Galatia 2
2
Petsɔ́ megàŋ ntúm Yěsô nǎ ngɔ́ɔnte Pɔl ná nò gie à tsẅǐ
1Ńdá’ ńgíŋe ńgwɔ́ piŋe Yerósalem, mbà é cʉ̌a ngù’ ntsɔ̀b lekùa nê legém, ńgwaa piŋ pú’u, peg Panebâse gwɔ́, ńgíŋ ńdɔg mbɔɔ Titus ńgʉa. 2N dɔ̌ɔn ńgee wó, mélà’mie e Ssé la gɔɔn ngie mèŋ n gʉa wó. N da tóo wó, ńkyagte nkʉ̀ mbòŋo gẅie mèŋ n tsẅii mbwo pʉ̀a pie é té pà Yuda wɔ́, éshwóŋ pʉ̀a pie mé lɔ́ɔn ńdíe wɔ́b ngie ée melÿò. Pega pɔ̌ ńnéŋe pɔ́ jʉ’ʉ ntsèm tá mèŋ n kyagte shwóŋó wɔ́b. Pú’u, nue n da tè ne ńkwoŋo ngie à fà’ gie n dǎ fa’ mbɔɔ gie mèŋ n ne fa’a à cʉa sẅɛ̀ɛ wɔ́. 3Titus gẅie peg yé la gwɔ́, laa nyìŋ Gelekia, tá’ tà mbɔɔ pú’u, pɔ́ ké tè sẅɛ́ɛ yé ngie à zẅíŋ mé pú’u yé tá à gwɔ́ nyìŋ Ssé wɔ́. 4Tà mbɔɔ pá’ tsɔ́ pàcÿɔ nò ngie pɔ́ ée mefɛ́ pég la ne ńkwoŋo ngie mé pú’u yé. Pʉ̀a ŋwɛ́ la shú ńkúu tsɛ̀ɛ nùɔ yég pá’ pà mánaŋ. Pɔ́ lɔ́ɔn ńtóo lé gyá pá’ peg ee pà ndù nnɛ́ ná mà pà Yuda, ńcʉa ná Yěsô Kristo ńgÿo még menò pú’u. Pɔ́ lɔ́ɔn fa’a lé lɔgɔ wég ńgÿo menkwɔɔn. 5Tá’ peg la tè zẅíŋe tsɔ́ nò mbwo pʉ̀a ŋwɛ́ wɔ́, tà mbɔɔ lé ná’a ńzẅíŋ tá ḿbiŋ ńdʉ’. Pú’u, le gwɔ́ gie nkʉ̀ mbòŋo ge tyé pɔ́ ndʉŋ ndʉŋ pá’ é gwɔ́, pi zẅɛ́’.
6Á gʉa ná pʉ̀a pie mé lɔ́ɔn ńdíe wɔ́b ngie pɔ́ ee melÿò, mbà pɔ́ la tè gyá ngie pɔ́ ge kẅi’i tsɔ́ mmó ná nò gie mèŋ n tsẅii wɔ́. Ammó gie pɔ́ la zɔɔn ńgwɔ́ yɛ̌ fʉ̀’e mvfò á té líe wɔ̀ɔn nà tsɔ́ nò wɔ́. Á nue e Ssé tè gẅiin tyɛ̀’te ná pʉ̀a mesoŋ wɔ́. 7Tà ńcʉ́’ pú’u, mbà pɔ́ la gyá pɔ́ ngie Ssé la cʉ́me létsẅi nkʉ̀ mbòŋo né pʉ̀a pie é té pà Yuda wɔ́ á mbwo mèŋ ndʉŋ ndʉŋ pá’ à la cʉ́me mbwo Piɛ létsẅii mbwo pʉ̀a pie ée pà Yuda. 8Á lɔgɔ ńgwɔ́ ngie e Ssé gẅie à la zɔɔn ńnáa Piɛ tʉ̀, ńtúmo yé mbwo pà Yuda, yé zɔ la gíŋ ńnáa wɔ̀ɔn tʉ̀ ńtúm wɔ̀ɔn mbwo pʉ̀a pie é té pà Yuda wɔ́. 9Jâg, Piɛ mbɔɔ Jâŋ, é pʉ̀a pie mé lɔ́ɔn ńdíe wɔ́b pá’ mentóon tsɛ̀ɛ cú’tè pʉ̀a Kristo la, la gwɔ́ tà ńzsé ngie e Ssé la kwa’ ńcʉ́me yɔɔn fà’ mbwo mèŋ, ńnáa pwó né peg Panebâse, lélɔg ńda’te ngie pega pɔ̌ ee tà’ ncwò nà fà’a Ssé. Pú’u, peg gẅiin légʉa tsetsɛ̀ɛ pʉ̀a pie é té pà Yuda wɔ́, ńtsẅi nkʉ̀ mbòŋo, pɔ́b yɔ́b pâ Piɛ gẅiin légʉa tsetsɛ̀ɛ pà Yuda ńtsẅi. 10Pɔ́ gɔɔn né peg pɔ́ ndà’ ngie peg kímte mépoŋ pie ée tsɛ̀ɛ cú’tè pʉ̀a Kristo Yerósalem. N ka kě ńkímte wɔ́b kwà’ mboŋó.
