Matye 3
3
Lutendulu lu Mpolu Mboti lu Za-Batiisë
(Mak 1.1-8; Lik 3.1-18; Za 1.19-28)
1Mu bilumbu be binë binaani, Za-Batiisë wusë basikë mu ke tendulaangë mu ntaandu ciyumi yi Zudee#3.1 Zudee : libweeti likaambu baatu bëmpaapë. : 2« Balulaanu mëvaangë,#3.2 Balulaanu mëvaangë : balulaanu ndyatulu, vilukaanu. cibilë Lwaangu lu mëyilu lwabelëmë. » 3Licyelikë, na wuuwu na m'bici Ezayi kutubilë ti :
« Mbeembu yilë mu kutendukë mu ntaandu ciyumi :
Bëlikilaanu nzilë yi Fumu,
sulikaanu tobulu twaandye#3.3 Ezy 40.3.! »
4Za wuvwaatë cinkutu bëtungilë mu miikë cibulu bën'teelë samo i n'siingë lucyeto wu n'kaandë cibulu#3.4 2 Mt 1.8.. Bilya byaandi byabë mëkoonkë i mëfutë më nyosi n'situ. 5Oboobo, basë livulë li Yelusaleemë, li Zudee lyooso i likomu lyooso li mwiilë Yulëdaani, bëlëkwendaangë ke naandi. 6Baawu bëlëfungulaangë mësumu maawu i Za wulëbëbatizyaalaangë mu mwiilë Yulëdaani.
7Abu kulëmonë mpaapë Sifalisyaanu i Sisadusyaanu bëlëkwisaangë ke naandi mu kubatizyaalu. Naandi wusë bëkaambë : « Liloongu li simpili! Nani waluleesi kutiinë likaanzi li Nzaambi lin'kwiisë? 8Leesyaanu mëvaangë ti beeno lwavilukë 9i nubalyaanu ko ti lufwenikini tokë kutubilë mu benuveekë : “Beeso tuke yi tatiitu, Abalaamë#3.9 Za 8.33,37,39. !” Cibilë, yilukaambë ti Nzaambi kupodi kusalilë mëmanyi lum'monë omo mu kumëcitulë sindaandu si Abalaamë. 10Citali cibeliminë mu kucyeelë singaanzi si miti : wosuku n'ti wun'kaambu kubutë mëkuundi mëboti wun'cyeelu i wun'laku ku mbaasu. 11Miinu, yilë mu kulubatizyaalë mu masi bwiinji beeno luvilukë, kasi wunë wulë mu n'kwiisë ku mbusaami wulubatizyaalë mu Ciluunzi ci Saantu i mu mbaasu. Naandi mwiinji luleendo yi miinu : yisye fwanëkënë kuve kuvuulë mëpaapë maandi. 12Naandi wun'simbililë cicyenzulu#3.12 cicyenzulu : cisalulu cifwanëkënë buke cicyenzulu mu kukabulë bitiiti yimunë singeenzë. fë kooko i wun'cyeenzë i wun'kabulë lungeenzë i citiiti. Naandi wun'kucikë lungeenzë lwaandi mu ntalë, kasi wun'kookë citiiti mu mbaasu yin'kaambu kuzimaangë. »
Lubatizyaalu lu Yeesu
(Mak 1.9-11; Lik 3.21-22)
13Oboobo, Yeesu wufuminë lu Ngalilee ku Yulëdaani. Naandi wusë tuukë ku mwiilë Yulëdaani fëke Za mu kubatizyaalu. 14Za finu wake m'maangë i wusë tubë : « Miinu, yifwenikini kubatizyaalu ke njeeyi, abu ti njeeyi wan'kwiisë ke miinu! » 15Kasi Yeesu wusë n'vutulilë ti : « Afaafë, vitikë lyaawu libeelë boobo. Cibilë boobo bwa bufwenikini kuvangininë n'vwiilu Nzaambi. » Oboobo, Za wusë vitikë. 16Bunë Yeesu kwabatizyaalu, wusë tapukë mu masi. Mo mu ntaangu mweekë, li yilu kuzibukë i naandi kumonë Ciluunzi ci Nzaambi cisë kulukë buke libeembi i cisë betëmë mu naandi. 17Mbeembu yilëbasikilë lu yilu yilëtendukë : « Awuuwu mwanaami wu mëdilë, mu naandi mwa muke sinyeenzi syaami syooso#3.17 Twi 2.7; Ezy 42.1.. »
Currently Selected:
Matye 3: NTVIL
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. and © Alliance Biblique du Congo. All rights reserved.