Ŋúnuyɔ 60
60
Kire nɛ́ ki mìɛni, Kulocɛliɛ bé kapiɛnnɛ kpúɔn lè weli mɛ́
1Ŋúnuŋuminɔ yiɛginiwɛ wuʔu gī. Pe 'ki ŋú nɛ́ yékpoli ní nàa ni 'jo: «Nyakungɛngɛ siɛnrɛ ti luʔɔ kácunʔɔ#60.1 Nyakungɛngɛ siɛnrɛ ti luʔɔ kácunʔɔ: Eburu siɛnrɛ nī dè, tiī nɛ jo: «susani eduti.» Ti bé gbɛ̀ nyaa yakpuɔnrɔ kpúɔngɛnmɛ bī, kire ga laa ŋúnugo ŋúgɛnmɛ..» Dawuda ŋúnuzɛbɛgɛ#60.1 Ki kɔri wiì fílige nɛ̀ cɛ́nʔ. Wéli baa 16.1 kaliwɛgɛ ki táanmɛ gè. gī, bè tɛnmɛnɛ kɛn. 2Lɛ̀lɛ líì nī Dawuda 'kapiɛnnɛ kpúɔn lè nɛ́ Aramiyé ní bèle, Mɛsopotamii kùlo wuulo bèle, nɛ́ Soba tɛ́nimɛ wuulo ní bèle, bà Zowabi yé koli nɛ̀ pɛn nɛ̀ pɛ́nì kapiɛnnɛ kpúɔn lè nɛ́ Edɔmi kùlo kapiɛngbuɔnnɔ siramuʔɔyɔ taanri (12 000) ní yè, nɛ̀ pe jáa, baa Yasuʔɔgɔ jùlɔgɔ tiʔɛ nī gè#60.2 Wéli baa Sam2 8.13,14; Kaj1 18.12. Mɛsopotamii kùlo lè nɛ́ Soba tɛ́nimɛ bè, ki tiɛyɛ siin nyáà yi yé líili Isirayɛli kùlo nɛ̄ lè, cɛngɛnyɛnifolimɛ kàmɛgɛ kɔli mɛ́ gè. Yasuʔɔgɔ jùlɔgɔ tiʔɛ gè, ki yé puu Isirayɛli kùlo láʔala táanni lè cɛngɛnyɛnifolimɛ kàliige kɔli mɛ́ gè, nɛ́ míɛni ki yé puu Yasuʔɔniʔɛgɛ kuʔɔjii lìʔɛlɛ nī lè, cɛngɛnyɛnifolimɛ kàliige kɔli mɛ́ gè..
3Kulocɛliɛ yo, muɔ nyɛ́nì weli wáa,
nɛ́ weli kapiɛngbuɔnnɔ gboli jaa lè !
Muɔ fungo ki 'yɛ̀ weli kúrugu; koli ma weli pínɛ !
4Muɔ nyɛ́nì dàala cúungo lè nɛ̀ ni cɛnminɛ;
‑ni nɔmiyɔ puʔɔ yè, nɛ́ ki cɛ́n niī nɛ cúungu.
5Muɔ nyɛ́nì ki yaʔa a muɔ siɛnnɛ pe 'kagbɛnyɛ nyaa yè,
majo bɛ̀ muɔ cî diviɛn sungbɛnmɛ kɛn bè weli mɛ́
a weli 'gbuɔ nɛ̀ tín nɛ fíigi wè.
6Bàli pe fìʔɛ́ muɔ nɛ̄ wè, a muɔ 'káfali kɛn pe mɛ́ fìɛ pe‑ fɛ̀#60.6 Eburu siɛnrɛ nī dè náʔa gè, ti kɔri wiì fílige nɛ̀ cɛ́nʔ. Siɛnnɛ pálì nɛ̂ tiʔɛ gáà siɛnrɛ yiʔɛ dè nɛ̀ jo: káfali ŋáà wiī nɛ kányiʔɛ tìí gè.,
kire ga buu leguu wi sandali ŋaʔa ki fǎga nɔ̀ pe nɛ̄ʔ. Ye‑ ŋɔ́ cɛ̀.
7Te báan ma pa weli píle ma suɔ nɛ́ muɔ kàliige kɔli ní gè,
kire ga buu bàli pe 'muɔ dɛ́ni bèle peli‑ muɔ suɔlɔ nyaa lè.
Ma lúʔu weli mɛ́#60.7 Koliyo 7-14 tiʔɛ nī gè, wéli baa 108.7-14. !
