Pjiripo Ma̧ȩ 2
2
Pearä judirä cjiarëremȩ pio judi pumȩpe bagarëremȩde
1Danȩrȩ ca̧ oti̧, a̧ro̧rȩ Quiricho pio judiri ja̧ji̧ri̧pea̧ tara, ¿yö̧ta dari̧ cjo̧ro̧rea̧rȩ? ¿Järirȩa̧ daji̧ri̧rȩ cjo̧ro̧dërȩare? Judi pio ibë ea̧ pio ju̧i̧ ¿taradërea̧rȩ? Judi ibë chjichjipami̧ dari̧ japea̧ oaiä, cjatäcjie jo̧rȩtaji̧ri̧rȩ ¿cjo̧ro̧dërea̧rȩ? A̧ro̧rȩ pio judiri ja̧ji̧ri̧pea̧ tara, Tjo tjamo̧ pio ju̧i̧ nö̧ta jadü cjiarea̧ ¿dadërea̧rȩ? Ibëa̧ pumȩ pio ji̧ri̧ nö̧ta ba dëbë cjäri̧ri̧ cjia jo̧rȩtaji̧ri̧rȩ ¿cjo̧ro̧rea̧ dadërea̧rȩ? Dë, ja̧di dari̧ cjo̧ro̧ji̧ri̧pea̧rea̧rȩ. Ado pio ju̧i̧iä ma̧ chiadëri̧ cjiamȩrȩ jo̧rȩtarequededibe. 2Ado yaba̧ cüdë pio dibëiä ji̧dë u̧i̧ ma̧ chiadëri̧ cjiapea̧ oa, jabechji̧ cja̧rȩmȩ chji̧ chiami̧ dari̧ cjo̧ro̧chji̧vä. Cja̧rȩmȩ earea̧ maeara̧ eachji̧vä dibëa̧ dëbëti̧ra̧ chia. Jabechji̧ chjarapë jo̧rȩtadë machji̧vä, jabo cja̧rȩmȩ jo̧rȩtarea̧ chia maea oa cjo̧ro̧chji̧vä. 3Ado danȩrȩ, dibëa̧ chji̧rämo̧ jo̧rȩtataji̧ri̧rȩ cjo̧ro̧dë matäreji̧ri̧nȩrȩ jabo jabechji̧, 'o judiro̧ pio coa u̧i̧ ba chia tjamo̧diro̧da' quëna̧ jo̧rȩtaji̧ri̧rȩ cjo̧ro̧täreji̧ri̧nȩrȩ. Aja̧, ja̧di dari̧ cjo̧ro̧täreji̧ri̧nȩrȩ pumȩ judiro̧ pio dibë chjiari oëra̧ jo̧rȩtachea oa, 'Aja̧, pio ibë u̧i̧ ba chiadiro̧da' quëna̧ jo̧rȩtachea oa. 4Jabechji̧ dibëa̧ maea oa jo̧rȩtadëchji̧vä jabo o ji̧ri̧ ja̧bo jo̧rȩtaji̧ri̧rȩ cjo̧ro̧chji̧vä.
