Leviiyé 7
7
Kolimɔ kakuɔrɔ wori dè
1A Yewe ń'nɛ̀ ki juu nɛ́ jo: «Fànʔa kajuʔulo ke n'gɛlɛ gàli gīɛlɛ kolimɔ kakuɔrɔ wuʔulo gèle. Yakaa gī gàa gī cɛ̀njɛngɛ wàlidɛngɛgɛ. 2Tiʔɛ gíì nī pe sí nɛ kakuɔrɔ kaasuʔuro yajuuro kɔni dè, kire tiʔɛ nī pe bé kolimɔ kakuɔrɔ yajuʔu kɔnigi gè míɛni. Kacuɔnriwɔ wi bé ki sìsiɛn nyɛri nyɛri gè gbùʔɔrɔdiʔɛ yafanʔa lìʔɛgɛlɛ nɛ̄ gèle. 3Wi bé sùnmɔ tiɛyɛ yi mìɛni kɔ̀n bè tɛ́ngɛ Yewe yiʔɛ mɛ́ gè: nɛgɛ gè, nɛ́ sùnmɔ tiɛyɛ yi mìɛni ní yè nyàa yi 'ki laafungbuʔɔ nɛ́ ki laara màʔa dè, 4nɛ́ seluʔulo siin ní gèle nɛ́ sùnmɔ ní bè bàa pi 'sɛ̀nnɛ màʔa gèle, nɛ́ nyibɔli ní wè. Tire ti mìɛni bé kɔ̀n nɛ́ seluʔulo ní gèle.
5«Bà kacuɔnriwɔ wi bé ti sórigo gbùʔɔrɔdiʔɛ yafanʔa nɛ̄ gè, kakuɔrɔ yakɔnrɔ dī dàa kàsun ki sórigi Yewe mɛ́ wè. Kolimɔ kakuɔrɔ dī. 6Nàguɔlɔ bálì bīɛlɛ kacuɔnrilɔ bèle, peli yákuɔ pe bé gbɛ̀ kaasɛnrɛ káa dè. Pe 'yɛli pe ti káa tiɛwalidɛngɛgɛ káà nī. Yakaa gī gàa gī cɛ̀njɛngɛ wàlidɛngɛgɛ. 7Kolimɔ kakuɔrɔ fànʔa kajuʔulo gèle, kiyē nugolo nɛ́ kapiʔile kàsulugo kakuɔrɔ wuʔulo ní gèle. Kaasɛnrɛ tire yē kacuɔnriwɔ wire wori, wire ŋáà wi 'kàsulugosuɔ baara kúɔ dè.
8«Kacuɔnriwɔ ŋáà wiī nɛ kakuɔrɔ kaasuʔuro baara kúu dè Yewe yiʔɛ mɛ́ gè, wàa wiiyɛ wori dè, kakuɔrɔ kaasuʔuro yajuʔu ki sɛ̀ngɛ ki bé kò wire wuʔu.
9«Yaliire yakɛnrɛ ó yakɛnrɛ dáà pe 'fúɔ dìbige nī gè kire ga laa yakpɔbigɔ nɛ̄ gè, nɛ̀ fàri yaliire yakɛnrɛ dáà pe 'káli ŋɔ̀mipiʔɛlɛ nī gèle, tire bé puu kacuɔnriwɔ wi wori, ŋàa wi 'ki baara kúɔ dè. 10Yaliire yakɛnrɛ dáà ti mìɛni, dàa pe 'nyaʔami nɛ́ sùnmɔ ní bè, nɛ́ dàa dī sùnmɔ fùn bè, tire ti mìɛni bé puu Arawɔn jaala wori; wàlimɛ sì je puu baaʔ.»
Yanyige yakɔnrɔ wori dè
11«Fànʔa kajuʔulo ke n'gɛlɛ gàli gīɛlɛ yanyige yakɔnrɔ wuʔulo gèle, yakɔnrɔ dáà pe tɛ́ngi Yewe yiʔɛ mɛ́ gè. 12A ki sí nyaa wàa wi 'pɛn nɛ́ ti ní bè Yewe síɛri wè, wi 'yɛli bè yɛrɛ dáà fàri dè wi kacɛ̀ngɛ síɛrilɛ yakɔnrɔ nɛ̄ dè: sìnvarifun búru kpɔbilɔ bálì pe 'nyaʔami nɛ́ sùnmɔ ní bè, nɛ́ sìnvarifun ŋɔ̀minɔ bálì nɛ̄ pe 'sùnmɔ wo bè, nɛ́ míifuɔnibɔ búru kpɔbilɔ bálì pe 'nyaʔami nɛ́ sùnmɔ ní bè#7.12 Wéli baa Tɔ́r 15.3.. 13Búru kpɔbilɔ bálì pe 'kpúɔn nɛ́ sìnvari ní dè, wi 'yɛli bè pàli fàri yanyige yakɔnrɔ nɛ̄ dè, kacɛ̀ngɛ síɛrilɛ wori dè. 14Wi bé búrulo nigbe nigbe láʔala gbuʔulo gálì nɛ̄ gèle bè kɛn Yewe mɛ́ kpuʔɔrɔ.
