Pjiripo Ma̧ȩ 4
4
Ji̧dë ma ma̧ chiadëri̧ cjiaji̧ri̧rȩ cjo̧ro̧chji̧vä
1Ja̧di tara ca̧ oti̧, ibëa̧ Ano̧mȩ pio ju̧i̧ chjuari̧ quëna̧ji̧ri̧rȩ cjo̧ro̧chji̧vä. Aja̧, mȩnȩro̧ pio coaiä dabapea̧mi̧ chjuari̧ quëna̧ji̧ri̧rȩ cjo̧ro̧chji̧vä. Pio dibë ea tjamo̧mȩrȩ yo̧requededibe ca̧ oti̧. Aja̧, odai̧ tarari̧ jo̧rȩtamȩrȩ datämi̧ cjia tjamo̧requededibe. Jabechji̧ pio dibëiä ma̧ chiadëri̧ cjia tjamo̧requedequȩ. 'Jabechji̧ ca̧ chëre ba chia tjamo̧ oa boa̧ oa goami̧ dari̧ ëbaquiji̧ri̧da, Ütë tjamo̧ ja̧ oa ja̧bepea̧ ba oa boami̧ dari̧ ëbaquiji̧ri̧da, a̧dë chjäte ba chia tjamo̧diro̧ca̧da' quëna̧ jo̧rȩtarequededibe, ma̧ chiadëri̧ cjia tjamo̧mȩrȩ.
2Ado yaba̧ yo̧a̧ri̧ ivi pio ji̧ri̧ jo̧rȩtamȩrȩ go̧ȩpaquëdibë. Aja̧, Ebodi quȩyi̧ ji̧, ado Chitica quȩyi̧ pio ji̧bo jo̧rȩtamȩrȩ go̧ȩpaquëdibë. Danȩro̧, mȩnȩro̧ Ano̧mȩ pio ju̧i̧ nö̧ta cja̧rȩmȩpe baga̧ tara, jabechji̧ chjadëri̧ opatä eamȩrȩ yo̧taquëdibë. 3Ado danȩ Chichigu, pio mȩabo jo̧rȩtarequedemȩ ca̧ jadü. Jabechji̧ pio coa nö̧ta chjadëri̧ ëba ja̧beparëremȩ pio ju̧i̧ jo̧rȩtarequedemȩ. Ado pio ju̧i̧iä yo̧requedemȩ omȩ. Jabechji̧ chjadëri̧ a̧dojȩrȩ pio jiro ivi ji̧ri̧ jënȩro̧ chjadëri̧ opapea̧ oa, jënȩro̧ cja̧rȩmȩ chji̧ chiami̧ dari̧ jo̧rȩtapea̧ oa. Danȩ, pio jiro ivi jini̧ro̧ järi tjamo̧ji̧ri̧rȩ a̧dorëreji̧ri̧ni̧ro̧coe ma̧ȩ chjadëi̧ pio ju̧i̧ a̧ra̧ano̧pea̧ oa, oëra̧ti̧ oa chjuchjupechärea̧mi̧ dari̧. Ado jini̧ro̧mo̧rȩdë jabo Queremȩte quȩmȩ pio judiborë chjadëri̧ a̧dorëremȩdique. Aja̧, chjadëri̧ a̧dorëreji̧ri̧diro̧coe pio coa nö̧ta ëba ja̧bepaji̧ri̧ pio ji̧ri̧ nö̧ta. Ado ji̧ri̧ ja̧ quȩ üdë bucho ana̧ cjo̧ro̧rea̧ joërä go̧ȩpea̧ oa cjia maeade. Ja̧di tara yo̧requedemȩ ca̧ omȩ. Jabechji̧ chjadëri̧ a̧dojȩrȩ pio jiro ivi ji̧ri̧.
