Yirile 24

Isirayɛliyé pe 'yéri Yewe nyakungɛngɛ siɛnrɛ nɛ̄ dè

1A Yewe 'Misa yeri wè nɛ́ jo: «Tánʔa mi kúrugu, muɔ nɛ́ Arawɔn, nɛ́ Nadabi, nɛ́ Abiyu#24.1 Nadabi nɛ́ Abiyu ní wè, Arawɔn jaala bīɛlɛ pe siin bèle. Peli pe yé yɛli bè taʔa Arawɔn nɛ̄ wè kacuɔnrilɔ baara nɛ̄ dè; kiǐ sí gbɛ̀nɛ kpíʔileʔ nɛ́ ki cɛ́n pe yé Kulocɛliɛ kafunnɔ kpíʔile, a Kulocɛliɛ sí pe kpúu (wéli baa Lev 10.1-2; Tɔ́r 3.4)., nɛ́ Isirayɛli nàgaliɛlɛ togotaanri nɛ́ kpɔrigɔ ní bèle. Ye- pa tuu ye cúbulo liʔi ye mi gbùʔɔrɔ. 2Muɔ Misa wè, muɔ bé sìʔɛrɛ muɔ nigbe bè kpɔni mi Yewe nɛ̄ wè. Sɛnminɛ piyè yɛli pe- sìʔɛrɛ bè kpɔni mi nɛ̄ʔ. Nɛ́ míɛni Isirayɛli siɛnsɛnminɛ ní bèle, piyè yɛli pe- tánʔa nɛ́ muɔ níʔ.»

3A Misa 'koli nɛ̀ tìgi nɛ̀ pɛ́nì Yewe siɛnrɛ ti mìɛni juu siɛnnɛ mɛ́ bèle, nɛ́ kele ní gèle gàli gīɛlɛ kàyuʔujuu wuʔulo gèle.

A siɛnnɛ pe mìɛni 'pínɛ nɛ̀ ki juu nɛ́ jo: «Gàa Yewe 'juu gè, weli 'yéri ki nɛ̄, we béri ki kpínʔini.»

4A Misa sí Yewe siɛnrɛ ti mìɛni sɛbɛ.

Ki kpìɛnduu gè, a wi 'yɛ̀ sínbiniwuuro nī dè, nɛ̀ Yewe gbùʔɔrɔdiʔɛ káà faan nyagurugo táanni gè, nɛ́ kàdɛniyɛ kiɛ nɛ́ siin líɛ nɛ̀ yi cɔ́ri nɛ̀ yérige gbùʔɔrɔdiʔɛ táanni gè, bè Isirayɛliyé saaya tùluyo kiɛ nɛ́ siin tìɛ yè. 5A Misa 'nàgapunminɔ pálì yori nɛ̀ yige Isirayɛli siɛnnɛ nī bèle pe- sa yajuuro kpúu dè, bè Yewe gbùʔɔrɔ wè nɛ́ kakuɔrɔ kaasuʔuro ní dè, nɛ́ nɛ̀piʔɛlɛ kpúu gèle bè ki kpíʔile yanyige kaara. 6A Misa wi 'yajuuro sìsiɛn líɛ gè nɛ̀ ki tíla nɛ̀ le yaleye yáà nī, nɛ́ tílaga sɛngɛ gíì líɛ gè nɛ̀ ki nyɛri nyɛri gbùʔɔrɔdiʔɛ nɛ̄ gè.

7A wi 'nyakungɛngɛ siɛnsɛbɛrɛ líɛ dè#24.7 Sɛbɛ ŋáà wuʔu ki 'juu náʔa gè, kire sɛbɛ wire wī ŋàa Misa yé péli nɛ̀ sɛbɛ wè nyakungɛngɛ wuu wè (wéli baa 24.4). nɛ̀ ti wéli nɛ̀ kɛ́ yékpogbuɔlɔ ní, a siɛnnɛ pe 'ti lúʔu.

A Isirayɛli siɛnnɛ pe mìɛni 'ki juu nɛ́ jo: «Weli bé ki kpíʔile dàa ti mìɛni Yewe 'juu dè; weli béri lúru wi siɛnrɛ mɛ́ dè.»

8A Misa 'sìsiɛn sɛngɛ gíì líɛ gè nɛ̀ ki nyɛri nyɛri siɛnnɛ nɛ̄ bèle nɛ́ jo: «Sìsiɛn gáà kire yē nyakungɛngɛ wuʔu, gàa Yewe 'kpíʔile nɛ́ yeli ní bèle#24.8 Bà Zezi wi yé lìizɛnnɛ séli lè nɛ́ lìi nɛ́ wi pìtɛnmɛnɛ ní bèle, a wi 'wi sìsiɛn tɔ́nminɔ gè nɛ́ tiʔɛ gáà ki siɛnrɛ ní dè. Wéli baa Mat 26.28; Mar 14.24; Luk 22.20; Kor1 11.25; Eb 9.19-20; 10.29..»

