Kakpiʔiligele 19

Pɔli wi 'kɛ́ Efɛzi kàʔa mɛ́

1Bà Apolɔsi wi 'puu Korɛnti kàʔa mɛ́ gè, a Pɔli wi 'Azii tɛ́nimɛ jeli bè nyaguruyo kayɔbigɔ nɛ̄ gè, nɛ̀ kɛ́ Efɛzi kàʔa mɛ́. A wi sɛ́nì tɛ́ngɛfɔlilɔ pálì nyaa baa ki kàʔa nī gè. A wi 'pe yúgo: 2«Bà yeli 'tɛ́ngɛ bèle, Kulocɛliɛ Pìle ni 'pɛn yeli mɛ́ lé ?»

A pe 'wi yɛ: «Weli sì fìɛ cɛ́nì ki lúʔu dí Kulocɛliɛ Pìle yē baaʔ.»

3A Pɔli wi 'jo: «Batɛmi ŋíi sí yeli 'kpíʔile ?»

A pe 'wi yɛ: «Zan Batiisi batɛmi weli 'kpíʔile.»

4A Pɔli wi sí jo: «Zan wi 'puu nɛ siɛnnɛ batiize bèle nɛ́ jo pe- pe funyɔ yiʔɛ yè, pe sí tɛ́ngɛ siɛn ŋáà wi cî ga pɛn wire kàduʔumɛ gè. Zezi wire wi 'puu nɛ pun.»

5Bà pe 'Pɔli siɛnrɛ lúʔu dè nɛ̀ kúɔ dè, a pe 'batɛmi kpíʔile wè Kàfɔli Zezi míʔɛ nɛ̄ gè. 6A Pɔli wi 'kiyɛ taʔala yè pe nɛ̄, a Kulocɛliɛ Pìle ni 'tìgi pe nɛ̄, a pe 'yɛ̀ nɛ nyu siɛnrɛ táà tiiyɛ nī, nɛ̀ kò Kulocɛliɛ siɛnjuulo. 7Pe cé siɛnnɛ kiɛ nɛ́ siin kúɔ, nàguɔlɔ pe 'puu.

8A Pɔli wi sɛ́nì jíin tɛnmɛzaʔa nī gè, a wi 'siɛnnɛ tɛnmɛ bèle nɛ̀ taa yeye taanri. Wi 'puu nɛ Kulocɛliɛ Kùlofɔligɔ wori nyu dè nɛ́ nàzorido ní#19.8 Girɛki sɛbɛliɛlɛ pálì nyɛ́nì ki sɛbɛ nɛ̀ jo: fànʔa 'puu wi mɛ́ kpuʔɔ., níɛ ki cìrá siɛnnɛ pe- pe sɔ̀ngirɔ yiʔɛ dè pe sí tɛ́ngɛ ki wori nɛ̄ dè.

9Bà sí pàli cé cíi nɛ́ pe funyɔ gbɛ̀n yè, níɛ siɛncuʔɔrɔ nyu nɛ pìye nyíɛnɛ Kàfɔli koligo nɛ̄ gè siɛnniʔɛmɛ sunʔɔmɔ nī bè, a Pɔli wi 'láʔa pe táanni. A wi 'pìtɛnmɛnɛ kɔ́ri bèle nɛ̀ sɛ́ni pe tɛnmɛ cɛngɛ ó cɛngɛ Tiiranusi tɛnmɛdiʔɛ nī gè. 10Wi cé pe tɛnmɛ nɛ̀ taa yiʔɛlɛ siin, fúɔ a kire 'ki kɛn a Azii tɛ́nimɛ wuulo pe mìɛni bèle, Zuufulo nɛ́ Girɛkilɛ ní bèle, a pe 'Kàfɔli wi siɛnrɛ taa dè nɛ̀ lúʔu.

