Fànʔa Kajuʔulo 33
33
Misa 'diba kpíʔile Isirayɛli saaya tùluyo mɛ́ yè
1Diba siɛnrɛ ti n'dɛ dáà Kulocɛliɛ siɛn Misa wi 'juu Isirayɛli siɛnnɛ mɛ́ bèle sɛ́ni wi 'kùu wè.
2A wi 'jo:
«Yewe nyɛ́nì tìgi Sinayii nyagurugo nɛ̄ gè,
wi 'yɛ̀ Seyiiri kùlo nī lè
nɛ nyíʔɛnɛ weli nɛ̄#33.2 Sinayii nɛ́ Seyiiri nyaguruyo nɛ́ yi tiɛrɛ ní dè, ti mìɛni nɛ nyu nɛ́ jo kire tiɛrɛ nī dè Kulocɛliɛ wi 'fànʔa siɛnrɛ kɛn dè. Siɛnrɛ dáà ti 'puu a pe 'ti tɔ́nminɔ nɛ́ cɛngɛ kɛnmɛ ní bè, gàa ki 'yɛ̀gí nɛ càanna siɛnnɛ nɛ̄ bèle..
Wi kpìɛnmɛ pi 'yiri Paran
nyagurugo nɛ̄ gè
a wi 'pɛn nɛ́ nyìʔɛnɛ tundunminɔ
siramuʔɔyɔ siramuʔɔyɔ
ní yè,
Fànʔa Siɛnrɛ ní dè wi
kàliige kɔli nī gè bɛ̀
kàsun tíɛlɛ#33.2 Eburu siɛnrɛ nī dè náʔa gè, siɛnrɛ dáà tiì fíligeʔ. Siɛnnɛ pálì nɛ ti yiʔɛ nɛ̀ jo: cɛngɛnyɛnifoligɔlimɛ kàliige kɔli mɛ́ gè, bèri waa nyaguruyo jùlɔgɔ mɛ́ gè..
3Kányiʔɛ gī, muɔ ŋáà wī
muɔ siɛnnɛ
pe 'muɔ dɛ́ni wè,
siɛnwalidɛngɛlɛ pe mìɛni
yē muɔ kiyɛ nī yè.
Piyē nɛ káguro cáanri dè
muɔ tɔliyɔ táanni yè,
níɛ lúru muɔ kajuʔulo
mɛ́ gèle.
4Misa wi 'Fànʔa Siɛnrɛ
tìɛ dè weli nɛ̄
dàa dī Yakuba#33.4 Yakuba wè, Isirayɛli míʔɛ siinwuʔu kire gī. Yakuba wi 'puu Isirayɛliyé pe tuuliʔɛ. Kulocɛliɛ tíimɛ wi yé míʔɛ gáà le gè wi nɛ̄ (wéli baa Sél 35.10) Diba siɛnrɛ dáà juulo nī lè, míɛyɛ nyáà siin yiī nɛ yeri Isirayɛliyé nɛ̄ bèle. gboli
siɛnnɛ kɔrigɔ gè.
5Bà gboli kàfɔlilɔ pe 'pìye
gbuʔulo bèle,
nɛ́ Isirayɛli saaya tùluyo#33.5 Yakuba jaala kiɛ nɛ́ siin bèle, peli míɛyɛ yire yi 'puu Isirayɛli saaya tùluyo nɛ̄ yè: Wurubɛni wè, Zuda wè, Levii wè, Bɛnzamɛ wè, Yusufu wè, Zabulɔn wè, Gadi wè, Dan wè, Nafitali wè, Azɛri wè, nɛ́ Simɛyɔ ní wè. Diba siɛnrɛ dáà nī dè, Simɛyɔ míʔɛ ki wè baaʔ.
yi mìɛni ní yè,
Yewe wi yé puu Yesuruni#33.5 Wéli baa 32.15 kaliwɛgɛ ki táanmɛ gè.
kùlofɔli wè.
6Ki 'yɛli Wurubɛni- kò sìi nɛ̄,
wi fǎga kùuʔ,
a ki cɛ́nì nyaa wi siɛnnɛ
piyě niʔɛ wèʔ.»
7 Zuda wuʔu nɛ̄ gè, a wi 'jo:
«Yewe yo, ma lúʔu Zuda
saʔa tùlugo mɛ́ gè,
ma wi kɔ́ri ma tórigo
wi siɛnnɛ mɛ́ bèle,
dí wi kiyɛ yi sí wi suɔ,
dí muɔ tíimɛ sí puu wi sáʔafɔli wi parifɔlilɔ
kɔli mɛ́ gè.»
