1 Tesalunikawaraita 1
1
Tesalunikawaraita uiku puranga
1Ixe Paulu, Silvanu yuiri, Timuteu yuiri, penye arama penye ingreja supe aramawaita uikuwaita yanepaya Deus rese yaneruixawa Jesus Kristu rese yuiri Tesalunika upewaraita. Haputari periku ipurangasawa, itimaaresesawa yuiri.
2Yawewarawate yamee perese purangawaa Deus supe yapurandu irumu perese.
3Yapurandu rame yanepaya Deus irumu yamanduari mayetaa pepuraki uruyarisawa irumu, gustarisawa irumu yuiri, peiku yuiri santa pesaru irumu umaa yaneruixawa Jesus Kristu.
4Nyãse pekuawate penye semuita Deus ugustariwaita uparawakana yande.
5Nyãse kua nyenga purangawaa yambeuwaa penye arama, usika pepiri timaa nyenga irumu upawantu, maa kirimbawa usika uxari pekuawa supiwa ae. Nyãse pekuawa maye kuera yaiku puranga pepiterupi, yagustari resewara penye.
6Asui pemaa resewara perangawa pemunya kuaye yaneyawe yaneruixawa iyawe yuiri, nyãse suuri pesuanti kua nyenga Espiritu Santu irumu pepurara irumu sesewara.
7Kuiri panye kuaita uruyariwaita Masedunia upe, Akaia upe yuiri aintaumaa aintarangawa penye.
8Nyãse pesui aintausendu yaneruixawa nyenga timaa anyunte Masedunia upe, nẽ Akaia upe, maa panye mundu upe aintausendu sesewara, peresewara yuiri peruyari puranga Deus, ape timaa resewara yambue pirire.
9Nyãse aintapawate aintaumbeu yaneresewara maye kuera pesuanti yande pepiterupi, maye kuera peyereu Deus kiti idulu sui pepuraki arama ixupe kua Deus upakawaa supiwa.
10Pesaru arama pemaa kua Taira uri iwaka sui, kua umpuamuwaa manusawa sui, kua Jesus uyurawa yande isui kua ipiaiwasawa uriwaa kuri.
Currently Selected:
1 Tesalunikawaraita 1: BBp
Highlight
Share
Compare
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
