Atu 5
5
Anania Safira yuiri
1Maa yepe apigawa serawaa Anania irumute kua ximiriku serawaa Safira uvenderi yepe ikupixawa.
2Asui ukuawa pukusawa kua ximiriku uyumimi ainta supe sikuyara suiwara, asui urasu simirera uxari arama ae apustuluita ipi ruaki.
3Asui Pedru umbeu ixupe:
—Anania marantaa Yurupari umuteresemu nepia reganani arama Espiritu Santu supe reyumimi arama inde arama nekupixawa rikuyara suiwara?
4Maitaa tineyara ae tipukusaware revenderi ae? Asui maitaa timaa neyara sikuyara revenderi rire ae? Marantaa reganani nepia upe? Tireganani apigawa supe maa Deus supe.
5Asui Anania usendu irumu kua nyenga uwari iwi upe umanu ae. Asui aintausikie muiri kuaita usenduwaita sese.
6Asui kuaita kurumiwasuita aintaupuamu aintaupupeka ipira fazenda irumu, asui aintaurasu aintaumburi iwi kuara kiti ae.
7Asui kuajintu musapiri ura rire uri kua Anania rimiriku, timaa ukuawa maye kua usasawawaa.
8Asui Pedru usu ipiri upurandu ae unyee:
—Rembeu hasendu, maitaa pekampu rikuyara kua peruriwaa yande arama? Asui usuaxara ae:
—Ẽẽ aete.
9Asui Pedru unyee ixupe:
—Marantaa yepewasu peganani pesaã kua yaneruixawa Espiritu? Aintaipi kuaita umburiwaita nemena, aintauiku ukara kiti aintaurasu kuri yuiri inde.
10Asui aramete uwari Pedru ipi ruaki umanu ae. Asui aintauwike kuaita kurumiwasuita aintaumaa umanuana ae, asui aintaurasu ae aintaumburi iwi kuara kiti imena irumu.
11Asui aintausikie muiri kuaita ingreja puraita panye kuaita usenduwaita yuiri sese maye usasawa.
Apustuluita aintaumunya milagri
12Asui kuaita apustuluita aintaumunya siya tiwaitare yamaa siya milagrita yuiri miraita umaa. Asui aintauyumuatiri yepewasu kupiara kiti serawaa Salumão.
13Asui kuaita amuita aintausikie aintauyumuatiri aintairumu maa panye kuaita miraita aintaurespetari ainta.
14Asui siya miraita aintauxari aintapia Kristu rese, siya apigawaita siya kunyaita yuiri.
15Asui aintaurasu kuaita imãsiwaita ukara kiti aintakama upe tupe rese yuiri aintausaru Pedru ianga usika aintarese yepeyepe usasawa upe.
16Asui aintauri siya miraita tetama sui Jeruzalẽ ruakintuwaita aintaururi kuaita mãsiwerawaita, kuaita urikuwaita yuiri demuniu ikiawaita, asui purangana panye ainta.
Aintaumprezu apustuluita
17Asui upuamu aintaruaxara kua saserdutita ruixawa kuaita yuiri sadusewita panye sumuaraita, aintaumuasi kirimbawa.
18Asui aintaupisika kuaita apustuluita asui aintauxari ainta kadeya upe.
19Maa pituna rame yepe yaneruixawa anju upirari kadeya rukena asui urasu ainta ukara kiti, ape umbeu ainta supe:
20—Pesu pepuamu templu upe pembeu arama ainta supe kuaita miraita panye kua nyenga upakawaa.
21Asui aintausendu rire kua umbeuwaa aintausu kuema aintaumbue templu upe. Asui usika irumu kua saserdutita ruixawa uyumuatiri aintairumu kuaita serakuenawaita kuaita israelitaita ruixawaita yuiri asui aintaumundu amuita aintausu kadeya kiti aintauyuka arama ainta kadeya sui.