8 Levii wuʔu nɛ̄ gè, a wi 'jo:
«Muɔ Urimi nɛ́ muɔ Tumimi#33.8 Wéli baa Yir 28.15 kaliwɛgɛ ki táanmɛ gè. ní wè
ti yé kɛn Levii siimɛ
mɛ́ bè,
bàa pi 'pìi puɔ muɔ nɛ̄ wè,
bàa muɔ 'siʔɛ nɛ̀ wéli bè,
baa Masa tiʔɛ nī gè,
peli bálì ní muɔ 'tún wè
baa Mɛriba luɔyɔ tiʔɛ nī gè#33.8 Wéli baa Yir 17.1-7; Tɔ́r 20.2-13..
9Pe yé puu nɛ̀ pìye puɔ
muɔ Yewe nɛ̄
nɛ̀ tóri pe tobilo
nɛ́ pe yàala nɛ̄ bèle,
nɛ́ pe siinyɛninɛ ní bèle
nɛ́ pe pìile ní bèle.
Pe 'puu nɛ lúru
muɔ siɛnrɛ mɛ́ dè
nɛ̀ muɔ nyakungɛngɛ
cò gè nɛ́ kányiʔɛ ní#33.9 Wéli baa Yir 32.25-29..
10Pe bága de Yakuba#33.10 Wéli baa 33.4 kaliwɛgɛ ki táanmɛ gè. tɛnmɛ wè
muɔ kàyuʔujuuro nɛ̄ dè,
nɛ́ muɔ Fànʔa Siɛnrɛ ní dè,
Isirayɛli siɛnnɛ mɛ́ bèle.
Pe béri wusuna sórigo wè
muɔ yiʔɛ mɛ́
béri kakuɔrɔ kaasuʔuro
tari dè
muɔ gbùʔɔrɔdiʔɛ nɛ̄ gè.
11Yewe yo, ma diba taʔa wè
Levii wi ŋɔri nɛ̄ dè,
nɛ́ wi kiyɛ baara ti mìɛni
ní dè.
-Wi túnvɔlilɔ pe sɛ̀nnɛ
cèri gèle,
kire ga buu pe fǎga ní
gbɛ̀ jáa bè yɛ̀ʔ,
bàli 'Levii wi biɛn bèle.»
12Bɛnzamɛ wuʔu nɛ̄ gè,
a wi 'jo:
«Yewe pìdɛniwɛ wire wī.
Wiī tɛ́niwɛ nɛ ŋɔ́gi nɛ taʔa
wi táanni yanyige nɛ̄.
Yewe 'wi màʔa nɛ̀ suʔu
nɛ́ wi kiyɛ ní yè,
á wi sí ní tɛ́niwɛ Yewe
fíkɛnyɛ nɛ̄ yè.»
13 Yusufu wuʔu nɛ̄ gè, a wi 'jo:
«Yewe wi- diba taʔa wè
wi dàala nɛ̄ lè,
kire ga buu
nyìʔɛnɛ kámɛgɛ nɛ́ dàala táanmɛ luɔyɔ,
yi de dàala fuɔnri lè#33.13 Koliyo 13-16 wuʔu nī gè, wéli baa Sél 49.25-26.,
14dí cɛngɛ ki sí de yaliicɛ̀nrɛ
fíin dè,
yege ó yege, ti de sɔ́migi
de liʔi.
15Yusufu wi- sí ní nyaguruliɛyɛ
yi yacɛ̀nrɛ taa dè,
nɛ́ nyaguruyo nyáà yi 'tíin
nɛ̀ puu baa yè,
yi yaliiniʔɛrɛ ní dè,
16nɛ́ yataanra dáà ti 'dàala
nyì lè.
Ŋàa wi 'puu kàsun tiinbile
nī lè#33.16 Wéli baa Yir 3.1-6.,
wi- wi kpuʔɔrɔ taʔa dè
Yusufu nyùgo nɛ̀ gè,
nɛ́ wi gbɛlɛ nɛ̄ lè,
wire ŋáà wī
wi siinyɛninɛ kàfɔli wè#33.16 Wéli baa Sél 37.8..
17Yusufu wè, kpuʔɔrɔ yē wi nɛ̄ !