9A Misa sí koli nɛ̀ tánʔa nyagurugo nɛ̄ gè wire nɛ́ Arawɔn, nɛ́ Nadabi nɛ́ Abiyu ní wè, nɛ́ Isirayɛli liɛlɛ togotaanri nɛ́ kpɔrigɔ ní bèle. 10A pe 'Isirayɛliyé Kulocɛliɛ nyaa wè; gbɛ̀nigɛ ní baa wi tɔliyɔ láara yè#24.10 Yewe yé ki juu pe mɛ́ nɛ́ jo pe- tuu pe cúbulo liilige (wéli baa 24.1). Gàa pe 'nyaa náʔa gè wi tɔliyɔ láara yè, a siɛn 'sínɛ nɛ̀ cúbulo, kire yákuɔ wi bé gbɛ̀ nyaa., majo dùʔɔ ki 'kpíʔile nɛ́ safiiri kàdɛnigɛ#24.10 Safiiri wè, wiī kàdɛnigɛ káà gàa gī luluu tíɛlɛ wè, nɛ́ ní bulɔ céri tíɛlɛ. ní wī, ki ní cìilige bɛ̀ nyìʔɛnɛ tíɛlɛ lè. 11Nɛ̀ sí ki yaʔa Kulocɛliɛ sì wi kɔli sáʔa gè nɛ̀ taʔa Isirayɛli liɛlɛ nɛ̄ bèle nɛ̀ kapiʔi kpíʔile pe nɛ̄ʔ. A pe 'Kulocɛliɛ nyaa wè, nɛ́ kúɔ nɛ̀ lìi nɛ́ gbuɔ baa#24.11 Lìile náà wuʔu ki 'juu náʔa gè, kire lìile ni 'puu nɛ nyakungɛngɛ kúɔmɔ tiʔɛ tìí gè..

Misa 'tánʔa nɛ̀ kɛ́ Yewe kúrugu Sinayii nyagurugo nɛ̄ gè

12A Yewe 'ki juu Misa mɛ́ nɛ́ jo: «Pɛn náʔa m'mɛ́ nyagurugo nɛ̄ gè, ma pa yéri náʔa gè. M'bé kàdɛnitɛnyɛ kɛn yè muɔ mɛ́ nyàa nɛ̄ kajuudiʔɛlɛ ke yē sɛbɛgɛlɛ gèle, nɛ́ Fànʔa Siɛnrɛ ní dè, kire ga buu muɔ de siɛnnɛ tɛnmɛ bèle ti nɛ̄.»

13A Misa sí yɛ̀ nɛ̀ kɛ́ nɛ́ wi baakuɔwɔ Yesuwe ní wè, wire ŋáà wi 'puu wi taʔara dè. A wi 'tánʔa Kulocɛliɛ nyagurugo naamɛ gè, 14nɛ̀ ki yaʔa wi yé ki juu liɛlɛ mɛ́ bèle nɛ́ jo: «Ye- weli sige náʔa gè fúɔ weli ga koli bɛn. Arawɔn nɛ́ Kuriyé pe bé kò náʔa nɛ́ yeli ní. A kaala 'siɛn taa wè, wi- pa ki juu peli mɛ́, peli bé ti cuɔnri.»

15A Misa 'tánʔa nyagurugo naamɛ gè, a kàsadibagɛ ki 'nyagurugo tɔ́n gè. 16A Yewe cɛ̀nmɛ nɛ́ wi kpuɔmɔ pi 'tìgi Sinayii nyagurugo nɛ̄ gè, a kàsadibagɛ ki 'nyagurugo tɔ́n gè nɛ̀ taa cɛnyɛ kɔlini. Cɛnyɛ kɔlisiinwuʔu nɛ̄ gè, a Yewe 'Misa yeri wè kàsadibagɛ sunʔɔmɔ nī bè. 17Isirayɛli siɛnnɛ nyaamɛ nɛ̄ bè, Yewe cɛ̀nmɛ nɛ́ wi kpuɔmɔ pi 'puu bɛ̀ kàsun tíɛlɛ gàa ki cúʔɔmɔ kpínʔini bè, baa nyagurugo naamɛ gè. 18Bà Misa 'tánʔa nyagurugo naamɛ gè, a wi 'jíin baa kàsadibagɛ nī gè. Wi yé kò baa nyagurugo naamɛ gè fúɔ nɛ̀ pɛ́nì taa cɛnyɛ togosiin nɛ́ pìliye togosiin.

Currently Selected:

Yirile 24: sev

Highlight

Copy

Compare