Loomë 13

Kucinzikë mikwa-lwaangu më n'tinu

1Wosuku muutu wufwenikini kucinzikë mikwa-lwaangu më n'tinu mën'salilë lutumu. Cibilë lutumu looso lun'fuminë ke Nzaambi. Lunë lukeeli luvaangunu ke naandi. 2Bwaawu, wunë wum'maangë lutumu be loolo, wun'tundëkënë lutumu luvaangë Nzaambi. Banë bëm'maangë lutumu beenë, bëm'bakë lufundusu mu baveekë. 3Licyelikë, bën'vaangë mëboti bëkeeli yi boomë ko bu sizoonzi, kasi mu bo bën'vaangë libi. Njeeyi kusë n'zolë kucinzikë n'kwa-lwaangu lu n'tinu kwe? Boobo, vaangë liboti i njeeyi wum'bakë ndumu. 4Cibilë naandi ke mu cisalu ci Nzaambi mu kun'ciinzi kusalë buboti. Kasi ningë njeeyi wun'vaangë libi, tiinë boomë! Cibilë buunë kuve naandi ke yi lutumu mu kukubesi: naandi ke mu cisalu ci Nzaambi mu kuleesi likaanzi lyaandi ke banë bën'vaangë libi. 5Bwaawu, n'ciinzë beenë mu kucinzikë mikwa-lwaangu, yaaku tokë mu kutiinë likaanzi li Nzaambi, kasi mu kusalilë bo bun'kwendilë si.

6Mati yivaandi lun'futilaangë mpaku, cibilë banë bën'tambulaangë yaawu, bën'salilë Nzaambi mu kusalë buboti cyaawu cisalu. 7Futaanu kadë muutu cinë beeno lukun'defë: futaanu mpaku ke wo lufwenikini kuyifutilë i cipaasu ke wunë wufwenikini. Baanu yi luciinzu ke wunë beeno lufwenikini kucinzikë i zanjikaanu wunë beeno lufwenikini kuzanjikë.

Luzolo lu mbaasyaaku

8Nudefyaanu cyosuku ko ke muutu, kanuku luzolo lo beeno lun'leesi benuveekë yi benuveekë. Cibilë, wunë wun'zolë bëmesë, naandyoowo wacinzikë buboti n'kaakë be woowo. 9Licyelikë, tutumu « Keelë wulëvaalë, keelë wulëvoondë, keelë wulëkwiibë, keelë wulë ba cideenzë mu binë bibakë bayaaku », yivaandi byakë byooso bin'ka, bizitëminë mu lutumu lo lumweekë : « Njeeyi wufwenikini kuzolë mbaasyaaku bo buke njeveekë. » 10Wunë wazolë, kusë n'vaangaangë lyosuku libi ko mu mbaasyaandi. Mu luzolo, tun'cinzikë buboti n'kaakë.

Kubëliminë mu nyisulu Kliistu

11Wunë wuzabisi teepu yizoolë tweekë : ntaangu yafwaanë kotukaanu mu tolo twiinu. Licyelikë, luvukulu lwabelëmë yiitu buyifanwabu, bo twatatikë kuta maanë. 12Bwiisi bwayiyililë, cilumbu cyabelëmë. Twe bumaanu mëvaangë mën'vangininë ku citoombi i twe boongaanu binwanunu bi cyeseesë. 13Twe natyaanu luziingu lucinzëmë, bo bufwenikini mu cyeseesë ci cilumbu. Twe leembwaanu bulyaafu i kukolu mëlafu, busafu i sinsalulu syooso simbi, kwambilë i likwaafi. 14Kasi vwaataanu Yeesu Kliistu baanu dedë mweekë Yeesu Kliistu Fumwiitu i keelaanu lulëyilekulë mu cimuutu ciinu mu kusalilë bideenzë.

Currently Selected:

Loomë 13: NTVIL

Highlight

Copy

Compare