Mëvaangë 13

Ciluunzi ci Saantu cisë soolë Balënabaasë i Sawuulë

1Mu Cingangë ci Antyoosë, mwabë mibici i miloonji : Balënabaasë, Simeyoonë wunë bulukë N'fyooti, Lukiisë li Sileenë, Manayeenë wunë wuyonzukulë fë cimweekë yimunë Eloodë, wunë wulëtumi ku Ngalilee#13.1 Eloodë Antipaasë, Lik 3.1., i Sawuulë. 2Cilumbu cin'viipë, bunë baawu bëlësambililaangë Fumu i bëlëkaangaangë n'sweelë, Ciluunzi ci Saantu cisë bëkaambë : « Tulaanu nkoonzu Balënabaasë i Sawuulë mu cisalu yibëtelilë. » 3Bunë bamani kukaangë n'sweelë i kusambilë, bisë kutendikë myooko mu baawu i bisë bëbiikë beendë.

Balënabaasë i Sawuulë ku Sipëlë

4Ciluunzi ci Saantu cisë kufilë Balënabaasë i Sawuulë mu mweendo, bëyendë ku Seleesi#13.4 Seleesi yabë liloondo li Antipaasë., kunë bëbongilë likuumbi li masi li bënatë ku citumbu ci Sipëlë. 5Bunë batuuci ku Salamiinë, baawu bisë kuloongë Libuungu li Nzaambi mu bizutununu bi Sizwiifë. Za-Malëkë wabë yaawu mu kubëvaanë myooko. 6Baawu bisë sabukë citumbu cyooso tee ku Pafoosë. Faawu, bisë kudyengënë muutu wumweekë wulëvaangë mëyoombo bën'telaangë Baalë-Yeesu, Zwiifë wunë wulëpuutë baatu ti naandi m'bici. 7Naandi wulëkalilaangë fëke n'tinu lwaangu lu citumbu, Selësuusë Poluusë, wunë wabë muutu mëlyeelë. Naandyaawu wusë kutelë Balënabaasë i Sawuulë, cibilë naandi wabë yi tesu mu kuwu Libuungu li Nzaambi. 8Kasi civaangë mëyoombo Elimaasë, lizinë lyaandi mu singeleekë, wulëbëkakini i wulëtoombaangë kukwakini n'tinu Selëziisë Poliisë mu ciminu. 9Mu lyaawu, Sawuulë bën'telooso Poolë#13.9 Sawuulë lyabë lizinë li m'bunzi, Poolë lizinë lyaandi li Loomë 22.27-29., wabë wuwaalë mu Ciluunzi ci Saantu, wusë sitikë ntalwaandi ke naandi 10i wutubë : « Njeeyi muutu wuwaalë lupuutu i bubaalu, mwaanë dyaabu, mbeeni mu byakë byooso biboti! Njeeyi wusë n'leembuko mu kutolikini sinzilë sisulëmë si Fumu? 11Buyifanwabu, Yuwo: Fumu wakanë kukuseembë, wum'ba mpofo. Njeeyi kusë bëmonë ko cyeseesë ci muunyi mu mwa ntaangu. » Kususukulabu, meeso më Elimaasë misë ba pipitii, i wusë ba mu citoombi: naandi wulë ke balukaangë sinkoonzu syakë syooso, mu ke toombaangë muutu wunë kun'natë mu kooko. 12Bunë n'tinu wusë monë manë mëlëvangënë, naandi kuta lyaanë. Naandi wubwa libobo mu liloonji li Fumu.

Poolë i Balënabaasë bëyendë ku Antyoosë li Pisidi

13Poolë i sindiku syaandi bisë kandëmë mu bwaatu mu kweendë ku livulë li Pafoosë, kuunë baawu bisë ke tuukë ku Pelëgë li Pamfili. Za#13.13 Za Za bën'teelë Malëkë, 12.12,25; 13.5. wusë bëyakënë i wusë vutukënë ku Yelusaleemë. 14Baawu bisë landilë mweendwaawu kubotukë Pelëgë i kutuukë ku livulë Antyoosë li Pisidi. Mu cilumbu ci saba, baawu bëkotë mu cizutununu i bisë kalë. 15Bunë bamani kutaangë libuuku li N'kaakë i li Mibici, sifumu si cizutununu bisë bëkaambë : « A baanë yaami bë nguli, mooti beeno luke mwa bikumë bi kutubë ke libuundu mu kubëciinzi, buyifanwabu, bitubyaanu. » 16Poolë wutelëmë, wunangunë kooko i wusë tubë : « Basë Islayeelë i beeno lun'sambilaangë Nzaambi mu bucyelikë, n'yuwulwaano! » 17Nzaambi li mboongu Islayeelë wusoolë sinkaakë siitu. Naandi wusë kukusi likaandë ali bunë babë ku si bweeni, ku Zipiitë, i wusë kubëbaasi ku si be yooyo mu luleendo lwaandi. 18Naandi wubëlikilë kwaasu ku mëkumë-na më n'vu mu ntaandu ciyumi#13.18 Lub 1.7; 12.51; Lut 14.34; Det1.31.. 19Fë mbusë, naandi wuvoondë saambwali li bifuumbë ku si Kaanë i kuvandikë libweeti lyaawu kuke mboongwaandi dedë mweekë cibyalilë cyaawu#13.19 Det 7.1; Zos 14.1.. 20Mu kwaasu ku nkamë-na mëkumë-taanu li mivu.

