Sélimɛ 49
49
Yakuba 'diba kpíʔile wi jaala mɛ́ bèle
1A Yakuba 'wi jaala yeri bèle nɛ̀ gbuʔulo nɛ́ pe yɛ: «Ye‑ gbuʔulo mi táanni mi‑ sí mbànʔa kele juu gèle bè tìɛ yeli nɛ̄, gàli ke bé ba yeli taa gèle.
2Ye‑ sìʔɛrɛ ye kpɔni mi nɛ̄,
yeli Yakuba jaala bèle,
yéri lúru.
Yeri Isirayɛli siɛnrɛ lúru dè,
yeli tuu wè.
3Wurubɛni, muɔ wī
mi jaapeliwe wè,
mi ŋɔri dè,
mi yasɛnbelige gè
gàa mi 'taa mi nàyelige
lɛ̀lɛ nī lè.
Muɔ 'tóri muɔ cɔninɔ
nɛ̄ bèle
nɛ́ kpuʔɔrɔ ní,
nɛ́ ní fànʔa ní.
4Muɔ nɛ fílagi bɛ̀ luʔɔ tíɛlɛ,
muɔ sì ní muɔ yéridiʔɛ
pélige taa gèʔ,
nɛ́ ki cɛ́n muɔ nyɛ́nì
muɔ tuu cuɔ nyɔ́gɔ wè
saʔa nī
nɛ̀ muɔ tuu yasinɛgɛ cúʔɔ gè.
ʔé ! Wi nyɛ́nì jíin baa#49.4 Wéli baa 35.22. !
5Simɛyɔ nɛ́ Levii ní wè,
peli yē wàa nɛ́ wi luɔ,
peli funyɔ yiī nuyɔ.
Peli yakpuɔnyɔ
yiī fungbɛnyɛ ŋuʔɔnɔ !
6Mi wè nɛ caa bè jíin
pe gboli nī lèʔ;
mi fungo kiì yɛli
ki‑ pínɛ nɛ́ pe níʔ.
Nɛ́ ki cɛ́n pe fungbɛnyɛ nī yè,
a pe 'nàguɔlɔ kpúu;
a pe 'ki kɔ̀rirɔ nɛ̀ nɛ̀piʔɛlɛ
kapɛnyɛ celile yè#49.6 Wéli baa 34.25..
7Pe funyɛriyɛ nyáà feliye yè,
mi 'dɛ́ngɛ taʔa wè yi nɛ̄,
nɛ́ ki cɛ́n yi nyɛ́nì pii nɛ̀
cáanri !
Pe funyɛrigboliyo nyáà feliye yè,
mi dɛ́ngɛ taʔa wè
yi nɛ̄,
nɛ́ ki cɛ́n yi 'núʔɔ nɛ̀ cáanri !
M'bé pe cɛrigɛ Yakuba
narigɛ nī gè,
bé ní pe yɛ́ligɛ màʔa
Isirayɛli kùlo nī lè.
8 Zuda muɔ wè, muɔ wī muɔ
cɔninɔ pe béri kpóri.
Muɔ kɔli ki béri muɔ leguulo
kɔ́ri bèle kànyaa mɛ́ gè.
Muɔ tuu jaala,
pe béri tun de cúbulo
muɔ yiʔɛ mɛ́ gè.
9ʔaan, Zuda yē bɛ̀ jàriyɛliwɛ
tíɛlɛ.
Mi jaa, muɔ nyɛ́nì kɛ́ dèzuʔu
nɛ̄ nɛ̀ sɛ́nì kpúu;
muɔ nyɛ́nì káguro cáan dè
nɛ̀ sínɛ bɛ̀ jàri tíɛlɛ,
bɛ̀ jàrinuu tíɛlɛ. Ŋáa wi bé
gbɛ̀ wi yɛ̀gɛ ?
10Fànʔa kàgbiile niǐ ga tíi
yiri Zuda narigɛ nī gèʔ,
nɛ̀ pínɛ fànʔa sápile niǐ ga
tíi yiri wi kiyɛ nī yèʔ,
fúɔ bè taa ni kàfɔli wi ba pɛn,
wire ŋáà mɛ́ siɛnfeliye yi
béri lúru wè#49.10 Tiʔɛ gáà siɛnjuuro dè, tiī nɛ nyu Kulocɛliɛ Siɛnnyiɛnɛgɔnwɔ wuʔu nɛ̄ gè, ŋàa wi cî ga ba sii wè, Zuda tùlugo nī gè..
