Yirile 37
37
Bɛtisalɛli wi 'nyakungɛngɛ finʔɛgɛ kpíʔile gè
1A Bɛtisalɛli wi 'finʔɛgɛ kpíʔile gè nɛ́ akasiya tiire ní dè. Ki tɔnigɛnmɛ pi 'puu kabuunyiʔɛnɛ siin nɛ́ tílaga, ki píɛlɛgɛnmɛ pi 'puu kabuunyɛni nigbe nɛ́ tílaga, ki kpàʔalagɛnmɛ pi 'puu kabuunyɛni nigbe nɛ́ tílaga. 2A wi 'tiɛ cɛ̀nwɛ nyɛgɛ wè nɛ̀ ki tɔ́n nɛ́ wi ní, ki laamɛ nī bè nɛ́ ki kàduʔu nɛ̄ gè, nɛ́ ki nyuɔyɔ màʔa yè nɛ̀ suʔu nɛ́ tiɛ ní. 3A wi 'kájingele sicɛri kpíʔile nɛ́ tiɛ ní, nɛ̀ ke nɔrigi ki tɔliyɔ sicɛri nɛ̄ yè, siin kayɔbigɔ gíì nɛ̄ gè, nɛ́ kayɔbigɔ gíì ní gè. 4A wi 'akasiya kàgbiʔile sicɛri tɛn, nɛ́ tiɛ nyɛgɛ wè nɛ̀ ke tɔ́n. 5A wi 'kàgbiʔile le gèle kájingele nī gèle finʔɛgɛ ki gɔ̀ninɔ tiʔɛlɛ nɛ̄ gèle, kire ga buu pe- gbɛ̀ finʔɛgɛ líɛ gè.
6A wi sí finʔɛgɛ yatɔngɔ kpíʔile gè nɛ́ tiɛ cɛ̀nwɛ ní wè, ki- puu kàsulugo suɔdiʔɛ. Ki tɔnigɛnmɛ pi 'puu kabuunyiʔɛnɛ siin nɛ́ tílaga, ki píɛlɛgɛnmɛ pi 'puu kabuunyɛni nigbe nɛ́ tílaga. 7A wi 'tiɛ líɛ wè nɛ̀ wi kpúɔn, nɛ̀ nyìʔɛnɛ tundunminɔ faan bèle, bàli bīɛlɛ seribɛnnɛ bèle, nɛ́ pe kóri kàsulugo suɔdiʔɛ ki nyuɔyɔ nɛ̄ yè. 8Seribɛn wáà 'puu ki yiʔɛ mɛ́ nyuɔ nɛ̄ gè, wàa sí puu ki kàduʔu mɛ́ nyuɔ nɛ̄ gè. A wi 'pe kpíʔile pe- puu nigbe nɛ́ kàsulugo suɔdiʔɛ ní gè, ki nyuɔyɔ siin nɛ̄ yè. 9A pe 'fíkɛnyɛ yɛ̀gɛ yè naamɛ gè nɛ̀ kàsulugo suɔdiʔɛ tɔ́n gè níɛ ki wéli. A pe 'yiɛyɛ wáa yè pìye mɛ́, nɛ́ nyùyɔ cùungu yè níɛ kàsulugo suɔdiʔɛ wéli gè.
