Matiye 26
26
PE 'ZEZI KPUU WE A WI KOLI NƐ NYƐ NƐ YIRI
(26.1–28.20)
Pe 'nyuɔ le Zezi nɛ̄ wè bè wi kpúu
(Mar 14.1-2; Luk 22.1-2; Zan 11.45-53)
1Bà Zezi kɛ́nì siɛnrɛ dáà ti mìɛni juu nɛ̀ kúɔ dè, a wi 'wi pìtɛnmɛnɛ yɛ bèle: 2«Yeli 'ki cɛ́n ki 'kò cɛnyɛ siin dí Torimakiyaʔa Fundaanra cɛngɛ ki sí nɔ̀, Siɛn Pùɔ míɛni wè, pe bé wi cò bè wi kpúu tiiparigɛ nɛ̄ gè.»
3Kire lɛ̀lɛ nī lè, a kacuɔnrilɔ kàfɔlilɔ bèle, nɛ́ kùlo ni liɛlɛ ní bèle, a pe 'pìye pínɛ Kayifa nàkpanʔa mɛ́, kacuɔnrilɔ kàfɔli wè. 4A pe sɛ́nì juu nɛ̀ bìɛ nigbe nɛ̄, gìi ki bé tí pe- Zezi cò wè sìnjiligele nɛ̄ bè wi kpúu wè. 5Nɛ̀ kɛ́nì pìye kìɛ nɛ́ jo: «Kiì yɛli ki- puu fundaanra cɛnyɛ yire nīʔ, á kire 'laa kàgbaaligɛ bága yɛ̀ siɛnnɛ sunʔɔmɔ nī bè.»
Cɛliwɛ wáà 'natukɔli wo Zezi nyùgo nɛ̄ gè
(Mar 14.3-9; Zan 12.1-8)
6A ki 'nyaa Zezi wi cé kɛ́ Betanii vògo mɛ́, nɛ̀ sɛ́nì puu Siimɔ yaanyiɛmɛfɔli#26.6 Ki 'nyaa yaanyiɛmɛ piǐ sî puu de tíin Siimɔ nɛ̄ wèʔ, nɛ̀ taʔa gíi nɛ̄, a yaanyiɛmɛ yē siɛn nɛ̄ wi nɛ̌ de nyaʔami siɛnnɛ nīʔ. saʔa mɛ́. 7A cɛliwɛ wáà pɛ́nì sìʔɛrɛ nɛ̀ kpɔni Zezi nɛ̄ wè, lagbɛnrɛ natukɔli cɛ̀njɛnwɛ kùngboli#26.7 Girɛki siɛnrɛ nī dè ki 'jo: «alibatiri» kùngboli. Ki 'nyaa lagbɛnrɛ natukɔli wáà wi 'puu, pe nɛ̂ wi le kùngbuʔulo kálì nī, sìndɛnigɛ kùngbuʔulo. Sìndɛniviiye yáà yi 'puu, pe yi ye «alibatiri» sìndɛnigɛ. 'puu wi mɛ́; a wi pɛ́nì wi sùʔu nɛ̀ wo Zezi nɛ̄ wè nyùgo nī gè, pe ní nɛ líi bèle.
8Bà pìtɛnmɛnɛ pe 'kire nyaa gè, a ki 'pe biɛn a pe 'yɛ̀ nɛ nyu nɛ́ jo: «Gáa nɛ̄ wi 'lagbɛnrɛ natukɔli ŋáà cúʔɔ wè mmɛ gè ? 9Je wi cî gbɛ̀ pári lagbɛnrɛ nɛ̄, bè wali kɛn wè fuunmɔfɔlilɔ mɛ́ !»
