Leviiyé 6
6
Kajuudiʔɛlɛ kálì kiyeyɛ kacuɔnrilɔ mɛ́ bèle
1A Yewe sí ń'nɛ̀ ki juu Misa mɛ́ nɛ́ jo: 2«-Ki juu ma gbɛ̀ngɛ Arawɔn nɛ́ wi jaala mɛ́ bèle, ma kire fànʔa kajuʔulo tìɛ gèle pe nɛ̄.»
Kakuɔrɔ kaasuʔuro wori dè
«Fànʔa kajuʔulo ke n'gɛlɛ gàli gīɛlɛ kakuɔrɔ kaasuʔuro wuʔulo gèle#6.2 Kaasuʔuro kakuɔrɔ dè, pe 'puu nɛ ti kúu sínbinimɛ nɛ́ cɛnguʔɔ súuri Isirayɛli siɛnnɛ mɛ́ bèle.. Kakuɔrɔ kaara ti bé kò kàsun nɛ̄ gè gbùʔɔrɔdiʔɛ yafanʔa naamɛ gè pìlige ki mìɛni nī. Kàsun ki bé kò de nyí ti láara. 3Kacuɔnriwɔ wi bé burudɔnigɔ le gè nɛ́ jàdigi ní, dàa dī lɛn jèsii pìniwe wori dè. Bà wi bé cúnʔɔ kɔ̀n gè, cúnʔɔ gáà gī kakuɔrɔ kaasuʔuro wuʔu gè, bè ki tɛ́ngɛ gbùʔɔrɔdiʔɛ yafanʔa táanni gè.
4«Kire kàduʔumɛ gè wi bé nɛ́ wi bururo fòri dè bé tàa tiiyɛ le, bé kɛ́ nɛ́ cúnʔɔ ní gè bàa ki wo bùguro kàduʔu mɛ́ gè, tiɛciilige tiʔɛ nī gè#6.4 Kacuɔnrilɔ burudo ti 'puu pe ti nii saawalidɛngɛgɛ kire yákuɔ nī (wéli baa Ezek 44.17-19).. 5Kàsun ki béri nyí gbùʔɔrɔdiʔɛ yafanʔa nī gè; kiì yɛli bè fígi bè nyaaʔ. Cɛngɛ ó cɛngɛ sínbinimɛ táanni, kacuɔnriwɔ wi bé kásiin le yè kàsun nī gè, bé kakuɔrɔ kaasuʔuro kaara taʔa dè kàsun naamɛ gè, bé sí yanyige yakɔnrɔ sùnmɔ tiɛyɛ taʔa yè ti nɛ̄ bè ti sórigo. 6Kàsun ki béri nyí gbùʔɔrɔdiʔɛ nī gè súuri; kiǐ fígi bè nyaaʔ.»
Yaliire yakɛnrɛ wori dè
7«Fànʔa kajuʔulo ke n'gɛlɛ gàli gīɛlɛ yaliire yakɛnrɛ wuʔulo gèle. Arawɔn jaala bèle, peli pe bé pɛn nɛ́ yaliire yakɛnrɛ ní dè Yewe yiʔɛ mɛ́, gbùʔɔrɔdiʔɛ yafanʔa yiʔɛ mɛ́ gè. 8Kacuɔnriwɔ wáà bé yakɔnrɔ ti kagbuunyiʔɛ nigbe kɔ̀n, míifuɔnibɔ báà pe 'nyaʔami nɛ́ sùnmɔ ní bè, nɛ́ wusuna cìiliwe wi mìɛni ní. Wi bé ti sórigo gbùʔɔrɔdiʔɛ yafanʔa nɛ̄ gè ti- puu sɔ̀ngidaa wori, dàa nùdaanna ni Yewe fungo nyígi gè.
9«Arawɔn nɛ́ wi jaala ní bèle, peli pe bé sɛnrɛ káa dè dàa ti 'kò yaliire yakɛnrɛ nī dè, sìnvarifun búru wori dè, tiɛwalidɛngɛgɛ káà nī Kpàlidiʔɛ Kpátaʔa dàligɛ nɛ̄ gè. 10Tiì yɛli bè suʔɔ nɛ́ sìnvari níʔ. Pe liɛlɛ lire nī nàa mi Yewe mi 'kɛn pe mɛ́ lè, nàa ni 'kɔ̀n kakuɔrɔ yakɔnrɔ nī dè dàa kàsun ki sórigi dè. Yakaa gī gàa gī cɛ̀njɛngɛ wàlidɛngɛgɛ, bɛ̀ kapiʔile kàsulugo kakuɔrɔ nɛ́ kolimɔ kakuɔrɔ tíɛlɛ dè. 11Arawɔn siimɛ nàguɔlɔ bèle, pe mìɛni bé gbɛ̀ ti káa#6.11 Yaliire yakɛnrɛ liɛlɛ lè náʔa gè, tire yé puu nàguɔlɔ yákuɔ wori (wéli baa 6.22; 7.6). Tàa 'puu baa cɛlilɛ pe cî gbɛ̀ tire káa, bàli bīɛlɛ kacuɔnrilɔ nariyɛ wuulo bèle (wéli baa 10.14; 22.12-13).. Tire liɛlɛ náà ni 'yiri kakuɔrɔ yakɔnrɔ nī dè, dàa kàsun ki sórigi Yewe mɛ́ wè; pe liɛlɛ lire nī súuri, kɛ̀ngɛlɛ ke mìɛni nī. Tire yē fànʔa kaala lɛ̀lɛ ó lɛ̀lɛ. A siɛn ó siɛn kire ga laa yɛgɛ ó yɛgɛ 'cò ti nɛ̄, ki bé kò wàlidɛngɛgɛ#6.11 A wàa yé cò nɛ̀ taa ti nɛ̄, nɛ̀ ki yaʔa wi wè wàlidɛngɛwɛ wèʔ, wi bé wuʔɔgɔ taa. Wéli baa Tɔ́r 17.1-5..»