Bɛtisalɛli 'búrutaʔa tabali kpíʔile wè
10A Bɛtisalɛli wi 'tabali kpíʔile wè nɛ́ akasiya tiire ní dè. Wi tɔnigɛnmɛ pi 'puu kabuunyiʔɛnɛ siin, wi píɛlɛgɛnmɛ pi 'puu kabuunyɛni nigbe, wi kpàʔalagɛnmɛ pi 'puu kabuunyɛni nigbe nɛ́ tílaga. 11A wi 'tabali wi mìɛni tɔ́n nɛ́ tiɛ cɛ̀nwɛ ní wè, nɛ́ wi nyuɔyɔ sɔ́migɔ yè nɛ̀ kpíʔile nɛ́ yi tɔ́n nɛ́ tiɛ cɛ̀nwɛ ní wè nɛ̀ wi màʔa nɛ̀ suʔu. 12Nɛ́ sí tabali nyuɔ kpíʔile gè nɛ̀ ki kpàʔala nɛ̀ wi màʔa nɛ̀ suʔu kadagbege píɛlɛgɛnmɛ. A wi 'tiɛ cɛ̀nwɛ tíʔɛ wè nɛ̀ ki nyuɔ siinwuʔu màʔa gè nɛ̀ suʔu. 13A wi 'fali nɛ̀ tiɛ kájingele sicɛri kpíʔile nɛ̀ ke kóri tabali wi gɔ̀ninɔ sicɛri tiɛyɛ nɛ̄ yè, bàli pe yē tabali wi tɔliyɔ sicɛri táanni yè. 14Ki kájingele gálì pe 'kóri tabali wi lìʔɛgɛlɛ tiɛyɛ táanni yè, nyàa yī kadagbege tiɛyɛ nī yè. Baa pe 'puu nɛ kàgbiʔile nii gèle níɛ tabali líi wè. 15A wi 'akasiya tiire líɛ nɛ̀ kàgbiʔile gálì kpíʔile gèle, nɛ́ ke tɔ́n nɛ́ tiɛ cɛ̀nwɛ ní. Keli ke 'puu tabali wi líɛdiɛyɛ yè. 16A wi 'tiɛ cɛ̀nwɛ líɛ wè nɛ̀ yakpiʔilide kpíʔile nɛ́ wi ní, tabali wori dè: tàa 'puu tasaala, nɛ́ tàkuuwori, nɛ́ kàjuʔɔlɔ, nɛ́ lakuucɛngɛlɛ ní. Keli nī pe nìɛ diviɛn kóri nɛ ŋu nɛ Yewe gbùʔɔrɔ́ wè.
Bɛtisalɛli wi 'fètindaʔagɛlɛ tiige kpíʔile gè
17A Bɛtisalɛli wi 'fètindaʔagɛlɛ tiige kpíʔile nɛ́ tiɛ cɛ̀nwɛ ní ŋáà pe 'kpúɔn wè. Fètindaʔagɛlɛ tiige ki yé kpíʔile nɛ́ tiɛ ní wè. A wi 'ki táanmɛ nyùgo kpíʔile gè, nɛ́ ki sunʔɔmɔ tiige kpíʔile gè nɛ̀ ki sìɛn céwu. A wi 'nɛ̀joyo kpíʔile yè bɛ̀ tiige fiɛnrɛ tíɛlɛ; yi mìɛni nigbe nigbe 'puu nɛ́ fiɛnrɛ ní, nɛ́ fiɛnrɛ ti nadanʔana nɛ́ ti wɛgɛlɛ ní gèle. Ti mìɛni bìnɛ wi 'puu nigbe nɛ́ fètindaʔagɛlɛ tiige ní gè.
18Lèye kɔlini 'puu sunʔɔmɔ tiige nɛ̄ gè; taanri sí puu kayɔbigɔ gíì mɛ́ gè, taanri ní kayɔbigɔ gíì mɛ́ gè. 19Lège ó lège, nɛ̀joyo taanri 'puu ki nɛ̄. Nɛ̀jogo ó nɛ̀jogo 'puu bɛ̀ amadi tiige fiɛnrɛ tíɛlɛ dè, yafiɛnnɛ ó yafiɛnnɛ nɛ́ ki nadaanna ní, nɛ́ ki wɛgɛlɛ ní gèle. Bɛ̀ ki 'puu lèye nyáà yi mìɛni kɔlini nɛ̄ yè.