10A Zezi wi 'ti cɛ́n, a wi 'pe yɛ: «Gáa nɛ̄ yeli nɛ cɛliwɛ ŋáà cɔ̀rí wè ? Nɛ̀ sí ki yaʔa kacɛ̀ngɛ wi 'kpíʔile mi kɔli mɛ́ gè. 11Fuunmɔfɔlilɔ piyē bile nɛ́ yeli ní súuri. Mi wè, mi sí wè bile nɛ́ yeli ní súuriʔ. 12Cɛliwɛ ŋáà wè, natukɔli ŋáà wi 'tíʔɛ nɛ̀ mi kurugo ŋàa wè, wi 'mi céri gbòbori dè nɛ̀ yaʔa wī, náʔanɛ ti- ga sa tɔ́n dè#26.12 Pe 'puu nɛ natukɔli ŋáà tíʔi wè nɛ kúbilo kurugi nɛ pínɛ níɛ pe tɔ́ngi.. 13M'bé ki juu yeli mɛ́ kányiʔɛ nɛ̄, a Kataanna Siɛnrɛ dáà ti sɛ́nì jáari tiʔɛ ó tiʔɛ nī duniya nī wè, cɛliwɛ ŋáà wi wori míɛni ti bé juu baa ki tiʔɛ nī gè, gàa wi 'kpíʔile gè; siɛnnɛ peri sɔ̀ngí de tari nɛ́ wi ní.»
Zudasi wi 'Zezi pári wè Zuufulo mɛ́ bèle
(Mar 14.10-11; Luk 22.3-6)
14Kire lɛ̀lɛ nī lè, pìtɛnmɛnɛ pe kiɛ nɛ́ siin nī bèle, ŋàa pe 'puu nɛ ye Zudasi Isikariyɔti wè, a wire 'fali nɛ̀ kɛ́ kacuɔnrilɔ kàfɔlilɔ kúrugu bèle, 15nɛ̀ sɛ́nì pe yɛ: «Gáa yeli bé kɛn mi mɛ́, dí mi sí Zezi le wè yeli kiyɛ nī yè ?» A pe 'fali nɛ̀ walifiiwe walikpegele togo nɛ́ kpɔrigɔ tɔ́ri nɛ̀ kɛn wi mɛ́. 16Nɛ̀ láʔa kire lɛ̀lɛ nī lè, a Zudasi 'fali nɛ̀ kò nɛ lɛ̀jɛnnɛ caa bè Zezi le wè pe kiyɛ nī.
Zezi wi 'jo Zudasi bé wire le wire leguulo kiyɛ nī
(Mar 14.12-21; Luk 22.7-12,21-23; Zan 13.21-30)
17 Sìnvarifun Búru Fundaanra cɛnbelige gè, a pìtɛnmɛnɛ pe sɛ́nì Zezi yúgo wè nɛ́ jo: «Sé muɔ nɛ caa we sa Torimakiyaʔa suro suʔɔ dè muɔ lìi wè ?»
18A wi 'jo: «Yeri waa baa kàʔa gáà mɛ́ gè ye sa ŋuɔ yɛ wè: ‹Tɛnmɛfɔli wi 'jo wire lɛ̀lɛ ni 'kò túɔn, dí wire je Torimakiyaʔa suro lìi dè muɔ tiʔɛ nī nɛ́ wire pìtɛnmɛnɛ ní bèle.› »
19A pìtɛnmɛnɛ pe 'kele kpíʔile gèle nɛ̀ yɛli bɛ̀ Zezi wi cé ki juu gè, nɛ̀ sí Torimakiyaʔa lìile gbòbori lè.
20Cɛnguʔɔ gè, a wi 'tɛ́ni nɛ líi nɛ́ pìtɛnmɛnɛ kiɛ nɛ́ siin ní bèle. 21Bà pe líi bèle, a wi kɛ́nì pe yɛ: «M'bé ki juu yeli mɛ́ kányiʔɛ nɛ̄, wàa nigbe yē bile yeli nī, wi bága mi le leguulo pe kiyɛ nī yè.»
22A siɛnrɛ dáà ti 'laamɛ cúʔɔ pe nī kpuʔɔ, pe wi yúgo nigbe nigbe, nɛ́ jo: «Kàfɔli, mi wī lé ?»
