Efezuwaraita 3
3
Deus uputari yuiri kuaita tiwaita judeu
1Sesewara ixe Paulu prezu ixe Kristu Jesus resewara, hagustari resewara penye tiwaita judeu.
2Hamanduari pesenduana uxari ixe arama kua nyenga Deus purangasawa rese, peresewara uxari ixe arama ae.
3Pesenduana uxari hakuawa kua nyenga uyumimiware kuaye hampinimawaa yawe penye arama kuaira.
4Asui peleri irumu ae pepuderi pekuawa mayetaa hakuawa uyumimire Kristu rese.
5Kua tiwa kuerare uxari aintaukuawa kuaita apigawaita kuaye uxariwaa yawe aintaukuawa kuiri Espiritu irumu kuaita umunduwaita purangawaita utitikawaita yuiri.
6Uxari aintaukuawa mayetaa ainta kuaita tiwaita judeu ixupe aramawaita ainta, sakangaita ainta kua yepenyute ipira, ainta supe yuiri kua Kristu Jesus umbeuwaa irumu kua nyenga purangawaa.
7Uxari hambue kua nyenga purangawaa kuaye uxariwaa yawe ixe arama prezenti Deus purangasawa kuaye umunyawaa yawe ixe arama ukuawasawa irumu.
8Ixete aintawira kiti panye kuaita uruyariwaita uxari ixe arama ipurangasawa hambue arama kua nyenga purangawaa ainta supe kuaita tiwaita judeu, sese kua purangawaa yarikuwaa Kristu irumu tiwa yapuderi yambawa yakuawa panye.
9Haxari arama panye apigawa ukuawa mayetaa kua Deus uyumimiwaa kuera kua umunyawaa panye maantu.
10Iingreja uxari arama aintaukuawa kuiri panye Deus ukuawasawa kuaita tuixawaita umunduwaita iwaka kiti.
11Kuaye umunya uxari irumu Kristu Jesus yaneruixawa kuaye uputariwaa yawe yawewarawate.
12Irumu yapuderi yamusuaki ae timaa yasikie yaxari resewara yanepia sese.
13Ape hapurandu penye tiarama yatima penye sesewara kua hapurarawaa peresewara, nyãse pepuderi pembeu purangawaa peresepawate sesewara.
Paulu upurandu yuiri aintarese
14Ape sesewara hamunya benditu ixupe kua yanepaya Deus.
15Asui panye suka puraita iwaka kiti kua mundu upe yuiri aintauriku sera.
16Uxari arama kirimbawa penye pepia upe irumu kua Espiritu kuaye ipurangasawa turusuwaa yawe.
17Ape pexari Kristu uiku pepia upe pexari resewara pepia sese, sapu arama penye santa gustarisawa rese.
18Uxari arama pekuawa panye uruyariwaita irumu iturususawa panye, panye ilargusawa, panye ipukusawa, panye iwatesawa, panye itipisawa.
19Pekuawa arama mayetaa iturususawa kua Kristu gustarisawa turusuwaa ae panye gustarisawa sui, teresemu arama penye panye Deus suiwara irumu panye penye.
20Kuiri kua upurakiwaa ikirimbawasawa irumu yanepia upe upuderi uxari yande arama turusu piri isui kua yapuranduwaa irumu, isui yuiri kua yamanduarisawa.
21Yamee ixupe arama purangawaa ingreja upe Kristu Jesus rese yawewarawate, amem.
Currently Selected:
Efezuwaraita 3: BBp
Highlight
Share
Compare
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
