Efeso 6

Leńnéŋe we metá, lâ memá lâ ńgÿo penkʉ́

1Ńgʉa ná pi penkʉ́, awɔ̌wɔ́ɔ jú’ ncwò tá we pɔ́ má we ná pá’ Cʉ̀apʉ̀a ne ńkwoŋo. Áa mmó gie á tyé ndʉŋ ndʉŋ, pi gẅiin légÿo pú’u. 2Tsɔ́ *lepʉ̌ Ssé gɔɔn ngie: «Gÿo mekù’ tá gù pɔ́ má gù». Aa ndùŋ mvfò *lepʉ̌ sie Ssé la ka’ ntsɔ’ɔ́ fà’ mǒ. 3Á lɔgɔ ńgwɔ́ ngie ɔ̀ lɔɔn ńgÿo pú’u, mbà «ɔ̀ ge gwɔ́ shÿó mbòŋo, é zye ńnéŋe ndùmo ssé tsetsá’».

4Pi metá penkʉ́, tà pi lába lóŋ penkʉ́ pí. Pi cʉ́’ʉ lékwé’te wɔ́b, ńtÿɔ́gte wɔ́b, ńzí’i wɔ́b mmó gie Cʉ̀apʉ̀a ne ńkwoŋo.

Menkwɔɔn lâ metá pù’.

5Ńgʉa ná pi menkwɔɔn, pi jú’ ncwò pʉ̀a pie pɔ́ gẅiin gẅí, ńne náa mekù’ mɔ́b, ésẅí’i mbùm gí ńnáa ssé mvfò pɔ́b, ńgẅiin ntʉ́m mbòŋo nzèm pɔ́b, ndʉŋ ndʉŋ pá’ pi jú’u ncwò Kristo. 6Pi pɔ́ɔn légÿo pú’u, pɔ́ ndà’ fʉ̀’ gie pɔ́ tyé nzèm pi. Pá’ fʉ̀’ gie pi gÿo pɔ́ mmó gie á ge poŋ pʉ̀a mesoŋ la. Pi fa’ pɔ́ pá’ menkwɔɔn Kristo pie pɔ́ ne gÿo mmó gie Ssé ne ńkwoŋo lê ngwòŋ ntʉ́m wɔ́b ntsèm. 7Pi fa’a fà’ yɔ́b lê ntʉ́m mbòŋo, pɔ́ pá’ pi fa’a mbwo Cʉ̀apʉ̀a tà pi tě fa’a mbwo pʉ̀a mesoŋ wɔ́. 8Pi kímte ngie, nyìŋ lɔɔn ńgwɔ́ nkwɔɔn, kà ńgwɔ́ pɔ́ ndù nnɛ́ wɔ́, mbà Cʉ̀apʉ̀a ge lá’ cʉ́’ʉ léná ntsɔ’ɔ́ fà’ we wɔ̌wɔ́ɔ, é ná pɔ́ pá’ ngàŋ ka lɔg fa’ mboŋó pú’u. 9Pi metá pu’ pi gẅiin gí menkwɔɔn mí nê ntʉ́m mbòŋo. Tà pi vege wɔ́b vege. Pi zsé ngie pia pɔ́ pǔ ńgẅiin pɔ́ tà’ Nyìŋ gẅie à sá’a gẅi lâ pɔ̌ á gwɔ́ tÿǒ lepwó. Àa těen ńgẅiin tyɛ̀’te tsetsɛ̀ɛ pʉ̀a mesoŋ wɔ́.