11Kulocɛliɛ wi 'puu nɛ kanyuʔɔnigɔlɔ kpínʔini Pɔli wi kiyɛ nī yè, ke feligele sì puu nɛ nyaʔaʔ. 12A kire 'ki kɛn a cècuuro díì, á kire 'laa a fɛ̀ni ŋíì cé kurugo nɛ̀ taa Pɔli nɛ̄ wè, siɛnnɛ pe nɛ̂ cé ti líɛ nɛ̀ taʔa yaala nɛ̄ bèle pe nìɛ pori; gbòdolilo míɛni pe nìɛ yigi pe nī.

Seva jaala wori dè

13Zuufulo bílì pe cî nɛ nyaari nɛ gbòdolilo cìrá nɛ yigi siɛnnɛ nī bèle, a pàli kɛ́nì jo peli bé gbòdolilo pálì cìra nɛ́ Kàfɔli Zezi míʔɛ ní gè. A pe 'jo: «Zezi míʔɛ nɛ̄, Zezi ŋáà wori Pɔli cî nɛ nyu dè, mi 'jo ma yiri !»

14Ki 'nyaa Zuufulo kacuɔnrilɔ kàfɔli wáà jaala kɔlisiin pe 'puu nɛ baara dáà kúu dè, pe 'puu nɛ ki kacuɔnrilɔ kàfɔli ye wè Seva. 15A gbòdoli wi sí siɛnnugoro kɛn pe mɛ́ nɛ́ pe yɛ: «Zezi wè, mi nyɛ́nì wi cɛ́n; Pɔli míɛni wè, mi 'wi cɛ́n nɛ̀ pínɛ. Yeli sí bèle, báli bīɛlɛ yeli bèle ?»

16Nàguɔ ŋáà nī gbòdoli wi 'puu wè, a wi 'fali nɛ̀ tuu siɛnnɛ bálì nɛ̄ bèle, nɛ̀ pe wáa nɛ̀ mígi pe mìɛni bèle nɛ́ ŋɔri ní, nɛ̀ pe yiɛyɛ wárigɛ yè sìpiʔi, fúɔ a pe 'fɛ̀ nɛ̀ yiri nɛ́ nɔmirɔ ní náborilo.

17A Efɛzi kàʔa wuulo pe mìɛni 'ki kaala náà lúʔu lè, Zuufulo yo, Girɛkilɛ yo. A fíɛrɛ 'jíin pe mìɛni nī, a pe 'yɛ̀ nɛ kpuʔɔrɔ tari Kàfɔli Zezi míʔɛ nɛ̄ gè. 18Siɛnniʔɛnɛ cé tɛ́ngɛ, a pe 'yɛ̀ nɛ ki nyu nɛ yigi kpànʔanɛ kacuʔɔrɔ dáà peli 'kpíʔile nɛ̀ tóri dè. 19Bàli pe 'puu nìnyuʔɔnigɔ kacɛ́nminɛ bèle, a peli pàli nìʔɛnɛ 'pɛn nɛ́ pe nìnyuʔɔnigɔ sɛbɛlɛ ní bèle, nɛ̀ pɛ́nì ti sórigo siɛnnɛ pe mìɛni yiʔɛ mɛ́ gè. A pe 'ki yɛrɛ dáà ti lɔri tɔ́ri dè, a ki wali wi 'yɛ̀ walifiiwe siramuʔɔyɔ togo nɛ́ kogunɔ (50 000). 20Kàfɔli wi fànʔa nɛ̄ gè, a kire 'ki kɛn a Kataanna Siɛnrɛ ti 'kò nɛ nyu nɛ waa yiʔɛ nɛ̄ nɛ́ ŋɔri ní.

Pe 'kàgbaaligɛ yɛ̀gɛ tɛ́ngɛfɔlilɔ kúrugu bèle

21Bà kire kele gálì ke kɛ́nì tóri gèle, a Pɔli wi 'ki yɛ̀gɛ bè sùuri Maseduwani tɛ́nimɛ nī bè nɛ́ Akayi tɛ́nimɛ ní bè, bè kɛ́ Zerizalɛmi kàʔa mɛ́. A wi 'jo: «A mi kɛ́nì kúɔ baa kire tiʔɛ nī gè, ki 'yɛli mi- kɛ́ Wurɔmi kàʔa mɛ́ gè bè pínɛ.»