« Kumanoofo, naandi wusë vaanë mëkundaalë kuke sinkaakë siitu tee mu ntaangu Samweelë m'bici#13.20 Zuz 2.16; 1 Sa 3.20.. 21Oboobo, baawu bëloombë n'tinu i Nzaambi wusë bëvaanë Sawuulë, mwaanë Kiisë, wu likaandë li Bezamë, wunë wubyaalë n'tinu mu mëkumë-na më n'vu. 22Abu kwamaangë Sawuulë, Nzaambi wusë kubëvaanë Daviidë mwaanë mu kuba n'tinu. Naandi wutubilë mu cibilë cyaandi: “Miinu yabakulë Daviidë mwaanë Yesee: muutu wufwanëkënë mu n'timaami, naandi mba wuvaangë makë mooso yin'zolë#13.22 1 Sa 8.5, 19; 10.21; 13.14; 16.12; Twi 89.21. .” » 23Wumweekë mu sindaandu si Daviidë wabë Yeesu wunë Nzaambi wubyaasi mu kuvuuci mboongu baatu bë Islayeelë, bunë naandi wukanyi. 24Ntetë Yeesu kwiisë, Za wuloongë mboongu yi Islayeelë bwiinji bëbalulë mëvaangë maawu i kubatizyaalë#13.24 kubalulë mëvaangë: kubalulë ndyatulu kaambofo kuvilukë Mak 1.4; Lik 3.3.. 25Bunë Za kwatuuci fë siitu cisalu cyaandi, naandi wulëtubaangë: « Nani beeno lulë mu kubalë yikeeli? Miinu yikeeli ko muutu wunë beeno luke mu kuciingë. Kasi yuwaano: wunë wun'kwisë fë mbusaami i miinu yisye fwaanë ko mu kukutulë misiingë mëpaapë maandi#13.25Mak 1.4; Lik 3.3.. »

26Baanë yaamë bë nguli, beeno sindaandu si Abalaamë i beeno lukeeli afa mu kukuundë Nzaambi: mati mu beeso kwaandi vwiili bëfililë saangu ayi yi luvukulu. 27Licyelikë, basë livulë li Yelusaleemë i sifumu syaawu bësye bakulë ko nani wabë Yeesu. Bilumbu byooso bi saba, baawu bëlëtaangaangë mëbuungu më mibici akasi baawu bësye bakulë ko. Kasi baawu bëvaangë maambu beenë mu kutabulilë Yeesu lufwa. 28Bunë bamoni cyosuku ve cikun'vangisi lutabu mu lufwa, bisë kuloombë Pilaatë mu kun'voondë. 29Bunë kwavaangë makë mooso bunë mësonëmë mu Bisonë bi Nzaambi mu cibilë ci Yeesu, baawu bisë kun'kululë fë kuluusu, i bisë n'tuulë mu buumbë#13.29 28-29; Mat 27.22-23, 57-61; Mak 15.13-14,42-47; Lik 23.21-23,50-56; Za 19.15,35,38,42.. 30Kasi Nzaambi wusë n'vulumunë fë meeyi bëfwa. 31Naandi wuyimonikë fë mbusë mpaapë bilumbu ke banë bëlëkwendaangë yaandi ku Ngalilee tee ku Yelusaleemë. Mu ntaangu ayi, baawu simbaanji fë ntwaalë nkoongë Islayeelë#13.31 1.3.. 32Besuveekë, twalutwalilaanu Mpolu Mboti: yinë Nzaambi wutukanyi ke sinkaakë siitu, 33Naandi wuvaangë maawu mu beeso, sindaandu syaandi, bunë kwavulumunë Yeesu mu lufwa. Mësonëmë mu luumbu lumwaali :

« Mati, njeeyi Mwanaami,

kutoonë bubwayi, miinu Tataaku yikeeli.

