Ŋúnuyɔ 55
55
Mi gbuɔnyɛni wi 'mi fáanni
1Ŋúnuŋuminɔ yiɛginiwɛ wuʔu gī, gàa pe 'ŋú nɛ́ gɔrilɔ ní bèle. Dawuda sícilimɛ ŋúnugo#55.1 Ki kɔri wiì fílige nɛ̀ cɛ́nʔ. Wéli baa 32.1 kaliwɛgɛ ki táanmɛ gè. gī.
2Kulocɛliɛ yo, ‑mi náarigɛ lúʔu gè !
Ma fǎga làri mi nɛ̄ a mi nɛ muɔ fiɛn wèʔ !
3Ma líiye cáan m'mɛ́, ma siɛnnugoro kɛn dè m'mɛ́ !
Mi fungo ki 'nyaʔami mi nī nɛ̀ tóri#55.3 Siɛnnɛ pálì nɛ̂ tiʔɛ gáà siɛnrɛ yiʔɛ dè nɛ̀ jo: mi nɛ tári nɛ mári., mi nɛ cíɛn, mi sɔ̀ngirɔ ti 'kúɔ,
4gàa wuʔu mi leguu wiī nɛ nyu mi nɛ̄ wè, kire kɛnmɛ nɛ̄.
Nɛ́ ki cɛ́n siɛnpiiwe wiī nɛ mi serigi, wiī nɛ fùrɔgɔ niʔɛgi gè mi nɛ̄,
wiī nɛ siɛnrɛ córi dè nɛ kanʔa m'mɛ́ wi funyɛrigɛ nī gè.
5Mi nàzɔn wiī nɛ wáari kpuʔɔ mi laamɛ nī bè,
kùu fíɛrɛ tiī nɛ̄ mi cògí.
6Sànviige nɛ mi wáari; mi céri tiī nɛ fún nɛ yàʔará;
fíɛgbuɔrɔ 'tuu mi nɛ̄ nɛ̀ mi tɔ́n.
7Mi 'puu nɛ ki sɔ̀ngí nɛ́ jo:
«Cí ! A mi cî gbɛ̀ jáa bè fíkɛnyɛ taa majo gòtolo nī lè,
mi cî de fini de waa bàa tɛ́ni kɔli káà mɛ́.
8ʔaan, mi cî fɛ̀ bè kɛ́ liilige,
bè sa kpìɛnmɛ tuu bè, baa waama kùlo nī lè. Ye‑ ŋɔ́ cɛ̀.
9Mi cî fìɛlɛ bè tiʔɛ káà taa bè líʔire jó
a káfaligbuʔɔ ki kɛ́ni wáari nɛ́ kàsaala ní lè.»
10Mi Kàfɔli yo, ‑siɛnpiile pe sɔ̀ngirɔ nɛ́ pe siɛnrɛ nyaʔami dè#55.10 Wéli baa Sél 11.1-9. !
Nɛ́ ki cɛ́n nɛ̀mɛ kele keli mi nɛ nyaʔa nɛ́ kàsii ní wè,
baa kàʔa nī gè.
11Pìlige nɛ́ cɛnvugo bàli pe ki kele kpínʔini gèle,
piyē nɛ tári nɛ mári kàʔa gunzuluyo nɛ̄ yè#55.11 Pe 'ki kpíʔile kire ga buu Dawudayé pe fǎga gbɛ̀ yiriʔ.;
ki laamɛ nī bè, kapiʔile nɛ́ wuʔɔgɔ kire gī baa.
12Cúʔɔmɔ piī kàʔa laamɛ nī bè,
màama nɛ́ káfinɛrɛ ti wè nɛ kúu kàʔa ki dàalikpoliyo nɛ̄ yèʔ.
13A ki yé buu mi leguu wáà wi 'mi tiʔɛlɛ wè,
mi cî ki kpàri bè cò.
A ki yé buu siɛn ŋáà wi 'mi biɛn wè, wire wi yé yɛ̀ mi kúrugu wè, mi cî fɛ̀ bè làri wi nɛ̄.