8Kulocɛliɛ wi 'juu, baa wi saawalidɛngɛgɛ nī gè, nɛ́ jo:
«M'bé fànʔa taa bè Sikɛmi kàʔa#60.8 Wéli baa Sél 12.6; 33.18; Yes 17.7; 24.1,25-27. tɛ́nimɛ líɛ bè, bè pi liɛlɛ,
bé Sukɔti jùlɔgɔ#60.8 Wéli baa Sél 33.17; Yes 13.26,27. simɛ gè, bè ki liɛlɛ#60.8 Sikɛmi kàʔa tɛ́nimɛ pi 'puu fìɛ nɛ Isirayɛli kùlo tìí lè, Zurudɛn cáʔa kúrugu gè cɛngɛnyɛnijiinmɛ mɛ́ bè. Sukɔti jùlɔgɔ tiʔɛ ki 'puu míɛni fìɛ nɛ tɛ́nimɛ tìí bè, bàa pi 'puu Zurudɛn cáʔa kúrugu gè, cɛngɛnyɛnifolimɛ mɛ́ bè..
9Galaadi tɛ́nimɛ pire yē mi wobo,
Manase tɛ́nimɛ pire yē mi wobo#60.9 Galaadi tɛ́nimɛ bè nɛ́ Manase saʔa tùlugo tílaga ní gè, peli kàaya tɛ́nimɛ pi yé puu Zurudɛn cáʔa kúrugu gè, cɛngɛnyɛnifoligɔli mɛ́ gè.,
Ɛfirayimi tɛ́nimɛ pire yē mi kapiɛngbuɔn ndɔ̀ngɔ#60.9 Ɛfirayimi saʔa tùlugo tɛ́nimɛ pire yé puu Zurudɛn cáʔa kúrugu gè, cɛngɛnyɛnijiinmɛ mɛ́ bè. Ndɔ̀ngɔ kɔri wè, kire 'puu nɛ ki tìí kire saʔa tùlugo ki 'puu kùlo ni kapiɛngbuɔn sànbali.,
Zuda tɛ́nimɛ pire yē mi fànʔa kàgbiile#60.9 Zuda saʔa tùlugo gè, kire 'puu tɛ́nigɛ míɛni Zurudɛn cáʔa kúrugu gè, cɛngɛnyɛnijiinmɛ mɛ́ bè. Dawuda wire yé kɔ́n kire saʔa tùlugo nī gè, nɛ́ kùlofɔlilɔ tùlugo ní gè gàa ki 'yiri Dawuda nī wè. Kire Kulocɛliɛ 'puu nɛ tìí bà wi 'juu fànʔa kàgbiile wuʔu nɛ̄ gè..
10 Mowabi kùlo lire yē m'mɛ́ tasaa ŋáà nī mi nɛ gbínni wè#60.10 Wéli baa Sam2 8.2.,
Edɔmi kùlo tɛ́nimɛ pire yē mi wobo báà nī mi nɛ mi tɔriyɔ wáari yè#60.10 mi tɔriyɔ wáari yè: Kire yé buu pe kaliɛlɛ láà nàa ni ki tìí gè kire tiʔɛ dàala ni yē muɔ woli lè..
M'bé sí fànʔa taa bè kòkuulo wáa lè Filisiti kùlo nɛ̄ lè#60.10 Wéli baa Sam2 8.1..»
11Ŋáa wi bé mi kɔ́ri nyɔ́gɔ gunliriye kàʔa nī gè ?
Ŋáa wi bé mi kɔ́ri nyɔ́gɔ Edɔmi kùlo nī lè#60.11 Wéli baa Sam2 8.13,14. ?
12Muɔ bɛ̀ʔ lé, Kulocɛliɛ ? Nɛ̀ sí ki taa muɔ sì weli wáaʔ lé ?
Muɔ ní wè nɛ weli kapiɛngbuɔnnɔ yiʔɛ kínigi gèʔ.
13Te báan ma pa weli sáʔa weli parifɔlilɔ nɛ̄ bèle !
Nɛ́ ki cɛ́n sáʔala náà ni kɔ́ngi lewiile mɛ́ bèle, lire wè kányiʔɛʔ.
14Nɛ́ Kulocɛliɛ ní wè, weli bé pe jáa !
Wire wi bé weli parifɔlilɔ tánʔana bèle bè pe tirige.
Currently Selected:
Ŋúnuyɔ 60: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
