Ŋúnuyɔ 31
31
Mi nɛ Yewe náari wi- mi suɔ
1Ŋúnuŋuminɔ yiɛginiwɛ wuʔu gī. Dawuda ŋúnudanʔa gī gàa pe ŋú nɛ́ yakpuɔnrɔ ní dè.
2 Yewe muɔ mɛ́ mi 'líʔire jó, fǎga ki yaʔa fìɛrɛ‑ tɔ́n mi nɛ̄ʔ !
Bɛ̀ muɔ nɛ kasingele kpínʔini gèle lɛ̀lɛ ó lɛ̀lɛ nī lè, ‑mi píle ma suɔ#31.2 Koliyo nyáà wuʔu gè 2-4, wéli baa 71.1-3. !
3‑Líiye cáan m'mɛ́ fáari! Ma mi cò ma yige pe kiyɛ nī yè,
ma puu mi mɛ́ kàdɛnigbaala, tiʔɛ gíì nī m'bé làri wè,
ma puu làridiʔɛ bɛ̀ gunliriye tíɛlɛ mi mɛ́, kire ga buu mi‑ suɔlɔ taa !
4ʔaan, muɔ yē mi kàdɛnigbaala
nɛ́ ní mi làridiʔɛ lìrige gáà gī naamɛ gè !
Bè ki yaʔa muɔ míʔɛ kiri kpóri gè,
ma mi yiʔɛ kíni gè, mari waa nɛ́ mi ní.
5‑Mi cò ma yige jùɔ nī wè ŋàa pe 'pari mi nɛ̄ wè,
nɛ́ ki cɛ́n muɔ yē mi làridiʔɛ bɛ̀ gunliriye tíɛlɛ.
6Mi nyɛ́nì mi pìle yaʔa lè muɔ kiyɛ nī yè#31.6 Ki siɛnrɛ ti 'juu baa Luk 23.46..
Yewe, muɔ yē kányiʔɛ Kulocɛliɛ; muɔ 'mi fùgu nɛ̀ suɔ.
7Bàli pe baara kúu nyùgofun yɛrɛ mɛ́ dè, pe 'mi biɛn;
mi wè, mi 'mi sɔ̀ngirɔ taʔa dè muɔ nɛ̄, Yewe.
8M'béri fundaanra kpínʔini bèri muguri
muɔ bànguɔ dɛ́nigɛ kire kɛnmɛ nɛ̄,
nɛ́ ki cɛ́n muɔ nyɛ́nì mi fuunmɔ nyaa bè, muɔ 'ki cɛ́n funbiɛnrɛ dáà dī mi nɛ̄ dè.
9Muɔ sì mi yaʔa mi leguulo pe kiyɛ nīʔ;
muɔ 'mi tɔliyɔ yérige yè larigbuʔɔ káà nī.
10Yewe, ‑nyinimɛ taa mi nɛ̄, nɛ́ ki cɛ́n mi yē cɔ̀riwɔ !
Mi nyapigele ke 'nyɛ́nigɛ fùrɔgɔ nɛ̄ gè, mi pìle nɛ́ mi fungo ki 'fùrɔ.
11Mi sìi wiī nɛ kùu funbiɛnrɛ nī dè, mi nɛ cíɛn mi yiʔɛlɛ ke mìɛni nī.
Mi ŋɔri ti 'kúɔ mi kolimɔ pire kɛnmɛ nɛ̄#31.11 kolimɔ pire kɛnmɛ nɛ̄: Siɛnnɛ pálì nɛ̂ tiʔɛ gáà siɛnrɛ yiʔɛ dè nɛ̀ jo: mi fuunmɔ pire kɛnmɛ nɛ̄. , mi céri nɛ́ mi kácere ti wari nɛ waa.
12Mi nyɛ́nì kò kátaanra yɛgɛ mi piɛnnɛ mɛ́ bèle,
nɛ́ ń'nɛ̀ kò fìɛrɛ yɛgɛ mi tɛ́ninyɛninɛ mɛ́ bèle.
Bàli pe 'mi cɛ́n bèle, piyē nɛ fìʔɛ́ mi nɛ̄,
bàli pe mi nyaʔa kpànʔanɛ gè, pe nɛ̂ wàli nɛ̀ yéri#31.12 Wéli baa 38.12; 41.10; 69.9; 88.9,19; Zɔbi 19.13-19; Zer 12.6; 15.17..
13Pe 'mi yige pe sɔ̀ngirɔ nī dè mi‑ kò bɛ̀ kpúu tíɛlɛ.