14Kire kàa sí bɛ̀ʔ ! Muɔ ŋáà wī mi nàganyɛni wè,
mi gbuɔnyɛni tíimɛ wè ŋàa mi sɔ́migɔ nɛ̀ cɛ́n wè,
15muɔ ŋáà ní mi 'puu nɛ nàgorigo siɛnrɛ nyu dè
á wiyē nɛ wúu nɛ waa Kulocɛliɛ saʔa mɛ́ gè siɛnniʔɛmɛ sunʔɔmɔ nī bè.
16Kùu wi‑ mi leguulo líɛ bèle, dí pe sí jíin wiile baa kusiʔi nī gè !
Nɛ́ ki cɛ́n kapiʔi kiī kòrigo pe nī, kiī pe funyɔ nii yè.
17Mi wè, mi nyɛ́nì Kulocɛliɛ yeri wè. Kire nɛ̄, Yewe bé mi suɔ.
18Cɛnguʔɔ gè, nɛ́ sínbinimɛ nī bè, nɛ́ a cɛngɛ ki 'yéri nyùgo nī gè#55.18 Wéli baa Dan 6.10. Isirayɛliyé pe cɛngɛ ki 'séli cɛnguʔɔ nɛ̄.,
mi nìɛ ŋɔ́gi níɛ̀ nɛ cíɛn. Wi bága mi yékpoli lúʔu lè,
19wi bé mi píle bè suɔ siɛnnɛ bálì mɛ́ bèle,
bà pe cáanri nɛ́ mi ní wè,
kire ga buu mi‑ kò yanyige nɛ̄,
a ki cɛ́nì nyaa pe 'niʔɛ nɛ̀ tóri mi nɛ̄ wè.
20Kulocɛliɛ wi bé lúʔu m'mɛ́ bè pe cɛ́rigɛ,
wire ŋáà wī tɛ́niwɛ wi kùlofɔlilɔ kácunʔɔ nɛ̄ gè
nɛ̀ ki líɛ baa faʔa faʔa gè. Ye‑ ŋɔ́ cɛ̀.
Nɛ́ ki cɛ́n peli nī bèle, pe wè nɛ yiʔi nɛ nyaʔaʔ;
pe wè nɛ fìʔɛ́ Kulocɛliɛ nɛ̄ʔ.
21Kire gbuɔnyɛni ŋáà wè,
wiī nɛ túngu nɛ́ bàli ní pe 'puu yanyige nɛ̄ nɛ́ wi ní wè,
wiī nɛ wi nyakungɛngɛ córi gè.
22Wi nyasiɛnrɛ ti 'tɛ́ni bɛ̀ nɛ̀yirimɛ tanʔanibɛ tíɛlɛ,
nɛ̀ ki yaʔa kapiɛnnɛ lire nī wi fungo nī gè.
Wi siɛnrɛ tiī nɛ pɔli bɛ̀ sùnmɔ tíɛlɛ,
nɛ̀ ki yaʔa tiī bɛ̀ ŋɔsii tíɛlɛ ŋàa wiī 'gbòbori nɛ̀ yaʔa bè siɛn luɔ wè.
23‑Muɔ tugoro tìrige dè ma taʔa Yewe nɛ̄ wè;
wire wi bé muɔ tuʔɔ bè yérige#55.23 Wéli baa Piɛ1 5.7.,
wiǐ fɔ̀li bè siɛnsinwɛ yaʔa wè wi‑ kúrugo bè tuuʔ#55.23 Wéli baa Ŋún 37.5..
24Cúɔʔ ! Kulocɛliɛ, muɔ bé siɛnpiile yaʔa bèle pe‑ jíin kùu kàwiʔi nī gè,
sìsiɛnwobilo siɛnnɛ bálì bèle nɛ́ bàli pe siɛnnɛ fáanni bèle.
Yiʔɛlɛ gálì nyuɔ pe cî ga kúɔ dàala nɛ̄ lè, piyě ní cɛ ke tílaga taa gèʔ.
Mi wè, mi nyɛ́nì mi sɔ̀ngirɔ taʔa dè muɔ nɛ̄.
Currently Selected:
Ŋúnuyɔ 55: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
