Mëvaangë 23

1Poolë wusitikë ntalu ke bëkuluutu bë cinzonzi i kutubë : « A baanë bë nguli, mu n'timaami wumboti, miinu yilë mu kumonë ti, yisalilë Nzaambi deku-dekoo tee yi zwaalu. » 2N'kuluutu singangë-Nzaambi, Ananyaasë#23.2 Ananyaasë wabë n'kuluutu ngangë-Nzaambi mu mivu 47 tee mivu 59., wusë tumë banë bëba bëbelëmë yi Poolë mu kum'bulë mu munu. 3Mu bwaawu Poolë wusë n'kaambë : « Mati Nzaambi mba wukubulë, cibakë baviindë mpeembi#23.3 Mat 23.27-28.! Njeeyi wakalë ofo mu kun'fundisi bunë bën'kwendilë n'kaakë i bunë bën'kaambu kwendilë n'kaakë, njeeyi watumë bëkum'bulë. » 4Banë babë bëbelëmë yi Poolë bën'kaambë : « Njeeyi wafiingë n'kuluutu singangë-Nzaambi! » 5Poolë wusë vutulë : « A baanë bë nguli, miinu yisye zaabë ko, ti naandi n'kuluutu singangë-Nzaambi. Licyelikë, libuungu lin'tubë : “Kanë-kunto, kutubë libi ke fumu mboongwaaku#23.5 Lub 22.27.!” »

6Poolë wusë zaabë ti, bëkuluutu bë cinguuku babë bëmesë Sisadusyaanu i bën'ka Sifalisyaanu#23.6 26.5; Fil 3.5.. Mati mu bwaawu, naandi wusë kaayi fë ntwaalaawu : « A baanë baami bë nguli, miinu Falisyaanu yikeeli, mwaanë Sifalisyaanu. Cibilë yike yi lyaanë mu luvulumuku lu bo bëfwa bwa yike mu lufundusu ». 7Ntaangu yo kutubilë katyoobo, Sifalisyaanu i Sisadusyaanu bisë ba mu kwambilë i cinguuku cisë kabukë bikuuku byooli. 8Sisadusyaanu bëlëtubaangë ti luvulumuku lu baatu bëfwa lukeeli ko, siyaanzi i biluunzi bikeeli ko, kasi Sifalisyaanu bën'cikunaangë maambu makë mooso omo#23.8 Mat 22.23; Mak 12.18; Lik 20.27.. 9Baatu bisë be losukooso beenë mu mëngolo mooso i mwa m'pooku miloonji n'kaakë yi cinguuku ci Sifalisyaanu bisë telëmë i bisë losukë : « Beeso, tusye monë lyaambu libi mu muutu awu ko. Beeso tusye zaabë ko a nkanë ciluunzi, kaambofo yaanzi yisë kun'kaambë. » 10Lwambulu lusë be lutilooso, kumandë ku mësodaadi wusë ba yi boomë ti, bacyelë Poolë mu bitini. Mu lyalyooli, naandi wusë tumë nkoongë mësodaadi maandi mu kubotulë Poolë fë meeyi nkoongë, bwiinji bën'natë kunë kulëkalilaangë mësodaadi. 11Mu bwiilu bulandëkënë, Fumu Yeesu wusë kumonikinë Poolë i kutubë : « Ciindë! Njeeyi wakum'pangilë bumbaanji afa ku Yelusaleemë, bufwenikini yivaandi kuyileesi bumweekë ku livulë li Loomë. »

Fuundu mu kuvoondë Poolë

12Bo bwiisi bwacya, mwa likomo li Sizwiifë lisë kotë fuundu yikuvondilë Poolë. Baawu bisë lefë-mpesë, mu kumaangë kulya i kunwa tee yi fanë bën'voodilë Poolë. 13Bo bëkotë fuundu beenë babë kuvyookë lutaangu lu mëkumë-na më baatu. 14Baawu bëyemonë bëkuluutu bë singangë-Nzaambi i bëkuluutu bë Sizwiifë, bwiinji bëbëzabikini: « Beeso twalefë mpesë fë ntwaalë Nzaambi mu kuleembu kulya i kuleembu kunwa, tee yi fanë tun'vondilë Poolë. 15Mu katyoobo, yimunë cinzonzi ci bëkuluutu, lwe loombyaanu ke kumandë ku mësodaadi mu kunatë Poolë fë ntwaaliinu. Bunë mu beeso, twabeliminë mu kun'voondë bosë naandi wukutukilë afa. »

