Atu 27
27
Aintaumundu Paulu Italia kiti
1Asui aintaukuawa rire aintauxari yasu Italia kiti anyunte aintauxari Paulu ixupe kua kumandanti aintasuiwara kuaita tuixawa yaraita serawaa Juliu aintairumu kuaita amuita prezuita yuiri.
2Asui yawiye naviu kiti yepe Adramitinu suiwara usuana uyari arama aintaretama yaweyawe Azia kiti, asui yasuwaa parana turusuwaa kiti, asui yaneirumute Aristarku uriwaa Tesalunika sui Masedunia upe.
3Asui wirande kiti yasika Sidum kiti, asui kua Juliu umunya puranga Paulu supe, uxari usu umaa ianama aintapiri aintawajudari arama ae.
4Asui yasu aintasui yasu sutinga irumu Xipri rumasa kiti nyãse puxuwera yande arama kua iwitu.
5Asui yayasawa parana turusuwaa Silisia ruaxara Panfilia ruaxara yuiri yayari Mirra kiti Lisia upe.
6Apete kua kumandanti uwasemu yepe naviu Alexandria suiwara usuana uiku Italia kiti, asui uxari yawiye ipupe.
7Asui siya ara yasu merupiara asui yapurara yasika Kinidu ruaxara kiti, asui tiyapuderi yasu yanerunde kiti nyãse kirimbawa iwitu upeyu yanerese, ape yasu tumasawaa kiti Kreta sui kuayentu Salmuna sui.
8Asui iwasu yasasawa simbiwa kiti asui yasika yepe tendawa kiti serawaa Bum Purtu kuayentu tetama sui serawaa Laseia.
Yawaite aintaviaji
9Siya ara aintausasawa ape puxuwerana aintauwata nyãse kuxima usasawa aintarangawa aintauyukuaku kuaita judewita, asui Paulu umbeu ainta supe inyenga supiwa irumu.
10Umbeu:
—Serumuaraita, hakuawa yapurara kuri yasuwaa upe, ukanyemu kuri naviu, ipuraita yuiri, maa yande yuiri yawaitentute yapurara.
11Maa kua kumandanti usendu umbeuwaa kua pilutu naviu umundusarawaa naviu upe yuiri Paulu umbeuwaa sui.
12Asui kua igarapa tipuranga aintauiku arama ape akiti paranawasu rame, asui kuaita siyawaita aintaumbeu purangate yasu isui parana turusuwaa kiti, aintaumanduari aintaupuderi aintausika Fenise kiti aintauiku arama akiti paranawasu rame nyãse uiku Kreta upe yamaa ae tumasawaa sui.
13Asui iwitu upeyu merupiara tumasawaa sui asui aintaumanduari aintauwasemu puranga anyunte aintauyurawa aintanaviu, asui aintausu simbiwa kiti kua kaapuamu serawaa Kreta.
14Maa arire uyupiru upeyu kirimbawa kaapuamu ruaxara yepe iwitu serawaa Euru Akilão.
15Asui iwitu upeyu kirimbawa naviu rese asui tiwaguentari suaxara asui anyunte yaxari iwitu urasu ae.
16Asui yasasawa yepe kaapuamu miri serawaa Kauda tumasawaa kiti isui, asui yapurara yasupiri yepe igara miri naviu yara.
17Asui aintauxari rire igara miri naviu upe aintaupukuari kua naviu, asui aintaumuye kua sutinga aintauxari arama kua naviu uwiwi nyãse aintausikie yawaite iwitu upeyu ainta praya rese serawaa Sirte.
18Asui kirimbawa iwitu upeyu yande ape wirande kiti aintaumburi naviu pura parana kiti.
19Asui musapiri arana panye yande yamburi panye naviu rupiara parana kiti.
20Asui yepeyepe ara timaa kurasi umuturi timaa yuiri yamaa estrela, asui uwari yanerese turusu trevada, asui yanekuereana yaeskapari arama isui.
21Asui aintauyukuaku ainta siya ara asui Paulu upuamu uiku aintapiterupi umbeu ainta supe:
—Serumuaraita, pesendu rame ixe arama Kreta upe tirame maa pesu isui ape maa timaa yapurara kuiri timaa yuiri ukanyemu kua naviu.
