Matio 28
28
Yěsô zimé nà legwé
(Malékuse 16.1-8; Lukase 24.1-12; Jâŋ 20.1-2)
1Àlyɛ’ɛ́ nzse pa Yuda gÿo ńtɔ́g, á gwɔ́ mba’ámba’ ná ndùŋ mvfò lyɛ̌’ nà ngàba lá’, Malîɛ Magdala pɔ́ wetsɔ̌ Malîɛ gʉa légyá lesyè, 2ńdeen ńkúu wó ńjú’ tsetsá’ pú ńcʉ’ʉ tɛ’. *Cÿɔ́’ Cʉ̀apʉ̀a fó tÿǒ lepwó sẅɛ́’, ńtó ńkite tóon gẅie mé ka lɔg ńjÿɔ́’ ncwò lesyè, ńkwɔ́’ ńnéŋe ná tóon ŋwɛ́. 3À la ne ńkyɛ’ɛ jʉ’ pá’ nně mbʉ̀ŋ la, menzsǒ mé piŋ ne fɔ́gɔ tà ńŋwʉŋe. 4Pàpyɛ́b lesyè gyá pú’u, ḿvɛ, ḿbɔ́g, ńgwete ńnuŋte ssé pá’ mepfó la.
5Tá *cÿɔ́’ Ssé gɔɔn né pànzwě ngie: Tà pi pɔ́g, n zsě ngie pi tóo fa’ Yěsô gẅie mé ka kime yé ná tÿǒ kǐ la. 6À tè gíŋe ńgwɔ́ jʉ’ɔɔn wɔ́, à zimé nà legwé pá’ à la gɔɔn la. Pi tó ńdíe jʉ’ gie pfó yé kaa wó tá ńgyá. 7Pi gwóon ńgʉa shwóŋ *ngàŋa kwò yé ngie à zimé nà legwé, ńgie à vɔgɔ́ Galilea ńně ńzẅí’te gẅi lâ pɔ́, pi ge kúu wó tá gyá yé. Yɔɔn aa nò gie mèŋ n kɔ’ɔ́ ńgẅiin léshwóŋó gẅí.
8Pànzwě gwóon fó ngʉ̀ŋe lesyè ńgʉa létsẅii yɔɔn nò mbwó *ngàŋa kwò Yěsô. Ecÿɔ’ nyé ńgwɔ́ pɔ́ ná pɔ́b, tá pɔ́ ne ńkága kǎg, 9ńtóo légiŋ, ḿbumte Yěsô. Á gɔɔn né pɔ́b ngie. N tsyɛ’té gẅí! Pɔ́ kẅí’te mvfò yé, ńkíbe mekwò mé, ńgu’te yé. 10Yěsô leen ńké ńgɔɔn né pɔ́b ngie: Tà pi pɔ́g. Pi gʉa ńtsẅi né mefɛ́ pɔ́ɔn, ńgie pɔ́ gʉa né Galilea, ńgie pɔ́ ge gyá wɔ̀ɔn pɔ́ wó.
Shwóŋte pàpyɛ́b lesyè
11Pànzwě gwɔ́ mánzsè ne ńgee, etsɔ́ pàlÿɔ́’ ncù ná pie é la ne ḿbyɛ́bɛ lesyè gʉa tÿǒsoŋ, ḿbú ḿbíte kɔ́ɔkɔ́ gie á cʉ̌a, éshwóŋ *mentándá pànùŋe pwɔ́’. 12*Mentándá pànùŋe pwɔ́’, tóŋ mekěme lá’, pâ pɔ̌ cú’te ńnéŋe ssé, ńkwaŋte, ńná ḿbwɔ́’ nkáb mbwó pàlÿɔ́’ ncù, 13ńgɔɔn né pɔ́b ngie: Pi gɔɔn pé ngie pi ně ne ńdyé letsẅɛ́’, *ngàŋa kwò Yěsô tó ńjʉʉ pfó yé ńdɔg ńgʉa. 14Ngúmnɔ́ɔn lɔɔn ńké ńjú’, mbà peg ge zsé nò gie peg ge shwóŋó yé, ḿbɔ́gɔ gẅi légyá ngɔ́’. 15Pàlÿɔ́’ ncù kẅé nkáb, ńgÿo pá’ mé tsẅǐ né pɔ́b. Áa yɛ̌ tá yɔɔn nò leen sá jʉ’, pà Yuda zsé yɔ́b pɔ́ yɛ̌ nò tà ńkú lyɛ̌’ɔɔn.
Yěsô ne ńtúmo pʉ̀a pé tsɛ̀ɛ njÿó
16 *Ngàŋa kwò Yěsô ntsɔ̀b yémɔ’ɔ́ nê legém la jú’u nò gie Pànzwě pá gɔ̌ɔn, ńgʉa né Galilea, ńkwɔ́’ɔ ndùm lekwɔ’ɔ́ sie Yěsô la gwɔ gwɔ́, mbà à la la’te mbwó pɔ́b, ngie pâ pɔ́ ge lá’ pumte wó 17Pɔ́ gwɔ́ tá ńgyá Yěsô, ńkwí’te ssé, ńgu’te yé, tá tsɔ́ pʉ̀a gwɔ́ tsetsɛ̀ɛ pɔ́b, ńně ḿmʉ́’te mʉ’té. 18Yěsô tóo lejʉ́ŋ pɔ́b, ńgɔɔn né pɔ́b ngie: E Ssé leen ńná tʉ̀ ntsèm né mèŋ lélɔg sá’ shúm sie ée tÿǒ lepwó mbɔɔ sie ée ndùmo ssé tsetsá’. 19Pú’u la, pi gʉa ngwòŋo ngwòŋ, ńdɔg pʉ̀a mesoŋ ńgÿo *ngàŋa kwò yɔ́ɔn, ńnu’u wɔ́b ntse ná lezíŋ Tá, mbɔɔ Múɔ, mbɔɔ Zẅìge Ndʉalʉ̌a, 20ńzí’i wɔ́b létÿɔ́gɔ kwò ná menò ntsèm mie mèŋ n da zí’i gẅí. Pi zsé ngie, kwà’ mèŋ n ge lá’a gwɔ́ pɔ́ tsetsɛ̀ɛ pi tà njÿó lá’ ḿmag.
Currently Selected:
Matio 28: NGBM
Highlight
Share
Copy
Want to have your highlights saved across all your devices? Sign up or sign in
Nouveau Testament en Ngienboum © Alliance Biblique du Cameroun, 2007.