Yirile 17

Luʔɔ ki 'yiri kàdɛnigbaala nī lè

1A Isirayɛli tògo siɛnnɛ pe mìɛni 'yɛ̀ Sɛnɛ waama kùlo tiʔɛ nī gè nɛ tári nɛ waa cɛ̀cɛ#17.1 Wéli baa Tɔ́r 33.5-16. Kire tiʔɛ kiī nɛ Isirayɛli siɛnnɛ pe tánʔagɛnmɛ tìí bè, tiɛyɛ nyíì nī pe tóri yè. nɛ̀ yɛli nɛ́ koligo ní gè gàa Yewe 'puu nɛ tìí pe nɛ̄ gè, nɛ̀ sɛ́nì nɔ̀ Erefidimi tiʔɛ nɛ̄ gè nɛ̀ tɛ́ni baa. Nɛ̀ ki yaʔa luʔɔ sì yé puu baa pe- gbuɔʔ. 2A siɛnnɛ pe 'yɛ̀ nɛ Misa nyuɔ caa gè. A pe 'jo: «-Luʔɔ kɛn weli mɛ́ weli- gbuɔ !»

A Misa sí pe yɛ: «Gáa nɛ̄ yeli nɛ mi nyuɔ caa gè ? Gáa nɛ̄ yeli nɛ Yewe pun wè nɛ wéli ?»

3Luʔɔwuʔɔ ki yé tɔ̀ni nɛ̀ puu siɛnnɛ nɛ̄ bèle, a pe 'yɛ̀ nɛ nyu nɛ kúnʔɔri Misa nɛ̄ nɛ́ jo: «Gáa gī mmɛ gè, gàa muɔ 'kpíʔile weli nɛ̄ mmɛ gè, nɛ́ weli yige Ezipiti kùlo nī lè bè pa weli kpúu náʔa gè luʔɔwuʔɔ nɛ̄ gè, weli nɛ́ weli pìile ní bèle nɛ́ weli yajuuro ní dè ?»

4A Misa sí yékpoli wáa Yewe mɛ́ nɛ́ jo: «Gáa mi 'yɛli bè kpíʔile siɛnnɛ bálì mɛ́ bèle ? Ki 'kò cɛ̀ri dí pe sí mi wáa gbúu nɛ́ kàdari ní !»

5A Yewe sí ki juu Misa mɛ́ nɛ́ jo: «Kíni siɛnnɛ pe yiʔɛ mɛ́ gè, ma Isirayɛli liɛlɛ pálì kɔ́ri ma pínɛ nɛ́ mìɛ ní. Ma kàgbiile líɛ lè muɔ kɔli nī gè nàa ní muɔ cé Niili cáʔa kpúɔn gè, mari waa. 6Mi wè, m'bé yéri náʔa muɔ yiʔɛ mɛ́ gè kàdɛnigbaala láà nɛ̄ Worɛbi nyagurugo#17.6 Wéli baa 3.1 kaliwɛgɛ ki táanmɛ gè. nɛ̄ gè. Muɔ bé sa kàdɛnigbaala kpúɔn lè#17.6 Pe níɛ sɔ̀ngí nɛ taʔa nɛ́ tiʔɛ gáà siɛnrɛ ní dè níɛ nɛ ti gbùʔɔrɔ́ (wéli baa Ŋún 78.15-16,20; 105.41; 114.8; Eza 48.21). Pɔli 'kàdɛnigbuʔɔ tiʔɛ gáà tɔ́nminɔ gè nɛ́ Zezi Kirisi ní wè (wéli baa Kor1 10.4)., bà luʔɔ ki bé yiri, siɛnnɛ pe bé gbuɔ.» A Misa 'ki kpíʔile baa Isirayɛli liɛlɛ pe nyaamɛ nɛ̄.

7A wi 'ki tiʔɛ míʔɛ le gè nɛ ki yeri Masa nɛ́ Mɛriba (ki kɔri wire wī: puuwelige nɛ́ kúnʔɔrilɔ tiʔɛ), bɛ̀ ki 'nyaa Isirayɛli siɛnnɛ pe yé kúnʔɔri Yewe nɛ̄ wè, nɛ́ Yewe puu wè nɛ̀ wéli wè, nɛ́ jo: «Yewe wiī bile weli sunʔɔmɔ nī í#17.7 Eb 3.7-8 wiī nɛ nyu tiʔɛ gáà ki wuʔu nɛ̄ gè; kire tiʔɛ gáà míɛni kiī nɛ Ŋún 95.7-8 siɛnnuro nyu dè. ?»