23A wi sí siɛnnugoro kɛn dè pe mɛ́ nɛ́ jo: «Ŋàa wi 'pínɛ nɛ kɔli nii nɛ́ mi ní sipiɛnunɔ nī lè, wire wi bé mi le leguulo kiyɛ nī yè. 24Siɛn Pùɔ wi bé kùu, nɛ̀ yɛli nɛ́ gìi Kulocɛliɛ siɛnsɛbɛrɛ ti 'juu wi wori nɛ̄ dè. Yawuʔɔ bé sí siɛn taa wè, ŋàa wi je Siɛn Pùɔ le wè wi leguulo kiyɛ nī yè ! Ki cî pɔ́ri siɛn mɛ́ wè pe fǎga cé cɛ wi siiʔ.»
25Zudasi wè wire ŋáà wi yé je wi le wi leguulo kiyɛ nī yè, a wire 'jo: «Mi wī lé, tɛnmɛfɔli ?»
A Zezi wi 'wi yɛ: «Muɔ ma 'jo bɛ̀.»
Zezi lìizɛnnɛ lè
(Mar 14.22-26; Luk 22.15-20)
26Bà pe líi bèle, a Zezi wi 'búru líɛ wè, nɛ̀ barigɛ kɛn Kulocɛliɛ mɛ́, nɛ́ wi kúnminɔ nɛ̀ kɛn pìtɛnmɛnɛ mɛ́ bèle nɛ́ jo: «Ye- suɔ yeri káa, mi céri tire dī dàa dè.» 27Nɛ́ kúɔ nɛ́ yagbuɔlɔ líɛ lè, nɛ̀ barigɛ kɛn Kulocɛliɛ mɛ́, nɛ́ ni kɛn pe mɛ́ nɛ́ jo: «Ye- gbuɔ ye tóri ye mìɛni bèle; 28mi sìsiɛn kire gī, Kulocɛliɛ nyakungɛngɛ sìsiɛn gè, gàa ki 'wo siɛnniʔɛnɛ kɛnmɛ nɛ̄ bè, bè kapiʔile láʔa gèle. 29M'bé ki juu yeli mɛ́, nɛ̀ láʔa píra ŋáà nī wè, miǐ ní ɛrɛzɛn yasɛnrɛ luʔɔ káà gbuɔʔ, fúɔ bè taa cɛngɛ gíì m'bé ní ga kàa gbuɔ nɛ́ yeli ní cígini mi Tuu wi Kùlofɔligɔ nī gè.»
30A pe 'ŋúnuyɔ yáà ŋú#26.30 Torimakiyaʔa lìile lɛ̀lɛ nī lè, pe nɛ̂ cé Ŋúnuyɔ 113-118 ŋúnudo ŋú dè., nɛ́ yiri nɛ̀ kɛ́ Wolivi Tiire nyagurugo mɛ́ gè.
Zezi wi 'ki juu nɛ̀ yaʔa dí Piɛri bága jo wiì wire cɛ́nʔ
(Mar 14.27-31; Luk 22.31-34; Zan 13.36-38)
31A Zezi wi 'pe yɛ: «Pàngɛ pìlige nī gè, m'bága puu kúrugodiɛlɛ yeli ye mìɛni mɛ́ bèle, nɛ̀ taʔa gíi nɛ̄, Kulocɛliɛ siɛnsɛbɛrɛ ti 'jo:
M'bága sìnbanaʔawa kpúɔn wè;
sìnbatogo ki bé fɛ̀ bè cɛrigɛ # 26.31 Wéli baa Zaka 13.7. .
32«A mi sí kɛ́nì koli nɛ̀ nyɛ́ wè, m'bé kíni yeli yiʔɛ mɛ́ baa Galile kùlo mɛ́ lè.»
33A Piɛri sí siɛnrɛ líɛ dè, nɛ̀ jo: «A ki nɛ́ cɛ́nì nyaa pe mìɛni bága fɛ̀ bé muɔ wáa wè, mi wè, miǐ ga tíi fɛ̀ bé muɔ wáaʔ.»
34A Zezi wi 'wi yɛ: «M'bé ki juu muɔ mɛ́ kányiʔɛ nɛ̄, pìlige gáà nī gè, sɛ́ni nɛ́ gòpɔli wi- nyɛni wè, muɔ bé ti kìɛ bè taa tɔliyɔ taanri bé jo muɔ sì mi cɛ́nʔ.»
