Ŋúnuyɔ 25
25
Yewe yo, pa mi suɔ, -mi yiʔɛ kíni gè
1 Dawuda wuʔu gī#25.1 Ŋúnugo gáà ki siɛnkanʔana gboli ó gboli nɛ séligi nɛ́ sɛbɛkaanna láà ní; sɛbɛkanʔana ó sɛbɛkanʔana ke taanni kìye táanni nɛ̀ yɛli nɛ́ Eburulo alifabe ní wè (wéli baa 9.1 kaliwɛgɛ ki táanmɛ gè)..
Yewe yo, mi nɛ̂ muɔ náari nɛ̀ yiʔɛ muɔ kɔli mɛ́ gè.
2Mi Kulocɛliɛ, mi 'mi sɔ̀ngirɔ taʔa dè muɔ nɛ̄;
fǎga ki yaʔa fìɛrɛ tɔ́n mi nɛ̄ʔ
kire ga buu mi leguulo peri fundaanra kpínʔini mi wori nɛ̄ dèʔ.
3Bàli pe wéli muɔ mɛ́ wè, fìɛrɛ sǐ ga tɔ́n pe nɛ̄ʔ !
Fìɛrɛ ti bága tɔ́n pe nɛ̄
bàli pe 'dàli nɛ siɛnnɛ fáanni nyùgofun wè.
4Yewe yo, ‑ki yaʔa mi‑ muɔ koligo sɔ́migɔ gè cɛ́n;
‑mi tɛnmɛ kɛnmɛ bíì nɛ̄ m'bé muɔ kozinge líɛ gè.
5‑Mi yiʔɛ kíni gè muɔ koligo nī gè nɛ́ muɔ kányiʔɛ ní gè,
má sí mi tɛnmɛ, nɛ́ ki cɛ́n muɔ yē Kulocɛliɛ ŋáà wi mi suu wè.
Mi nɛ wéli muɔ mɛ́ cɛngɛ ó cɛngɛ.
6Yewe yo, sɔ̀ngi ma taa nɛ́ muɔ nyinidaaguugo ní gè
nɛ́ muɔ bànguɔ dɛ́nigɛ kele#25.6 Wéli baa 17.7 kaliwɛgɛ ki táanmɛ gè. ní gèle, gàli gīɛlɛ baa lɛ̀lɛ ó lɛ̀lɛ nī lè.
7Fǎga ní sɔ̀ngi daa nɛ́ mi nàgapunmɔ lɛ̀lɛ kapiʔile ní gèleʔ
nɛ́ mi tuudiʔɛlɛ ní gèleʔ;
sɔ̀ngi ma taa nɛ́ mi ní muɔ bànguɔ dɛ́nigɛ kire kɛnmɛ nɛ̄,
nɛ́ muɔ kacɛ̀ngɛ ní gè, Yewe.
8Yewe fungo ki 'nyuɔ nɛ́ sín,
kire kɛnmɛ nɛ̄ wiī nɛ koligo tìí gè siɛnpuunninɔ nɛ̄ bèle.
9Siɛnnɛ bálì ní pe wè tɔ́ri bèleʔ,
wiī nɛ pe kɔ́ri nɛ waa kasingele kɔli mɛ́ gè,
nɛ pe tɛnmɛ wi koligo kele nɛ̄ gèle.
10Yewe kakpiʔiligele ke mìɛni yē
nɛ wi bànguɔ dɛ́nigɛ nɛ́ wi kányiʔɛ tìí gè
bàli nɛ̄ pe tári nɛ yɛligi nɛ́ wi nyakungɛngɛ siɛnrɛ ní dè
nɛ́ ti kajuugbɛngɛlɛ ní gèle.
11Muɔ míʔɛ kire kɛnmɛ nɛ̄ bè, Yewe,
ma sí mi kapiʔile kàsulugo suɔ gè, bɛ̀ kiyē nìʔɛgɛlɛ gèle.
12A siɛn nɛ fìʔɛ́ Yewe nɛ̄ wè,
Yewe nɛ̂ koligo tìɛ gè wi nɛ̄ gàa wi 'yɛli bè líɛ gè.
13Wi sìi wi nɛ̂ nyuɔ, wi siimɛ pi nɛ̂ kùlo taa lè kɔrigɔ.
14Yewe nɛ wi funzɔngirɔ tìí dè wi wuulo nɛ̄ bèle, bàli pe wi fìʔɛ́ bèle.
Wi nìɛ wi nyakungɛngɛ siɛnrɛ nyu de pe mɛ́.
15Mi nɛ wéli Yewe mɛ́ lɛ̀lɛ ó lɛ̀lɛ nī wi‑ pa mi suɔ,
nɛ́ ki cɛ́n wire wi nyɛ́ni mi tɔliyɔ yigi yè jùɔ nī wè.
16‑Mi wéli, má kpuʔɔrɔ taʔa dè mi nɛ̄,
nɛ́ ki cɛ́n mi yē mi nigbe, yawuʔɔ yē mi nɛ̄.
17Mi fungo ki funbiɛnrɛ ti 'niʔɛ mi nī,
‑mi cò ma yige mi kafurɔgɔlɔ nī gèle.
18‑Mi wéli mi wuʔɔgɔ nī gè nɛ́ mi fùrɔgɔ ní gè,
má sí mi kapiʔile ke mìɛni yaʔa mi nɛ̄.
19‑Ki wéli bɛ̀ mi leguulo pe 'niʔɛ bèle,
nɛ́ kɛnmɛ bíì nɛ̄ mi 'nɛ̀mɛfɔlilɔ biɛn bèle.
20Bɛ̀ muɔ yē mi làridiʔɛ gè,
‑mi sìi wéli wè, má mi píle ma suɔ pe kiyɛ nī yè,
ma ki yaʔa fìɛrɛ fǎga mi taaʔ !
21Mi funviige nɛ́ mi sínmɛ pi de mi wéli,
nɛ́ ki cɛ́n muɔ nɛ̄ mi sɔ̀ngirɔ ti yē.
22ʔé, mi Kulocɛliɛ, -Isirayɛli fùgu wè ma suɔ;
ma wi yige wi funbiɛnrɛ ti mìɛni nī dè.
Currently Selected:
Ŋúnuyɔ 25: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
