Fànʔa Kajuʔulo 34
34
Misa wi 'kùu Nɛbo nyagurugo nɛ̄ gè
1A Misa 'yiri Mowabi waama kùlo kpàanjali tiʔɛ nī gè nɛ̀ tánʔa Nɛbo nyagurugo nɛ̄ gè, Pisiga nyagurugo nyùgo tiʔɛ káà gī gàa ki 'puu Zeriko kàʔa táanni gè#34.1 Wi 'kɛ́ Nɛbo nyagurugo mɛ́ gè majo bɛ̀ Yewe 'ki juu wi mɛ́ gè (wéli baa 32.48-52).. A Yewe wi 'kùlo ni mìɛni tìɛ wi nɛ̄, nɛ̀ ki séli kayɔbigɔ gíì nɛ̄ gè nɛ̀ sɛ́nì nɔ̀ gìi nɛ̄ gè#34.1 Bè wi yaʔa baa Nɛbo nyagurugo nɛ̄ gè, gàa gī kpàʔaligɛ gè, Misa cî gbɛ̀ jáa bè kùlo nyaa lè, nàa Yewe yé jo wire bé kɛn wè. Tiʔɛ gíì Misa 'nyaa gè, ki yé séli Galaadi kùlo tiʔɛ nɛ̄ gè gàa ki 'puu pe wuʔu gè nɛ̀ kúɔ gè, nɛ̀ sɛ́nì nɔ̀ Dan kàʔa nɛ̄ gè gàa gī cɛngɛnyɛnifolimɛ kàmɛgɛ mɛ́ gè; kire tiʔɛ nī Zurudɛn cáʔa nyùgo ki yē. Nɛ̀ màʔa nɛ̀ pɛ́nì yiri kùlo náà nī cɛngɛnyɛnijiingɔli mɛ́ gè Zurudɛn cáʔa kúrugu gè. Bè ni líɛ cɛngɛnyɛnifolimɛ kàliige mɛ́ gè bè sa kúɔ tiɛrɛ dáà dī ti 'kpɔni Nɛbo nyagurugo nɛ̄ gè.: nɛ̀ ki líɛ Galaadi kùlo tiʔɛ nɛ̄ gè nɛ̀ sɛ́nì nɔ̀ Dan kàʔa nɛ̄ gè, 2nɛ̀ Nafitali láʔala ni mìɛni ní, nɛ̀ màʔa nɛ̀ sɛ́nì yiri Ɛfirayimi nɛ́ Manase kùlo nɛ̄ lè, nɛ́ Zuda kùlo ni mìɛni ní fúɔ nɛ̀ sɛ́nì nɔ̀ Cɛngɛnyɛnijiinmɛ kuʔɔjii nɛ̄ wè, 3nɛ́ Nɛgɛvi waama kùlo ní lè, nɛ́ koli nɛ̀ pɛ́nì nɔ̀ Zeriko kpàanjali nɛ̄ wè, kire gáà ki 'puu támari tiire kàʔa gè, fúɔ nɛ̀ sɛ́nì láʔa Zowari kàʔa nɛ̄ gè#34.3 Zowari kàʔa ki 'puu Yasuʔɔniʔɛgɛ kuʔɔjii táanni wè, cɛngɛnyɛnifolimɛ kàliige kɔli mɛ́ gè (wéli baa Sél 13.10; 14.2; 19.22)..
4A Yewe 'ki juu Misa mɛ́ nɛ́ jo: «Kùlo náà lire nī nàa nɛ̄ mi yé kàli nɛ̀ kɛn Birayima mɛ́ wè, nɛ́ Siaga ní wè, nɛ́ Yakuba ní wè, bà mi yé ki juu pe mìɛni nigbe nigbe mɛ́ nɛ́ jo peli siimɛ pire mɛ́ m'bé ni kɛn lè#34.4 Wéli baa Sél 12.7; 26.3; 28.13.. Mi nyɛ́nì ni tìɛ muɔ nɛ̄, a muɔ 'ni nyaa muɔ tíimɛ nyapigele ní gèle, nɛ̀ ki yaʔa muɔ sǐ jíin baa ni nīʔ.»
5Misa wè, Yewe baakuɔwɔ wè, a wi 'kùu kire tiʔɛ nī gè, Mowabi kùlo nī lè, nɛ̀ yɛli nɛ́ Yewe siɛnrɛ ní dè. 6A Yewe 'wi tɔ́n baa kpàanjali tiɛlɛ láà nī Mowabi kùlo nī lè, nàa ni 'yiʔɛ wáa gè Beti Peyɔri tiʔɛ mɛ́ gè. Siɛn sì fìɛ wi nyɛgɛ tiʔɛ cɛ́n gèʔ, fúɔ nɛ̀ pɛ́nì nɔ̀ pàngɛ nɛ̄. 7Misa yé yiʔɛlɛ tekɔlini (120) taa lɛ̀lɛ líì nī wi 'kùu wè. Nɛ̀ ki yaʔa wi nyapigele kiyè cé fùrɔ wi nɛ̄ʔ; wi céri ŋɔri ti 'puu nɛ tíin wi nī.
8A Isirayɛli siɛnnɛ pe 'nyɛni Misa kùugo nɛ̄ gè cɛnyɛ togo nɛ́ kpɔrigɔ, baa Mowabi waama kùlo kpàanjalilɛ nɛ̄ bèle. A kùugo nɛ́ kɔnwaara cɛnyɛ yi pɛ́nì nyì.
9 Yesuwe wè, Nuni jaa wè, síciliniʔɛgɛ 'puu wi mɛ́, nɛ̀ ki cɛ́n Misa cé wi kiyɛ taʔa yè wi nɛ̄. Nɛ̀ líɛ kire lɛ̀lɛ nī lè, Isirayɛli siɛnnɛ pe puu nɛ lúru wi mɛ́ níɛ ki kpínʔini nɛ̀ yɛligi nɛ́ dàa ní Yewe cé juu nɛ̀ gbɛ̀ngɛ Misa mɛ́ wè#34.9 Wéli baa Tɔ́r 27.18-23..
10Isirayɛli kùlo nī lè, siɛnjuuwo wáà sì yé ń'nɛ̀ yiri bɛ̀ Misa tíɛlɛ wèʔ, wire ŋàa wi cé puu nɛ Yewe nyaʔa wè nìɛ nyu wi ní wè#34.10 Wéli baa Yir 33.11.. 11Misa wire Yewe cé tun a wi sɛ́nì fìɛlɛ kpíʔile bèle nɛ́ kakpoliyo ní yè Ezipiti kùlo nī lè Farawɔn yiʔɛ mɛ́ gè, nɛ́ wi baakuɔlɔ ní bèle, nɛ́ wi kùlo siɛnnɛ ní bèle. 12Kire Misa wire wi yé kele gálì kpíʔile gèle Isirayɛli siɛnnɛ nyaamɛ nɛ̄ bè nɛ́ wi ŋɔri kɔli ní gè, kire ki yé ki yaʔa siɛnnɛ pe fìʔɛ́ Yewe nɛ̄ wè.
Currently Selected:
Fànʔa Kajuʔulo 34: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