11Wi béri wi sèfɛnnɛ puu lè
ɛrɛzɛn tìrige nɛ̄ gè,
béri sèfɛnbuɔ puu wè
ɛrɛzɛn fétirige nɛ̄ gè
gàa gī cɛ̀ngɛ gè.
Wi béri wi buruyo jíri yè
diviɛn nī wè,
béri wi burugbuʔɔ jíri gè
ɛrɛzɛn luʔɔ nī gè#49.11 Siɛnrɛ dáà ti juugɛnmɛ tiī nɛ siʔi kɛnmɛ tìí gàa nī yaliire tiī nɛ nyuʔɔ dè; a sèfɛnnɛ cɛ́nì tiire yasɛnrɛ káa dè yo, ki nɛ̌ kàa yige siʔi ki yaliire nī dèʔ. A ki cɛ́nì nyaa siʔi yasɛnrɛ ti 'nyuɔ dè, pe bé gbɛ̀ ɛrɛzɛn luʔɔ tíʔɛ gè bè buruyo jíge yè, ki nɛ̌ kàa yige siʔi yasɛnrɛ nī dèʔ..
12Ɛrɛzɛn diviɛn wi bé
wi nyapigele
nyɛ́nigɛ gèle,
nɛ̀yirimɛ pire bé sí
wi gànʔana fílige gèle#49.12 Siɛnrɛ dáà ti kɔri wè, kire nɛ ki tìí a siɛn yē ladaanma nɛ̄ níɛ gbun nɛ tíngi wè, ki nɛ̂ cɛ́n wi yiʔɛ nɛ̄ gè..
13Zabulɔn wire bé puu tɛ́niwɛ
kuʔɔjii gògogo nɛ̄ gè,
luʔɔ kɔ́rikpoliyo yi béri
báan wi mɛ́ de yèrí
kuʔɔjii gògogo nɛ̄ gè.
Wi kùlo láʔala
ni bé líɛ bè sa nɔ̀
Siidɔn tɛ́nimɛ táanni bè.
14Izakari wire yē sèfɛnnɛ tíɛlɛ
nàa nī ŋɔri ní dè,
nɛ̀ ki yaʔa wiī sínɛwɛ
sìnbaduuyo siin
sunʔɔmɔ ní.
15A wi 'ki nyaa ŋɔ́daala
lire yē pɔ́rilɔ,
nɛ́ míɛni kùlo ni yē tàanna.
Kire nɛ̄ wi nɛ̂ wi
fíkɛnnyugo tíʔɛ gè nɛ̀
tugoro tugo dè,
nɛ̀ kò sùkulowo nɛ fànʔa
baara kúu.
16Dan béri wi siɛnnɛ pe kàyuʔu
nyu gè,
bɛ̀ Isirayɛli saʔa tùlugo káà
tíɛlɛ.
17Dan wire yē bɛ̀ wɔ̀bugɔ
tíɛlɛ gàa gī sínɛgɛ gè
koligo nɛ̄ gè,
wàfiraso tíɛlɛ
ŋàa wiī kobile nɛ̄ lè,
níɛ sunʔɔ nɔgi gè tɔligɔ nɛ̄ gè,
kire ga buu suɔnfɛwɛ
wi‑ láʔa tuu bè cɛ̀li.
18ʔé Yewe, suɔlɔ náà
muɔ nɛ kanʔa lè,
lire nɛ̄ mi 'mi sɔ̀ngirɔ taʔa dè.
19Gadi wire wè,
siɛngbɛninɛ pe béri wi caa de ŋɔ́gi;
wi béri tari pe nɛ̄ pe kàduʔu
mɛ́ gè bè pe jáa.
20Azɛri wire nɛ yaliire fáli nɛ
taʔa;
wi béri sitaanra sori
kùlofɔlilɔ mɛ́ bèle.
21Nafitali wire yē bɛ̀ sùɔ tíɛlɛ
ŋàa wi yē wìimɛ nɛ yogi nɛ
mári wè;
wi béri sàpigele sii cɛ̀ngɛlɛ#49.21 wi béri sàpigele sii cɛ̀ngɛlɛ Siɛnrɛ dáà míɛni ti bé gbɛ̀ juu bè jo: wiī nɛ diba siɛnrɛ nyu..
22Tiige gáà ki sɛngi gè, kire gī
Yusufu wè.
Pe 'ki cɔ́ri lawiile táanni,
a ki lère ti 'yɛ́ligɛ nɛ̀ tuu
gungo nɛ̄ gè.
