Ŋúnuyɔ 45
45
Kùlofɔli cepɔrigɔ ŋúnugo gī
1Ŋúnuŋuminɔ yiɛginiwɛ wuʔu gī. Pe 'ki ŋú nɛ́ yékpoli ní nàa ni 'jo: «Luʔɔ kácuɔnyɔ yè#45.1 Ki kɔri wiì fílige nɛ̀ cɛ́nʔ. Siɛnnɛ pálì nɛ̂ tiʔɛ gáà siɛnrɛ yiʔɛ dè nɛ̀ jo: gàa 'ki ŋú nɛ́ màʔagɛlɛ kɔlini gɔri ní wè.». Kore jaala#45.1 Wéli baa 42.1 kaliwɛgɛ ki táanmɛ gè. sícilimɛ ŋúnugo gī#45.1 Ki kɔri wiì fílige nɛ̀ cɛ́nʔ. Wéli baa 32.1 kaliwɛgɛ ki táanmɛ gè.. Dɛ́nigɛ ŋúnugo gī.
2Mi fungo ki 'nyì fundaanra nɛ́ siɛntaancɛ̀nrɛ tire kɛnmɛ nɛ̄,
mi nɛ mi ŋúnugo ŋú gè kùlofɔli wáà mɛ́.
Mi nyinɛ ni 'tɛ́ni bɛ̀ sɛbɛnyɔnigɔjɛ̀nwɛ gòsiige tíɛlɛ
bà wi cî ki tíʔɛ nɛ sɛbɛ wè.
3Muɔ cetinnɛ ni nyɛ́nì nyuɔ nɛ̀ tóri siɛnsɛnminɛ nɛ̄ bèle,
kpuʔɔrɔ yē muɔ nyasiɛnrɛ nī dè;
we 'ki nyaa Kulocɛliɛ nyɛ́nì diba taʔa wè muɔ nɛ̄
lɛ̀gɛlɛ ke mìɛni nī.
4Kapiɛngbuɔn sànbali, ‑muɔ kapiɛngbuɔn ŋɔsii nyɔ́gɔ wè
kpàfuʔu nī gè, muɔ nágbɛnigɛ nɛ̄ gè,
má yɛ̀ ma pɛn nɛ́ muɔ nàjɛnrɛ ní dè nɛ́ muɔ kpuɔmɔ ní bè.
5Muɔ kpuɔmɔ ní bè, mari waa yiʔɛ mɛ́ muɔ sunʔɔ nɛ̄ gè,
ma fànʔa taa ma cáan ma kányiʔɛ yige gè,
nɛ́ funnyige ní gè nɛ́ sínmɛ ní bè,
kire ga buu muɔ kàliige kɔli ki de
bògaara kakpiʔiligele kpínʔini gèle.
6Kùlofɔli, muɔ ŋaaya yiī juɔyɔ bè kùlogolo kálì siɛnnɛ
cáan bèle muɔ láara,
a muɔ ŋaaya yi kɛ́nì sìndinyɛ fúrugu yè nɛ̀ nɔ̀
muɔ leguulo pe nàzɔnnɔ nɛ̄ bèle.
7Kulocɛliɛ yo, muɔ kùlofɔlilɔ kácunʔɔ kiī baa súuri lɛ̀lɛ ó lɛ̀lɛ nī,
muɔ fànʔa kàgbiile náà ni yē muɔ kɔli nī gè,
niī nɛ muɔ kùlofɔligɔ kàrigí gè nɛ́ sínmɛ ní#45.7 Koliyo 7 nɛ́ 8 wuʔu nī gè, ki 'juu baa Eb 1.8,9..
8Sínmɛ pi 'muɔ dɛ́ni, a kapiʔi ki 'muɔ biɛn.
Kire kɛnmɛ nɛ̄, Kulocɛliɛ ŋáà wī muɔ Kulocɛliɛ wè,
wi 'muɔ nyíɛnɛ nɛ̀ kɔ̀n nɛ̀ muɔ kpíʔile kùlofɔli.
A wi 'fundaanra sùnmɔ#45.8 Nùdaanna láà ni yé puu nàa pe 'puu nɛ kpínʔini nɛ́ yɛrɛ dáà wuʔu ki 'juu 45.9 nī yè. wo bè muɔ nɛ̄#45.8 Wéli baa Kàs 7.17.,
nɛ̀ muɔ yɛ̀gɛ nɛ̀ tóri muɔ pínɛnyɛninɛ nɛ̄ bèle.
