Malékuse 5

Yěsô gÿǒ nyìŋ gẅie messé tepòŋ la ne ḿbue yé zeŋe

(Matio 8.28-34; Lukase 8.26-39)

1Yěsô pâ *ngàŋa kwò yé túm ntse tà ńkúu nà yetsɔ́ nzǐŋ, é gwɔ́ ngwòŋ pà Garazania, 2ńně fóo tsɛ̀ɛ kanú’ ńkẅɛɛ, atsɔ̌ nyìŋ gwóon ńkẅɛ ńtóo mvfò yé, éfóo mvwɔ́’ metóon, á gwɔ́ jʉ’ gie mé túŋo mepfó wó, ńgwɔ́ nyìŋ, mbà *ssé tepòŋ léen ńgwoon yé, ńně ḿbue yé. 3À lɔ̌ɔn ńtsẅé pɔ́ mvwɔ́’ metóon ŋwɛ́, nyìŋ piŋ tè wó gẅie à lɔɔn ńgwɔ́ á gíŋe ńku’u lékwɛ́ɛ yé wɔ́, tà mbɔɔ lê tsên wɔ́. 4Á gwɔ́, mbà mé lǎ zye ńnéŋe *kɔ̌’ mekwò yé, ńdɔgɔ tsɛ̂n ńkwɛ́ mbwó mé, á pú ḿbwɔ́’te *kɔ̌’, ńzá’te metsɛ̂n tà tsɔ̌ nyìŋ tè gíŋe ńku’u ná yé wɔ́. 5Á gwɔ́ kà zsǒ wɔ́, kà tsẅɛ́’ wɔ́, ńgwá ḿbúu, éfóo mvwɔ́’ metóon ńgee ndùm lekwɔ’ɔ́ ńga’te, ńně ńdɔgɔ metóon ńgwate mbùm ye.

6Á tyé ngʉ̀a shʉ̀shʉ̀a, ńgyá Yěsô pú’u, ńnɔ́ɔnte yé ńtó ńnuŋe mekwò yé, 7ńdɔg ngyè tetʉ́ʉ ńga’te ngie: Yěsô Míŋ Ssé gẅie à pi’i kɔ̀ɔkɔ́ɔ, ɔ̀ kẅé kɔ́ mbwo mèŋ? Tsétsɔ’, mèŋ n dɔ̌g lezíŋ Ssé sẅíŋte gú ngie, ɔ̀ pɔ́ɔn lé ńnéŋe wɔ̀ɔn tsɛ̀ɛ ngɔ́’? 8Nyìŋ ŋwɛ́ la gwaa gɔɔn pú’u, á gwɔ́, mbà Yěsô tsẅǐ né *messé tepòŋ ngie pɔ́ fó ná yé ńkẅɛ. 9Yěsô zɛ́te nyìŋ ŋwɛ́ ngie: Lezíŋ shú ée le wɔ̌? Á tsɔ́’ɔ mbwo yé ngie: Lezíŋ sɔ́ɔn ée le menùɔ, mélà’mie peg *messé tepòŋ gyɔ́ɔn gyɔ̌ɔn, 10ńnyɛte sẅíŋte Yěsô ngie: Tsétsɔ’, tà á jwoŋ messé ŋwɛ́ tà pɔ́ fóo lá’ ayɛ̌ ńgʉa.

