Ŋúnuyɔ 62
62
Mi nìɛ yaʔa Kulocɛliɛ kiyɛ nī yè
1Ŋúnuŋuminɔ yiɛginiwɛ Yedutun wuʔu gī#62.1 Wéli baa 39.1 kaliwɛgɛ ki táanmɛ gè.. Dawuda ŋúnudanʔa gī gàa pe ŋú nɛ́ yakpuɔnrɔ ní dè.
2Mi fungo yo, ma mìɛ yaʔa Kulocɛliɛ nigbe kiyɛ nī yanyige nɛ̄;
wire mɛ́ mi suɔlɔ ni kɔ́ngi.
3Kányiʔɛ nɛ̄, wiī mi kàdɛnigbaala, nɛ́ ní mi suɔfɔli,
nɛ́ mi líʔirejodiʔɛ; miǐ gbɛ̀ cúungoʔ bè tuuʔ.
4Lɛ̀lɛ jori nī yeli bé ní tuu siɛn nɛ̄ wè bè wi ŋɔrigɔ wè,
bèri caa bè wi kpúu,
wire ŋáà wī gunjɛliyaʔagɛ tíɛlɛ gè,
majo kàkɛngɛ gī gàa ki tun fáari gè ?
5Kányiʔɛ nɛ̄, wi leguulo piyē nɛ ki caa bè siɛnkpuɔwɔ tìrige wè
wi kpuɔmɔ nɛ̄ bè; káfinɛrɛ ti 'pe dɛ́ni.
Pe nyuɔyɔ nī yè, piyē nɛ diba siɛnrɛ nyu dè nɛ tari siɛnnɛ nɛ̄ bèle,
nɛ̀ ki yaʔa pe funyɔ nī yè, piyē nɛ dɛ́ngɛ siɛnrɛ nyu dè
nɛ tari pe nɛ̄. Ye‑ ŋɔ́ cɛ̀.
6Mi fungo yo, ma mìɛ yaʔa Kulocɛliɛ nigbe kiyɛ nī yè yanyige nɛ̄,
nɛ́ ki cɛ́n wire nɛ̄ mi 'mi sɔ̀ngirɔ taʔa dè.
7Kányiʔɛ nɛ̄, wiī mi kàdɛnigbaala, nɛ́ ní mi suɔfɔli,
nɛ́ mi líʔirejodiʔɛ; miǐ gbɛ̀ cúungo bè tuuʔ.
8Mi suɔlɔ nɛ́ mi kpuɔmɔ piī Kulocɛliɛ nī;
Kulocɛliɛ wiī mi kàdɛnigbaala náà nī lìrile lè, nɛ́ mi làridiʔɛ gè.
9Yeli siɛnnɛ bèle o, ye‑ yeli sɔ̀ngirɔ taʔa dè wi nɛ̄ lɛ̀lɛ ó lɛ̀lɛ nī.
Ye‑ yeli funyɔ fùʔuro yè wi nyaamɛ nɛ̄. Kulocɛliɛ wiī làridiʔɛ weli mɛ́. Ye‑ ŋɔ́ cɛ̀.
10Lewiile bèle, peli yē ŋɔ́nɔ yákuɔ nàa ni 'tóri lè;
siɛnnɛ bèle, peli yē wíra#62.10 Siɛnnɛ pálì nɛ̂ tiʔɛ gáà siɛnrɛ yiʔɛ dè nɛ̀ jo: káfinɛgɛ.wī.
A pe 'pe taʔa culo nɛ̄ wè,
pe mìɛni bé nyaa sífaʔala siɛnnɛ ŋɔ́gari tíɛlɛ dè.
11Ye fǎga yeli sɔ̀ngirɔ taʔa dè yɛrɛ nɛ̄ dè
dàa yeli nɛ nùʔɔrɔ́ nɛ suu dèʔ !
Ye fǎga sɔ̀ngirɔ taʔa dè míɛni kàyuugo nɛ̄ gèʔ !
A yeli lɔri ti 'niʔɛ dè, ye fǎga de tɔ́ri nɛ́ ti níʔ#62.11 Wéli baa Kàs 1.10-19. !
12Kulocɛliɛ 'ki juu tɔligɔ nigbe, tɔliyɔ siin wi 'ki juu a mi 'ki lúʔu,
dí ŋɔri tiī Kulocɛliɛ wori.
13Bɛ̀ sí ki yē, muɔ ŋáà wī mi Kàfɔli wè, bànguɔ dɛ́nigɛ kiī muɔ wuʔu,
nɛ́ ki cɛ́n muɔ nɛ siɛn ó siɛn sàrí
nɛ yɛligi nɛ́ wi kakpiʔiligele ní gèle#62.13 Wéli baa Zɔbi 34.11..
Currently Selected:
Ŋúnuyɔ 62: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