9Cí ! muɔ 'bururo ti mìɛni nùgo ki yē nùdaanna,
nùdaanna náà pe 'kpíʔile nɛ́ miiri tiige tùnmɔ ní bè,
nɛ́ alowɛsi natukɔli ní wè, nɛ́ kase nàgɔriyɔ nùgo ní gè.
Bè fundaanra kɛn muɔ mɛ́, piyē nɛ gɔrilɔ kpúɔn bèle
baa kùlofɔli nàkpaanya nī yè, nyàa pe 'fèri nɛ́ soli gàanya ní yè.
10Kùlofɔlilɔ pórilo piyē muɔ tórigofɔlilɔ,
kùlofɔcuɔ wiī muɔ kàliige mɛ́,
nɛ́ wìi fèri nɛ́ tiɛ ní wè ŋàa wi 'kɔ́n Wofiri kùlo mɛ́ lè#45.10 Wofiri kùlo tiɛ wè, ki nyɛ́nì juu baa Zɔbi 28.16; Eza 13.12 . Piyē nɛ ki sɔ̀ngí nɛ̀ jo dùʔɔ Wofiri kùlo ni 'puu Arabuulo kùlo nī, á kire bɛ̀ʔ Ɛndiyɛnɛ kùlo nī, á kire bɛ̀ʔ Siɛnnɛwuɔlɔ tiʔɛ káà nī, cɛngɛnyɛnifoligɔli mɛ́ gè, á kire bɛ̀ʔ cɛngɛnyɛnifolimɛ kàliige kɔli mɛ́ gè..
11Te lúru, sinboriwo, mari wéli mári líiye cáanri:
ma fìʔɛ nɛ́ muɔ siɛnnɛ ní bèle nɛ́ muɔ tuu kpáa ní gè,
12bà muɔ cɛ̀nmɛ pi bé kùlofɔli píle wè.
Wi yē muɔ kàfɔli; ma káguro cáan wi yiʔɛ mɛ́.
13Tiiri kàʔa#45.13 Tiiri kàʔa ki 'puu yasuɔbarilɛ kàʔa, Cɛngɛnyɛnijiinmɛ kuʔɔjii gògoyo nɛ̄ yè. Lɔri ti yé ki míʔɛ yige gè (wéli baa Eza 23; Ezek 26.1–28.19.) siɛnnɛ pe béri báan nɛ́ kpuʔɔrɔ ní dè muɔ mɛ́,
ʔaan, lɔrifɔlilɔ pe béri muɔ fiɛn ma kpuʔɔrɔ kɛn pe mɛ́.
14Kùlofɔli póri wiī nɛ jiin nàkpanʔa nī gè, wiī cɛ̀nwɛ níɛ nyíʔɛnɛ;
cefɔnwɔ burugo kiī súugo nɛ́ tiɛ jèsiile ní.
15Pe 'wi kɔ́ri nɛ waa muɔ mɛ́, kùlofɔli. Wi bururo ti 'sɔ́migɔ nɛ̀ súu;
wi kàduʔu mɛ́ gè, wi kàdɔnminɔ pe 'pínɛ nɛ́ wi ní
bàli bīɛlɛ sinborilo bèle, nɛ̀ kɛ́ muɔ kúrugu.
16Piyē nɛ pe kɔ́ri nɛ waa nɛ́ fundaangbuɔrɔ ŋúnuyɔ ní
bè sa jíin kùlofɔli nàkpanʔa nī gè.
17Muɔ jaala pe bé tɛ́ni muɔ tuuliɛyɛ kácunʔɔ nɛ̄ gè;
muɔ bé pe tɛ́ngɛ pe‑ puu siɛnkpolilo tiɛyɛ yi mìɛni nī kùlo nī lè.
18M'bé ki kpíʔile muɔ wuʔu ki de nyu kɛ̀ngɛlɛ ke mìɛni ní,
dí kùlogolo kálì siɛnnɛ pe sí de muɔ gbùʔɔrɔ́ súuri lɛ̀lɛ ó lɛ̀lɛ nī.
Currently Selected:
Ŋúnuyɔ 45: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
