Mëvaangë 17

Poolë i Silaasë ku Tesaloniikë

1Baawu bëtabilë ku Amfipoliisë i tee ku Apoloni i bisë kutuukë ku Tesaloniikë fanë Sizwiifë babë yi cizutununu. 2Bo bubeelë cifu cyaandi, Poolë wukotë ku cizutununu bilumbu bi tatu biluvundulu bilandëkënë, naandi wulëbulaangë lukuungu mu Bisonë bi Nzaambi yimunë bo babë faanë. 3Naandi wulëbëzimunaangë i kubësulikilaangë : Kliistu wufwenikini kumonë simpasi i naandi wun'vulumukë mu nkoongë bëfwa. Naandi wulën'tumbaangë : « Yeesu wo yilë mu kuluzabikini, mati naandi Kliistu. » 4Mwa m'pooku baatu mu katyaasi kwaawu bisë ta maanë i bisë ba nkoongë mweekë yimunë Poolë i Silaasë. Bo bumweekë yivaandi, singeleekë i mpaapë mu banë bëlëkuundë Nzaambi bëdukënë yaawu fë cimweekë yimunë mpaapë bëcyeetu bë bënaangë. 5Kasi Sizwiifë babë bëwaalë yi n'soci. Baawu bisë kukucikë mwa mpooko baatu kwaandi vwiili bëmonë mu sinzilë, baawu bisë kosi n'vuusu munë nkoongë i n'tyatyamu mu livulë. Baawu bisë kutuukë ku n'zo Zasoonë mu kutoombë Poolë i Silaasë, bwiinji bëbënatë fë ntwaalë baatu bakë booso. 6Bo baawu bëkaambu kubëmonë, bisë natë Zasoonë i mwa baanë bë nguli bëmesë fë ntwaalë mëkundaalë bë livulë i bisë ba mu kulosukë : « Baatu aba bavaangë n'vuusu mu buloongo n'viipë i bubwayi aci, baawu bakwiisë tee aku! 7Zasoonë wusë bëkwaakë ku n'zwaandi! Baatu bakë booso bëlësiilaangë bo bumweekë, yaaku ti bo bën'kwendilë n'kaakë wu Sezaalë, cibilë naandi wulëbalë ti n'tinu wun'ka wukeeli, bën'telë Yeesu. » 8Mëbuungu ama mëvangisi nkoongë kuba mu lusweenu i bëkuluutu bë livulë. 9Mu lyaawu, Zasoonë i bëmesë bisë tubooso futaanu kwaandi mwa simboongo kuke bëkuluutu, bwiinji bëtubiikë.

Poolë i Silaasë ku Belee

10Bwiisi bwayili, baanë bë nguli bë cingangë bëfilë Poolë i Silaasë ku Belee. Bunë batuuci kwaawu, baawu bisë kotë ku cizutununu ci Sizwiifë. 11Baawu babë bideenzë biboti kuvyokilë Sizwiifë si Tesaloniikë. Baawu bëkwaakë libuungu li Nzaambi yi sinyeenzi syooso. Kadë cilumbu, baawu bëlëtaangaangë Bisonë bi Nzaambi mu kucyengululë buboti mëbuungu më Poolë. 12Mpaapë baatu mu katyaasi kwaawu bisë ta maanë i mu kati Singeleekë, mwa mpooko bëcyeetu bëcinzëmë i mpaapë bëbakëlë, bisë ta maanë yivaandi. 13Kasi bunë Sizwiifë si Tesaloniikë bëyuwu ti Poolë wulëloongë libuungu li Nzaambi ku Belee, baawu bëyendë kwaawu i bisë vaangë n'vuusu i baatu bëdasukë. 14Melengë-lengë, baanë bë nguli bisë kunatë Poolë ku lweeku lu m'bu. Kasi, Silaasë yimunë Timotee, bësyaalë ku Belee. 15Banë bënatë Poolë, bisë ke yendaangë yaandi tee ku Ateenë. Baawu bisë vutukënë ku Belee, Poolë wusë bëtumë mu ke kaambë Silaasë i Timotee mu kulengë kwiisë fanë naandi kwabë.

