díɛ !
Ŋáa wi bé gbɛ̀ yéri muɔ yiʔɛ mɛ́ a muɔ fungo ki 'yɛ̀ kpuʔɔ gè ?
9Bè muɔ yaʔa baa nyìʔɛnɛ nī lè, a muɔ 'ki juu nɛ̀ ceri gàa ki bé puu siɛnpiile wuʔɔgɔ gè;
duniya wi 'puu nɛ fìʔɛ́ muɔ nɛ̄, a wi 'pìiri yéwu,
10bà Kulocɛliɛ kɛ́nì yɛ̀ wè nɛ̀ kàyuʔu juu gè nɛ̀ ceri gè,
bè fuunmɔfɔlilɔ pe mìɛni suɔ bèle dàala nɛ̄ lè. Ye‑ ŋɔ́ cɛ̀.
11Siɛnnɛ pe béri muɔ gbùʔɔrɔ́
muɔ fundanʔanigɛ kàyuʔujuuro tire kɛnmɛ nɛ̄ siɛnnɛ nɛ̄ bèle,
a muɔ 'fundanʔanigɛ kapiɛnnɛ bururo le dè#76.11 Eburu siɛnrɛ nī dè, kiì fílige nɛ̀ cɛ́nʔ..
12Yeri nyakungɛnrɛ kpínʔini Yewe yeli Kulocɛliɛ mɛ́ wè, ye sí de ki siɛnrɛ forigi dè.
Yeli bálì ye 'wi màʔa nɛ̀ suʔu wè, yeri báan nɛ́ kpuʔɔrɔ ní
bògaara Kulocɛliɛ mɛ́ wè, wire ŋáà nɛ̄ we 'yɛli bèri fìʔɛ́ wè.
13Wire wiī nɛ fànʔafɔlilɔ fungboliyo tìrigí yè,
wiī nɛ fíɛgbuɔrɔ wáari duniya kùlofɔlilɔ nɛ̄ bèle.
Currently Selected:
Ŋúnuyɔ 76: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