35A Piɛri wi 'wi yɛ: «A ki nɛ́ cɛ́nì nyaa mi 'yɛli bè kùu nɛ́ muɔ ní wè, miǐ ga tíi bé ti kìɛ bé jo mi sì muɔ cɛ́nʔ.»
A pìtɛnmɛnɛ bílì pe mìɛni pe 'siɛnnuro juu dè.
Zezi wi 'Kulocɛliɛ náari wè Zɛtisemani tiʔɛ nī gè
(Mar 14.32-42; Luk 22.39-46)
36A Zezi wi 'pe kɔ́ri nɛ̀ kɛ́ tiʔɛ káà nī pe ki ye Zɛtisemani, nɛ̀ sɛ́nì pìtɛnmɛnɛ yɛ bèle: «Ye- tɛ́ni bile náʔa gè, dí mi kɛ́ baa mmɛ gè bè sa Kulocɛliɛ náari.»
37A wi 'Piɛri kɔ́ri, wire nɛ́ Zebede jaala siin ní bèle. A wi laamɛ pi 'séli nɛ pinʔɛ wi nī, a wi 'ki nyaa gbɛ̀ligɛ. 38A wi sí pe yɛ: «Laamɛ pi 'piɛn mi nī fúɔ nɛ waa bè mi kpúu. Ye- kò bile nyɛminɛ nɛ́ mi ní.»
39A wi 'fali nɛ̀ sìʔɛrɛ cɛ̀ri nɛ̀ sɛ́nì tuu nɛ̀ yiʔɛ kíri gè dàala nɛ̄ lè, nɛ náari nɛ́ jo: «Tuufɔli, a ki yē ki bé gbɛ̀ kpíʔile gè, -wuʔɔgɔ gáà líili gè mi nɛ̄. Mi sí wè ki mɛ́ gìi mi nɛ caa gèʔ, fúɔ macɛn gìi muɔ nɛ caa gè.»
40A wi 'koli nɛ̀ pɛn wi pìtɛnmɛnɛ kúrugu bèle, nɛ̀ pɛ́nì pe nyaa pe ŋɔ́ni. A wi 'Piɛri yɛ wè: «Bɛ̀ yeli yē lé, yeli sì gbɛ̀nɛ jáa nɛ̀ kò nyɛminɛ nɛ́ mi ní nɛ̀ lɛ̀lɛ cɛ̀ri kúɔ léʔ ? 41Ye- kò nyɛminɛ yeri náari, gìi ki bé tí yeli fǎga tuu Setɛni puuwelige nī gèʔ. Siɛn pìle lire tɔ̀ni nɛ cɛ̀ngɛ sɔ̀ngí; céri fànʔa kire ki 'cɛ́ri.»
42A wi 'koli nɛ̀ láʔa nɛ̀ kɛ́ tɔliyɔ siinwuʔu nɛ̄ gè, nɛ̀ sɛ́ni náari, nɛ́ jo: «Tuufɔli, a ki yē yagbuʔɔ gáà kiǐ gbɛ̀ kɛ́ʔ bé mi yaʔa ga mi sì ki gbuɔ gèʔ, muɔ nyɛ́ni kaala ni- kpíʔile.»
43Bà wi ní nɛ̀ koli nɛ̀ pɛn wè, nɛ̀ pɛ́nì pe nyaa pe ŋɔ́ni; ki 'nyaa ŋɔ́nimɔ 'puu pe yiɛyɛ nī yè kpuʔɔ. 44A wi 'pe yaʔa baa nɛ́ koli nɛ̀ kɛ́ nɛ̀ sɛ́nì náari tadaanriwuʔu nɛ̄ gè, nɛ̀ koli nɛ̀ náarigɛ nugo kpíʔile gè. 45Bà wi koli nɛ̀ pɛn pìtɛnmɛnɛ kúrugu bèle, a wi pɛ́nì pe yɛ: «Yeli nɛ ŋɔ́ni nɛ ŋɔ́gi nɛ taʔa wī lé ? Ki 'kúɔ nɛ̀ kúɔ, lɛ̀lɛ ni 'nɔ̀, Siɛn Pùɔ wiī còlewe kapiigbiʔilile kiyɛ nī yè. 46Ye- yɛ̀ we- kɛ́, ŋàa wi je mi cò le mi leguulo kiyɛ nī yè n'ŋɛ, wi 'nɔ̀ nɛ̀ kúɔ we nɛ̄.»