34Nzaambi wutubë ti naandi wun'vulumunë Yeesu mu lufwa, bwiinji kuleembu kubolë. Licyelikë, naandi wutubilë obo :

“Miinu yiluvaanë tusakumunu tu saantu i tucyelikë

tunë yikani Daviidë.”

35Mu lyaawu naandi wusë sisiminooso mu twiimbu tun'ka :

“Njeeyi wusë m'biikë ko vuumbi ciseelu cyaaku cisulëmë kubolë mu buumbë#13.35 Twi 2.7; Ezy 55.3; Twi 16.10..”

36Daviidë wusalilë Nzaambi mu ntaangwaandi i wusë fwa, bën'ziikë fo fëke sinkaakë syaandi i vuumbyaandi yibolë#13.36 1 Mt 2.10.. 37Kasi wunë Nzaambi kuvulumunë mu lufwa i vuumbyaandi sye bolë ko. 38-39A baanë yaami bë nguli, beeno lufwenikini kulizaabë, mati mu Yeesu mwaawu mu ke lobukulu lu mësumu bëlutendulilë. Mati mu naandi wosuku muutu wun'ta maanë wum'bakë lobukulu lu mësumu maandi makë mooso manë n'kaakë Moyiizë wusye podi ko kuluvuuci. 40Mu lyaawu, zungululaanu, mu kumaangë manë mibici bësonikë kuluyisilë#13.40 Lisë bëyisilë kaambofo kubëyisilë.:

41“Talaanu, beeno baatu bëwaalë lubaayu,

Lwe bwaanu libobo i lwe zimbilaanu!

Cibilë yin'toombë kuvaangë bo lucilë moonyi, lyaambu linë lun'kaambu kuta maanë, ningë wun'viipë wulukwalulilë lyaawu#13.41 Aba 1.5.!” »

42Bunë Poolë i Balënabaasë bubasikë mu cizutununu, bëbëloombë mu kuvutukënë mu cilumbu ci saba cinë cilë landëkënë bwiinji bë tubilooso mu maambu bë maama. 43Fë mbusë luzutununu, mpaapë Sizwiifë i baatu bën'ka banë bëkotë mu libuundu li Sizwiifë bisë kulaandë Poolë i Balënabaasë. Baawu bisë bëkaambë i bëlëbëciindisyaangë mu kutatëminë mu muulë Nzaambi.

44Mu cilumbu ci saba cinë cilandëkënë, mu kumonë kwaandi baatu bakë booso bë livulë bëzutukënë bwiinji bëyuwu maambu mën'talilë Fumu. 45Bunë Sizwiifë bamonë baatu bakë booso, baawu bisë waalë mu n'soci, bëtubaangë ti Poolë wulë mu kupuutë i baawu bisë n'fiingë. 46Mu lyaawu, Poolë i Balënabaasë bisë kubëzabikini yi civuufu cyooso: « Bufwenikini, bëlutendulilë ntetë libuungu li Nzaambi. Bo beeno lulë mu kumaangë lyaawu i bunë lulë mu kuyituunvi ti lwabakë luziingu lu sakë yi sakë, boobo, beeso tun'kwendë ko kukaambu banë bëkeeli ko Sizwiifë. 47Tala linë Fumu wutulombisi :

“Miinu yikusoolë dedë mweekë cyeseesë mu buloongo n'viipë,

bwiinji wunatë baatu kuluvukulu

tee kunë kusitikilë buloongo#13.47 Ezy 49.6!” »

48Bunë banë bëkeeli ko Sizwiifë bayuwu bikumë obyo, baawu bisë sangilë i bisë dumisi libuungu li Fumu. Bakë booso banë Nzaambi kusoolë mu kubakë luziingu lu sakë yi sakë, bisë ba bitamaanë. 49Libuungu li Fumu li lutilooso kutendukë mu mëbweeti beenë. 50Kasi Sizwiifë bëlëvaangë n'vuusu fanë fabë bëcyeetu bë bënaangë babë sisu mu Nzaambi, i banë bëke mëkakëtë bë livulë. Baawu bisë kusakë Poolë i Balënabaasë byaamu i bisë bëkulë mu si yaawu. 51Baatu bë bwaali bisë kukumunë n'kunkuunvu yi maalu maawu#13.51 Mak6.11. i bisë kweendë ku livulë li Ikoonyoomë. 52Bilaanzi byabë ku Antyoosë, baawu babë bëwaalë mu liyaanji i mu Ciluunzi ci Saantu.

Currently Selected:

Mëvaangë 13: NTVIL

Highlight

Copy

Compare