Pɔl ne ńkaga Piɛ á Antiokia
11Tá’, Piɛ la gÿo ńtóo Antiokia mèŋ shʉa shʉa ńtyé mvfò lá’ ńdʉ’ʉ mmó gie à gÿǒ, á nue à la gwaa gwɔ́, mbà à fʉ̌a nò. 12Yɛ̌ nò gwɔ́ pá’, pʉ̀a pie Jâg la túm, la gwaa tó, Piɛ pâ pʉ̀a Kristo pie é té pà Yuda wɔ́ ne ńteme ńjÿó mmó. Pɛ̌ pʉ̀a gwɔ́ tà ńtó á lɔg pɔ́ ndɔ́ɔn ndɔ́ɔn ńkẅɛɛ tsetsɛ̀ɛ pɔ́b, pâ pɔ̌ cʉ́’ʉ ńteme mmó wɔ́, á nue à la ne ḿbɔ́gɔ nò gie pʉ̀a pie é kẅite nò lépú’ pʉ̀a ge gɔɔn ná yé. 13Petsɔ́ mefɛ́ mefɛ́ pie é laa Antiokia ńgwɔ́ pà Yuda, gíŋ ńkẅɛ yɔ́b pà zẅíŋe ncwò ńdʉ’ʉ lóŋ pá’ Piɛ. Á gwɔ́ gwɔ̌ tà kwà’ Panebâse gíŋe ńgÿo yé pɔ́ pú’u. 14Tá’ n da gwɔ́ tà ńgyá ngie pɔ́ té ně ńgiŋe ndʉŋ ndʉŋ ná pá’ nkʉ̀ mbòŋo ée jʉ’ó ńgwɔ́ pú’u wɔ́, éshʉa shʉa ńtyé mvfò lá’, ńgɔɔn mbwo Piɛ ngie: Gù gẅie ɔ́ɔ nyìŋ Yuda, ɔ̀ kɔ̌ɔn ńnéŋe jʉ’ɔɔn á nà ntí gie pʉ̀a pie é té pà Yuda wɔ́ ne ńnéŋe, tà ɔ̀ tè ńnéŋe pá’ nyìŋ Yuda wɔ́. Ɔ̀ piŋe fa’a lésẅɛ pʉ̀a pie é té pà Yuda wɔ́, léńnéŋe pá’ pà Yuda mélà’a kɔ́?
