2 Jâŋ 1
1
Atsyɛ̀’te
1Mèŋ gẅie mèŋ n ge nkẅè mvfò tsɛ̀ɛ cú’tè pʉ̀a Kristo, mèŋ n náa yɔɔn ŋwà’ne mbwo Má penkʉ́. E Ssé la tsɔ́’ɔ gú. Mèŋ n giŋé ńnáa mbɔɔ mbwo gubé jú, m bǔ ńkwoŋo gẅi pɔ́ métsèm, á nue pege metsèm pǔ ńtyé nà nò nénʉ́, é té ndà’ wɔ̀ɔn mie mèŋ n kwoŋo gẅi wɔ́, awɔ̌wɔ́ɔ gẅie à tyé nà nò nénʉ́ giŋé ńkwoŋo gẅi yé. 2Peg kwoŋo gẅí, á fóo ná pá’ nò nénʉ́ áa tsɛ̀ɛ ntʉ́m wégè, é ké lá’a tsẅé gwɔ́ pɔ́ tsoló. 3E Ssé Tá, mbɔɔ Yěsô Kristo gẅie aa Míŋ Tá né ńgwɔ́ né pege, ńne ńdege mefʉa mégè, ńne ńnéŋe sẅétè ntʉ́m pege pie pege tyé nà nò nénʉ́ ḿbiŋ ńgẅiin nkwòŋe tsetsɛ̀ɛ pege.
Anò nénʉ́ mbɔɔ nkwòŋe
4Anò ka pǔ ḿboŋo wɔ̀ɔn tɛ’ pá’ n ka jǔ’ ngie tsɔ́ penkʉ́ pú ne ńgiŋe ná mánzsè nò nénʉ́ pá’ Tá wege la tsẅi né pege la. 5Tʉ̀ nzẅìŋ Má penkʉ́, ammó gie mèŋ n ne ńzɛ́te mbwo gù fʉ̀’ɔɔn á gwɔ́ ngie pege gẅiin nkwòŋe tsetsɛ̀ɛ pege, sɔɔn ke tè gwɔ́ pɔ́ tsɔ́ *lepʉ̌ se sẅé sie mèŋ n ŋwe’e ńnáa mbwo gù wɔ́, ée *lepʉ̌ sie pege gẅiin tà fó nzyeté. 6Legẅiin nkwòŋe à gwɔ́ pɔ́ lékú’te mbʉ̌ Ssé. *Lepʉ̌ sie pi la jú’ tà fó nzyeté é gwɔ́ pɔ́ ngie pi ńnéŋe lê nkwòŋe. 7Pàcÿɔ nò kéen sa njÿó tà ńgyɔ́ɔn. Pɔ́ té ńne ńzẅíŋe ngie Yěsô Kristo la kwà’ sele ńcʉ́’ʉ nyìŋ mesoŋ wɔ́, pɔ́ ée kwà’ megàŋa cÿɔ̌ nò, ńgwɔ́ megàŋ mbù Kristo. 8Pi laga twó gí ḿbɔ́g pá’ à lɔɔn ńgwɔ́ apì gie pi la jÿó nà fa’a yég cʉa sẅɛ̀ɛ#1.8 ńgwɔ́ mé gíŋe ngie: Pi laga twó gí, ḿbɔ́g pá’ à lɔɔn ńgwɔ́ apì gie pi la jÿó nà fà’a gí cʉa sẅɛ̀ɛ. . Pi kag pɔ́ tʉ̀, ńgÿo ńkẅé ntsɔ’ɔ́ fà’ gẅi pɔ́ ntsèm. 9Nyìŋ lɔɔn tè kú’te pɔ́ ndà’ nò gie Kristo la zí’i wégè wɔ́, ńgʉa mǒ ńkẅi’i tsɔ́ mmó, mbà ngàŋ pɔ́ Ssé té temte. Nyìŋ gẅie à kú’te nò gie Kristo la zí’i wégè pɔ́ Tá temte, mbɔɔ pɔ́ múɔ gíŋe ńtemte. 10Nyìŋ lɔɔn ńdɔgɔ tsɔ́ nò ńtóo tsetsɛ̀ɛ pi, tà á té gwɔ́ pɔ́ gie Kristo la zí’i gẅi wɔ́, tà pi kúe yé, tà pi fó ńtsyɛ’te yé mbɔɔ tsyɛ’te. 11Nyìŋ lɔɔn ńtsyɛ’te yé, mbà pɔ́ ngàŋ lɔgɔ ńgwɔ́ tà’ ncwò ná mefà’ tepòŋ mie à ne fa’a.
Ashwóŋè lɔg ńzsote
12Mèŋ n kě ńgẅiin menò tà é gyɔ́ɔn gyɔ̌ɔn mie ńgwɔ́ mèŋ shwóŋó gẅí, tá mèŋ n gyǎ ngie mèŋ n tè ŋwe’e ŋwe’e wɔ́, á nue mèŋ n ne ńkwaa létóo lá’ pi, anò kẅɛɛ ncwò mèŋ ńkúu ncwò pi, ńzsé ngie lekág wege aa pú cʉ́me. 13Egubé fɛ́ gù we manzwě gẅie Ssé la tsɔ́’ɔ yé, gɔ̌ɔn ngie mèŋ n tsyɛ’te gú ńná né pɔ́b.
Currently Selected:
2 Jâŋ 1: NGBM
Highlight
Share
Copy
Want to have your highlights saved across all your devices? Sign up or sign in
Nouveau Testament en Ngienboum © Alliance Biblique du Cameroun, 2007.