11Á la gwaa gwɔ́, atsɔ́ nùɔ mekúnɔ́ɔn gwɔ́ jʉ’ó, á ndùm lekwɔ’ɔ́ ńně ńgwá ńkʉ́’ʉ fa’a shúm ḿpfɛ́ɛ. 12*Messé tepòŋ sẅíŋte Yěsô ńgɔɔn ngie: Gÿo peg kú pɔ́ nà mekúnɔ́ɔn pɛ̂. 13Yěsô zẅíŋ, *messé tepòŋ leen ńké fóo ná nyìŋ ŋwɛ́, ńkẅɛ ńkúu nà mekúnɔ́ɔn. Anùɔ mekúnɔ́ɔn pú ńtága fó ndùm lekwɔ’ɔ́ ḿbʉle ntse, ńnú ntse ńkwéte. Pɔ́ laa mmó ntsá’ yépʉ́a. 14Pʉ̀a pie pɔ́ la ne ḿpféle mekúnɔ́ɔn gyá pú’u, ńkÿo, ńgʉa ḿbú ńdɔgɔ nò gie pɔ́ gyǎ, ésaa tÿǒsoŋ, tà mbɔɔ lá’. Alá’ kwɔ́’, ńtó ńgyá mmó gie á gÿǒ, 15ńgʉa tà ńkúu lejʉ́ŋ Yěsô, ńgyá nyìŋ gẅie *messé tepòŋ laa ná yé tà ńgyɔ́ɔn gyɔ́ɔn la, á ńnéŋe ḿma’ menzsǒ, mbà legyè sé pǐŋ, pɔ́ pú ḿbɔ́g tɛ’. 16Tsɔ́ pʉ̀a gwɔ́ jʉ’ó, mbà pɔ́ ně ńgyá mmó gie á gÿǒ nyìŋ awɛ̌ mbàa mekúnɔ́ɔn. Pɔ́ ne ḿbíte shwóŋó pʉ̀a pie é tǒ nzèm. 17Mé jú’, ńzye lésẅíŋte Yěsô ngie à fó lá’ pɔ́b ńgʉa.

18Yěsô ne ńkúu tsɛ̀ɛ kanú’ pá’ à ge cʉ́’ gʉa yé gʉa, nyìŋ wá gẅie à zeŋé la, sẅíŋte yé ngie à zẅíŋ, pɔ́ ye gʉa. 19Yěsô lʉ’, ńgɔɔn né yé ngie: Piŋ nê mbʉ̀a gù, ńkẅɛte pʉ̀a pú, éshwóŋó wɔ́b máa nò mbòŋo gẅie Cʉ̀apʉ̀a gÿǒ ná gú, éshwóŋó wɔ́b pá’ à tsɔ̌ɔn mezìŋe mú. 20Nyìŋ ŋwɛ́ leen ńké ńgʉa ńgwá ńgiŋe tsɛ̀ɛ melá’ ŋwɛ́ ntsèm, ńně shwóŋó nò gie Yěsô ně ńgÿo ná yé. Pʉ̀a metsèm jú’u á kʉ’ʉ wɔ́b tɛ’. Mé tóŋo yɛ̌ pàga lá’ lê Metÿǒsoŋ Legém.

Anò míŋ Yayelo pɔ́ manzwě gẅie à la kíbe nzsǒ Yěsô

(Matio 9.18-26; Lukase 8.40-56)

21Yěsô lɔgɔ kanú’ ńtúm ntse tà ńkúu nà yetsɔ́ nzǐŋ. Máamáa nùɔ lá’ cú’te lejʉ́ŋ ye. Á nyé ńgwɔ́ pɔ́ nkʉ̀ŋ ntse, 22atsɔ̌ nyìŋ tó, lezíŋ sé gwɔ́ le Yayelo, á gwɔ́ tsɔ̌ tà’ nà melÿò tsɛ̀ɛ *ndá cú’tè pà Yuda, ńgwɔ́ tà ńgyá Yěsô, ńdeen ńnuŋe mekwò ye, 23ḿbú’ mbwó ngie: Tsétsɔ’ míŋ wɔ̀ɔn we manzwě à cʉ̌’ ńgwɔ́ pɔ́ ncwò legwé, tóo, ńzáb mbwó mú ná ye, à sẅéte ńtsẅɛ́. 24Yěsô zẅíŋ, pɔ́ yé cʉ́me mánzsè ńně ńgee, alá’ pú ńgwɔ́ mánzsè tɛ’, ḿbú ne sẅɛ́ɛ Yěsô.

25Atsɔ̌ manzwě gwɔ́ yé nùɔ, ńně ńguɔ, ńgẅiin guɔ máshúɔ, mbà á gegé yé gege ngù’ ntsɔ̀b pʉ́a lê legém. 26Mbà à lǎ giŋe mbʉ̀a megàŋa ffo tà ńkʉ́a, ḿbú ńcʉŋte ye nkáb tà é mag, ńké tè sẅéte, tà ńcʉ́’ pú’u, aguɔ kẅi’i kẅi’i. 27À la jú’ pá’ mé gɔɔn ngie Yěsô ne ńgÿo pʉ̀a zeŋe, á ná’te fó nzèm ńtó ńkíbe nzsǒ Yěsô, 28ńně ńgɔɔn ntʉ́m yé ngie: N dɔɔn ńkíbe pɔ́ ndà’ nzsǒ Yěsô, mbà n ge zeŋe, 29ńdeen ńkíbe, aguɔ yé gwóon ńzá’a, á gíŋe ńjú’, mbà à zeŋé.