Pà Yuda mbɔɔ pʉ̀a pie é té pà Yuda wɔ́ tsẅɛɛ ńcʉa pɔ́ ná pá’ pɔ́ zǎb ntʉ́m ná Kristo
15Mèŋ n gɔɔn né Piɛ pá’ɔɔn, á lɔgɔ ńgwɔ́ ngie pega pɔ̌, é pà Yuda tà fó lyɛ’ɛ́ nzyé, peg tè pʉ̀a pie é kaa ndòon pá’ petsɔ́ melá’, e mie é té zsé *lepʉ̌ Ssé wɔ́. 16Tá’ peg ké ně ńzsé ngie nyìŋ mésoŋ tè gwaa gwɔ́ nyìŋ gẅie e Ssé cʉ̌’ ńdíe yé pɔ́ pá’ nyìŋ gẅie aa ndʉŋ ndʉŋ mvfò yé, á fóo ná pá’ ngàŋ gɔɔn ngie à kú’te *lepʉ̌ Ssé wɔ́. Á zɛ́te pɔ́ ngie à záb ntʉ́m wé ná Yěsô Kristo. Áa mmó gie á la gÿo peg yég la záb ntʉ́m wég ná Yěsô Kristo, pá’ peg ge gwɔ́ pʉ̀a pie e Ssé cʉ’ʉ́ ńdíe wɔ́b pɔ́ pá’ pʉ̀a pie ée ndʉŋ ndʉŋ. À ké fó pɔ́ ná pá’ peg zǎb ntʉ́m ná Kristo, tà á le gwɔ́ pɔ́ nò gie peg ku’té *lepʉ̌ wɔ́, á nue e Ssé la zɔɔn ńgɔɔn ngie sɔɔn nyìŋ té lá’ gwɔ ku’u légwɔ́ ndʉŋ ndʉŋ mvfò yé à fó ná pá’ ngàŋ gɔɔn ngie à ku’té *lepʉ̌ wɔ́. 17Pá’ peg ne fa’a lécʉa ndà’ nzèm Kristo tá ńku’ pʉ̀a pie ée mvfò Ssé ńgwɔ́ ndʉŋ ndʉŋ la, pà Yuda lɔɔn ńgwɔ́ pé’e ńdɔgɔ wég ńtóŋ pʉ̀a pie ndòon ée twó pɔb pá’ pɔ́ tóŋo pʉ̀a pie pɔ́ té zsé *lepʉ̌ Ssé wɔ́, á lɔgɔ pú’u, ńgwɔ́ ngie Kristo aa nyìŋ gẅie à gÿo pʉ̀a kaa pɔ́ ndòon keen? Ngǎŋ á té pú’u wɔ́. 18Ngwɔ́ n gíŋ ńzɔɔn ńzáb ntʉ́m wɔ̀ɔn nà nò *lepʉ̌ gie mèŋ n ka nyé lá? N gÿo pú’u, mbà kwà’ mèŋ n ge lɔg nyɛ ngie mèŋ n gee nyìŋ gẅie à fʉ̌a *lepʉ̌, é lɔgɔ pú’u, é kaa ndòon. 19Á kaa fʉ̀’ gie mèŋ n ka nyě ne fa’a ngie e Ssé fó ná pá’ mèŋ n gɔɔn ngie mèŋ n kú’te *lepʉ̌, ńcʉ́’ ńdíe wɔ̀ɔn pɔ́ pá’ nyìŋ gẅie aa ndʉŋ ndʉŋ, mèŋ n jú’ ngie ńgwɔ́ á le gwɔ́ pú’u wɔ́, áa yɛ̌ tá mèŋ n cʉ́’ ńgwɔ́ ná nò *lepʉ̌ yɔɔn ńgwɔ́ pɔ́ mpfó, pú’u, ńzsé ngie n ge gwɔ́ mvfò Ssé é gwɔ́ ntentʉ́. E Ssé la zɔɔn ńteme wég Kristo mé púte wég yé ńkime nà tÿǒ nkǐ. 20Mèŋ n zɔ tè pá’ɔɔn ńgíŋe sá’a twó mbùm yɔ́ɔn mɔ́, Kristo zɔ cʉ̌’ ńgwɔ́ soŋ nnɛ́ mèŋ ésá’a wɔ̀ɔn. N dɔɔn ńgÿo pɔ́ kɔ́ wɔ́, mbà á gwɔ́ pɔ́ ngie m bǔ ńzáb ntʉ́m wɔ̀ɔn ná Míŋ Ssé. Àa nyìŋ gẅie à la kwoŋo wɔ̀ɔn kwoŋ tà ńkwé nà twó yɔ́ɔn. 21N tě ge zẅíŋ, ànò mbòŋo gie e Ssé la lɔg ńcÿó gʉm yɔ́ɔn à cʉa sẅɛ̀ɛ wɔ́. N gɔɔn ńtí, mélà’mie à lɔɔn ńgwɔ́ gie ńgwɔ́ nyìŋ cʉa ná nò *lepʉ̌ tá e Ssé cʉ́’ ńdíe yé pɔ́ pá’ nyìŋ gẅie aa ndʉŋ ndʉŋ, mbà á lɔgɔ ńgwɔ́ ngie Kristo la kwé sẅɛ̀ɛ sẅɛ̀ɛ.
Currently Selected:
Galatia 2: NGBM
Highlight
Share
Copy
Want to have your highlights saved across all your devices? Sign up or sign in
Nouveau Testament en Ngienboum © Alliance Biblique du Cameroun, 2007.