4Ado danȩrȩ, mȩnȩro̧ Ano̧mȩ pio judiri ja̧ji̧ri̧pea̧ tara, jabechji̧ ji̧dë ma ma̧ chiadëri̧ cjiaji̧ri̧rȩ cjo̧ro̧chji̧vä. Ado yo̧requededibe ca̧ oti̧, ma̧ chiadëri̧ cjiaji̧ri̧rȩ cjo̧ro̧chji̧vä. 5Ado Ano̧mȩ judi jana̧pea̧ ji̧ querediä tjamo̧ tara, jabechji̧ ma̧ chjua dachji̧jȩrȩ pumȩ ji̧ri̧, ji̧dë ma chjadëri̧ na̧rȩriäji̧ri̧rȩ. 6Ado bücjüri̧ cjiadë machji̧vä. Mȩnȩro̧ eami̧ oa chjätärä judi, jabechji̧, bücjüri̧ cjiaji̧ri̧rȩ jo̧rȩtadë machji̧vä jabo jabechji̧, Ütë tjamo̧ pio ju̧i̧iämo̧i̧ cjo̧dëriä cjo̧ro̧chji̧vä. Aja̧, mȩnȩro̧ jo̧rȩta̧mi̧ cjo̧dëriächji̧vä jabëdiächea oa. 'Jabechji̧ chjadëri̧ a̧domȩdicoada, chjadëri̧ japamȩdiibëda' quëna̧ jo̧rȩtaji̧ri̧rȩ ni̧bäriä cjo̧ro̧chji̧jo̧ȩ. 7Ado mȩnȩro̧ ja̧di dari̧ cjo̧ro̧rä judi, jabechji̧ Ütë tjamo̧ pio judi tänȩa̧ oa ma̧ chjupi̧ cjiari̧ jo̧rȩtarea̧ dapanȩrȩ cjatäcjie jo̧retarea̧mi̧ dari̧. Jabechji̧ mȩnȩro̧ Jechu Quiricho pio judiri ja̧ji̧ri̧ oa, chjadëri̧ jidapadejȩ dibëa̧ chji̧ oa mȩnȩro̧ bücjüri̧ cjiaji̧ri̧rȩ jo̧rȩtachea oa. Ado mȩnȩro̧, 'Chia chia, cüdë bücjüri̧ cjia tjamo̧tärea̧ ji̧, bücjüri̧ cjiadëquëda, pumȩrȩ dabarea̧mi̧dëri̧ a̧dë chjäte ma̧ chjupi̧ cjiari̧ jo̧rȩtarea̧ chiaquëda, Ütërë yürüa̧ oa ma̧ chjupi̧ cjiari̧ jo̧rȩtarea̧ chiaquëda' quëna̧ jo̧rȩtapanȩrȩ.
Ba chiati̧ maea oa jo̧rȩtariä dopachji̧vä
8Ado yaba̧, cjiadiäa̧mȩ ma̧ȩ pio ju̧i̧ yürürequdedibe. Danȩrȩ ca̧ oti̧, dibëa̧ chji̧ üdë tjuri cjiami̧ dari̧ cjiatäremȩde jo̧rȩtarea̧ chjadë pio ju̧i̧. Ja̧di tara yo̧requededibe. Ba chia maea oa, tjamo̧i̧ cjiari̧ baämȩ jo̧rȩtarea̧ maea oa jo̧rȩtariä dopachji̧vä. Aja̧, coëma cjia jo̧rȩtarea̧ maea oa, oëra̧ baädëmȩ maea oa, jo̧rȩtarea̧ chja maea oa, dibëa̧ tjo oa chjadëri̧ a̧domȩ jo̧rȩtarea̧ maea oa jo̧rȩtariä dopachji̧vä. Ado pio dibë ma̧ chiadëri̧ cjiaparȩmȩ pio ju̧i̧, chjadë pio ju̧i̧, chjacjiamȩri̧ jo̧rȩtapea̧ pio ju̧i̧ jo̧rȩtariä dopachji̧vä. Aja̧, chjai̧dëri̧ mirea̧ oa cjiadëmȩ jo̧rȩtarea̧ maea oa jo̧rȩtachji̧vä. 9Ado mȩnȩro̧ pio coaiä dabapea̧ pio ju̧i̧ ji̧dë ma japachji̧vä. Aja̧, pio coaiä ta̧rëa̧mi̧ cjo̧ro̧chji̧vä. Jabechji̧ cüdë dibëa̧ chjarerä cjo̧ro̧rërea̧ ji̧, dae chjaoa̧renȩro̧coe cjo̧ro̧ cjiamȩ oa. Peaja̧dimi̧ dari̧ cjo̧ro̧chji̧vä. Ado mȩnȩro̧ ja̧di dari̧ cjo̧ro̧rä judi, jabechji̧ ma̧ chjupi̧ cjiari̧ jo̧rȩtarea̧ yürüpadidibe Ütë tjamo̧ judi, pio dibë nö̧ta ëba cjiamȩ pio judi.