Eshúm ncù sie e Ssé náa

10Nzsò nzèm nò gie mèŋ n ge shwóŋó gẅí, á gwɔ́ pɔ́ ngie: Pá’ pi la nnɛ́ ná Cʉ̀apʉ̀a la, pi kẅé metʉ̀ mbwo ye. Àa ngàŋ metʉ̀ ntsèm. Pi kẅé metʉ̀ mbwo ye. 11Pi kaa shúm ncù sie e Ssé nǎ mbwo pi pɔ́ ntsèm, tá ńdɔg ńzsé ngie Sátà ge lɔg wɛ̌ shÿó ma’a gẅi wɔ́ pi le ŋele, 12á nue pege tě ńgee ńdÿɔ́’ pʉ̀a mesoŋ wɔ́. Pege gee pɔ́ ńdÿɔ́’ mezẅìge tepòŋ mie ée tàa tÿǒ, é lÿɔ́’ metándá pɔ́b, é gíŋe lÿɔ́’ shúm sie ée tàa tÿǒ ńgẅiin metʉ̀, lâ púɔ ntɔ́’ nzěm pie pɔ́ sá’a yɔɔn njÿó. 13Áa mmó gie á gÿo tá á ne ńzɛ́te ngie, pi kaa shúm ncù Ssé pɔ́ ntsèm, tá ńku’u légwɔ́ gie lyɛ’ɛ́ lá’ tepòŋ ge tó, pi ma’ ncù meshÿó meshÿó tà ńtsẅé jʉ’, é ké le ŋele. 14Pú’u la, tà pi ŋele. Anò nénʉ́ gwɔ́ kwɔb gẅie pi lɔ̌g ńtʉ́me zẅɛ̌’ gí, ammó gie á tyé ndʉŋ ndʉŋ gwɔ́ nzsǒ ncù gie pi ge ma’a ná pi. 15Leneŋé ńtsẅi nkʉ̀ mbòŋo Kristo gẅie é ná mbʉ́lè, é gwɔ́ mí melɔ̌ɔn mie pi ge shÿɔ́gɔ kwò pi. 16Gẅi kʉ́’ʉ̀ ncù á gwɔ́ pɔ́ lezǎb ntʉ́m nà Ssé tà mbɔɔ pá’ pi lɔɔn ńtyé pɔ́ nà wɛ̌ shÿó ncù wɔ́. Wɛ̌ kʉ́’ʉ̀ ncù kẅéte gẅi le pyág mmɔ̌g gẅie Ngàŋ mbù lyɛɛ ná mekwòŋ tá ńdɔgɔ ḿma’a gẅí. 17Pi zẅíŋ ngie e Ssé ne ńgÿo pi tsẅɛ́ɛ. Lezẅǐŋ pú’u, aa lekaa cÿɔ́’ɔ ncù ńtɔ’. Pi kẅé nně ncù gie Zẅìge Ndʉalʉ̌a náa mbwo pi. Yɛ̌ nně ncù aa shwóŋè Ssé. 18Pi gwɔ́ fʉ̀’ ntsèm ńne ńtsyɛ’te Ssé, ńgíŋe ne sẅíŋte yé nà mentí ntsèm, pá’ Zẅìge ge ne nyɛɛ gẅi ngie pi gÿo pú’u. Tà pi gwá’a lÿɔ̀g, pi sẅíŋte Ssé nà twó pʉ̀a Ssé métsèm. 19Pi sẅíŋte yé mbɔɔ ná yɔ́ɔn twó légwɔ́ gie à ge ńnéŋe shwóŋè ncwò mèŋ, ńgie à gÿo pú’u, légwɔ́ gie n dɔɔn ńnyɛ́’ ncwò wɔ̀ɔn fʉ̀’e kɔ́ wɔ́, n gɔɔn nò té pɔ́g, légwɔ́ gie pʉ̀a ge zsé nò gie nkʉ̀ mbòŋo la lɔg ńtó, mbà á la zɔɔn ńgwɔ́ pɔ́ lelyěen. 20Mèŋ, n gee mántúm létsẅi wɛ̌ nkʉ̀, tà mbɔɔ pá’ mèŋ fǒ ńgwɔ́ pɔ́ tsǎŋ lɔɔn. Pi sẅíŋte Ssé ngie mèŋ n gẅiin shÿɔ́g lélɔg ńgɔɔn pá’ á ne ńzɛ́te ngie mèŋ n gɔɔn.

Atsyɛ̀’te

21Tishig gẅie aa fɛ́ wege we ntʉ̀ nzẅìŋ, ńgwɔ́ ngàŋa fà’ Cʉ̀apʉ̀a, tà ńzsé yé pɔ́ ndà’ yɛ̌ fà’, à ge tó, é tó shwóŋó gẅi pá’ mèŋ n gee jʉ’ɔɔn ńgwɔ́ pú’u, légwɔ́ gie pi ge zsé mmó gie n kéen ńcʉ́’ʉ yɛ̌, mbɔɔ mmó gie mèŋ n gÿo. 22Mèŋ n zɔɔn ńké ńtúmo yé né pi pɔ́ ngie à shwóŋó gẅi pá’ peg ee pú’u, mbɔɔ pá’ à ge kẅiŋte gẅí.

23E Ssé Tá, mbɔɔ Cʉ̀apʉ̀a Yěsǒ Kristo ne ńnéŋe sẅétè tsɛ̀ɛ ntʉ́m mefɛ́ mefɛ́, pɔ́ ne ńgẅiin nkwòŋe, ńne ńzába ntʉ́m pɔ́ nà Ssé. 24E Ssé ne ńgwɔ́ né mânyìŋ ntsèm gẅie à kwoŋo Cʉ̀apʉ̀a wege Yěso Kristo lê ntí nkwòŋe gie e tě ńdá’a ḿmaga wɔ́.

Currently Selected:

Efeso 6: NGBM

Highlight

Copy

Compare