22Maa haputari hamusuuri penye nyãse tiawa kuri ukanyemu yanepiterupi yepenyu kuri ukanyemu kua naviu.
23Nyãse uyi pituna yepe Deus anju upuamu seruaki, iyara ixe kua Deus hapuraki yuiri ixupe.
24Asui umbeu ixe arama:
—Teresikie inde Paulu, nyãse rerikute repuamu Sezar umaa, ape Deus uxari kuri aintaueskapari panye kuaita usuwaita neirumu.
25Ape, serumuaraita, peyumusuuri, nyãse hakuawa Deus kuri umunya kuaye umbeuwaa yawe ixe arama.
26Maa yarikute yayutuka yepe kaapuamu rese.
Aintanaviu uyupipika
27Asui katurzi ara rire iwitu urasu yande kirimbawa parana turusuwaa kiti serawaa Adriatiku, asui kuaji pituna piterupi kuaita marinyeruita aintaumanduari kuayentu yande iwi sui.
28Asui kuaita marinyeruita aintaumburi aintausaãwaa rupiara parana kiti, asui aintaukuawa vinti brasa tiipisawa, asui kuayentu senunde kiti aintaumburi aintausaãwaa rupiara asui aintaukuawa kinzi brasa tiipisawa.
29Asui aintausikie yawaite aintauyutuka ita rese, asui aintaumburi kuatru ankura naviu yakumã (ganti) sui, asui aintaupurandu kuemana ae kutara.
30Asui kuaita marinyeruita aintauputari aintauyawawa naviu sui, asui aintaumuye igara miri naviu sui parana kiti, aintauputari aintauxari yamanduari aintaumburi ankura parana kiti naviu ganti sui.
31Asui Paulu umbeu ixupe kua kumandanti, ainta supe yuiri kuaita suraraita:
—Tirame kuri kuaita marinyeruita aintauiku naviu upe tikuri pepuderi peeskapari penye.
32Asui kuaita suraraita aintaumunuka igara miri xama aintauxari uwiwi.
33Asui kuemaitere Paulu umbeu ainta supe kuaita aintaumbau arama panye ainta, unyee:
—Katurzi arana yasaru gapenu usasawa peyukuaku penye timaa nungara pembau.
34Ape haputari pembau pekirimbawasawa arama, nyãse nẽ yepe awa ukanyemu kuri peakanga sui muiri penye.
35Asui umbeu rire kua nyenga upisika pão asui umee purangawaa Deus supe aintaumaawaa upe panye, asui umpena ae asui umbau.
36Asui aintauyumusuuri panye asui aintaumbau yuiri.
37Asui yanesiyasawa panye yande duzentu setenta seis pesua.
38Asui aintaapu rireana ainta aintaumburi panye trigu parana kiti ipuseima xinga arama naviu.
39Asui kuemana ae maa timaa aintaukuawa kua iwi, maa aintaumaa yepe praya pusu upe, asui aintaumanduari aintaupuderi aintauxari naviu uyutuka praya rese.
40Asui aintausupiri ankura aintauxari naviu usu parana ara rupi, asui aintauyurawa yuiri kua lemi asui aintausupiri yepe sutinga iganti pura iwitu urasu arama ainta, asui aintausu praya rese.
41Asui aintauyutuka iwi rese parana pirantawaa uyusasawa upe, asui santa naviu ganti uyari maa gapenu upeteka naviu yakumã (ganti) rese asui uyupiru uyupirari.
42Asui kuaita suraraita aintauputari aintauyuká kuaita prezuita yawaite aintauwita aintauyawawa.
43Maa kua kumandanti uputari umukaturu Paulu usaisu aintauyuká ainta, asui umundu aintaupuri parana kiti aintauyupiru kuaita ukuawaita uwita aintausu arama maa iwi rese.
44Asui kuaita amuita aintaueskapari tabua rese u mirá rese aintauwasemuwaa naviu upe. Ape aintaueskapari muiri ainta iwi rese.
Currently Selected:
Atu 27: BBp
Highlight
Share
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