Wire yē bɛ̀ nɛ̀piɛlɛ pìpeliwe
tíɛlɛ;
ni nyɛgɛlɛ kiyē bɛ̀
nyàʔanuɔ wuʔulo tíɛlɛ.
Keli ní wiī nɛ kùlogolo kálì
siɛnnɛ pe mìɛni cílele
fúɔ bè sa nɔ̀ dàala
ni láʔala nɛ̄ lè.
Nyɛnɛ láà nigbe yē
Ɛfirayimi siɛnniʔɛbobo,
nyɛnɛ siinwoli ní lè,
Manase
kapiɛngbuɔntoyo
nìʔɛyɛ.»
18Zabulɔn nɛ́ Izakari wuʔu nɛ̄ gè#33.18 Weli Izakari míʔɛ taʔa gè baa wī, bè siɛnrɛ dáà lúʔugɛnmɛ fílige bè.,
a wi 'jo:
«Zabulɔn, ma puu
fundaanra nɛ̄ muɔ
tánʔagɛlɛ ke mìɛni nī.
Muɔ Izakari wè, ma puu
fundaanra nɛ̄ a muɔ
'tɛ́ni muɔ bùguro nī dè.
19Peli béri siɛnfeliye yáà yeri
nyagurugo mɛ́ gè,
kire tiʔɛ nī gè pe béri
kakuɔrɔ yɛrɛ kɔ̀ngí dè
nɛ̀ yɛli nɛ́ dàa ní
Yewe yé juu dè.
Nɛ́ ki cɛ́n peli béri kuʔɔjii
wi lɔri laala dè,
nɛ́ lɔri dáà dī làridɛ kuʔɔjii
gògoyo nyuɔ nɛ̄ gè#33.19 Ti 'juu Eburu siɛnrɛ nī dè nɛ́ jo: dàrimiʔɛ. Tire bé gbɛ̀ tɔ́nminɔ nɛ́ jaʔa kɛnmɛ ní bé ŋàa pe wáari kɔ́riyɔ nī yè níɛ tòrí lakpoliyo naamɛ gè. Pàli nɛ ki sɔ̀ngí piyē nɛ dàrimiʔɛ líi gè nɛ̀ yacɛ̀nrɛ kpínʔini nɛ́ ki ní wī..»
20Gadi wuʔu nɛ̄ gè, a wi 'jo:
«Kpuʔɔrɔ 'yɛli ti de tari
Yewe nɛ̄ wè,
wire ŋáà wi
'Gadi kpúʔɔ wè !
Gadi wiī nɛ tɛ̀ní
bɛ̀ jàri tíɛlɛ
níɛ wi yacògo cɛnminɛ gè,
ki tɔliyɔ yè nɛ́ nyùgo
ní gè.
21Wi 'dàacɛnnɛ nyíɛnɛ lè
nɛ̀ kɔ̀n,
a pe 'kàfɔli liɛlɛ kɛn lè
wi mɛ́.
Wi pɛ́nì kíni siɛnnɛ
yiʔɛ mɛ́ gè
nɛ̀ ki kpíʔile gàa ki 'sín
Yewe yiʔɛ mɛ́ gè
bɛ̀ Yewe 'puu nɛ ki caa gè.
Wi 'tánʔa nɛ̀ yɛli nɛ́
wi kàyuʔujuuro ní dè,
dàa wi yé tɛ́ngɛ Isirayɛliyé
mɛ́ bèle#33.21 Wéli baa Tɔ́r 32.16-18..»
22Dan wuʔu nɛ̄ gè, a wi 'jo:
«Dan yē bɛ̀ jàriyɛliwɛ tíɛlɛ
ŋàa wi 'yo nɛ̀ kɔ́n
Basan kùlo mɛ́ lè.»
23Nafitali wuʔu nɛ̄ gè, a wi 'jo:
«Yewe 'diba taʔa wè
Nafitali nɛ̄;
wi 'tín kpuʔɔrɔ nɛ̄ dè
nɛ́ yacɛ̀nrɛ ní dè.
Wi- sí tiɛyɛ líɛ yè nyàa
yiī cɛngɛnyɛnifolimɛ
kàliige kɔli mɛ́ gè
fúɔ bè sa nɔ̀ kuʔɔjii nɛ̄ wè#33.23 Eburu siɛnrɛ nī dè, nyasiɛnkɛnigɛ gáà ki bé gbɛ̀ juu bé jo kuʔɔjii; bà ki pɛ́nì mɔgɔ gè a ki yerigɛnmɛ pi 'pínɛ nɛ́ «cɛngɛnyɛnijiinmɛ» ní bè. Kire nɛ̄ pàli 'ki yiʔɛ náʔa gè nɛ̀ jo cɛngɛnyɛnijiinmɛ..»