30Yěsô gwóon ńjú’ pá’ tsɔ́ metʉ̀ kẅɛ̌ mbùm yé, ésele nnɛ́ ńdíe lá’, ńzɛ́te ngie: À wɔ̌ kibé nzsǒ yɔ̀ɔn? 31*Ngàŋa kwò yé tsɔ́’ ngie: Ɔ̀ gyǎ alá’ pú ne sẅɛ́ɛ gú zẅìŋ wɔɔn, ɔ̀ gíŋe ńzɛ́te ngie à wɔ̌ kibé nzsǒ jù wɔ́ la? 32Yěsô ké sele pɔ́ nnɛ́ ńně ńnáŋte, éfa’a lézsé nyìŋ gẅie à kibé yé. 33Manzwě ŋwɛ́ cʉ́’ʉ ḿvɛɛ vɛ, ńtí nue à la zsé mmó gie á cʉ̌a ná ye, ńdeen ńké ńtó, ńnuŋe mekwò Yěsô, ḿbú shwóŋó yé kwà’ nò gie á cʉaté ntsèm. 34Yěsô gɔɔn né ye ngie: Míŋ wɔ̀ɔn, pá’ ɔ̀ zǎb ntʉ́m ná mèŋ la, ɔ̀ zeŋé, gʉa lê mbʉ́lè, aguɔ jú mǎg.

35Yěsô nyé ńgɔɔn nò né manzwě ŋwɛ́ gɔɔn, etsɔ́ ntá’ pʉ̀a fóo mbʉ̀a Yayelo, ńtó shwóŋó yé ngie míŋ we ně ńdá’ ńkwé, ngie tà á gíŋe ḿbége Ndè. 36Yěsô jú’ pá’ fʉ̀’ gie à kaa jú’u la, ńgɔɔn né Yayelo ngie: Tè pɔ́g, záb pɔ́ ntʉ́m ná mèŋ. 37Yěsô pɔ́ Yayelo ne ńgee, Yěsô tè zẅíŋ ngie tsɔ̌ nyìŋ cʉ́me nzèm pɔ́b wɔ́, ndà’ Piɛ ńgÿo Jâg pɔ́ fɛ́ we Jâŋ. 38Pɔ́ gʉa tà ńkúu ndá Yayelo, Yěsô gyá mé pú ńgwɔ́ wó ńně ḿbége jʉ’, epʉ̀a ne ńdʉate, petsɔ́ ne ńga’te. 39Yěsô kúu ndá ńgɔɔn né pɔ́b ngie: Pi pǔ ḿbége jʉ’, ńdʉa nzẅìŋ wɛ̂ mélà’a kɔ́? Múɔ kaa kwé, à lye lyě. 40Pɔ́ jú’, ńgẅe yé gẅe. Á gÿo pʉ̀a metsèm fóo ndá ńkẅɛ, tà é cʉ́’ ndà’ tá múɔ pɔ́ má múɔ, ńgÿo *ngàŋa kwò yé yɛ̌. Pâ pɔ̌ kúu tsɛ̀ɛ lûm ndá, á jʉ’ gie múɔ nuŋe wó. 41Yěsô kú’te pwó múɔ, ńgɔɔn né yé ngie: Talita kum, ńdɔgɔ ńgɔɔn ngie: Múɔ manzwě, lu ssé. 42Múɔ gwóon ḿbʉ’ʉ nnɛ́, ńdu ssé ńzye légiŋ. Pɔ́ gyá á pú ńkʉ’ʉ wɔ́b tɛ’. Múɔ laa mûɔ ngù’ ntsɔ̀b pʉ́a nê legém. 43Yěsô pú ńtɔ’ɔ wɔ́b ngie pɔ́ pɔ́ɔn légÿo tà tsɔ̌ nyìŋ ndyɛ̀’ɛ zsé mmó gie à gÿǒ, ḿbiŋ ńtsẅi ngie mé náa mmó à jÿó.

Currently Selected:

Malékuse 5: NGBM

Highlight

Copy

Compare