Jẅide 1
1
Atsyɛ̀’te
1Àa mèŋ Jẅide, nyìŋ gẅie à fa’a fà’a Yěsô Kristo, ńgwɔ́ fɛ́ Jâg. N túmo yɔɔn ŋwà’ne ńnáa mbwo pi pie Tá wege Ssé la tóŋo gẅí. À kwoŋo gẅi ńne ńtÿɔ́’te gẅi ńdɔgɔ ńzẅí’te Yěsô Kristo. 2E Ssé ne ńtsɔ́ɔn mezìŋe mí, ńne ńnéŋe sẅétè ntʉ́m pi, ńne ńgÿo pi ne ńkẅi’i ńjú’u ngie à kwoŋo gẅi kwà’ mboŋó.
Pazí’i pʉ̀a mmó pie ée pe cÿɔ̌ nò
3Meshǔ pɔ́ɔn pe tʉ̀ nzẅìŋ, n kɔ̌ɔn ńzɔ́gɔ ńtsɔ́ɔn tsɔ̌ɔn léŋwe’e ŋwà’ne ńnáa mbwo pi á nà nò pá’ e Ssé ka gÿo pege metsèm pú ńtsẅɛ́, tá’ n ka neŋé tà ḿbú ńgyá fʉ̀’ɔɔn ngie á zɛ́te ngie mèŋ n ŋwe’e ńdɔg ńkẅiŋte gẅi léma’ ncù ńdɔg ḿbɔ́ɔnte nò Yěsô Kristo gie e Ssé la cʉ́me mbwo pege pʉ̀a Ssé. Yɛ̌ nò gwɔ́ pɔ́ yémɔ’ɔ́ ndà’, atsɔ́ té ńdá’a ńgíŋe ńgwɔ́ wó wɔ́. 4Mèŋ n gɔɔn pá’ɔɔn nue tsɔ́ pʉ̀a kéen ńzɔɔn shú ńkúu tsetsɛ̀ɛ pi, pɔ́ ne sele shÿó nò mbòŋo gie e Ssé yege la lɔg ńcÿó gʉm yégè, pú’u lépʉ́le ńgÿo menò shʉ́ mɔ́b. Pɔ́ lɔgɔ pú’u, ḿmoŋe Yěsô Kristo, á gwɔ́ ndà’ Ndè wege, yé gíle yé zɔ gẅiin wégè. Pɔ́ ée pʉ̀a tepòŋ, ńgwɔ́ pʉ̀a pie ntyě sǎg pá’ ŋwà’ne Ssé la lá’ ńgɔɔn ntí ngʉ̀ngʉ̀ gie e ku’u ná pɔ́b. 5Mèŋ n ne ńkwoŋo lékímte gẅi tsɔ́ nò gie pi cwoŋo ńne ńzsé mboŋó, á gwɔ́ pá’ Cʉ̀apʉ̀a la kẅile pʉ̀a pé pà Israel tsɛ̀ɛ ngwòŋ Egipto tà pɔ́ tsẅɛ́, á gÿo ńgʉa tsetsɛ̀ɛ pɔ́b ńgÿo pʉ̀a pie pɔ́ kaa záb ntʉ́m ná yé wɔ́ kwéte. 6Pi kímte nò *mecÿɔ́’ Ssé pie pɔ́ la gwága jʉ’ gie e Ssé tÿɔgɔ́ wɔ́b wó, ńgwá’a yɔ́b jʉ’ʉ leńnéŋe, ńne ńtsɔ́ɔn ye mvfò. E Ssé la kwɛ́ɛ wɔ́b ndà’ ndà’ lê metsɛ̂n, ńnéŋe wɔ́b tsɛ̀ɛ mwòon nzém, pɔ́ ée wó ńzẅí’te ngʉ̀ngʉ̀ ye lyɛ’ɛ́ lÿò gie mé ge lá’ zá’ mentsaŋ, 7pi gíŋe ńkímte nò tÿǒsoŋo Sodom mbɔɔ ye Gomor, tà mbɔɔ ye metsɔ́ metÿǒsoŋ mie pâ pɔ̌ la teme pàa, ńkímte pá’ pʉ̀a metÿǒsoŋ ŋwɛ́ la gÿo nò tepòŋ pɔ́ pá’ *mecÿɔ́’ Ssé pɛ̌. Pɔ́ la ne ńgÿo menò shʉ́ tà sá’a sǎ’, ńdɔg mbùm yɔb ńkúbe shÿó menò mie e Ssé la záb#1.7 Mé líe Genèse 19.1-25. . Áa nà fʉ̀’ɔɔn pɔ́ nuŋte tsɛ̀ɛ mmɔ̌g gẅie é té ndà’a ḿbyé wɔ́. Á lɔgɔ ńgɔɔn nò mbwo wɔ̌wɔ́ɔ.