24Azɛri wuʔu nɛ̄ gè, a wi 'jo:
«Yewe wi- diba taʔa wè
Azɛri nɛ̄ wè
bè tóri Yakuba jaala
sɛnminɛ nɛ̄ bèle,
dí wi- sí wi siinyɛninɛ
dɛ́ni bèle,
dí wi- sí wolivi sùnmɔ
taa bè nìʔɛbɛ bèri
wi tɔliyɔ nii yè pi nī#33.24 wolivi sùnmɔ taa bè nìʔɛbɛ bèri wi tɔliyɔ nii yè pi nī. Nyasiɛnkɛnigɛ gáà kiī nɛ nyu Azɛri nyuɔ wuʔu nɛ̄ gè. Wi tɛ́nidiʔɛ nī gè, wolivi tiire ti 'puu nìʔɛrɛ baa. !
25Muɔ kàaya kɔ̀riyɔ yi yasuʔɔyɔ
yi bé puu timɔri
nɛ́ kányiɛrɛ woyo,
bɛ̀ muɔ bé kò yanyige nɛ̄
muɔ sìi cɛnyɛ yi mìɛni nī.»
26A Misa ń'nɛ̀ kɛ́ yiʔɛ mɛ́ nɛ́ jo:#33.26 Weli 'tiʔɛ gáà siɛnrɛ taʔa dè baa wī, bè ti lúʔugɛnnɛ cìile lè.
«Yesuruni#33.26 Wéli baa 32.15 kaliwɛgɛ ki táanmɛ gè. yo, kulocɛliɛ wáà
yē bile lé ŋàa wi 'wúɔ nɛ̀
yɛli nɛ́ Kulocɛliɛ ní wè,
wire ŋáà wi báan bè ba muɔ sáʔa wè nɛ́ kɔ́n
nyìʔɛnɛ nī lè,
wi ní tɛ́niwɛ kàsadibarɛ nɛ̄
dè, wi kpuɔmɔ nī bè ?
27Kulocɛliɛ ŋáà wī sìi nɛ̄
lɛ̀lɛ ó lɛ̀lɛ nī,
wire wī muɔ làridiʔɛ gè,
wi kiyɛ ŋɔri
dáà ti wè kúu nɛ nyaʔa dèʔ,
tiī muɔ láara súuri.
Wi bé muɔ leguulo cìra
bèle muɔ yiʔɛ mɛ́ gè,
wire ŋáà wi 'ki juu nɛ́ jo:
‹Ye- pe cúʔɔ bèle !›
28Bà Isirayɛli#33.28 Wéli baa 33.4 kaliwɛgɛ ki táanmɛ gè. bé kò yanyige nɛ̄,
Yakuba pìile pe bé kò
ŋɔ́daala nɛ̄,
kùlo nī lè nàa nī
yaliire woli lè nɛ́ ní
ɛrɛzɛn luʔɔ woli lè,
baa nyìʔɛnɛ ni kámɛgɛ
kiī nɛ sɔli nɛ tíri gè.
29Isirayɛli yo, je muɔ yē
fundaanra nɛ̄ !
Ŋáa wī bɛ̀ muɔ tíɛlɛ
siɛnfelige káà gàa
Yewe 'suɔ gè ?
Wire wī timɔzigege gè
gàa ki muɔ tɔ́ngi gè.
Wi míɛni yē kapiɛngbuɔn
ŋɔsii nɛ̀ ki kpíʔile
a muɔ 'pe jáa.
Muɔ leguulo pe bé pɛn bè ba
pìye cɛ́rigɛ muɔ yiʔɛ mɛ́,
muɔ bé pe tánʔana nɛ́ muɔ tɔliyɔ ní yè
pe kàduuyo nɛ̄ yè#33.29 pe kàduuyo nɛ̄ yè: Siɛnnɛ pálì nɛ̂ tiʔɛ gáà siɛnrɛ yiʔɛ dè nɛ̀ jo: tiɛyɛ nyáà yī nyaguruyo naamɛ gè..»
Currently Selected:
Fànʔa Kajuʔulo 33: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