Poolë ku Ateenë

16Ntaangu yo Poolë wulëciingaangë Silaasë i Timotee ku Ateenë, cyuundë cinenë cin'kotilë bunë kwamoni livulë beenë liwaalë bintumbë. 17Mu bwaawu, naandi wëlëfindënë simpakë mu cizutununu yimunë Sizwiifë bo bëlëkuundë Nzaambi i fë ciyalëlë kadë cilumbu, yimunë baatu banë naandi kulëdyengënë. 18Mwa m'pooku bizaabi bi Epikilyeenë i Sitoyisyeenë bisë mokënë yaandi. Bën'ka bëyufulë : « Mbici muutu wun'sukulë beenë owo wun'toombë kutubë? » — Bën'kooso bëtubë : « Wun'toombë kutendulë sinzaambi si Beeni. » Cibilë naandi wulëbëtendulaangë Yeesu i luvulumuku. 19Baawu bëboongë Poolë i bisë ke n'nataangë fë ntwaalë cinguuku cilë dukunaangë fë limoongo bën'teelë Alewopaazë i bisë n'kaambë : « Buni beeso tum'podi kuzaabë mpilë mbi ndongulu yo yimoonë wuke mu kuloongë? 20Njeeyi wulë mu kutuvangisi kuwu maambu mëtudë i beeso tun'toombë kuzaabë buni maawu mëkelili. » 21– Baatu bakë booso bë Ateenë i beeni bëlëkwisaangë mu kuvyoosi ntaangwaawu kwaawu, mu kutubaangë, kaambofo mu kuwu maambu mëtudë më siitu. – 22Mu lyaawu, Poolë wusë kutelëmë fë katyaasi ku meeyi yi Alewopaazë i wusë tubë : « Beeno basë Ateenë, miinu yilë mu kumonë ti lulë baatu bën'kuundaangë byosuku. 23Mu lyaawu, bunë yilëzungunë mu livulë liinu, yimonë bintumbë binë beeno lulë cinzikaangë, miinu yisë monë civakuli, bësonikë : “Mu nzaambi bëkaambu kuzaabë.” Nzaambi wunë wuvaangë buloongo i byakë byooso bike mwaawu, mati naandi Fumu li yilu i n'toto i naandi kusë n'kalilaangë ko mu n'zo yinë yituungë baatu. 24Nzaambi wuvaangë buloongo i biimë byakë byooso bike mwaawu. Naandi Fumu liyilu, yi n'toto. Naandi wusë n'kalilaangë ko mu sinzo situungë baatu. 25Naandi wukeeli ko yi n'ciinzë mo baatu bën'zudi mu kun'vaanë cyosuku ciimë, cibilë wun'vandikaangë luziingu, n'vumuku i byakë byooso#17.25 v. 24-25: 7.48; 1 Mt 8.27; Ezy 42.5.. 26Mu muutu wumweekë, naandi wuvaangë baatu bë mëkaandë mooso i wusë kubëtuunvi mu buloongo n'viipë. Naandi wuzitikë mu baawu sintaangu si kuzingilë i sindilu si sisi sinë baawu bëfwenikini kukalilë#17.26 mu muutu wumweekë: Adaamë (Ntn 1.28); Det 32.8. . 27Nzaambi wusë kusiilë katyoobo bwiinji baatu bën'toombë i bëm'bakulë. Cyelikë, Nzaambi wusë cinaanu ko yi beeso, 28cibilë:

“Mati mu naandi mwaawu tulë mu kuzingilë,

tulë mu kunyikukë i tukeeli.”

Liboti beenë mu baatu bën'ka banë bëyolë i bisë sisiminë ti :

“Besuviitu baanë baandi tukeeli.”

29Abu tukeeli baanë baandi, beeso kupodi ve kubalë ti Nzaambi wufwanëkënë yi cintumbë bëvangilë mu woolë, mu palaatë, kaambofo mu limanyi, bëfikulë mu mëlyeelë mu muutu i mu simbalulu syaandi. 30Kasi Nzaambi wusye be monooso ko sintaangu sinë muutu wabë mu bunzimbu. Kasi bubwayi aci, naandi wun'loombë baatu bakë booso, fosuku faamë bëkeeli, bëbalulë sindyatulwaawu. 31Naandi wusë zitikë cilumbu cinë wun'fundisi buloongo n'viipë yimunë n'sulumunu yooso, mu muutu wunë naandi kusoolë. Naandi wusë leesi cimaaku ke baatu booso mu kuvulumunë muutu be woowo mu lufwa. »

32Bunë bayuwu Poolë kutubilë mu luvulumuku lu baatu bëfwa, baatu bëmesë bisë n'dyeengë i bën'ka bisë tubë : « Mu lyalyooli, beeso tun'kuwu maambu omo vyaasi yin'ka. » 33Mu bwaawu, Poolë wusë bëbiikë. 34Kasi mwa m'pooku baatu bëmesë bisë bundënë yaandi i bisë kuta maanë. Mu kati kwaawu, mwabë libakëlë, mu lizinë li Deniisë, wumweekë mu cinguuku ci bënaangë ci Alewopaazë i n'cyeetu mweekë bëlëtelë Damaliisë i bën'kooso yivaandi.

Currently Selected:

Mëvaangë 17: NTVIL

Highlight

Copy

Compare