Salmo 139
139
Pʉhtoro Davi Cohamacʉ to noaputia jia tiare masino, tirore wache payoha
1Pʉhtoro Davi Cohamacʉre õ sehe ni basa payoha:
—Mʉhʉ Yawe yʉ Cohamacʉ, mʉhʉ sehe yʉ durucuare tʉhoca.
Tuhsʉ, yʉ tʉhotuare, ã jichʉ yʉ jia tia cʉ̃hʉre ñʉca.
à jicʉ yʉhʉre noano masica mʉhʉ.
2Yʉ nuju sʉchʉ, yʉ wahcãrʉcʉ sʉchʉ,
jipihtia dohse jia yʉ yoachʉ ñʉca mʉhʉ.
Tuhsʉ, yʉ yoa duaa cʉ̃hʉre mʉhʉ sehe yoaropʉ jipaihta masiyu tuhsʉca.
3Dachoripe yʉ wahcã wihiri baharo, nohoi yʉ tinirire,
nohoi yʉ dohse yoarire, yʉ yʉhdʉri cʉ̃hʉre
tí jipihtiare noano waro masica mʉhʉ, te yʉ sochʉpʉ cʉ̃hʉre.
4Tuhsʉ, yʉ ni duaa cʉ̃hʉre yʉ ni wiohto panopʉ
tí jipihtiare masiyu tuhsʉca mʉhʉ.
5Ã masicʉ, mʉ tuaa mehne
yʉhʉre soroa dʉcataro yoaro seheta yoacʉ,
yʉhʉre ñaa wahaboare dobasara mʉhʉ.
6Ã yoa mʉ yʉhʉre ã noano waro masi yʉhdʉrʉcʉ sʉa sehe
bʉjʉa waro jira.
à jicʉ yʉhʉ sehe tíre noano waro tʉho ñaha duapai,
tʉho ñaha nuhri pja bihoeraja yʉhʉ.
7Mʉ ã jiriro choro jichʉ, nohoi yʉ tininoi
mʉ Catia Macariro Espíritu Santo yʉhʉre ã piti tirucura.
à jicʉ yʉhʉ mʉhʉre duhti duai cʉ̃hʉ,
nohoi yʉ duhtiboro bocaeraja.
8Ñahpichoha poca buipʉ yʉ mʉja sʉchʉ, tópʉ cʉ̃hʉre mʉhʉ cʉ̃hʉ jica.
Tuhsʉ, ahri yahpa docapʉ yariaina cjiri ti jiropʉ
yʉ dija sʉchʉ cʉ̃hʉre tópʉ mʉhʉ cʉ̃hʉ jica.
9Ã yoa sʉ̃ mʉja tari pahrẽ sehepʉ waha,
tópʉ yʉ sʉchʉ, tópʉ mʉhʉ cʉ̃hʉ jica.
à yoa sʉ̃ sãari pahrẽ sehepʉ waha,
dia pjiri ma ji bato tirʉcʉ sʉropʉ yʉ sʉchʉ,
tópʉ cʉ̃hʉre mʉhʉ cʉ̃hʉ jica.
10Tópʉ cʉ̃hʉre mʉ tuaa mehne
yʉhʉre sʉho waja mʉhtarucu masica.
Tuhsʉ, tópʉ cʉ̃hʉre yʉhʉre yoadohorucu masica mʉhʉ.
11-12Pa tehe dacho jipachʉ,
“Nahitiano wʉrʉ wahachʉ cahmamaca yʉhʉ,
Cohamacʉ yʉhʉre to ñʉerahto cjihto sehe” nicʉ cʉ̃hʉ,
wiho waro ã nii niboa yʉhʉ.
Nahitiano, buhriaro cʉ̃hʉ cʉ̃no sehe jinocaca mʉhʉre.
13Ã yoa yʉ masa bajuahto panopʉ,
yʉ poco to niji suhtiropʉ yʉ ji bʉcʉachʉpʉ cʉ̃hʉre,
mʉhʉta jiga jipihtia yʉ pjacʉ macaa cjihtire dahrebasariro.
14Ã jicʉ yʉhʉ sehe mipʉre yʉ pjacʉre ñʉi,
“¿Cohamacʉ, mʉhʉ sehe yʉ pjacʉ cjihtore yoacʉ,
noacaro yoa mihniri?” nicʉ,
cua pisaro mehne wahche payorucuja yʉhʉ mʉhʉre.
Jipihtia mʉ yoaa noaputiaro wijara mʉhʉre.
Tíre potocãta masija.
15Ã yoa mʉhʉ sehe yʉ pjacʉ cjihto
yʉ poco to niji suhtiropʉ nahitianopʉ,
ne noa ñʉenopʉ to coã ji bʉcʉa dʉcachʉ,
yʉhʉ cjihtore ñʉga mʉhʉ.
16Ã ñʉcʉ, “Tópe dachori, tópe cʉhmari catirohca ahriro” nicʉ,
mʉ ya tjupʉ tíre noano joa na pahño tuhsʉga mʉhʉ,
ahri yahpapʉ yʉ masa bajuahto panopʉ.
17Ã yoa yʉ nino seheta mʉhʉ yʉ Cohamacʉ,
mʉ tʉhotua bʉjʉa waro jira yʉhʉre.
Mʉ tʉhotuare yʉ tʉho ñaha pahño duachʉ,
tʉho ñaha nuhri pja pahñohto basioeraputiara yʉhʉre.
18Mʉ tʉhotua padʉropʉ jia padʉ pohca bui payʉ waro jira.
à jicʉ mʉ tʉhotuare quihõ ñʉ duacʉ,
ne di pja quihõ pahño bihoeraboa yʉhʉ —ni basa payoha
pʉhtoro Davi Cohamacʉre.
Currently Selected:
Salmo 139: GVC
Highlight
Share
Compare
Copy
Want to have your highlights saved across all your devices? Sign up or sign in
Todo os direitos são reservados a:
©Missão Novas Tribos do Brasil
Rua Itália, Qd. 57 L. 5-7 – Santa Isabel
75083-310 Anápolis, GO