Mi yē bɛ̀ kàjuʔɔ tíɛlɛ gàa ki 'jaa gè.
14Nɛ́ ki cɛ́n mi nɛ ti lúru dàa siɛnnɛ pe nyu mi wori nɛ̄ dè.
Fíɛrɛ ti 'mi màʔa nɛ̀ suʔu; pe 'wúɔ mi nɛ̄ níɛ nyu bè mi kpúu#31.14 Wéli baa Zer 6.25; 20.3,10; 46.5; 49.29..
15Nɛ̀ ki yaʔa mi wè, mi nyɛ́nì nìɛ le muɔ kiyɛ nī yè, Yewe.
A mi 'ki juu nɛ́ jo: «Muɔ yē mi Kulocɛliɛ.»
16Mi sìi cɛnyɛ yiī muɔ kiyɛ nī;
ma mi cò ma yige mi leguulo pe kiyɛ nī, bàli pe 'mi cìra wè.
17Ma mi wéli nɛ́ funjɛ̀ngɛ ní, mi ŋáà wī muɔ baakuɔwɔ wè.
‑Mi suɔ nɛ́ muɔ bànguɔ dɛ́nigɛ ní gè.
18Yewe yo, fǎga ki yaʔa fìɛrɛ tɔ́n mi nɛ̄ʔ,
nɛ́ ki cɛ́n mi nyɛ́nì muɔ yeri.
‑Fìɛrɛ yaʔa ti‑ tɔ́n siɛnpiile nɛ̄ bèle,
dí pe nyuɔyɔ yi‑ sí tɔ́n baa kusiʔi nī gè.
19Ma pe káfinɛrɛ nyuɔyɔ yaʔa yè yi‑ kò boboyo,
nyàa yiī nɛ nyu siɛnsinwɛ kɔli mɛ́ gè nɛ́ nyawaala ní lè,
nɛ́ nìɛnyiɛnigɛ ní gè, nɛ́ parimɛ ní bè.
20Wéli kɛnmɛ bíì nɛ̄ ki 'nyuɔ gè,
muɔ kacɛ̀ngboliyo nyáà muɔ 'wàli nɛ̀ tɛ́ngɛ yè
bìli mɛ́ pe fìʔɛ́ muɔ nɛ̄ bèle,
nyàa muɔ nɛ kpínʔini bàli mɛ́ pe 'líʔire jó muɔ mɛ́ wè,
lewiile pe mìɛni nyaamɛ nɛ̄ bè !
21Muɔ nɛ̂ gbɔbi nɛ̀ tɔ́n pe nɛ̄ nɛ̀ pe làrigɛ,
nɛ̀ pe líili siɛnnɛ pe nyalere nɛ̄ dè.
Muɔ nɛ̂ pe làrigɛ muɔ nyúmɔ nī bè,
nɛ̀ pe líili siɛnnɛ pe nyuɔyɔ nɛ̄ yè
bàli pe túngu nɛ́ pe ní bèle.
22Kpuʔɔrɔ 'yɛli ti‑ taʔa Yewe nɛ̄,
nɛ́ ki cɛ́n wi nyɛ́nì kacɛ̀ngboliyo kpíʔile m'mɛ́
wi bànguɔ dɛ́nigɛ kire kɛnmɛ nɛ̄ bè,
bà mi 'puu kàʔa nī gè
gàa kapiɛngbuɔnnɔ pe 'màʔa nɛ̀ suʔu gè.
23Bɛ̀ fíɛrɛ ti yé mi cò dè, a mi 'ki juu nɛ́ jo:
«Wi ní wè mi nyaʔa wī léʔ ?»
Nɛ̀ sí ki yaʔa muɔ nyɛ́nì mi fiɛnnɛ lúʔu lè
bà mi 'yékpoli wáa lè muɔ kúrugu ma mi sáʔa wè.
24Ye‑ Yewe yaʔa wi‑ yeli dɛ́ni,
yeli ye mìɛni bàli bīɛlɛ ye 'yìye puɔ wi nɛ̄ wè !
Yewe nɛ̂ pe wéli bàli bīɛlɛ wi kányiʔɛ wuulo bèle;
wiī nɛ wi fuʔɔ tɔ́ngi gè nɛ gbɛ̀ngí fungboliyofɔlilɔ mɛ́ bèle.
25Ye‑ gbɛ̀nmɛ le ye puu lèbaanna ní,
yeli ye mìɛni bálì ye 'yeli sɔ̀ngirɔ taʔa dè Yewe nɛ̄ wè !
Currently Selected:
Ŋúnuyɔ 31: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
