Efezuwaraita 6
6
Tainaita, aintapayaita yuiri
1Penye tainaita perikute peruyari pepaya nyenga yaneruixawa rese, nyãse yawe puranga pemunya.
2Rerikute resikie remaa nepaya nemaya yuiri, nyãse yawe Deus uyupiru umbeu yamunya yaiku arama puranga,
3Puranga arama kuri pesasawa tuyuwe arama yuiri kuri inde kua mundu upe.
4Penye aintapayaita, tepempiaiwa kuaita perairaita, maa pemukiriari ainta yaneruixawa nyenga rese kuaye uputariwaa yawe.
Upurakiwaita
5Asui penye amuita supe aramawaita, peruyari kuaita peruixawaita mundu puraita, pesikie resewara aintasui pepia supiwa irumu kuaye peruyariwaa yawe Kristu.
6Tepepuraki aintaumaawaa upentu pemusuuri arama ainta kuaita apigawaita, maa pepuraki kuaye Kristu supe aramawaita upurakiwaa yawe, pepia sui pemunya kuaye Deus uputariwaa yawe.
7Suuri pepuraki ainta supe kuaye pepurakiwaa yawe yaneruixawa supe, timaa kuaye pepurakiwaa yawe apigawaita supe.
8Yakuawate yamunya rame puranga yaneruixawa kuri uxari yande arama yuiri purangawaa, kuaita apigawa supe aramawaita, aintayuiri kuaita tiwaita apigawa supe aramawaita.
9Asui penye aintaruixawaita, yawete yuiri pemunya ainta supe, tepemundu kirimbawa ainta, nyãse pekuawate peruixawa aintaruixawa yuiri uiku iwaka kiti, timaa uparawaka umaa kuaita miraita.
Pemundeu perese Deus rupa kirimbawawaa
10Ape anyu aramawaa peyumukirimbawa yaneruixawa rese, peiku santa ikirimbawasawa rese.
11Pemundeu perese panye Deus rupa kirimbawawaa pepuderi arama peiku santa Yurupari gananisawa ruaxara.
12Nyãse tiyamunya kera apigawa ruaxara, maa aintaruaxara kuaita yanga umunduwaita, aintaruaxara kuaita kirimbawawaita, aintaruaxara yuiri kuaita umunduwaita kua mundu pitunawasuwaa, aintaruaxara yuiri kuaita ianga puxuwerawaita iwaka wira kitiwaita.
13Sesewara pexari perese panye Deus rupa kirimbawawaa pepuderi arama peiku santa kua mundu puxuwerawa upe, asui pemuserana rire peiku santa xinga.
14Ape peiku santa, asui pepukuari pekua upe isinturão supiwa, asui pemuyari peputia upe kua kamixa purangasawa.
15Pemundeu peipi rese kua nyenga purangawaa uxari timaarese puranga.
16Asui pepisika yawewarawate kua suantisawa nyãse uruyarisawa ae, pepuderi arama pemuweu panye kuaita Yurupari puxuwerawa ruiwa sendiwaa.
17Pexari peakanga rese kua salvasão xapeu, pepisika kua Espiritu espada nyãse Deus nyenga ae.
18Ape pembeu Deus yawewarawate Espiritu irumu, pembeu Deus pepurandu irumu yuiri, asui pesaru tepekuere pepurandu aintarese kuaita uruyariwaita panye.
19Pepurandu serese yuiri hakuawa arama hambeu timaa hasikie seyuru irumu kua nyenga purangawaa uyumimiwaa kuera aintasui.
20Tiarama hasikie hambeu ainta supe kuaye uputariwaa yawe hambeu, ixe umundu hambeu arama aintaupukuari ixe kurenti irumu.
Tikiku
21Asui kua Tikiku yanemu yaputariwaa, kua upurakiwaa timaa ikuere yaneruixawa supe, umbeu kuri pesendu panye serese umbeu yuiri maataa hamunyawaa.
22Sesewara hamundu pepiri ae pekuawa arama mayetaa yande umusuuri arama yuiri pepia.
Uabensuari ainta
23Yanepaya Deus, ae yuiri yaneruixawa Jesus Kristu, uxari timaarese, uxari yuiri pegustari uruyarisawa irumu.
24Ipurangasawa uiku aintairumu panye kuaita ugustariwaita supiwa kua yaneruixawa Jesus Kristu.
Currently Selected:
Efezuwaraita 6: BBp
Highlight
Share
Compare
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
