Ŋúnuyɔ 17
17
Siɛnpiile pe 'mi màʔa nɛ̀ suʔu
1 Dawuda náarigɛ gī.
Yewe yo, lúʔu mi kajuusinnɛ mɛ́ lè, ‑mi kɔngɔ lúʔu gè.
‑Muɔ ngbúʔulo cɛ̀li gèle ma mi náarigɛ lúʔu gè,
gàa ki 'yiri mi nyuɔ nī gè, kányiʔɛ wuʔu gè.
2Mi kàyuʔujuuro ti 'yɛli bè yɛ̀ muɔ mɛ́,
muɔ nyapigele ke bé ki nyaa gàa gī sínmɛ bè.
3Muɔ nyɛ́nì mi fungo siʔɛ gè nɛ̀ wéli,
muɔ 'mi cúungo nɛ̀ wéli pìlige nī gè, muɔ sì yafiɛn nyaaʔ.
Mi 'ki nyíɛnɛ nɛ̀ kɔ̀n nɛ̀ jo mi nyuɔ kiǐ ga tíi káfinɛrɛ juuʔ.
4Gàa siɛnsɛnminɛ piyē nɛ kpínʔini gè, kiì mi líɛʔ.
Bɛ̀ mi 'taʔa muɔ nyasiɛnrɛ nɛ̄ dè,
a kire 'ki yaʔa mi sì fungbɛnyɛfɔlilɔ koligo líɛ gèʔ.
5Mi 'yéri nɛ̀ nìre wáa nɛ̀ taʔa muɔ yedanyɔgɔlɔ nɛ̄ gèle,
mi tɔliyɔ yiì pɔ̀li nɛ̀ yiri muɔ koligo nī gèʔ.
6Kulocɛliɛ, mi nɛ muɔ yeri
nɛ́ ki cɛ́n muɔ bága siɛnnugoro kɛn dè mi mɛ́.
‑Líiye cáan m'mɛ́, ma mi siɛnrɛ lúʔu dè.
7‑Ki tìɛ mi nɛ̄ kɛnmɛ bíì nɛ̄ muɔ bànguɔ dɛ́nigɛ kele#17.7 Eburu siɛnrɛ nī dè náʔa gè, ki 'jo: bànguɔ dɛ́niyɛ, gàa kiī nɛ wi kakpiʔiligele tìí gèle gàli ke 'kɔ́n wi dɛ́nigɛ mɛ́ gè (wéli baa Sél 32.11; Kaj2 6.42; Kaya 3.22; Ŋún 25.6; 89.2,50; 107.43.)
ke 'kpúʔɔ nɛ́ nyuɔ gèle,
muɔ ŋáà miɛ̄ nɛ siɛn suu nɛ́ muɔ kàliige ní gè,
siɛn ŋáà wi fé bè suɔ wi túnvɔlilɔ mɛ́ bèle
bàa líʔire jó muɔ mɛ́ wè.
8Te mi wéli bɛ̀ muɔ nyapisiɛn tíɛlɛ;
ma mi làrigɛ muɔ fíkɛnyɛ nyúmɔ nī bè#17.8 Wéli baa 36.8; 57.2; 61.5; 63.8; 91.4; Mat 23.37..
9Ma mi líili siɛnpiile nɛ̄ bèle bàli pe mi caa nɛ́ cúʔɔmɔ ní bè;
‑mi líili mi leguulo nɛ̄ bèle, bàli pe 'mi màʔa nɛ̀ suʔu
bè mi kpúu bèle.
10Pe 'pe funyɔ tɔ́n yè; pe wè nɛ nyinimɛ tari siɛnnɛ nɛ̄ bèleʔ#17.10 Kiì fílige nɛ̀ cɛ́nʔ..
Piyē nɛ nìɛnyiɛnigɛ siɛnrɛ nyu pe nyuɔyɔ nī yè.
11Pe m'bɛlɛ mi yedagbinʔɛnɛ táanni gèle;
píra ŋáà nī wè pe 'mi màʔa nɛ̀ suʔu.
Pe nyapigele kiyē mi nɛ̄, bè mi cáan,
12bɛ̀ jàriyɛliwɛ tíɛlɛ ŋàa wi 'làri nɛ wi yakaʔa palilɛ gè,
bɛ̀ jàri tíɛlɛ ŋàa fungo ki 'wári bè wi kaara cɛnminɛ dè.
13Yewe yo, yɛ̀ ! Ma tún nɛ́ pe ní ! ‑Pe líɛ ma cáan,
ma sí mi píle ma suɔ siɛnpiile bálì mɛ́ bèle nɛ́ muɔ ŋɔsii ní wè,
14siɛnnɛ bálì mɛ́ bèle nɛ́ muɔ kɔli ní gè, Yewe,
duniya ŋáà wi siɛnnɛ mɛ́ bèle, bàli pe 'pe liɛlɛ taa lè nɛ̀ kúɔ bèle.
Ma pe liyɛ nyì yè nɛ́ gàa ní muɔ 'tɛ́ngɛ pe mɛ́ gè.
Pe‑ sí sɛnrɛ yaʔa dè pe pìile mɛ́ bèle a pe kɛ́nì tín bèle;
peli míɛni bé sɛnrɛ yaʔa dè pe siimɛ mɛ́ bè.
15Gàa ki 'mi kúɔ wè, mi sínmɛ pire kɛnmɛ nɛ̄,
mi bé muɔ yiʔɛ nyaa gè.
A mi 'yɛ̀ wè, muɔ nyaana lire ni bé mi tín.
Currently Selected:
Ŋúnuyɔ 17: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