22A wi sí wi baakuɔnyɛninɛ siin tun baa Maseduwani tɛ́nimɛ nī bè, peli cé nyaa Timote nɛ́ Erasiti; wire wè nɛ́ kò baa Azii tɛ́nimɛ nī bè nɛ̀ lɛ̀lɛ láà kúɔ.

23Kire lɛ̀lɛ nī lè a kàgbaaligɛ 'yɛ̀ kpuʔɔ tɛ́ngɛlɛ koligo wori nɛ̄ dè. 24Ki 'nyaa nàguɔ wáà 'puu baa, tiɛkpuɔnwɔ wi 'puu, pe 'puu nɛ wi ye Demɛturusi; wi 'puu nɛ Aritemiisi yasungo saapigele yafanʔana kpínʔini nɛ́ walifiiwe ní. A ki baakuɔlɔ pe 'kò nɛ wali tari nìʔɛgɛ ki yafanʔana gálì nī gèle. 25A Demɛturusi wi 'peli bálì yeri bèle nɛ̀ fàri bìli pe 'puu nɛ ki baara felide kúu dè, nɛ̀ pe pínɛ, nɛ́ pe yɛ: «Mi siinyɛninɛ, yeli 'ki cɛ́n baara dáà tire nī weli nɛ weli wali tari wè. 26Gìi sí nàguɔ ŋáà wiī nɛ nyu gè, yeli nɛ ki lúru níɛ ki nyaʔa nɛ pínɛ. Efɛzi kàʔa yákuɔ cɛ bɛ̀ʔ, ki cɛ́nì kò cɛ̀ bé Azii tɛ́nimɛ pi mìɛni kpàri wī, bɛ̀ Pɔli ŋáà wi 'ki juu nɛ̀ siɛnnɛ pe sɔ̀ngirɔ yiʔɛ dè, nɛ́ jo dí kulocɛlɛlɛ bálì weli 'kpíʔile nɛ́ weli kiyɛ ní yè, dí ti wè kulocɛlɛlɛʔ. 27Weli baara tire yákuɔ míʔɛ bɛ̀ʔ ki je cúʔɔʔ; weli kulocɛliɛ ŋáà wī kpuɔwɔ wè Aritemiisi wè, wire sundiʔɛ kire pe je faʔa, siɛn fǎga ní de tɔ́ri nɛ́ ki níʔ, bèri ki gbùʔɔrɔ́ʔ Azii tɛ́nimɛ ni bè nɛ́ duniya wi mìɛni nī wèʔ.»

28Bà siɛnnɛ pe 'siɛnrɛ dáà lúʔu dè, a ti 'pe funyɔ yɛ̀gɛ yè kpuʔɔ ! A pe 'yɛ̀ nɛ nyu nɛ kpáala níɛ waa: «Aritemiisi wè, Efɛziyé wuu wè, wire wī kpuɔwɔ wè !» 29A ki kàgbaaligɛ ki 'kàʔa kpàri gè, a siɛnnɛ pe 'fɛ̀ nɛ̀ pɛn baa dàlikpuʔɔ mɛ́ gè. Bà pe báan bèle a pe 'Pɔli kobinɛnyɛninɛ cò bèle, Gayusi wè nɛ́ Arisitariki ní wè; Maseduwani tɛ́nimɛ wuulo pe 'puu.