8Epʉ̀a pie pɔ́ ka shǔ ńkúu tsetsɛ̀ɛ pi ŋwɛ́ gÿo pɔ́ pá’ pʉ̀a pie é laa tsɛ̀ɛ mɛ̌ metÿǒsoŋ. Pɔ́ kwaŋte menò mie é té tyé, á cʉa pú’u pɔ́ lɔg mbùm yɔb ńgÿo menò shʉ́. E Ssé gɔɔn nò pɔ́ gwág gwǎg. Pɔ́ zoonte mezẅìge mie é gẅiin legú’. 9Tá mbà Méshÿɛɛ, tándá *mecÿɔ́’ Ssé la tè pú’u gÿo. Á laa lyɛ̌’ gie pɔ́ Sátà la ne ńzoŋo nò ná mbùm Mǒsê, á ké tè Sátà zoonte, ńké tè túu *lɔ̌’ yé ńdɔg ńzoonte yé wɔ́. Tà ńcʉ́’ pú’u, mbà à la gɔɔn pɔ́ ndà’ ngie: Á poŋ ngie Cʉ̀apʉ̀a néŋ ngɔ́’ twó gù. 10Tá á gʉa ná pɛ̌ pʉ̀a, pɔ́ zoonte mmó té ne ńzsé pá’ á gwɔ́, ńgʉa ná gie pɔ́ zsé yɔ́b nò mǒ pɔ́ pá’ɔɔn, pɔ́ pá’ menɔ̀ɔn mbà’ pie legyè sɔ́b té gwɔ́ wɔ́, eshúm sie pɔ́ zsé ná yɔɔn ntí gÿo pɔ́ pyé pyě. 11Ndòon ee twó pɔ́b nue pɔ́ cʉmé nà mánzsè we Kain, ńne fʉate menò ńdɔgɔ ńdaba nkáb pá’ Mbalam. Pɔ́ ée pú’u, mbà pɔ́ kéen ńkwé, á nue pɔ́ kéen ńtʉʉ twó mbwo Ssé pá’ Koré. 12Pɔ́ ée pʉ̀a pie pɔ́ cʉŋe nzẅìŋ gẅi á fʉ̀’ gie pi mefɛ́ mefɛ́ cu’té ńne ńjÿó shúm, pɔ́ tó fʉ̀’ó ḿpfɛ́ɛ mmó tɛ’, ńnú melù’ tɛ’, pɔ́ té shʉ́ kú, ńkwaŋ pɔ́ ndà’ yɔ́b twó. Pɔ́ ée pá’ mbʉ̀ŋ gie e kwɔ̌’ tà mé ne ńzẅí’te ngie e lú, afóm kaa la, ńgwɔ́ pá’ metÿǒ mie ée těen ńzéme ntɔ̌ɔn wɔ́, tà mbɔɔ ná fʉ̀’ gie é kɔ’ɔ́ zém, ńgwɔ́ pá’ metÿǒ mie é léen ḿbʉe, ḿbú ńkwé. 13Pɔ́ ne ńdɔgɔ mefà’ tepòŋ mɔ́b saa jʉ’ pá’ ntse té pàa lu ssé ńtéme nà ngʉ̀ŋe ntse, fùfù’ we sa jʉ’ la. Pɔ́ ée pá’ mecÿɔ́’ saŋ pie é gwaa ḿbúu, pɔ́ cʉ́’ʉ ńcʉŋe na jʉ’ gie e Ssé la tÿɔ́gɔ wɔ́b wó wɔ́.
14Henɔg gẅie aa nà mejwoŋó sɔɔn mbʉ́a léfó ná Adam, à la tʉ́ njÿó ńtsẅi nkʉ̀ Ssé gẅie é líe wɔ́b ńgɔɔn ngie: Pi jú’ Cʉ̀apʉ̀a ge lɔg mecÿɔ́’ pé pe Ndʉalʉ̌a, é tó tà è pú ńgyɔ́ɔn gyɔ́ɔn tà ńgwaa ńgwɔ́ mé le sáŋ ńzsé nzẅìŋ wɔ́. 15Á lélɔg ńŋág pʉ̀a metsèm, ńnéŋ ngʉ̀ngʉ̀ twó pʉ̀a tepòŋ métsèm ńtí mefà’ tepòŋ mie pɔ́ la fa’, éfó ná pá’ pɔ́ la tʉʉ twó mbwo Ssé, tà mbɔɔ ná shwóŋè ntsèm gie á pÿɔ́g pÿɔ̌g, á gie pʉ̀a tepòŋ ŋwɛ́ pie pɔ́ té mekù’ gẅiin é lǎ gɔɔn ná Ssé. 16Epʉ̀a ŋwɛ́ ńnéŋe fʉ̀’ ntsèm anò ne ńgyáŋa wɔ́b gyáŋ, pɔ́ ne ńzẅɛ́te zẅɛté, ńnéŋe ńgÿo pɔ́ mmó gie mbùm yɔb ne ńtsóte wɔ́b ngie pɔ́ gÿo, pɔ́ gwɔ́ fʉ̀’ ntsèm, éshwóŋó pɔ́ shwóŋè gie pɔ́ lɔgɔ ńŋà’te ŋa’té, ńgwɔ́ lʉte nyìŋ ńne ńzsé pì gie pɔ́ ge jÿó ná yé.