Amalɛkiyé pe 'tún nɛ́ Isirayɛliyé ní bèle

8Bè pe 'yaʔa baa Erefidimi tiʔɛ nī gè, cɛngɛ káà a Amalɛki siɛnnɛ#17.8 Amalɛki siɛnnɛ bèle pe yé puu Ezawu jaa wáà pìile (wéli baa Sél 36.6,12; Sam1 15.2; Sam1 30.1; Kaj1 1.36). Pe puu nɛ tun siɛnnɛ nɛ̄ bèle waama kùlo koliyo nī yè nɛ pe yɛrɛ suu dè pe mɛ́.pɛ́nì pɛ́nì kapiɛnnɛ cáan Isirayɛli siɛnnɛ nɛ̄ bèle. 9A Misa 'ki juu Yesuwe#17.9 Tabelige kire gī náʔa gè pe 'Yesuwe míʔɛ yeri gè. Yesuwe wire 'puu Ɛfirayimi saʔa tùlugo ki kàfɔli wáà, wire wi bága pa Isirayɛli siɛnnɛ pe yiʔɛ kíni gè a Misa kâ pɛ́nì kùu wè. Wi míʔɛ ki kɔri wire wī: Yewe nɛ siɛn suu. mɛ́ nɛ́ jo: «Yɛ̀ ma nàguɔlɔ pálì nyíɛnɛ ma kɔ̀n ma sa kapiɛnnɛ kpúɔn lè nɛ́ Amalɛki ní wè. Mbànʔa gè, m'bé yɛ̀ bè yéri nyagurugo naamɛ gè nɛ́ Kulocɛliɛ kàgbiile ní lè mi kɔli nī gè.»

10A Yesuwe 'ki kpíʔile gàa Misa yé juu gè, a pe 'yiri nɛ̀ kapiɛnnɛ kpúɔn lè nɛ́ Amalɛki siɛnnɛ ní bèle. Misa nɛ́ Arawɔn ní wè, nɛ́ Kuri ní wè, a peli 'tánʔa nyagurugo naamɛ gè. 11Ki 'nyaa, a Misa yé gbɛ̀nɛ kiyɛ yɛ̀gɛ yè nɛ́ Kulocɛliɛ kàgbiile ní lè, Isirayɛli siɛnnɛ pe nɛ̂ cé fànʔa taa; a wi sí gbɛ̀nɛ kiyɛ tìrige yè, Amalɛki siɛnnɛ pe nɛ̂ cé fànʔa taa. 12Bà Misa kiyɛ yi pɛ́nì fùrɔ yè, a Arawɔn nɛ́ Kuri pe 'kàdɛnigɛ líɛ nɛ̀ le Misa láara wè, a Misa 'tɛ́ni ki nɛ̄. Á pe 'wi kiyɛ cò yè, a wàa 'kàmɛgɛ cò gè, a ŋìi 'kàliige cò gè. Bà ki 'kpíʔile a Misa kiyɛ yi 'kò yɛ̀gɛyaʔaya fúɔ nɛ̀ pɛ́nì cɛngɛnyɛni nyɔ́gɔ lè. 13A Yesuwe 'fànʔa taa Amalɛki siɛnnɛ nɛ̄ bèle, a kapiɛngbuɔn ŋɔnɔ ni 'pe mìɛni lìi.

14A Yewe 'ki juu Misa mɛ́ nɛ́ jo: «-Ki sɛbɛ 'sɛbɛ nī wè, ki- puu sɔ̀ngidaadiʔɛ#17.14 Ki tabelige kire gī náʔa gè piyē nɛ ki nyu nɛ́ jo sɛbɛ yē baa ŋàa nī yirile nɛ́ suɔlɔ siɛnrɛ tiī nɛ sɛbɛ dè.; ma Yesuwe tɛnmɛ wè ti nɛ̄ wi- ti lúʔu wi ki cɛ́n, m'bé ki kpíʔile siɛnnɛ sǐ ní sɔ̀ngi daa nɛ́ Amalɛki siɛnnɛ ní bèle dàala nɛ̄ lèʔ#17.14 Wéli baa Fàn 25.17-19; Sam1 15.2-9..»

15A Misa 'Yewe gbùʔɔrɔdiʔɛ káà faan, nɛ́ ki míʔɛ le gè nɛ ki ye Yewe Nisii (ki kɔri wire wī: Yewe wire wī mi fànʔa káfali wè). 16A wi 'ti yiʔɛ juu gè nɛ́ jo: «Bɛ̀ Amalɛki siɛnnɛ pe 'fɔ̀li nɛ̀ pɛ́nì tuu Yewe wi kùlofɔlilɔ kácunʔɔ nɛ̄ gè, Yewe bé puu kàsii nɛ̄ nɛ́ pe ní kɛ̀ngɛlɛ ke mìɛni nī.»

Currently Selected:

Yirile 17: sev

Highlight

Copy

Compare