16Kasi mwaanë-nkasi Poolë, wusë kuwu fuundu be yooyo. Naandi wusë kweendë kun'kalilaangë mësodaadi, wusë kotë i wukaambë Poolë yaawu. 17Mu lyaawu, Poolë wutelë wumweekë mu bëkuluutu mësodaadi i wusë n'kaambë : « Natë n'teendë cilesi ci bakëlë aci ke kumandë ku mësodaadi. Naandi wuke mwa lyaambu li kun'kaambë. » 18N'kuluutu-mësodaadi wusë natë n'teendë cilesi bakëlë beenë kuke kumandë ku mësodaadi i wusë tubë : « Poolë, mungë buloko, wakutelë i wakutumë mu kunatë n'teendë cilesi bakëlë aci ke njeeyi. Naandi ke lyaambu li kukukaambë. » 19Kumandë wusë siimbë n'teendë cilesi bakëlë mu kooko i wusë n'natë ku mpeengë. Naandi wusë n'yufulë : « Njeeyi mbi wun'toombë kun'kaambë? » 20N'teendë cilesi bakëlë wusë n'vutulilë : « Sizwiifë bakotë fuundu mu kuloombë ti, mbasi-menë, njeeyi wunatë Poolë fë ntwaalë cinzonzi ci bëkuluutu. Baawu bën'tubë ti, tun'toombë kumonë buboti lyaambu li Poolë. 21Kasi, keelë njeeyi kubëyuwulu, cibilë lutaangu lunenë lu mëkumë-na më baatu mu kati kwaawu baawu, baswaamë i bëlë mu kuciingë. Baawu balefë mpesë mu kuleembu kulya i kunwa tee ntaangu yo bëkun'vondilë. Ntaangu ayi, baawu bëbeliminë i bëlë mu kuciingë tokë lyo njeeyi wun'tubë. » 22Mu lyaawu, kumandë wusë kaambë n'teendë cilesi bakëlë beenë: « Kebë wulëkaambë muutu ti njeeyi wakun'kaambë lyaawu. » Fë siitu, naandi wusë m'biikë.

Poolë bën'filë kuke n'kuluutu Felikësë

23Fë mbusë, kumandë kutelë mësodaadi mwaali i wusë bëkaambë : « Lwe kosyaanu nkamë-wali li mësodaadi, mpilë mweekë yivaandi saambwali li mëkuumi li bo bën'nataangë sikuvaalu, i nkamë-wali li mësodaadi banë bën'nwaninaangë mu moongë. Lwe bëlëminyaanu mu kweendë ku livulë li Sezalee, fë ntonunu livwa li zoolë mësikë. 24Lwe belikaanu yivaandi sikuvaalu, bwiinji bëtuusi Poolë mu buvinyi kuke n'kuluutu Felikësë#23.24 Felikësë wabë likundaalë ku Zudee mu mivu 52 i 59. . » 25Fë mbusë, naandi wusë sonikë n'kaandë i kutubilë :

26« Miinu, Koloodë Lisyaasë yilë mu kubilë njeeyi Felikësë, n'kuluutu-si Zudee. 27Sizwiifë bëkaangë muutu awu i bëtoombë kun'voondë. Kasi, bunë yayuwu ti naandi wabë musë Loomë, miinu i mësodaadi maami tusë kweendë kuunë mu kun'vuuci. 28Bo yilëtoombaangë kuzaabë mu mbici Sizwiifë bën'kesilë, yisë n'natë fë ntwaalë cinzonzi ci Sizwiifë. 29Miinu yimonë ti baawu bën'kesilë mu manë mën'talë n'kaakaawu, kasi bësye podi kun'kesilë mu libi kuvangisi, bwiinji bën'tabulilë lufwa, kaambofo, bën'tuulë mu buloko. 30Bunë yazaabi fuundu yo Sizwiifë bën'kotilë. Miinu yisë lengë boongë lukanyu mu kun'filë kuke njeeyi i yisë loombë ke bo bëlën'fuundë mu kun'fundisi fë ntwaalaaku njeeyi. »

31Mësodaadi bisë cikunë maambu manë fumwaawu kubëkaambë. Baawu bisë boongë Poolë i bisë ke n'nataangë yi bwiilu tee ku livulë li Antipaatë. 32Cilumbu cilandëkënë, mësodaadi, banë bëkaambu sikuvaalu, bisë vutukënë ku livulë li Yelusaleemë fanë fabë binwanunu byaawu. 33Bunë batuuci ku livulë li Sezalee, baawu bisë vaanë n'kaandë kuke n'kuluutu-si i bisë biikë Poolë mu myookwaandi. 34N'kuluutu-si wusë taangë n'kaandë i wusë kufulë Poolë, si mbici kufuminë. Bo kwazaabi ti naandi wufuminë ku livulë li Siliisi, 35naandi wusë tubë : « Miinu sya yikuyufulë mooti banë bëkufundisi bakutuukë. » Fë mbusë, naandi wusë vaanë n'swa wukusweekë Poolë ku lwaangu lu n'tinu Eloodë#23.35 Lwaangu lwabë lutuungu ku Sezalee ke N'kuluutu Eloodë i bëyisoolë mu kuba cikalulu ke bëkuluutu bë Loomë. .

Currently Selected:

Mëvaangë 23: NTVIL

Highlight

Copy

Compare