Pjiriporäpȩ quëna̧ji̧ri̧ judiro̧ Pablo ju̧i̧ a̧dorëreji̧ri̧diro̧jo̧ȩ chërera̧
10Danȩrȩ, Ano̧mȩ pio judiri ja̧mȩrȩ a̧dë chjäte ma̧ chiadëri̧ cjiarequede mȩnȩro̧ japamitë ana̧ tjamo̧ chjätä ëte, chëre oa ado chjereno̧ chjadüa̧ tara. Pearä judi coa chjiari bücjüri̧ cjiaji̧ri̧rȩ chjadürërea̧ ji̧, chjadüdëa̧nȩrȩ chjadürea̧ dadëa̧ oaiä. Jabo pio coa chjiari bücjüri̧ cjiadëpe baga̧ ma ja̧didë jabo jabechji̧ chjadürea̧ dadëa̧nȩrȩ. 11Ado cüdë yaba̧, chëre ju̧i̧ chjiari ni̧bäa̧ oaiä, 'Aja̧, jabëdiämȩrȩ cjo̧ro̧ tara, chëre pio ju̧i̧ chjiari yo̧ jirodibëda, cjäri̧ ja̧bomȩrȩ bücjüri̧ cjia tjamo̧ jirodida' quëna̧dëchji̧coe. Jabechji̧ cüdë goadëmȩborë cjiadiämi̧ tarari̧ jo̧rȩtamȩrȩ cjo̧ro̧pea̧ ji̧ dabapea̧requede. 12Aja̧, chö̧na̧i̧ti̧ oa cjäri̧ ja̧bomȩrȩ cjo̧ro̧pea̧ pio ju̧i̧ chjadëri̧ dabarequede. Ado a̧dë chjäte ji̧ra̧ri̧ goamȩrȩ cjo̧ro̧pea̧ pio ju̧i̧bo dabarequede. Ado pio ju̧i̧iä ba chiati̧ jo̧rȩtarea̧ oa dabapea̧requede ca̧ oti̧. Aja̧, cjiadiämi̧ tarari̧ jo̧rȩtamȩrȩ cjo̧ro̧pea̧ pio ju̧i̧ dabapea̧requede. Tjamo̧ davä. Eami̧ gupënȩrä, cüdë eami̧räpȩ cjiarä, jabechji̧ cjiadiämi̧ tarari̧ jo̧rȩtamȩrȩ cjo̧ro̧pea̧ ji̧ dabapea̧requede, ma̧ jürüri̧ cjiamȩborë, mairi̧ jurarämo̧dë. Tjamo̧ davä. Cüdë mö̧na̧mȩborë cjiadiämi̧ tarari̧ jo̧rȩtamȩrȩ cjo̧ro̧pea̧ ji̧ dabapea̧requede ji̧ra̧ri̧ goarämo̧dë. 13Jabechji̧ cüdë eami̧ti̧ oa chjätärä judi, 'Aja̧, cjiadiämi̧ tarari̧ jo̧rȩtamȩrȩ cjo̧ro̧pai̧ daquëda, Quiricho pio judi ju chiarea̧ yürüa̧ oaiä chjuari̧ cjiami̧ dari̧ cjo̧ro̧pai̧ daquëda' quëna̧ dabamȩpea̧requede. 14Jabo cüdë ja̧di dari̧ cjo̧ro̧pea̧ ji̧ dabapea̧mȩborë, 'jabechji̧ chjadëri̧ japea̧diro̧coada' quëna̧ jo̧rȩtamȩrȩ daea̧requede mȩnȩro̧ chjadüa̧ chëre pio ju̧i̧. Aja̧, cüdë chjai̧dëri̧ chjätäa̧mȩ oa chjadëri̧ a̧doa̧renȩro̧coe mȩnȩro̧ järätäa̧rä ja̧ pio ju̧i̧.
