Ŋúnuyɔ 30
30
Yewe wi 'mi puʔɔ
1Ŋúnugo gáà pe 'ŋú Gbùʔɔrɔsaʔa múgu cɛngɛ nī gè. Dawuda ŋúnudanʔa gī gàa pe ŋú nɛ́ yakpuɔnrɔ ní dè.
2 Yewe yo, mi nɛ muɔ kpóri !
Nɛ́ ki cɛ́n muɔ 'mi píle nɛ̀ yige kàwiʔi nī gè,
muɔ sì yéri ki nɛ̄ mi leguulo peri mi tíʔɛʔ.
3Yewe mi Kulocɛliɛ yo, mi 'muɔ yeri ma mi sáʔa, a muɔ 'mi puʔɔ.
4Yewe, muɔ 'mi píle nɛ̀ yige kusiʔi nī gè,
a muɔ 'sìi kɛn wè m'mɛ́ bà mi 'puu nɛ jiin nyɛgɛ nī gè#30.4 jiin nyɛgɛ nī gè: Juugɛnmɛ báà pi 'puu bè kusiʔi tìɛ gè (wéli baa 28.1; 55.24; 69.16; 86.13; 143.7; Sél 37.35; Sam1 2.6)..
5Yeli ye mìɛni bàli bīɛlɛ ye 'yìye puɔ Yewe nɛ̄ wè,
yeri wi gbùʔɔrɔ́ nɛ́ yeli ŋúnuyɔ ní yè,
yeri wi tiɛlɛfun míʔɛ tòbilo gè.
6Nɛ̀ taʔa gíi nɛ̄, wi funyɛrigɛ ki wè nɛ mɔgiʔ;
wi kpuʔɔrɔ ti nɛ̂ mɔgɔ sìi wi mìɛni nī.
Pìlige nī gè, kɔngɔ ki nɛ̂ wáa nɛ̀ súɔn;
a kpìɛnmɛ 'tuu bè, fundaanra ti nɛ̂ pɛn.
7Bà mi kele ke 'puu nɛ nyuʔɔ gèle, a mi 'ki juu nɛ́ jo:
«Miǐ ga tíi cɛ̀li bè tuuʔ.»
8Yewe, muɔ yé muɔ kpuʔɔrɔ tìɛ dè mi nɛ̄
nɛ́ mi cò nɛ̀ yérige bɛ̀ nyagurugbɛngɛ tíɛlɛ.
Nɛ̀ ki yaʔa bà muɔ 'muɔ yiʔɛ làrigɛ gè, a fíɛgbuɔrɔ 'mi cò.
9Je muɔ mi 'puu nɛ yeri ma mi saʔa, Yewe !
Mi Kàfɔli, mi 'puu nɛ muɔ fiɛn ma nyinimɛ taa mi nɛ̄.
10A mi 'kùu nɛ̀ jíin kàwiʔi nī gè, tɔ̀ni ŋíi feliwe muɔ bé taa ki nī ?
Nyɛdari ti bé gbɛ̀ri ŋú lé bèri muɔ kpóri ?
Ti bé gbɛ̀ri muɔ kányiʔɛ kaala jáari lè lé ?
11Te lúru mi mɛ́, Yewe ! ‑Nyinimɛ taa mi nɛ̄ !
Yewe, ma kò mi sáʔafɔli !
12ʔé, muɔ 'mi kɔnwaara yiʔɛ dè a ti 'kò yuɔrɔ;
muɔ 'kùugo kayaʔa burugo fòri gè mi nɛ̄,
nɛ́ fundaanra burugbuʔɔ le gè ki sìndiʔɛ nī gè,
13kire ga buu mi ń'de ŋú muɔ mɛ́,
dí mi fungo ki fǎga ní kò pìirige mmɛ gèʔ.
Yewe mi Kulocɛliɛ, m'béri muɔ kpóri lɛ̀lɛ ó lɛ̀lɛ !
Currently Selected:
Ŋúnuyɔ 30: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