Lekagá tuŋó ḿbiŋ ńtsẅii nò gie mé ge gÿo
17Tá á gʉa ná pi, mbà meshǔ pɔ́ɔn, pi kímte menò mie megàŋ ntúm Cʉ̀apʉ̀a wege Yěsô Kristo la tʉ́ʉ njÿó ńtsẅii mbwo pi. 18Pɔ́ la gɔɔn ngie, á ge lá’ gwɔ́ nà fʉ̀’ gie njÿó ge magá, epʉ̀a gẅe gẅí, ńgÿo menò tepòŋ ná ntí gie mbùm yɔb ne ńtsóte wɔ́b légÿo pú’u. 19Pɔ́ zɔ̌ ée pʉ̀a pie pɔ́ ma’a fagte tsetsɛ̀ɛ pʉ̀a Kristo. Pɔ́ gÿo pɔ́ mmó gie pɔ́ jú’u soŋ nnɛ́ pɔ́b, a Zẅìge Ssé té ná pɔ́b wɔ́. 20Tá ńgʉa ná pi, mbà meshǔ pɔ́ɔn pe tʉ̀ nzẅìŋ, pi kẅi’i ńtʉte tʉte, ńne ńkú’te mmó gie pi la záb ntʉ́m gẅi mǒ. Yɛ̌ zɔ̌ cÿó gie gẅi leńnéŋe tyé mǒ. Pi tóŋo Zẅìge Ndʉalʉ̌a, à lɔg metʉ̀ mé ńkẅéte gẅí lésẅíŋte Ssé. 21Pi gÿo e Ssé ké ńne ńkẅi’i ńkwoŋo gẅi kwoŋ, ńne ńzẅí’te ngie Cʉ̀apʉ̀a wege Yěsô Kristo ge gÿo gÿo pi gẅiin le gwɔ́ tèmì, á nue à tsɔ́ɔn mezìŋe mí. 22Pi tsɔ́ɔɔn mezìŋe pʉ̀a pie pɔ́ ne ḿmʉ́’te mʉ’té#1.22 Tsɔ́ mezẅìŋe meŋwà’ne gɔɔn ngie: Á gʉa nà pʉ̀a pie é ne ḿmʉ́’te mʉ’té, pi fa’ shÿó léshwóŋó wɔ́b nò tà pɔ́ zẅíŋ. 23Pi fó ná mánzsè gẅie à gee né tsɛ̀ɛ mmɔ̌g ḿbe’e wɔ́b, pɔ́ tsẅɛ́. Tsɔ́ pʉ̀a gíŋe ńgwɔ́ wó pie pi ge gíŋe tsɔ́ɔn mezìŋe mɔ́b, é gwɔ tsɔ́ɔn, é ne pɔ́ɔn mà wɔb. Pi pɔ́ɔn mbɔɔ menzsǒ mɔ́b mie ncÿǒ menò tepòŋ ée mǒ.
Legù’te Ssé ńdɔg ńcʉ́me
24Agù’te gwɔ́ mbwo Ssé, yé gẅie à ku’u létÿɔ́’te gẅi tà pi é le gwé, yé gẅie à ku’u légÿo pi kẅɛ ńtyé nà jʉ’ʉ legú’ gie kwà’ yé aa wó tà *lɔ̌’ á le ná pi wɔ́, pi piŋ ńne ńkága kǎg, 25ée ndà’ yé ńgwɔ́ Ssé. À la lɔgɔ Cʉ̀apʉ̀a wege Yěsô Kristo ńgÿo pege tsẅɛ́. Mé gu’te pɔ́ yé, yé zɔ gẅiin legú’, yé zɔ̌ gẅiin metʉ̀, yé zɔ̌ sá’a pʉ̀a, pá’ à la lá’ ńzye, á ké ńgwɔ́ pɔ́ pú’u, tà ńkú fʉ̀’ɔɔn, é lá’a gwɔ́ pɔ́ pú’u, á nà ngù’ nkɔ̌ɔn nê nkɔ̌ɔn. *Amen.
Currently Selected:
Jẅide 1: NGBM
Highlight
Share
Copy
Want to have your highlights saved across all your devices? Sign up or sign in
Nouveau Testament en Ngienboum © Alliance Biblique du Cameroun, 2007.