Pe 'Zezi cò wè
(Mar 14.43-50; Luk 22.47-53; Zan 18.3-12)
47Bà Zezi nɛ tire nyu nɛ tíin wè, a Zudasi wi pɛ́nì yiri nɛ́ siɛnniʔɛmɛ ní, pìtɛnmɛnɛ kiɛ nɛ́ siin nī bèle wàa wi 'puu; bìli yē ŋɔsiile ní còbilo, kàgbelide yē bìli mɛ́. Kacuɔnrilɔ kàfɔlilɔ nɛ́ kùlo ni liɛlɛ peli pe cé pe tun.
48Zudasi wè, wire ŋáà wi yé je Zezi le wè pe kiyɛ nī yè, wi yé kɛnmɛ páà tìɛ pe nɛ̄, nɛ́ jo: «A yeli kâ sɛ́nì mi nyaa a mi siɛn ŋíì síɛri nɛ́ wi suɔn gàangbuʔulo nɛ̄ gèle, wire wī, ye- wi cò.» 49A wi sí 'fali nɛ̀ pɛ́nì kpɔni Zezi nɛ̄ wè nɛ́ jo: «Tɛnmɛfɔli, cɛnguʔɔ nɛ̄ !» Nɛ́ fali nɛ̀ wi síɛri nɛ́ wi suɔn gàangbuʔulo nɛ̄ gèle.
50A Zezi wi sí wi yɛ: «Nàgori, gàa kúrugu ma 'pɛn gè, te ki kpínʔini !»
A siɛnnɛ pe 'fali nɛ̀ sɛ́nì tɔ́n wi nɛ̄, nɛ̀ wi cò sɛni.
51Bìli pe 'puu baa nɛ́ Zezi ní wè, a pe wàa nigbe 'fali nɛ̀ kɔli sáʔa gè nɛ̀ ŋɔsii píle nɛ̀ yige, nɛ̀ fali nɛ̀ kacuɔnrilɔ kàfɔli baakuɔwɔ ngbóli láà kpúɔn nɛ̀ láʔa sɛni.
52A Zezi wi 'wi yɛ: «Koli ma muɔ ŋɔsii le wè baa wi tiʔɛ nī gè; nɛ̀ taʔa gíi nɛ̄, bìli mìɛni pe 'ŋɔsiile líɛ bèle, ŋɔsii wi bága pe cúʔɔ. 53Muɔ nɛ sɔ̀ngí miǐ gbɛ̀ ki náari mi Tuu mɛ́ wè léʔ, wi- nyìʔɛnɛ tundunminɔ kapiɛngbuɔn tòyo kiɛ nɛ́ siin tórigo píra píra ŋáà nī wè pe- pa yéri bè mi sùʔɔlɔ lé ? Ki bé cɛ tóri kire nɛ̄. 54A kire sí kpíʔile gè, mɛni Kulocɛliɛ siɛnsɛbɛrɛ ti bé fori bè síɛ, dàa ti 'ki juu nɛ́ jo dí bɛ̀ kele ke 'yɛli bè tóri tórigɛnmɛ báà nɛ̄ bè ?»
55Kire lɛ̀lɛ náà nī lè a Zezi wi 'ki juu wi còvɔlilɔ mɛ́ bèle nɛ́ pe yɛ: «Mi kúrugu lé ye 'yiri mmɛ gè nɛ́ kàgbelide ní, nɛ́ ŋɔsiile ní, ma cɛ jo dùʔɔ kàyuuwo còdiʔɛ nī ye 'pɛn ? Mi 'puu nɛ tɛ̀ní nɛ́ yeli ní cɛngɛ ó cɛngɛ baa Kulocɛliɛ Gbùʔɔrɔsaʔa nī gè nɛ siɛnnɛ tɛnmɛ bèle, yeli sì mi còʔ. 56Kire gáà ki mìɛni sí nyɛ́nì kpíʔile, gìi ki bé tí siɛnrɛ dáà Kulocɛliɛ siɛnjuuliɛlɛ pe 'juu baa Kulocɛliɛ siɛnsɛbɛrɛ nī dè#26.56 Wéli baa Zaka 13.7; Mat 26.31; Zan 16.32., ti fori ti nyɔgɔlɔ nī gèle.»