5Jabechji̧ Jechu Quiricho pio judi jo̧rȩtarërea̧mi̧ jo̧rȩtaji̧ri̧rȩ cjo̧ro̧ matäreji̧ri̧nȩrȩ. 6Ado Quiricho judi, ¿yö̧ta dari̧ jo̧rȩtarëremȩde? Yö̧ta dari̧dë, jabechji̧ jibëa̧ maea oa jo̧rȩtadëa̧de jabo o ji̧ri̧ ja̧bo jo̧rȩtarëremȩde. Danȩrȩ, Quiricho judi, jabechji̧ Ütë tjamo̧ pio judimo̧rȩ cjiarëremȩde pearä judiräri ja̧. Jabo judi Ütë tjamo̧mȩborë, 'Aja̧, ji̧dë ma ba chia tjamo̧ro cjiapea̧ chiaquëda, Ütërë cjiami̧ dari̧ ji̧dë ma cjiapea̧ chiaquëda' quëna̧dëa̧de. 7Jabo a̧dë chjäte ba chia tjamo̧räpȩ cjiamȩborë, 'Aja̧, biratäremȩquëda, Ütë tjamo̧mi̧ dadëpe bagari̧ ano̧ mire cjiadiätäremȩquëda, mö̧na̧mi̧ dari̧ cjiadiätäremȩquëda' quëna̧ jo̧rȩtamȩrȩ birarëremȩde. Aja̧, mu̧i̧tjoi̧mi̧ dari̧ cjo̧ro̧pea̧ oa birarëremȩde. Ado pumȩmi̧ dari̧ ara̧ oa cjiadiärëremȩde. Ado pumȩmi̧ dapea̧mȩ oa daea̧diro̧jo̧ȩ pumȩ judiro̧. 8Ado pumȩpea̧mȩrȩ, 'Aja̧, ba chia tjamo̧quëda' quëna̧dëa̧de, jabo jabechji̧ jibëa̧ Ama̧i̧ ja̧ ma̧ȩrämo̧ cjo̧ro̧rëremȩde. Aja̧, pio jȩa ja̧bo tänȩa̧rä yuro jibëa̧ Ama̧i̧ ja̧ ma̧ȩrämo̧ cjo̧ro̧rëremȩde. Tjamo̧ davä. Toro ja̧bo tänȩa̧räbo chjadëri̧ ta̧rëdiärëremȩdejȩ jibëa̧ Ama̧i̧ ju̧i̧, idi̧ da tjamo̧ri̧ ja̧boa̧räbo. 9Pio ju̧i̧iä Ütë tjamo̧ judi a̧dë chjäte ba chiaparȩmi̧ dari̧ japarëremȩdejȩ ado cja̧rȩmo̧ ütërë nö̧tarea̧mi̧dëri̧. 10Ado Jechu judi a̧dë chjäte ba chia tjamo̧ tara, jabechji̧ pumȩ judiro̧ ütëbodärärë pio ju̧i̧ ja̧ dëbëräpȩ cjiadiä mapadirȩ a̧dë chiquirea̧ decjiari̧. 'Aja̧, ba chia tjamo̧dida' quëna̧ jo̧rȩta mapadiro̧jo̧ȩ chjacjiamȩri̧ jo̧rȩtaji̧ri̧rȩ. Tjamo̧ davä. A̧dëräpȩji̧ri̧ judiro̧, daburäpȩji̧ri̧ judiro̧, na̧ra̧ oa cjiaji̧ri̧ pio judiro̧, tjo maearë cjiaji̧ri̧ judiro̧ ütëborë Jechu ja̧ dëbëräpȩ cjiadiä mapadirȩ, 'ba chia tjamo̧dida' quëna̧ jo̧rȩtaji̧ri̧rȩ. 11Ado judiro̧ ütëbodärärë jibëa̧ yara̧, 'Aja̧, Jechu Quiricho judi, Ano̧mȩ tjamo̧ pio judimo̧dida, ba chia tjamo̧dida' quëna̧ jo̧rȩtaji̧ri̧rȩ yo̧padiro̧jo̧ȩ. Ado ja̧di dari̧ yo̧a̧ oaiä, jabechji̧ ibëa̧ Ama̧i̧ Ütë pio ju̧i̧iäpȩmo̧ chjacjiamȩri̧ jo̧rȩtapadiro̧jo̧ȩ.