15Cüdë dibë ma̧ȩ chjadëi̧ pio ju̧i̧ pearä tarupë a̧ra̧ano̧rërea̧ ji̧, cüdë Machedonia quȩmȩ chiriri pio judiri pearä go̧dürërea̧ ji̧, cüdë a̧ra̧ano̧riä tai̧pea̧ oa pearä go̧dürërea̧ ji̧, pio dibë a̧dë baämȩrȩ go̧dürërea̧ ji̧, jabechji̧ pio mȩnȩro̧mo̧rȩ a̧dorëreji̧ri̧renȩro̧coe dibëa̧ chërera̧. Tjamo̧ davä. Pjiriporäpȩ a̧dopaji̧ri̧ pio mȩnȩro̧mo̧rȩ a̧dorëreji̧ri̧renȩro̧coe. Pio ju̧i̧ chjadëri̧ dabanȩrȩ. 'Aja̧, Pablo judi pio ibë a̧ra̧ano̧a̧mi̧ a̧ra̧ano̧täremȩdiji̧ri̧da, jabë ta̧rëdëa̧ pio ji̧ri̧bo a̧ra̧ano̧täremȩdiji̧ri̧da' quëna̧ jo̧rȩtaji̧ri̧rȩ a̧doa̧renȩro̧coe dibëa̧ chërera̧ pio ju̧ri̧ra̧ cüdë o ji̧ri̧iäpȩmo̧ a̧ra̧ano̧rea̧mi̧ dari̧. 16Ado cüdë Techaroni̧chȩche quȩmȩ bë ma̧ri̧räpȩ cjiamȩbo oa, peaja̧di chjadëri̧ chjadüa̧renȩro̧coe chëre oa. Cja̧rȩmȩ como̧ chjadüdëa̧ jabo yo̧a̧ri̧ co chjadüa̧renȩro̧coe cüdë jabëdiärea̧ decjiari̧. 17Jabo dibëa̧ chëre oa mitëpea̧ ji̧ ana̧ri̧ jo̧rȩtadërequede, jabo jabechji̧ mȩnȩro̧ coa a̧doa̧ oaiä, 'Aja̧, ji̧dë u̧i̧ ba ano̧padiji̧ri̧da, Ütë tjamo̧ judi ji̧dë u̧i̧ ba ano̧padiji̧ri̧da' quëna̧ jo̧rȩtarequede pio ju̧i̧mo̧i̧. 18Ado yaba̧ mȩnȩro̧ ado chjadüa̧ oaiä, jabechji̧ ji̧ra̧ri̧ goarequede ca̧ oti̧. Aja̧, chjaji̧ri̧rȩ chjadüa̧renȩro̧coe. Ado pio ju̧i̧iä jabëdiärea̧ decjiari̧ goarequede yaba̧. Ado danȩrȩ, mȩnȩro̧ chjadüa̧ pio ju̧i̧, Eparodito quȩmȩ pio ju̧i̧iä chjadüa̧ pio ju̧i̧, jabechji̧ ütëbo oa mitëa̧requede. Ado mȩnȩro̧ yürü chjadüa̧ üdë, jabechji̧ goaeri̧ pjȩa̧ cjitëmi̧ dari̧ cjitëdejȩ Ütë tjamo̧ pio ju̧i̧iäpȩmo̧. Aja̧, goae tjamo̧dejȩ. 'Jabechji̧ chjadëdica̧da' quëna̧ jo̧rȩtamȩrȩ dadejȩ. 19Ado jiro Ütë üdë, ca̧ Ütë pio judide. A̧dë chjäte ji̧ra̧ri̧ goamȩ Ütë pio judide. Ado pio judi yürüpadidibe mȩnȩro̧ jabëdiärea̧ decjiari̧. Aja̧, Jechu Quiricho pio judiri ja̧ji̧ri̧pea̧ji̧ri̧ oa chjadëri̧ yürüpadidibe. 20Ja̧di tara chjacjiamȩri̧ jo̧rȩtatäro̧jo̧ȩ ibëa̧ Ama̧i̧ Ütë pio ju̧i̧. Aja̧, bucho ana̧ chjacjiamȩri̧ jo̧rȩtatäro̧jo̧ȩ yuroparea̧ decjiari̧. Ja̧ditäde.
Cjiadiärea̧ Ma̧ȩ
21Tutia̧ oa cjiaji̧ri̧ pumȩ ütëbodärä oa cjäri̧ri̧ cjia jo̧rȩtamȩrȩ jearequededibe, Jechu Quiricho pio judiri ja̧ji̧ri̧ pio ji̧ri̧. Ado coa nö̧ta cjiaji̧ri̧ pumȩ pio judiro̧borë jȩarea̧ chjadüdiro̧dibe, pio dibë cjäri̧ri̧ cjia jo̧rȩtaji̧ri̧rȩ. 22Aja̧, pio yoaiä cjo̧ro̧ji̧ri̧ pumȩ ütëborë, tutia̧ oa cjiaji̧ri̧ pumȩ pio judiro̧ ütëborë cjäri̧ri̧ cjia jo̧rȩtaji̧ri̧rȩ jeadiro̧dibe. Ado Checha quȩmȩ ütë pio ju̧i̧ nö̧ta cjo̧ro̧ji̧ri̧ judiro̧, tutia̧ oa cjiaji̧ri̧ pumȩ pio judiro̧ peaja̧di cjäri̧ri̧ cjia jo̧rȩtaji̧ri̧rȩ jeadiro̧dibe, pio dibë tjamo̧ri̧ jo̧rȩtaji̧ri̧rȩ.
23Aja̧, ibëa̧ Ano̧mȩ Jechu Quiricho pio judi chjadëri̧ a̧dotädidibe dibëa̧ tjo oa.
©2021 Global Partners, All Rights Reserved