Kire lɛ̀lɛ nī lè, a pìtɛnmɛnɛ pe mìɛni fɛ̀ nɛ́ wi wáa.
Pe 'kɛ́ nɛ́ Zezi ní wè Zuufulo pe kàyuʔujuu tiɛkpuʔɔ mɛ́ gè
(Mar 14.53-65; Luk 22.54-55,63-71; Zan 18.13-14,19-24)
57Bìli pe cé wi cò bèle, a pe 'Zezi kɔ́ri wè nɛ̀ kɛ́ Kayifa kpáa mɛ́, kacuɔnrilɔ kàfɔli kpuɔwɔ wè. Kire tiʔɛ nī Fànʔa Siɛnrɛ sɛbɛcɛ́nminɛ nɛ́ liɛlɛ pe cé sɛ́nì pìye pínɛ. 58Piɛri wi cé taʔa wi kúrugu nɛ́ kò liʔi, fúɔ nɛ̀ sɛ́nì nɔ̀ kacuɔnrilɔ kàfɔli kpuɔwɔ wi kpáa nɛ̄ gè. Bà wi 'jíin wè, nɛ̀ tɛ́ni baakuɔlɔ táanni bèle, bè ki wéli gìi ki bága pa yiri baa gè.
59Kire lɛ̀lɛ nī lè, kacuɔnrilɔ kàfɔlilɔ bèle nɛ́ Zuufulo kàyuʔujuulo gboli#26.59 Zuufulo pe kàyuʔujuulo gboli lire ni 'puu. Nàguɔlɔ togo nɛ́ kpɔrigɔ pe 'puu baa gboli náà nī lè. Kacuɔnrilɔ kàfɔli kpuɔwɔ wire wi 'puu ki gboli ni yiɛginiwɛ wè. wuulo pe mìɛni ní bèle a pe 'yɛ̀ nɛ káfinɛrɛ siɛnrɛ táà caa bè lúʔu wàa nyuɔ nɛ̄ Zezi wori nɛ̄ dè, bé sí taa bè wi kpúu.
60Siɛnnɛ sáa yé finɛ nɛ̀ taʔa wi nɛ̄. Kire gáà nɛ̄ gè, a siɛnnɛ siin kɛ́nì pɛn nɛ̀ pɛ́nì jo: 61«Nàguɔ ŋáà wi 'ki juu nɛ́ jo wire fànʔa yē bè gbɛ̀ jáa bè Kulocɛliɛ Gbùʔɔrɔsaʔa cáan gè, bé koli bè ki faan cɛnyɛ taanri larigɛ nī !»
62A kacuɔnrilɔ kàfɔli kpuɔwɔ wi sí yɛ̀ nɛ̀ yéri nɛ́ Zezi yɛ wè: «Siɛnrɛ wè baa muɔ mɛ́ léʔ, dàa pe nyu nɛ tari muɔ nɛ̄ dàa dè ?»
63A Zezi wi 'pìiri. A kacuɔnrilɔ kàfɔli kpuɔwɔ wi 'wi yɛ: «Kàli Kulocɛliɛ wewiiwe nɛ̄ wè, ma ki juu we mɛ́ a ki yē muɔ wī Kulocɛliɛ Siɛnnyiɛnɛgɔnwɔ wè, Kulocɛliɛ Jaa wè !»
64A Zezi wi 'wi yɛ: «Tire muɔ 'juu nɛ̀ kúɔ dè; m'bé sí ní ki juu yeli mɛ́, nɛ̀ láʔa ŋɔ̀ wè yeli bága Siɛn Pùɔ nyaa wè tɛ́niwɛ Fànʔa Kàfɔli Kulocɛliɛ kàliige mɛ́ gè, dí wi sí de báan kàsadibarɛ nī dè nyìʔɛnɛ nī lè.»