Cjo̧dë oa ara jämi̧ dari̧ cjiaji̧ri̧rȩ cjo̧ro̧täreji̧ri̧rea̧rȩ quëna̧ji̧ri̧ judiro̧
12Ado Quiricho judi ji̧dë ma ta̧rëdiämȩrȩ cjo̧ro̧a̧ tara, peaja̧di ta̧rëdiäji̧ri̧rȩ cjo̧ro̧ matäreji̧ri̧nȩrȩ ca̧ oti̧. Jabechji̧ cüdë dibëa̧ chjarerä cjo̧ro̧rërea̧ ji̧, daea̧requededibe Ütë tjamo̧ ju̧i̧ ta̧rëdiä goaraji̧ri̧ oa. Ado yaba̧ cüdë decjiaräbo, ji̧dë u̧i̧ ta̧rëdiäji̧ri̧rȩ cjo̧ro̧täreji̧ri̧nȩrȩ chjaocjiarea̧ decjiari̧. 'Jabechji̧ ca̧ pumȩdiro̧ca̧da' quëna̧ jo̧rȩtamȩrȩ yo̧requededibe ca̧ oti̧. Aja̧, mȩnȩro̧ chjätärea̧ daea̧ tara, jabechji̧ uapaji̧ri̧rȩ järi tjamo̧täreji̧ri̧nȩrȩ chjadëri̧ na̧rȩriä cjo̧ro̧pea̧ ji̧ mȩnȩro̧ nö̧tarä yuro. 13Jabechji̧ ja̧di dari̧ cjo̧ro̧tä eamȩrȩ ja̧bepade Ütë tjamo̧ judi. Tjamo̧ davä. Jënȩ jo̧rȩta̧mi̧ ana̧ri̧ ja̧bepade dibëa̧ chji̧rä. 'Aja̧, Ütë tjamo̧ judi yo̧a̧mi̧ ta̧rëdiätämi̧ cjiaquëda, jabechji̧ cüdë chjadëri̧ ta̧rëdiärea̧mi̧ dari̧ ju chiarea̧ yürüdicoada, pio ju̧i̧iä chjadëri̧ ta̧rëdiärea̧ daquëda' quëna̧rea̧mi̧ dari̧ ja̧bepade.
14Ado mȩnȩro̧ eami̧ti̧ oa japarä judi, jabechji̧ chjadëri̧ japachji̧vä. Dibëa̧ dëbëti̧ra̧ chia goaedëri̧ aene ni̧bärea̧ decjiari̧ japachji̧vä, dëbë ni̧bätarea̧ decjiari̧. 15Aja̧, ja̧di dari̧ cjo̧ro̧chji̧vä mȩnȩro̧ chjai̧dë oa mirea̧ oa cjiachea oa, pumȩ judiro̧ pio dibëiäpȩmo̧ aechide ni̧bärea̧ dachea oa. Jabechji̧ Ütë tjamo̧ ja̧ u̧ri̧mi̧ dari̧ cjo̧ro̧chji̧vä, co chjami̧ dari̧. Danȩrȩ, chjai̧dëri̧ jape chjaoji̧ri̧ ja̧ chjarerä cjo̧ro̧nȩrȩ. Chjadë pio ju̧i̧ putu jura̧ a̧dë chami̧ dari̧ japaji̧ri̧ ja̧ chjarerä cjo̧ro̧nȩrȩ. Jabo mȩnȩro̧ tata u̧ri̧ mapea̧ tara, jabechji̧ bagönȩrä cjo̧dëra̧ yabo arë dariä jämi̧ dari̧ cjo̧ro̧chji̧vä pio yoa chiri oa yabo jäji̧ri̧mi̧ dari̧. 16Aja̧, arë dariämi̧ dari̧ cjo̧ro̧chji̧vä bucho ana̧ cjo̧ro̧rea̧ yürümȩ ma̧ȩ pio ju̧i̧ a̧ra̧ano̧ji̧ri̧rȩ. Ado mȩnȩro̧ ja̧di dari̧ cjo̧ro̧rä judi, jabechji̧ ma̧ chiadëri̧ cjia tjamo̧mȩrȩ cjiadiäparequede Quiricho pio judi jana̧ doro. 'Aja̧, badëri̧ cjiadiädëa̧dida, cüdë pio ji̧ri̧ chjiari goae tarari̧ ja̧bepea̧ üdë badëri̧ cjiadiädëa̧dida, jabo dae järea̧mi̧ dari̧ cjiadiäa̧dida' quëna̧ jo̧rȩtamȩrȩ ma̧ chiadëri̧ cjiaparequede pio jiro doro.