30A Pɔli wi 'yɛ̀ nɛ̀ jo wire bé jíin baa siɛnnɛ nī bèle, tɛ́ngɛfɔlilɔ piyè fɔ̀li nɛ̀ wi yaʔa wi 'kɛ́ʔ. 31A ki tiʔɛ tɛ́nimɛ siɛnkpolilo pálì 'tunduro tórigo wi mɛ́ nɛ̀ wi fiɛn nɛ́ wi yɛ wi fǎga tí bé ki kɔ̀rirɔʔ bé líɛ bè kɛ́ baa dàlikpuʔɔ mɛ́ gèʔ; Pɔli wi nàgorilo pálì pe 'puu peli bèle. 32Kàgbaaligɛ ki 'puu kpuʔɔ baa dàlikpuʔɔ mɛ́ gè; pe mìɛni nɛ nyu pìye fungo, nɛ̀ sí ki taa pe kpuɔmɔ sì yé cɛ́nì ki cɛ́nʔ gáa nɛ̄ piyē baa gbuʔulilo bèleʔ. 33Nàguɔ ŋáà Zuufulo pe yé ŋɔrigɔ nɛ̀ tórigo baa yiʔɛmɛ gè, Alɛgizandiri wè, a gboli wuulo pálì 'siɛnrɛ ti yiʔɛ juu nɛ̀ tìɛ wi nɛ̄. A Alɛgizandiri wi sí 'kɔli yɛ̀gɛ siɛnnɛ mɛ́ bèle, bè juu bè tìɛ pe nɛ̄. 34Bà siɛnnɛ pe kɛ́nì ki cɛ́n dí Zuufuwo wī wè, a pe mìɛni 'yɛ̀ nɛ kòkuʔulo wáari fúɔ nɛ̀ pɛ́nì taa líɛrilɛ siin, níɛ waa: «Aritemiisi wè, Efɛziyé wuu wè, wire wī kpuɔwɔ wè !»

35A kàʔa ki komi wi 'juu nɛ̀ siɛnnɛ pe funyɔ nyígi yè nɛ́ pe yɛ: «Efɛzi siɛnnɛ yeli bèle, siɛn yē bile lé ŋàa wi bé jo wire sì ki cɛ́n dí Efɛzi kàʔa kire nī Aritemiisi yasungbuʔɔ ki yē gè, á ki yafanʔa ki 'tìgi nyìʔɛnɛ nī lè nɛ̀ tuu gè ? Wi sundiʔɛ saakpuʔɔ míɛni gè náʔa gɛ ki yē. 36A ki sí yē siɛn sǐ gbɛ̀ ti tíɛnɛʔ dè, ye- yeli funyɔ nyígi yè, ye fǎga tí bé nyùgofun kaala láà parigɛ bè kpíʔileʔ.

37«Nàguɔlɔ bálì yeli 'cò nɛ̀ pɛn bèle, piyè yakaa yùu sundiʔɛ saakpuʔɔ nī gèʔ, pe míɛni piyè siɛncuʔɔrɔ juu nɛ̀ wáa weli yasungo mɛ́ gèʔ. 38A ki sí yē Demɛturusi wè, wire nɛ́ bàli ní pe nyɛ́ni baanuro kúu dè, a ki yē siɛnrɛ yē pe mɛ́ wàa kúrugu wè, kàyuʔujuudiɛyɛ yē baa nɛ́ fànʔafɔlilɔ ní, peri waa pe sa pe yeri kire tiʔɛ nī. 39A ki sí yē siɛnrɛ yē wàa mɛ́ yeli nī bèle, we bága sa wìye nyaa bè juu ti nɛ̄ weli gboli nī lè. 40A kire 'laa wè, pe bága siɛnrɛ cáan dè weli nɛ̄, bé jo weli nyɛ́nì kàgbaaligɛ yɛ̀gɛ kàʔa nī gè pàngɛ gè. A kire 'laa wè, siɛnkpaanra díi we bé gbɛ̀ juu gbúʔurulo náà ni wori nɛ̄ dè ?»

Bà kàʔa ki komi wi 'tire juu nɛ̀ kúɔ wè, a wi 'siɛnnɛ yɛ bèle peri waa pe tiɛyɛ nī.

Currently Selected:

Kakpiʔiligele 19: sev

Highlight

Copy

Compare