Ŋúnuyɔ 57
57
Mi yē nɛ́ kpàricogo ní, wuʔɔgɔ lɛ̀lɛ nī lè
1Ŋúnuŋuminɔ yiɛginiwɛ wuʔu gī. Pe 'ki ŋú nɛ́ yékpoli ní nàa ni 'jo: «Fǎga ki cúʔɔ gèʔ». Dawuda ŋúnuzɛbɛgɛ#57.1 Ki kɔri wiì fílige nɛ̀ cɛ́nʔ. Wéli baa 16.1 kaliwɛgɛ ki táanmɛ gè. gī, lɛ̀lɛ líì nī wi puu nɛ fé Sawuli yiʔɛ mɛ́ gè nɛ̀ sɛ́nì làri nyaguruwiʔi nī gè#57.1 Wéli baa Sam1 22.1; 24.1-3..
2Kulocɛliɛ yo, ‑nyinimɛ taa mi nɛ̄ !
Ma nyinimɛ taa mi nɛ̄ !
Nɛ́ ki cɛ́n muɔ nī mi bé líʔire jó dè.
Mi nyɛ́nì líʔire jó muɔ fíkɛnyɛ láara yè, fúɔ bè taa wuʔɔgɔ ki‑ pa tóri.
3Mi nɛ Kulocɛliɛ yeri wè,
Kulocɛliɛ ŋáà wī Duniya wi Mìɛni Nyùgo nɛ̄ gè,
wire ŋáà wi bé mi kele nyuɔ gèle bè forigo wè.
4Bè wi yaʔa baa nyìʔɛnɛ nī lè, wi bé suɔlɔ kɛn lè m'mɛ́,
bé siɛn láʔa wè mi nɛ̄ ŋàa wiī nɛ mi cìrá wè. Ye‑ ŋɔ́ cɛ̀.
Wi bága wi bànguɔ dɛ́nigɛ nɛ́ wi kányiʔɛ tórigo gè mi mɛ́.
5Mi yē jàriyɛ sunʔɔmɔ nī, mi yē sínɛwɛ siɛnkaala sunʔɔmɔ nī;
pe gànʔana ke 'fìrige bɛ̀ tàbɛ nɛ́ sandali ŋaaya tíɛlɛ yè,
pe nyigele kiyē kapiɛngbuɔn ŋɔsii tíɛlɛ ŋàa wi nyuɔ ki 'tɛ́ni gè.
6Kulocɛliɛ yo, ‑muɔ míʔɛ kpúʔɔ gè ma tóri nyìʔɛnɛ nɛ̄ lè !
Muɔ kpuʔɔrɔ ti‑ dàala nyì lè#57.6 Wéli baa koliyo 12 nɛ́ 108.6; 113.4; 148.13; Tɔ́r 14.21 . !
7Pe 'jùɔ puɔ wè mi koligo nī gè bè mi cò, a mi fungo 'ki piɛn;
mi yiʔɛ mɛ́ gè, pe yé kàtiʔɛ túgu, á peli tíimɛ pɛ́nì tuu ki nī. Ye‑ ŋɔ́ cɛ̀.
8Mi fungo ki 'tɛ́ngɛ Kulocɛliɛ muɔ nɛ̄ ! Mi fungo ki 'tɛ́ngɛ muɔ nɛ̄ !
M'béri ŋú, béri mi yakpuɔnrɔ kpúɔn dè#57.8 Koliyo 8-12 wuʔu nī gè, wéli baa 108.2-6..
9Mi fungo yo, ma yɛ̀ !
Màʔagɛlɛ kiɛ bɔ̀licɛrigɛ yo, muɔ nɛ́ gɔripile ní lè, ye‑ yɛ̀ !
Sínbiniwuuro nī dè, m'bé ŋú bè cɛngɛnyɛni foli lè.
10Mi Kàfɔli, m'bé muɔ síɛri duniya siɛnfeliye sunʔɔmɔ ni bè !
M'bé yakpuɔnrɔ kpúɔn dè bè muɔ gbùʔɔrɔ
kùlogolo sunʔɔmɔ nī bè !
11Nɛ́ ki cɛ́n muɔ bànguɔ dɛ́nigɛ ki 'kpúʔɔ nɛ̀ tóri
fúɔ nɛ̀ nɔ̀ nyìʔɛnɛ nɛ̄ lè,
a muɔ kányiʔɛ ki 'yɛ̀ nɛ̀ kpàʔala nɛ̀ tóri kàsadibarɛ nɛ̄ dè.
12Kulocɛliɛ yo, ‑muɔ míʔɛ kpúʔɔ gè ma tóri nyìʔɛnɛ nɛ̄ lè !
Muɔ kpuʔɔrɔ ti‑ dàala ni mìɛni nyì lè#57.12 Wéli baa 57.6. !
Currently Selected:
Ŋúnuyɔ 57: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