17Danȩrȩ, mȩnȩro̧ Jechu Quiricho pio ju̧i̧iäpȩmo̧ quëna̧ üdë, jabechji̧ Ütë tjamo̧ pio ju̧i̧iä goaeri̧ pjȩa̧ cjitëmi̧ dari̧ yürürea̧mi̧ dade. Jabechji̧ pumȩ judiro̧ Moicherë go̧ȩparërea̧ ma̧ȩrä gu̧na̧rea̧ mechjarä cäë yürürërea̧ ji̧, jabechji̧ jënȩro̧ yürüa̧ pio ju̧i̧ uëri arë cjarärëreji̧ri̧dirȩ uva ui jararea̧ oa judiro̧ yürüa̧ üdë nö̧tadäräri̧ cjiapea̧ oa. Ado danȩrȩ, domano judiro̧ pio coa ja̧bo tänȩrä judi, jabechji̧ ca̧ goe üdë peaja̧di arë cjaräa̧ oa cjiami̧ dari̧ cjiapade. Aja̧, mȩnȩro̧ quëna̧ pio ju̧i̧ uëri a̧de yürürea̧mi̧ dari̧ arë cjaräa̧ oa cjiami̧ dari̧ cjiapade. Jabechji̧ ca̧ icjara codë oa yürüreconȩ Ütë tjamo̧ ju̧i̧. Ado pio ju̧i̧iä jabechji̧, pio coa ja̧bo tänȩräbo ji̧dë ma ma̧ chiadëri̧ cjiaparequede pio dibë nö̧ta. 18Ado pio mȩnȩro̧borë ëba ma̧ chiadëri̧ cjiatäreji̧ri̧renȩro̧coe. Tjamo̧ davä. Cüdë ja̧boa̧räbo ëba ma̧ chiadëri̧ cjiatäreji̧ri̧renȩro̧coe.
Timoteo pio ju̧i̧ chjadütämi̧ cjiarëremȩdejȩ Pablo judi Pjiriporäpȩ
19Ado yaba̧ Ano̧mȩ Jechu pio judi japarea̧ yürürä judi, jabechji̧ Timoteo pio ju̧i̧ chjadüpareconȩ pio dibë chjadëri̧ a̧dopea̧ oa. Ado ja̧dëa ji̧ ji̧dë duri oa judi ado chjereno̧ cuchupë ma̧na̧rä, jabechji̧ järipe bagarea̧ daparequede pio dibë chjiari ta̧rëa̧ oaiä. 20Jabechji̧ ado cja̧rȩmo̧ oa chjadütärea̧ ji̧, cjäri̧ madirȩ, chjadürea̧mi̧dëdirȩ. Timoteo pio ju̧i̧mo̧i̧ chjadürea̧mi̧ dade. Pio judimo̧rȩ bücjüri̧ cjia tjamo̧ jo̧rȩtadidibe pio cüdëmi̧ dari̧. 21O judiro̧ jibëa̧ maea oa jo̧rȩtadirȩ. Jibëa̧ chji̧rämo̧ jo̧rȩtatadirȩ Jechu Quiricho ja̧ chji̧rämo̧ jo̧rȩtatärea̧ ji̧. 22Jabo ja̧didëde Timoteo judi. 'Jabechji̧ Ütë tjamo̧ judi yo̧a̧mi̧ japamȩdida, o ji̧ri̧ chjadëri̧ a̧domȩdiji̧ri̧da, ado chjadëri̧ ütarë daea̧ oa cjiadida' quëna̧ dabanȩrȩ pio ju̧i̧ chjiari. Tjamo̧ davä. 