«Kire kàduʔumɛ búrulo pe bé ní koli bè kò kacuɔnriwɔ wire wuulo, wire ŋáà wi 'yanyige yakɔnrɔ sìsiɛn nyɛri nyɛri gè gbùʔɔrɔdiʔɛ yafanʔa lìʔɛgɛlɛ nɛ̄ gèle. 15Ki 'yɛli pe- kakuɔrɔ kaara káa dè kire cɛnnugo gè, kaara dáà dī yanyige yakɔnrɔ wori dè bè Yewe síɛri wè. Tàa sǐ ga tíi kò bè súɔnʔ.
16«A wàa yanyige yakɔnrɔ ti kɛ́nì yē nyakungɛngɛ yakɔnrɔ dè, kire ga laa kinɛdɛnigɛ yakɔnrɔ dè, ki kaara ti bé gbɛ̀ káa kire cɛnnugo gè. Dàa ti bé kò dè, pe bé gbɛ̀ tire káa ki kpìɛnduu gè. 17Nɛ̀ ki yaʔa dìi ti bé kò bè cɛnyɛ taanri kúɔ yè, ki 'yɛli pe- tire sórigo. 18A siɛn 'yanyige yakɔnrɔ kaara káa dè cɛnyɛ taanriwuʔu nɛ̄ gè, Yewe sǐ ga tíi fɔ̀li kire siɛn nɛ̄ wè ŋàa wi 'ti kɔ̀n dèʔ; tiǐ ga tíi còʔ. Tire yē yanuʔɔrɔ Yewe yiʔɛ mɛ́ gè; ŋàa wi 'ti káa dè, wi kolimɔ pi bé tuu wi nɛ̄.
19«A kaara díì 'cò nɛ̀ taa yakaa nɛ̄ gàa ki 'núʔɔ Yewe yiʔɛ mɛ́ gè, piyě ga tíi ti káaʔ; ki 'yɛli pe- ti sórigo kàsun nī.
«Kaara dáà sí ti 'kò cìilide dè Yewe yiʔɛ mɛ́ gè, siɛn ó siɛn ŋáà wī cìiliwe wè#7.19 Wéli baa 5.2-3; 13.45-46; 15.2-3,19., wire bé gbɛ̀ ti káa. 20Nɛ̀ sí ki yaʔa a wàa 'yanyige yakɔnrɔ kaara káa dàa dī Yewe wori dè, a wi sí 'núʔɔ Yewe yiʔɛ mɛ́ gè#7.20 Wéli baa 12.1-8., pe bé kire siɛn yige péwu wi siɛnnɛ sunʔɔmɔ nī bè. 21Bɛ̀ míɛni ki yē, a wàa 'cò nɛ̀ taa yakaa nɛ̄ gàa ki 'núʔɔ Yewe yiʔɛ mɛ́ gè, a ki cɛ́nì yē siɛn fuɔnrɔ yo, á kire bɛ̀ʔ nyàʔayɛgɛ kire ga laa yajuʔu núʔɔgɔ yo, kire ga laa yafungo yɛgɛ gáà gī núʔɔgɔ gè, a wi pɛ́nì yanyige yakɔnrɔ kaara káa dè dàa dī Yewe wori dè, pe bé kire siɛn yige péwu wi siɛnnɛ sunʔɔmɔ nī bè.»
22A Yewe sí ń'nɛ̀ ki juu Misa mɛ́ nɛ́ jo:
23«-Ki juu Isirayɛliyé mɛ́ bèle ma fànʔa kajuʔulo gálì tìɛ gèle pe nɛ̄:
«Yeli sǐ ga tíi nùɔ sùnmɔ káa bèʔ, nɛ́ sìnbuɔ sùnmɔ ní bèʔ, nɛ́ síkpuɔ sùnmɔ ní bèʔ.
24«Yawiʔi ó yawiʔi gáà ki 'kùu kìimɛ gè, kire ga laa yawiʔi gáà nyàʔayɛgɛ káà kiiyɛ ki 'kpúu gè, yeli bé gbɛ̀ baara táà tiiyɛ kúɔ nɛ́ ki sùnmɔ ní bè, yeli sǐ ga tíi pi káa púloʔ ! 25Kakuɔrɔ kaara dáà kàsun ki sórigi dè Yewe mɛ́ wè, a siɛn wáà 'ti sùnmɔ káa bè, pe bé kire siɛn yige wè péwu wi siɛnnɛ sunʔɔmɔ nī bè.
