Loomë 2

Lufundusu lu Nzaambi

1Njeeyi, bosuku wubeeli, nani wukeeli mu kufundisi bën'ka, kusë bëkulen'vukilë ko#2.1 Mat 7.1; Lik 6.37.. Cibilë bunë wun'fundisi bën'ka i wun'vangilë bo bumweekë yi baawu, njeveekë wuyitabë. 2Beeso tuzabisi ti Nzaambi wun'tabaangë mu bucyelikë banë bën'vaangaangë mëbi bo bumweekë. 3Njeeyi wum'balë ti, wun'kumbë lufundusu lu Nzaambi, wulë mu kufundisi bayaaku mu mëvaangë mo wulë mu kusalilë? 4Kaambofo, njeeyi wun'leenji buboti bunenë bu Nzaambi, wuvungë-moonyi i mëboti maandi? Njeeyi wusye zaabë ko ti buboti bu Nzaambi bufwenikini kubalulë ziingulwaaku? 5Kasi njeeyi wusë n'toombë ko kubakulë, wusye belëmë ko mu kuvilukë. Mu lyaawu, njeeyi wun'vangisi kastiikë yi Nzaambi yiba yinenë mu cilumbu cyo Nzaambi wun'leesi likaanzi lyaandi i lufundusu lwaandi lusulëmë 6i fo kun'futilë kadi muutu mu manë kuvaangë#2.6 Sof 1.14-18; 2.2-3: Twi 62.13; Big 24.12.. 7Naandi wun'vaanë luziingu lu sakë yi sakë ke banë bën'tatëminë kuvaangë liboti i bën'toombaangë bumpumu, ndumu i luziingu lukalilë. 8Kasi naandi wuleesi likaanzi lyaandi i lunyotukunu lwaandi kuke bo bën'kaambu kun'yuwulu, bëm'maangë cyelikë i kuyilekulë mu kuvaangë libi. 9Cyuundë i lusweenu bin'vangisi simpasi ke bakë booso bën'vaangë libi, Sizwiifë cin'tetë i basë Ngeleesë. 10Kasi Nzaambi wun'vaanë bumpumu, ndumu i n'sikë ke bakë booso bën'vangaangë liboti, cin'tetë ke Sizwiifë, kasi yivaandi ke basë Ngeleesë, 11cibilë Nzaambi wusë n'taandaangë muutu ko#2.11 Det 10.17..

12Bakë booso bën'sumukaangë kukaambu kuzaabë n'kaakë Moyiizë, bën'fwa kukaambu n'kaakë. Kasi banë bëzabisi n'kaakë i bën'sumukë, bën'fundusu bo bën'kwendilë n'kaakë beenë. 13Cibilë baatu bësulëmë fëke Nzaambi bëkeeli ko banë bëm'ba tokë mu kuwu n'kaakë, kasi bo bën'salilë maawu. 14Bunë beeni bën'kaambu kuzaabë n'kaakë Nzaambi, yikuwusalilë, mati dedë mweekë baawu bëwunatë mu mitimaawu, kukaambu kuwuzaabë. 15Baawu bën'leesi obo mpangulu yin'loombë n'kaakë wo wusonëmë mu mitimaawu. Ciluunzi cyaawu cibëteelë cimbaanji, yimunë simbalulu syaawu syo sibëfuundë i sibënwaninë. 16Tala manë mëm'monikë cilumbu cyo Nzaambi wun'fundisi makë mooso mëswaamë mu luziingu lu baatu mu Yeesu Kliistu, bo bun'sisiminë Mpolu Mboti yinë yike mu kutendulë.

Sizwiifë i n'kaakë

17Njeeyi wuyituunvi Zwiifë, wusikëmë mu n'kaakë i wuke lunyemu mu Nzaambi. 18Njeeyi wuzabisi n'vwiilwaandi i n'kaakë wukuloongë mu kusoolë linë like liboti. 19Njeeyi wuyituunvi, cinatë simpofo, cyeseesë ci banë buke mu citoombi, 20n'loonji mu banë buke mu buzimbu i ngeelë mu baanë, cibilë njeeyi wuke mu n'kaakë ntubulu yifwanëkënë yi luzaabu i bucyelikë. 21A njeeyi, wun'vaanë mëlubu ke bën'ka, mu mbicye njeeyi wun'kaambu kulivangilë mu njeveekë? Nje wun'loongë ti busye fwaanë kuve kwiibë, cibilë mbicye njeeyi wulë mu kwiibë? 22Njeeyi wun'fuungë kuvaalë, cibilë-mbici wulë mu kulivaangë? Njeeyi wum'maangë, bintumbë cibilë-mbici wulë mu kwiibë binë bike mu sinzo syaawu sinzaambi#2.22 Det 7.25.? 23Njeeyi wuke yi lunyemu mu n'kaakë, kasi wun'safulaangë Nzaambi mu kuvaangë manë mësokënë yimunë n'kaakë! 24Licyelikë, Cisonë ci Nzaambi cin'sisiminë : « Mu cibilë ciinu, mëkaandë mën'ka bëlë mu kudyeengë Nzaambi#2.24 Ezy 52.5. . »

25Ningë njeeyi be cikunë n'kaakë, lubuku lu bubakëlë lufwenikini mu njeeyi. Kasi ningë wusye cikunë n'kaakë ko, njeeyi wuke dedë mweekë wunë wukaambu kubukë bubakëlë. 26Mooti muutu wunë wubuku bubakëlë wuncikunë tutumu tu n'kaakë, Nzaambi wusë kun'tiisi kwe dedë mweekë wubukë bubakëlë? 27Libakëlë linë lin'kaambu kubuku bubakëlë mu n'sunyaandi, kasi wun'cikunë n'kaakë, wukun'fundisi, njeeyi wun'kaambu kucikunë n'kaakë, bosuku bubeeli ti wuke yi n'kaakë wusonëmë i wubuku bubakëlë. 28Mu bwaawu, Zwiifë yi cyelikë wukeeli ko wunë wuyileesi tokë i wunë babukë bubakëlë tokë mu n'sunyaandi. 29Kasi Zwiifë yi cyelikë mati wo wuke mu kati, wunë wabuku bubakëlë mu n'timaandi, kubukë bubakëlë yin'vangënë mu Ciluunzi ci Nzaambi i yaaku ti mu n'kaakë wo wusonëmë#2.29 Det 30.6.. Zwiifë be yooyo wun'tambulë ndumu yaaku ke baatu ko, vandi kasi ke Nzaambi.

Currently Selected:

Loomë 2: NTVIL

Highlight

Copy

Compare