20Ki sunʔɔmɔ tiige nɛ̄ gè, nɛ̀joyo sicɛri 'puu ki nɛ̄, nyàa yi 'puu bɛ̀ amadi tiige fiɛnrɛ tíɛlɛ dè. Yi mìɛni nigbe nigbe 'puu nɛ́ nadanʔana ní nɛ́ yi wɛgɛlɛ ní gèle. 21Nadanʔana ke 'puu lèye kɔlini yi suʔudiɛyɛ táanmɛ gè sunʔɔmɔ tiige nɛ̄ gè: suʔudiʔɛ pélige táanmɛ gè, nadaanna nigbe; suʔudiʔɛ siinwuʔu táanmɛ gè, nadaanna nigbe; suʔudiʔɛ taanriwuʔu táanmɛ gè, nadaanna nigbe 'puu baa. 22Fíɛnrɛ nadanʔana gèle nɛ́ lèye ní yè, ti mìɛni 'pínɛ nɛ̀ puu sìnbogo nɛ́ fètindaʔagɛlɛ tiige ní gè. Wi yé nyɛ́nì ti mìɛni kpíʔile nɛ́ tiɛ cɛ̀nwɛ ní ŋàa pe 'kpúɔn wè.
23A wi sí fètingele kɔlisiin kpíʔile gèle, nɛ́ ke fígiyɛgɛlɛ ní gèle nɛ́ cúnʔɔ yalegele ní gèle. Ti mìɛni 'puu tiɛ cɛ̀nwɛ wori. 24Wi yé tiɛ cɛ̀nwɛ culolo togo nɛ́ kpɔrigɔ líɛ nɛ̀ fètindaʔagɛlɛ tiige kpíʔile gè nɛ́ ki yakpiʔilide ní dè#37.24 culolo togo nɛ́ kpɔrigɔ: Eburu siɛnrɛ nī dè, pe 'ki juu nɛ́ jo talan nigbe..
Bɛtisalɛli wi 'wusuna sórigodiʔɛ kpíʔile gè
25A Bɛtisalɛli wi 'wusuna sórigodiʔɛ faan gè nɛ́ akasiya tiire ní dè. Ki tɔnigɛnmɛ pi 'puu kabuunyɛni nigbe, nɛ́ ki píɛlɛgɛnmɛ pi 'puu kabuunyɛni nigbe. Sórigodiʔɛ ki kayɔbiyɔ sicɛri yi mìɛni yi 'puu nuyɔ. Ki kpàʔalagɛnmɛ pi 'puu kabuunyiʔɛnɛ siin. Ki nyɛgɛlɛ ke mìɛni bìnɛ wi 'puu nigbe nɛ́ sórigodiʔɛ ní gè. 26A wi 'tiɛ cɛ̀nwɛ nyɛgɛ nɛ̀ ki tɔ́n nɛ́ wi ní, ki naamɛ gè, nɛ́ ki lìʔɛgɛlɛ ní gèle, nɛ́ ki nyɛgɛlɛ ní gèle. A wi 'ki nyuɔyɔ màʔa yè nɛ̀ suʔu nɛ́ tiɛ ní wè. 27A wi 'kájingele siin kpíʔile nɛ́ tiɛ ní wè nɛ́ ke nɔrigi ki lìʔɛgɛlɛ siin nī gèle, ki nyuɔyɔ láara yè. Kire kájingele siin gálì keli nī pe 'puu nɛ kàgbiʔile nii gèle bèri ki líi. 28A wi 'akasiya tiire líɛ nɛ̀ kàgbiʔile gálì kpíʔile gèle, nɛ́ ke tɔ́n nɛ́ tiɛ ní wè. 29A wi 'siɛnnyiɛnɛgɔn sùnmɔ kpíʔile bè bèri saawalidɛngɛgɛ baara kúu dè, nɛ́ míɛni nùdaanna wusuna cìiliwe ní wè. Siɛn ŋàa wi 'ti kpíʔilegɛnmɛ cɛ́n bè, a wi 'ti kpíʔile.
Currently Selected:
Yirile 37: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
