Ŋúnuyɔ 49
49
Siɛn sǐ gbɛ̀ waliniʔɛgɛ taa bè wi sìi suɔ wèʔ
1Ŋúnuŋuminɔ yiɛginiwɛ wuʔu gī. Kore jaala#49.1 Wéli baa 42.1 kaliwɛgɛ ki táanmɛ gè. ŋúnudanʔa gī gàa pe ŋú nɛ́ yakpuɔnrɔ ní dè#49.1 Wéli baa 42.1 kaliwɛgɛ ki táanmɛ gè..
2Yeli bálì bīɛlɛ kùlogolo siɛnnɛ bèle, ye mìɛni yeri lúru !
Ye‑ líiye cáan ye mìɛni bèle, duniya siɛnnɛ,
3lewiile yo, siɛn ó siɛn,
lɔrifɔlilɔ bèle nɛ́ fɔ̀ngɔfɔlilɔ ní bèle !
4Mi nyuɔ ki bé laaduumɔ siɛnrɛ juu,
mi funzɔngirɔ ti bé puu nɛ́ sícilimɛ ní.
5Mi bé líiye cáan bèri kàsiile ŋúnugo sɔ́migi gè de lúru,
m'bé yúgogbɛngɛ wáa bè ki kɔri juu wè nɛ́ gɔripile ní lè.
6Gáa ki bé nyuɔ mi nɛ̄ mi de fìʔɛ́ wuʔɔgɔ cɛngɛ nī gè
bà káfinɛvinɛnɛ pe kolimɔ pi 'mi màʔa nɛ̀ suʔu bè ?
7Pe nyɛ́nì pe sɔ̀ngirɔ taʔa dè pe lɔri nɛ̄ dè,
níɛ pìye nyíɛnɛ nɛ́ pe waliniʔɛgɛ ní gè#49.7 Wéli baa Kàs 11.28; Mar 10.23-25..
8Kányiʔɛ nɛ̄, siɛn wáà fáala sǐ gbɛ̀ wi siɛnnyɛni sìi fùgu wè bè suɔ
Kulocɛliɛ yiʔɛ mɛ́ gèʔ,
siɛn wire tíimɛ míɛni sǐ gbɛ̀ wi sìi lɔri sàri dèʔ#49.8 Wéli baa Mat 16.26..
9Pe sìi wi lɔri ti 'gbɛ̀n nɛ̀ cáanri,
siɛn sǐ gbɛ̀ waliniʔɛgɛ taa bè wi suɔʔ,
10bè kò sìi nɛ̄ lɛ̀lɛ ó lɛ̀lɛ nīʔ,
kire ga buu wi fǎga jíin nyɛgɛ nī gè bè nyaaʔ.
11Nɛ́ ki cɛ́n, wiyē nɛ ki nyaʔa kìɛ, siɛnsiciliwe wiī nɛ kúu,
nɛ́ míɛni ledogo ní gè nɛ́ lelabiligɛ ní gè,
níɛ pe lɔri yaʔa dè pàli mɛ́.
12A ki cɛ́nì nyaa a pe 'pe míɛyɛ taʔa yè pe dàʔala nɛ̄ gèle,
nyɛgɛ kire gī pe mìɛni saasɛnyɛ yè
nɛ́ pe kòridiɛyɛ ní yè lɛ̀lɛ ó lɛ̀lɛ nī#49.12 Siɛnnɛ pálì nɛ̂ tiʔɛ gáà siɛnrɛ yiʔɛ dè nɛ̀ jo: Piyē nɛ ki sɔ̀ngí nɛ́ jo peli saaya yi bé kò bile súuri. Weli 'siɛnrɛ yiʔɛ nɛ̀ yɛli nɛ́ girɛki nɛ́ sirii siɛnliɛrɛ ti sɛbɛgɛnnɛ ní lè..
13Nɛ́ ki taa lewiiwe wè, ŋàa wī lɔri ní dè, wi wè nɛ mɔgiʔ;
wiī bɛ̀ nyàʔayɛrɛ tíɛlɛ dàa ti kúu dè.
14Pe m'bɛlɛ siɛnnɛ bálì pe 'tɛ́ngɛ pìye nɛ̄ bèle,
pe kúɔgɛnmɛ pire bī bàa bè#49.14 Wéli baa Luk 12.20.,
nɛ́ míɛni bàli pe 'ki nyaa pe siɛnjuuro ti 'pe dɛ́ni dè#49.14 Siɛnnɛ pálì nɛ̂ tiʔɛ gáà siɛnrɛ yiʔɛ dè nɛ̀ jo: bàli bīɛlɛ ki 'pe dɛ́ni bèri peli tíimɛ siɛnrɛ lúru dè.. Ye‑ ŋɔ́ cɛ̀.
15Pe mìɛni nɛ waa baa kusiʔi mɛ́ gè, majo sìnbaara dī;
kùu wire wi pe nári nɛ waa baa.
A kpìɛnmɛ pi 'tuu bè, siɛnsinminɛ pe bé pe tánʔana#49.15 Wéli baa Dan 7.22; Luk 22.30; Kor1 6.2; Tìɛ 2.26; 20.4..
Pe cɛ̀nmɛ pi bé fúnʔɔ kusiʔi nī gè; kusiʔi kire bé kò pe súɔndiʔɛ.
16Nɛ̀ ki yaʔa Kulocɛliɛ wi bé mi sìi fùgu wè bè suɔ
kusiʔi fànʔa mɛ́ gè#49.16 Wéli baa Oze 13.14; Dan 12.2.;
ʔaan, wi bé mi líɛ. Ye‑ ŋɔ́ cɛ̀.
17Ma fǎga de fìʔɛ́ a siɛn wáà 'kò lɔrifɔli wèʔ,
a muɔ 'wi saʔa lɔri nyaa dè ti 'niʔɛgi dèʔ.
18Nɛ́ ki cɛ́n, a wi kɛ́nì kùu wè, wi nɛ̌ kɛ́ nɛ́ yakaa níʔ;
wi lɔri ti nɛ̌ jíinʔ nɛ́ wi ní nyɛgɛ nī gèʔ#49.18 Wéli baa Tim1 6.7..
19Wi 'puu nɛ ki sɔ̀ngí nɛ́ jo wiī fundaanra nɛ̄ wi sìi cɛnyɛ nī yè.
Pe nìɛ muɔ kpóri bɛ̀ muɔ 'nyuɔ wè.
20Kire nɛ́ ki míɛni lɔrifɔli míɛni wi 'yɛli bè kɛ́
baa wi tobilo kúrugu bèle,
bàli pe 'kùu bèle, peli bálì bīɛlɛ piyè ń'nɛ̀ je kpìɛnmɛ nyaa bèʔ.
21Lewiiwe wè, ŋàa wī lɔri ní dè, nɛ̀ ki yaʔa sìnjilimɛ wè wi mɛ́ʔ,
wiī bɛ̀ nyàʔayɛrɛ tíɛlɛ dàa ti kúu dè.
Currently Selected:
Ŋúnuyɔ 49: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