65A kacuɔnrilɔ kàfɔli kpuɔwɔ wi 'fali nɛ̀ wi bururo píle dè nɛ̀ cɛnminɛ wìi nɛ̄ sɛni, nɛ́ jo: «Wi 'Kulocɛliɛ tiʔɛlɛ wè wī, we màakuu ní wè ki nɛ̄ʔ bè siɛnrɛ táà lúʔu wàa nyuɔ nɛ̄ cíginiʔ. Ti n'dɛ, dàa wi 'cúʔɔ nɛ̀ juu dè, ye mìɛni nyɛ́nì ti lúʔu. 66Ye 'jo mɛni ?»
A pe 'jo: «Wi 'yɛli nɛ́ kpúumɔ ní wī !»
67Kire tiʔɛ nī gè, a pe 'fali nɛ sùlugú nɛ wáari wi nɛ̄ yiʔɛ nī gè, a bìli 'wi kpúɔn kaguruyo ní, a pàli wi kpúɔn gbandeliye nɛ̄ yè, 68nɛ́ jo: «-Ki wéli ma ki juu we mɛ́ wêli, muɔ ŋáà wī Kulocɛliɛ Siɛnnyiɛnɛgɔnwɔ wè, ŋáa wi 'muɔ kpúɔn wè ?»
Piɛri 'ki juu nɛ́ jo wire sì Zezi cɛ́n wèʔ
(Mar 14.66-72; Luk 22.56-62; Zan 18.15-18,25-27)
69 Piɛri wire cé sí puu baa tɛ́niwɛ kpànʔanɛ kpáa dàligɛ nī gè; a cɛliwɛ wáà kɛ́ni tòrí, baakuɔwɔ wáà wi puu, a wire 'jo: «Muɔ míɛni 'puu baa nɛ́ Zezi ní wè Galile wuu wè.»
70A Piɛri wi 'ti tíɛnɛ pe mìɛni yiʔɛ mɛ́ gè nɛ́ jo: «Miì cɛ́nì ti cɛ́nʔ, dàa muɔ nɛ nyu dèʔ.»
71Bà wi 'yiri nɛ̀ kɛ́ baa wìile kɔli mɛ́ gè, a baakuɔcuɔ wáà ní nɛ̀ sɛ́nì wi nyaa, a wi 'bìli yɛ bèle bàli pe 'puu baa bèle: «Ŋàa wi 'puu baa nɛ́ Zezi ní wè, Nazarɛtiyé wuu wè.»
72A Piɛri wi ní nɛ̀ ti kìɛ, nɛ̀ cɛ́nì kàli nɛ̀ taʔa baa nɛ́ jo: «Mi sì nàguɔ ŋáà cɛ́n wèʔ !»
73Cɛ̀ri sìʔɛrɛ, bìli pe 'puu baa bèle, a pe 'sìʔɛrɛ nɛ̀ kpɔni Piɛri nɛ̄ wè nɛ́ wi yɛ: «Káaliyɛ wè ti nīʔ, pe tògo wuu wáà wī muɔ wè, muɔ juugɛnmɛ tíimɛ piī nɛ ki tìí.»
74A wi 'yɛ̀ nɛ nyu nɛ kàlí nɛ tari wìi nɛ̄, nɛ́ jo: «Mi sì nàguɔ ŋáà cɛ́n wèʔ !»
Kire lɛ̀lɛ nī lè a gòpɔli wi 'nyɛni.
75A Piɛri wi 'sɔ̀ngi nɛ̀ taa nɛ́ Zezi siɛnrɛ ní dè, dàa wi cé juu wi mɛ́ dè, nɛ́ jo: «Sɛ́ni nɛ́ gòpɔli wi nyɛni wè, muɔ bé ti kìɛ bè taa tɔliyɔ taanri bé jo muɔ sì mi cɛ́nʔ.»
A wi sí yiri kpànʔanɛ nɛ̀ sɛ́nì nyɛni funbiɛnrɛ nɛ̄ kpuʔɔ.
Currently Selected:
Matiye 26: sev
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