12A Yewe sí ń'nɛ̀ ki juu Misa mɛ́ nɛ́ jo:
13«Nɛ̀ líɛ cɛngɛ gíì nɛ̄ pe 'siɛnnyiɛnɛgɔn sùnmɔ wo bè Arawɔn nɛ́ wi jaala nɛ̄ bèle bè pe wàli dɛ́ngɛ wè, ki n'gɛ kpuʔɔrɔ dáà pe béri kanʔa Yewe mɛ́ wè. Ti bé puu míifuɔnibɔ juubaanyɛni tílaga gè, gàa gī yaliire yakɛnrɛ lɛ̀lɛ ó lɛ̀lɛ nī, tílaga káà sínbinimɛ táanni, kàa cɛnguʔɔ táanni. 14Ti bé fúɔ yakpɔbigɔ nɛ̄ nɛ́ sùnmɔ ní bè, dí muɔ ti nyaʔami cɛ̀ngɛ. Muɔ bé ti peguɔrɔ cùnʔɔ dè, bé nɛ́ pɛn nɛ́ ti ní Yewe mɛ́ wè; yakɔnrɔ dī, dàa nùdaanna ni Yewe fungo nyígi gè.
15«Kɛ̀ngɛlɛ ke mìɛni nī gèle, Arawɔn jaa ŋáà pe bága wàli bè tɛ́ngɛ bé siɛnnyiɛnɛgɔn sùnmɔ wo bè wi nɛ̄ wè kire ga buu wi- Arawɔn baara líɛ dè, wire wi béri yaliire yakɛnrɛ dáà ti mìɛni sórigi dè Yewe mɛ́ wè. Tire yē fànʔa kaala lɛ̀lɛ ó lɛ̀lɛ. 16Yaliire yakɛnrɛ dáà ti mìɛni kacuɔnrilɔ pe bé kɔ̀n dè, ti 'yɛli pe- ti mìɛni sórigo. Làa fáala sǐ ga tíi káaʔ#6.16 Wéli baa 4.3-12; 6.23..»
Kapiile kàsulugo kakuɔrɔ wori dè
17A Yewe sí ń'nɛ̀ ki juu Misa mɛ́ nɛ́ jo:
18«-Ki juu ma gbɛ̀ngɛ Arawɔn nɛ́ wi jaala mɛ́ bèle, ma kire fànʔa kajuʔulo tìɛ gèle pe nɛ̄.
«Fànʔa kajuʔulo ke n'gɛlɛ gàli gīɛlɛ kapiʔile kàsulugo kakuɔrɔ wuʔulo gèle. Pe 'yɛli bè kapiʔile kàsulugo yajuʔu kɔni gè Yewe yiʔɛ mɛ́ tiʔɛ gáà nī pe nɛ̂ kakuɔrɔ kaasuʔuro yajuʔu kɔni gè. Yakaa gī gàa gī cɛ̀njɛngɛ wàlidɛngɛgɛ.
19«Kacuɔnriwɔ ŋáà wi 'kapiʔile kàsulugo kakuɔrɔ baara kúu dè, wire bé ti káa tiɛwalidɛngɛgɛ káà nī Kpàlidiʔɛ Kpátaʔa dàligɛ nɛ̄ gè. 20A siɛn wáà kire ga laa yɛgɛ káà 'cò ti nɛ̄, ki bé kò wàlidɛngɛgɛ#6.20 Wéli baa koliyo 11 kaliwɛgɛ ki táanmɛ gè.. A ki sí nyaa ti sìsiɛn káà 'nyɛri nɛ̀ wo burugo nɛ̄ gè, tiɛwalidɛngɛgɛ káà nī muɔ bé ki jíge. 21A pe sí kakuɔrɔ kaara suʔɔ dè kàjɔli nī lè, pe 'yɛli bè ni kpúɔn muʔɔrɔ. A ki yē kányiɛrɛ nɛ̀gɛdaʔa nī pe 'ti suʔɔ dè, ki 'yɛli pe- ki sɔ́migɔ pe jíge, pe sí ki sulu nɛ́ luʔɔ ní.
22«Nàguɔlɔ bálì bīɛlɛ kacuɔnrilɔ bèle, peli yákuɔlɔ pe bé gbɛ̀ ti káa. Yakaa gī gàa gī cɛ̀njɛngɛ wàlidɛngɛgɛ gè. 23Nɛ̀ ki yaʔa yeli sǐ ga tíi kapiʔile kàsulugo kaara káa dèʔ, dàa sìsiɛn ní pe 'yɛli pe- pɛn Kpàlidiʔɛ Kpátaʔa nī gè bè kàsulugosuɔ baara kúɔ dè saawalidɛngɛgɛ nī gèʔ. Ti 'yɛli pe- ti sórigo péwu kàsun nī#6.23 Wéli baa 4.3-21 ..»
Currently Selected:
Leviiyé 6: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
