Leviiyé 18
18
Fànʔa siɛnrɛ dáà ti nyu fìɛrɛfun kele nɛ̄ gèle
1A Yewe 'ki juu Misa mɛ́ nɛ́ jo:
2«Ma siɛnrɛ dáà juu dè Isirayɛliyé mɛ́ bèle:
«Mi yē Yewe, yeli Kulocɛliɛ wè. 3Yeli sì yɛli bága kele gálì ke kàli kpíʔile gàli piyē nɛ kpínʔini Ezipiti kùlo nī lèʔ, baa yeli yé puu tɛ́ninɛ bèle, nɛ́ gàli piyē nɛ kpínʔini míɛni Kanaa kùlo nī lè, baa mi bé sa yeli nyɔ́gɔ bèle. Ye fǎga de tári de yɛligi nɛ́ pe fànʔa kele ní gèleʔ. 4Yeli 'yɛli bèri lúru mi kàyuʔujuuro mɛ́ dè, yeli béri mi fànʔa kele cògí gèle bèri tári de yɛligi nɛ́ ti ní. Mi yē Yewe, yeli Kulocɛliɛ.
5«Yeli béri mi fànʔa kele nɛ́ mi kàyuʔujuuro cògí dè; a siɛn wi 'ti cò dè, wi bé sìi taa tire kɛnmɛ nɛ̄. Mi yē Yewe#18.5 Wéli baa Nɛy 9.29; Ezek 18.9; 20.11-13; Luk 10.27-28. Ki siɛnrɛ ti 'juu baa Wurɔ 10.5; Gal 3.12 ..
6«Nàguɔ wáà fáala sì yɛli bè sìʔɛrɛ kpɔni wi narigɛ wuu wáà nɛ̄ʔ ŋàa wī cɛliwɛ wèʔ bè wi cɛ́n cɛliwɛʔ. Mi yē Yewe.
7«Muɔ fǎga fìɛrɛ wáa muɔ tuu nɛ̄ wè bè muɔ yàa cɛ́n wè cɛliwɛʔ. Nɛ́ ki cɛ́n wiī muɔ yàa; muɔ sì yɛli bè wi cɛ́n cɛliwɛʔ.
8«Muɔ fǎga muɔ tuu cuɔ wáà fáala cɛ́n cɛliwɛʔ. A muɔ 'kire kpíʔile gè, muɔ 'fìɛrɛ tɔ́n muɔ tuu nɛ̄ wè#18.8 Wéli baa Lev 20.11; Fàn 27.20; Kor1 5.1 .. 9Muɔ fǎga muɔ siinyɛni cɛ́n wè cɛliwɛʔ, ŋàa wī muɔ tuu wi póri wè, á kire bɛ̀ʔ ŋàa wī muɔ yàa póri wèʔ, ŋàa wi 'liɛ nɛ́ muɔ nī saanugo nī gè, á kire bɛ̀ʔ a wi cɛ́nì liɛ kɔli káà kiiyɛ mɛ́ yo#18.9 Wéli baa 20.17; Fàn 27.22; Sam2 13.11-14; Ezek 22.11 ..
10«Muɔ fǎga muɔ jaa wi póri cɛ́n wè cɛliwɛʔ, kire ga laa muɔ póri wi póri wèʔ. A muɔ 'kire kpíʔile gè, muɔ 'tíimɛ fìɛrɛ wáa mìɛ nɛ̄.
11«Muɔ tuu cuɔ wáà póri wè, muɔ fǎga wi cɛ́n cɛliwɛʔ. Wi yē muɔ tuu pùɔ wī, nɛ́ ní muɔ siinyɛni.
12«Muɔ tuu laayirinyɛni ŋáà wī cɛliwɛ wè, muɔ fǎga wi cɛ́n cɛliwɛʔ. Wiī muɔ tuu siinyɛni ŋáà wi 'kpɔni wi nɛ̄ wè. 13Muɔ yàa wi laayirinyɛni ŋáà wī cɛliwɛ wè, muɔ fǎga wi cɛ́n cɛliwɛʔ. Wiī muɔ yàa siinyɛni ŋáà wi 'kpɔni wi nɛ̄ wè.
14«Muɔ tuu laayirinyɛni ŋáà wī nàguɔ wè, muɔ sì yɛli bè fìɛrɛ tɔ́n wi nɛ̄ bè wi cuɔ cɛ́n wè cɛliwɛʔ. Nɛ́ ki cɛ́n wiī muɔ tuu wáà cuɔ.
15«Muɔ fǎga muɔ jaa cuɔ cɛ́n wè cɛliwɛʔ. Muɔ jaa cuɔ wī; muɔ sì yɛli bè wi cɛ́n cɛliwɛʔ#18.15 Wéli baa Sél 38.26; Lev 20.12; Ezek 22.11 ..
16«Muɔ fǎga muɔ laayirinyɛni wáà cuɔ cɛ́n cɛliwɛʔ. Nɛ́ ki cɛ́n muɔ bé fìɛrɛ tɔ́n muɔ laayirinyɛni nɛ̄ wè#18.16 Wéli baa 20.21; Mat 14.3-12..