23 Sandaliyɛ fɔ́lilɔ
pe 'wi caa nɛ̀ ŋɔ́,
nɛ̀ ŋaaya ŋɔ yè wi nɛ̄,
nɛ́ nyabiɛnnɛ kpíʔile
nɛ̀ cáan nɛ́ wi ní.
24Kire nɛ́ ki mìɛni
wi sandali
kiì puu nɛ fúnʔ,
a wi kiyɛ yi 'kò lìriye
Yakuba Kulocɛliɛ Ŋɔrifɔli
wi barigɛ nī,
wire ŋáà wī Nàʔavɔli wè
nɛ́ ní Kàdɛnigbaala náà
nɛ̄ Isirayɛli tɛ́ni lè,
25muɔ tuu Yakuba wire
Kulocɛliɛ kɛnmɛ nɛ̄,
wire ŋáà wi muɔ
suu wè,
Ŋɔri Ti Mìɛni Kulocɛliɛ
wire kɛnmɛ nɛ̄,
wire ŋáà wi diba tari wè
muɔ nɛ̄.
Wi‑ diba taʔa wè muɔ nɛ̄
wire ŋáà wi kɔ́ngi
nyìʔɛnɛ nī lè !
Wi‑ diba taʔa wè muɔ nɛ̄
wire ŋáà wi kɔ́ngi
lakpuʔɔ sícuugo nī gè,
gàa gī sínɛgɛ dàala
táanmɛ gè !
Wi‑ yírile tɛ́ni lè muɔ nɛ̄,
bè muɔ cesiʔi múgu gè !
26Diba ŋáà muɔ tuu wiī nɛ
kpínʔini muɔ mɛ́ wè,
wi nyɛ́nì tóri
nyagurusuɔnyɔ nɛ̄
nɛ́ nyagurubiliʔɛlɛ yacɛ̀nrɛ
nɛ̄ dè.
Ki diba wi‑ puu Yusufu
nyùgo nɛ̄ gè
nɛ́ wi gbɛlɛ nɛ̄ lè, wire ŋáà
wī wi lɔbilɔ kàfɔli wè !
27Bɛnzamɛ yē bɛ̀ sàndiɛn
tanʔaniwɛ tíɛlɛ
nɛ wi kaara káa dè
sínbinimɛ táanni bè;
cɛnguʔɔ táanni gè, dàa pe
'taa dè,
wi nɛ̂ wi liɛlɛ tíla lè.»
28Bàli pe mìɛni kiɛ nɛ́ siin yē saaya tùluyo, Isirayɛli nī wè. Siɛnrɛ dáà tire tuufɔli wi 'juu pe mɛ́ nyasiɛnsɛnrɛ dè. Wi 'diba kpíʔile we pe mìɛni nigbe nigbe mɛ́ nɛ̀ yɛli nɛ́ pe kɛnmɛ ní bè.
Yakuba wi 'kùu
29A Yakuba wi 'ki juu nɛ̀ gbɛ̀ngɛ pe mɛ́, nɛ́ jo: «M'bé kɛ́ mi tobilo kúrugu bèle. Ye‑ sa mi tɔ́n mi tobilo táanni bèle nyaguruwiʔi nī gè, gàa gī baa Efurɔn siʔi nī gè, Etiyé wuu wè, 30nyaguruwiʔi gáà gī baa Makpela siʔi nī gè, baa Mambire tiʔɛ táanni gè, Kanaa kùlo nī lè. Kire siʔi kire Birayima 'suɔ Efurɔn mɛ́ wè, Eti wuu wè, ki‑ kò wire siɛnnɛ tɔ́ndiʔɛ gè#49.30 Wéli baa 23.3-18.. 31Kire tiʔɛ kire nī pe 'Birayima nɛ́ wi cuɔ Sara tɔ́n wè. Kire tiʔɛ kire míɛni nī pe 'Siaga nɛ́ wi cuɔ Erebɛka tɔ́n wè. Kire tiʔɛ kire míɛni nī mi nyɛ́nì mi cuɔ Leya tɔ́n wè. 32Siʔi gáà gī baa gè, nɛ́ nyaguruwiʔi ní gè, Birayima nyɛ́nì ki suɔ wī, Eti siɛnnɛ mɛ́ bèle.»
33Bà Yakuba 'tunduro dáà juu dè nɛ̀ kúɔ dè nɛ́ wi jaala ní bèle, a wi 'wi tɔliyɔ yɛ̀gɛ yè nɛ̀ taʔa wi yasinɛgɛ nɛ̄ gè, nɛ́ sínɛ nɛ̀ kùu nɛ̀ kɛ́ wi tuuliɛyɛ kúrugu yè.
Currently Selected:
Sélimɛ 49: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