26«Yeli kòridiɛyɛ yi mìɛni nī yè, yeli sǐ ga tíi sìsiɛn káa gè púloʔ, a ki cɛni yē sínjinʔɛ sìsiɛn yo, á kire bɛ̀ʔ yajuʔu wuʔuʔ yo. 27A ki sí nyaa wàa pɛ́nì sìsiɛn káa, pe bé kire siɛn yige wè péwu wi siɛnnɛ sunʔɔmɔ nī bè#7.27 Wéli baa Sél 9.4; Lev 17.10-14; Fàn 12.16,23; 15.23..»
28A Yewe sí ń'nɛ̀ ki juu Misa mɛ́ nɛ́ jo: 29«-Ki juu Isirayɛliyé mɛ́ bèle ma fànʔa kajuʔulo gálì tìɛ gèle pe nɛ̄:
«Siɛn ŋáà wi 'pɛn nɛ́ yanyige yakɔnrɔ ní dè bè ti kɛn Yewe mɛ́ wè, wi bé Yewe liɛlɛ kɔ̀n lè ti nī. 30Wi bé pɛn nɛ́ ti ní wi tíimɛ kiyɛ nī yè bè ti sórigo Yewe yiʔɛ mɛ́ gè. Wi bé pɛn nɛ́ sùnmɔ ní bè nɛ́ dìribuu ní wè, bè dìribuu yɛ̀gɛ wè naamɛ Yewe yiʔɛ mɛ́ gè.
31«Bà kacuɔnriwɔ wi bé ti sùnmɔ tiɛyɛ sórigo yè gbùʔɔrɔdiʔɛ yafanʔa nɛ̄ gè, nɛ̀ ki yaʔa dìribuu kaara tire yē Arawɔn nɛ́ wi jaala wori. 32Yeli yanyige yakɔnrɔ kaara ti kàliige ciile lè, yeli bé lire kɛn kpuʔɔrɔ kacuɔnriwɔ mɛ́ wè. 33Arawɔn jaala nī bèle, ŋàa wi 'yanyige yakɔnrɔ sìsiɛn nɛ́ ti sùnmɔ tiɛyɛ tɛ́ngɛ yè Yewe yiʔɛ mɛ́ gè, wire liɛlɛ lire nī kàliige ciile lè.
34«Nɛ́ ki cɛ́n dìribuu kaara dáà pe yɛ̀gí naamɛ Yewe yiʔɛ mɛ́ gè nɛ́ kpuʔɔrɔ kàliige ciile ní lè, mi Yewe mi nyɛ́nì ti láʔala Isirayɛli siɛnnɛ pe yanyige yakɔnrɔ nɛ̄ dè, nɛ̀ ti kɛn kacuɔnriwɔ Arawɔn nɛ́ wi jaala mɛ́ bèle; pe liɛlɛ lire nī. Fànʔa kaala nī súuri.»
35Tire yē Arawɔn nɛ́ wi jaala liɛlɛ kakuɔrɔ nī dè dàa kàsun ki sórigi dè, dàa dī Yewe wori dè, nɛ̀ ki líɛ cɛngɛ gíì pe 'pe tɛ́ngɛ peri kacuɔnrilɔ baara kúu dè Yewe yiʔɛ mɛ́ gè. 36Tire dī dàa Yewe 'juu nɛ̀ gbɛ̀ngɛ Isirayɛli siɛnnɛ mɛ́ bèle pe- ti kɛn pe mɛ́ cɛngɛ gíì Misa wi 'kacuɔnrilɔ nyíɛnɛ bèle nɛ̀ kɔ̀n nɛ́ sùnmɔ wo pe nɛ̄. Fànʔa kaala nī súuri kɛ̀ngɛlɛ ke mìɛni nī.
Kakuɔrɔ fànʔa kajuʔulo siɛnrɛ ti kúɔdiʔɛ gè
37Keli yē fànʔa kajuʔulo gàli ke 'kakuɔrɔ kaasuʔuro wori kúɔ dè, nɛ́ yaliire yakɛnrɛ ní dè, nɛ́ kapiʔile kàsulugo kakuɔrɔ ní dè, nɛ́ kolimɔ kakuɔrɔ ní dè, nɛ́ siɛntɛngɛ kakuɔrɔ kele wori ní dè, nɛ́ yanyige yakɔnrɔ ní dè, 38gàli Yewe 'juu nɛ̀ gbɛ̀ngɛ Misa mɛ́ wè Sinayii nyagurugo nɛ̄ gè, cɛngɛ gíì wi 'ki juu nɛ̀ gbɛ̀ngɛ Isirayɛli siɛnnɛ mɛ́ bèle nɛ́ jo peri báan nɛ́ pe kpuʔɔrɔ ní dè Yewe mɛ́ wè, baa Sinayii waama kùlo nī lè.
Currently Selected:
Leviiyé 7: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