22Maa kuaita guardaita aintausika rame kadeya kiti tiaintauwasemu ainta, asui aintauyuiri aintaumbeu panye.
23Aintaumbeu:
—Yawasemu uyumusikindawa santa kua kadeya rukena, asui kuaita usaruwaita aintausaru puranga ukena, maa yapirari irumu ukena nẽ awa yamaa ape.
24Asui usendu irumu aintanyenga usikie usendu kua templu kapitão kuaita yuiri saserdutita ruixawa tiaintaukuawa mayetaa kuri usu usemu.
25Asui amu usika umbeu ainta supe:
—Kuaita pemburiwaita kadeya upe aintaumbue aintauiku miraita templu upe.
26Asui kua kapitão kuaita yuiri guardaita aintausu aintapiri aintaurasu ainta merupiara nyãse aintausikie miraita sui, yawaite aintauyuká ainta ita irumu.
27Asui aintaurasu rire ainta aintauxari ainta serakuenawaita umaa. Asui kua saserdutita ruixawa upurandu ainta, umbeu:
28—Yambeuwana penye kirimbawa tiarama pembue sera rese, maa pemuteresemu panye Jeruzalẽ irumu kua pembuewaa asui peputari pexari yanerese suwi kua apigawa.
29Asui Pedru usuaxara ainta kuaita yuiri amu apustuluita:
—Yarikute yaruyari Deus nyenga apigawaita nyenga sui.
30Asui aintaDeus kuaita yaneramunyaita usupiri Jesus manusawa sui kua peyukáwaa kurusa rese.
31Maa Deus usupiri ae ikatusawa upe tuixawa arama ae umukaturu aramawaa ae, uxari arama sasiyara aintaumanduari aintapuxuwerasawa kuaita israelitaita umburi arama aintasui aintapekadu.
32Asui yande yamaa ae, kua yuiri kua Espiritu Santu Deus uxariwaa ainta supe kuaita uruyariwaita ae.
Gamaliel umbeu umanduarisawa
33Asui aintausendu irumu kua nyenga ipiaiwa ainta asui aintauputari aintauyuká ainta.
34Asui yepe farizeu aintasuiwara kuaita serakuenawaita serawaa Gamaliel, umbuewa ae panye kuaita miraita aintaurespetari ae usemu upuamu umundu aintauxarire aintausu kuaita apigawaita.
35Asui unyee ainta supe:
—Penye israelitaita, pemaa katu pesui pemunyawaa ainta supe kuaita apigawaita.
36Nyãse kuxima yepe Teuda uputari aintaruixawa ae, asui aintauyumuatiri suaki kuaji kuatrusentu apigawaita, maa ukanyemu asui panye kuaita usuwaita sakakuera aintauyumusaĩ asui nemaa arama ainta.
37Asui arire upuamu yepe Juda Galileya suiwara aintaupapari irumu aintasiyasawa kuaita miraita panye, asui siya usu sakakuera, asui ae yuiri ukanyemu asui aintauyumusaĩ panye kuaita usuwaita sakakuera.
38Kuiri hambeu penye:
—Tepepisika kuaita apigawaita, pexarire ainta, nyãse ukanyemu kuri kua aintaumbuewaa aintaumunyawaa yuiri apigawaita suiwara rame ae.
39Maa Deus suiwara rame ae tikuri pepuderi pemukanyemu ae, yawaite maa pemuruanyana Deus. Asui aintaumunya kuaye umbeuwaa yawe.
40Asui aintausenui kuaita apustuluita asui aintaunupa ainta asui aintaumundu tiarama ainta, umbeu sera rese kua Jesus, asui aintauxari aintausuu
41Asui aintausu serakuenawaita sui, suuri ainta aintaupuderi arama aintaupurara Jesus rera resewara.
42Asui muiri ara aintaumbue templu upe uka upe yuiri tiaintakuere, aintaumbeu Kristu kua Jesus.
Currently Selected:
Atu 5: BBp
Highlight
Share
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
