Ŋúnuyɔ 46
46
Kulocɛliɛ wiī weli làridiʔɛ cɛ̀ngɛ
1Ŋúnuŋuminɔ yiɛginiwɛ wuʔu gī. Kore jaala#46.1 Wéli baa 42.1 kaliwɛgɛ ki táanmɛ gè. ŋúnugo gī, gàa ki 'ŋú nɛ́ yékpowaʔagɛlɛ ní gèle.
2Kulocɛliɛ wiī làridiʔɛ cɛ̀ngɛ weli mɛ́,
wire wī weli sáʔafɔli wè fùrɔgɔ lɛ̀lɛ nī lè, lɛ̀gɛlɛ ke mìɛni nī.
3Kire kɛnmɛ nɛ̄ weli wè nɛ fìʔɛ́ yafiɛn nɛ̄ʔ,
a ki cɛ́nì nyaa dàala ni 'cúungo lè,
a nyaguruyo yi 'jabari nɛ̀ jíin kuʔɔjii nī wè,
4a kuʔɔjii luɔyɔ yi kɛ́ni tùngú níɛ kɛ́ngi yè,
a lakuruyo yi kɛ́ni yɛ̀gí yè, fúɔ bè nyaguruyo cúungo yè. Ye‑ ŋɔ́ cɛ̀.
5Cáʔa káà yē baa#46.5 Wéli baa Sél 2.10; Tìɛ 22.1., ki lakoliyo yiī nɛ fúu nɛ fundaanra kanʔa
Kulocɛliɛ kàʔa mɛ́ gè,
kàʔa gáà gī Kulocɛliɛ wi kòridiʔɛ wàlidɛngɛgɛ gè,
Kulocɛliɛ ŋáà wī Duniya wi Mìɛni Nyùgo nɛ̄ gè.
6Kulocɛliɛ wiī tɛ́niwɛ ki kàʔa sunʔɔmɔ nī bè, kire nɛ̄ kiǐ gbɛ̀ tuuʔ.
Lɛ̀lɛ líì nī cɛngɛnyɛni niī nɛ foligi lè, Kulocɛliɛ wi bé ki sáʔa.
7Kùlogolo ke 'jɛnmɛ, a kùlofɔliyɔ yi 'tuu;
Yewe yékpoli ni 'kpɛ̀ni a dàala ni 'nyɛgɛ.
8 Yewe ŋáà wī Nyìʔɛnɛ Kapiɛngbuɔnnɔ Kàfɔli wè, wiī nɛ́ weli ní;
Yakuba Kulocɛliɛ wè, wiī weli líʔirejodiʔɛ. Ye‑ ŋɔ́ cɛ̀.
9Yeri báan ye pa ki wéli gàa Yewe 'kpíʔile gè,
bògaara kele gálì ke 'siɛn fungo wúɔ gè
gàli wi 'kpíʔile dàala nɛ̄ lè.
10Wire wi kapinʔɛnɛ yérigi gèle duniya wi láʔagɛlɛ nɛ̄ gèle,
wire wi sandaliyɛ nɛ́ tàbɛlɛ kabari bèle,
níɛ kapiɛngbuɔnnɔ wotorilo#46.10 Siɛnnɛ pálì nɛ̂ tiʔɛ gáà siɛnrɛ yiʔɛ dè nɛ̀ jo: timɔzigeye. sórigi bèle.
11«Ye‑ yéri, ye ki cɛ́n mi yē Kulocɛliɛ#46.11 Wéli baa Yir 14.13..
Mi yē kùlogolo ke mìɛni nyùgo nɛ̄. Mi yē duniya wi mìɛni nyùgo nɛ̄.»
12Yewe ŋáà wī Nyìʔɛnɛ Kapiɛngbuɔnnɔ Kàfɔli wè, wiī nɛ́ weli ní,
Yakuba Kulocɛliɛ wè, wiī weli líʔirejodiʔɛ. Ye‑ ŋɔ́ cɛ̀.
Currently Selected:
Ŋúnuyɔ 46: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