17«Nuufɔli nɛ́ wi póri wè, muɔ fǎga pe siin cɛ́n bèle cɛlilɛʔ. Muɔ jaa póri yo, kire ga laa muɔ póri wi póri yo, muɔ fǎga pe wáà líɛ bè wi cɛ́n cɛliwɛʔ. Piyē muɔ siinyɛninɛ bálì pe 'kpɔni muɔ nɛ̄ wè: kapiigbuʔɔ gī#18.17 Wéli baa 20.14; Fàn 27.23..
18«Muɔ fǎga muɔ cuɔ wi siinyɛni líɛ wi yejuɔʔ, bè wi cɛ́n cɛliwɛʔ, bè ki yaʔa muɔ cuɔ wi tíin sìi nɛ̄.
19«A cɛliwɛ wi yē núʔɔwɔ wi gbélige lɛ̀lɛ nī lè, muɔ fǎga wi nyɔ́gɔ saʔa nīʔ#18.19 Wéli baa 15.24; 20.18; Ezek 22.10..
20«Muɔ fǎga muɔ siɛnnyɛni wi cuɔ cɛ́n wè cɛliwɛʔ. A muɔ 'kire kpíʔile gè muɔ bé mìɛ núʔɔ#18.20 Wéli baa Yir 20.14; Lev 20.10; Fàn 5.18; Sam2 11.2–12.13 ..
21«Muɔ fǎga muɔ puɔ wáà fáala kpúu wè bè kɛn Mɔlɔki#18.21 Mɔlɔki wire yé puu Amɔyé pe kulocɛliɛ wáà. Pe 'puu nɛ pe pìile nyɔ́gi bèle kàsun nī gè bèri Mɔlɔki sungu nɛ́ pe ní. Wéli baa 20.2-5; Kùlo2 23.10; Zer 32.35 . yasungo mɛ́ gèʔ, bè muɔ Kulocɛliɛ míʔɛ faʔa gèʔ. Mi yē Yewe#18.21 Wéli baa 20.2-5; Fàn 12.31; Kùlo2 17.17; Zer 7.31; Ŋún 106.37-38 ..
22«Muɔ sì yɛli bè sínɛ nɛ́ muɔ nàganyɛni níʔ, majo cɛliwɛ wīʔ. Kire yē kafunnɔ náà nī sìpiile#18.22 Wéli baa Sél 19.5; Lev 20.13; Kàyu 19.22; Wurɔ 1.27 ..
23«Muɔ sì yɛli bè sínɛ nɛ́ yajuʔu níʔ; muɔ bé mìɛ núʔɔ nɛ́ ki ní. Cɛliwɛ míɛni sì yɛli bè wìi kɛn yajuʔu mɛ́ bè sínɛ nɛ́ ki nīʔ; tètii kaala nī#18.23 Wéli baa Yir 22.18; Lev 20.15-16; Fàn 27.21..
24«Ye fǎga yìye núʔɔ nɛ́ kaala náà ni làa níʔ, nɛ́ ki cɛ́n kele gálì keli ní kùlogolo siɛnnɛ pe 'pìye núʔɔ, bàli mi je cìra yeli yiʔɛ mɛ́ gè. 25Kùlo ni mìɛni ni yé kò núʔɔnɔ, a mi 'pe wuʔɔ pe kolimɔ kɛnmɛ nɛ̄ bè. Kire nɛ̄ kùlo ni bé ni tɛ́nivɔlilɔ tùgu bèle bè yige.
26«Yeli bèle, yeli 'yɛli bè mi fànʔa kele nɛ́ mi kàyuʔujuuro cò dè. Ye fǎga tíi bága kafunnɔ láà fáala kpíʔileʔ, a ki cɛ́nì nyaa yeli tíimɛ wuu wáà wī yo, a ki cɛ́nì nyaa nabɔnwɔ ŋáà wī tɛ́niwɛ yeli sunʔɔmɔ nī bè yo. 27Nɛ́ ki cɛ́n siɛnnɛ bálì pe 'puu baa yeli yiʔɛmɛ gè, peli yé kafungolo gálì kpíʔile gèle, a kùlo ni 'kò núʔɔnɔ. 28Kire kɛnmɛ nɛ̄ ye fǎga kùlo núʔɔ lèʔ, kire ga buu kùlo ni fǎga yeli tùgu bè yigeʔ, majo bɛ̀ ni yé kùlogolo gálì siɛnnɛ tùgu bèle nɛ̀ yige wè, bàli pe 'puu baa yeli yiʔɛmɛ gè. 29Nɛ́ ki cɛ́n bàli pe mìɛni pe 'kafungolo gálì kpíʔile gèle, pe bé pe yige péwu pe siɛnnɛ sunʔɔmɔ nī bè.
30«Yeli 'yɛli bè mi kajuugbɛngɛlɛ cò gèle, kire ga buu yeli fǎga kafunnɔ láà fáala kpíʔileʔ, gàli siɛnnɛ pe yé kpíʔile sɛ́ni yeli 'jíin baa kùlo nī lè. Bɛ̀ ki bé puu yeli sǐ ga tíi yìye núʔɔʔ. Mi yē Yewe, yeli Kulocɛliɛ wè.»
Currently Selected:
Leviiyé 18: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