'Pablo pio ju̧i̧ nö̧ta ja̧bepe cjiadida, Ano̧mȩ pio ju̧i̧ chjiari ma̧ȩ chjadëi̧ pio ju̧i̧ a̧ra̧ano̧mȩrȩ ja̧bepe cjiadida, pumȩ pio ji̧ri̧ chjadëri̧ a̧ra̧ano̧mȩrȩ ja̧bepe cjiadida' quëna̧ dabanȩrȩ davä Timoteo pio ju̧i̧ chjiari. Tjamo̧ davä. Joja üdë jäja pio ju̧i̧ nö̧ta ëba ja̧bepami̧ dari̧ ëba ja̧bepadique chjadëri̧. 23Ja̧di tara pio ju̧i̧ chjadütämi̧ cjiareconȩ pio dibëiäpȩ. Jabechji̧ chjadëri̧ ta̧rë ëte, pio coa chaä tänȩa̧ji̧ri̧ pio pio ji̧ri̧iä chjadëri̧ ta̧rë ëte, ja̧di dari̧ japapadiro̧coada' quëna̧ dabapea̧ oa ta̧rë ëte, jabechji̧ chjadüpareconȩ chjaodëri̧. 24Ado pio cüdëborë jäpa jirorequede pio dibëiäpȩ. 'Jabechji̧ Ano̧mȩ pio judi yürüpadicoada, japamitë boi̧chji̧ chjätä ëte tjamo̧ri̧ järea̧ yürüpadicoada' quëna̧ jo̧rȩta̧ oaiä, jabechji̧ pio cüdëborë jäpa jirorequede.
Eparodito pio ju̧i̧ chjiari ma̧ȩ yürürëremȩdejȩrȩ Pablo judi
25Danȩrȩ, chjadëri̧ chjadüa̧renȩro̧coe ibëa̧ omȩ oa, Eparodito quȩmȩ pio ju̧i̧. Jabechji̧ chjadëri̧ a̧doa̧dique jabëdiäa̧mȩ oa. Ado pio coa nö̧ta ëba ja̧beparemȩdique Ütë tjamo̧ pio ju̧i̧ ja̧ oa. Ca̧ jadüdiquȩ. Cüdë ana̧ri̧ taramȩ oa ëba tararemȩdique. Jabo yaba̧ jabechji̧, 'ado chjereno̧ chjadütäremȩcuni̧da, ja̧di dari̧ japea̧ üdë chjadëtäremȩdida' quëna̧ jo̧rȩtareconȩ. 26Jabechji̧ ana̧ri̧ jo̧rȩtadidibe. Ado datämi̧ cjia tjamo̧didibe ji̧dëri̧. Jabechji̧ mȩnȩro̧ pio ju̧i̧ chjiari goë goë ta̧rëa̧ oaiä, "Aja̧, gito ja̧bode" yo̧a̧ oa ta̧rëa̧ oaiä, 'Jabo cjäri̧ madiro̧da, pio coa chjiari gito ana̧ri̧ jo̧rȩta jirodiro̧da' quëna̧ jo̧rȩtaremȩdidibe, jama̧i̧ri̧ cjia tjamo̧mȩrȩ. Pio ju̧i̧iä jabechji̧, 'ado chjereno̧ chjadütäremȩcuni̧da' quëna̧ jo̧rȩtamȩrȩ chjadüpareconȩ. 27Ado dëdë, tjamo̧ri̧ ta̧rëa̧nȩrȩ. Gito ana̧ tjamo̧ri̧ tararemȩde. Jabechji̧ ja̧botea̧de. Jabo Ütë tjamo̧ judi pio jȩaiiäpȩmo̧ cjäri̧ri̧ cjia daea̧ oaiä cjatäcjiarea̧ yürüa̧dejȩ. Pio coabo cjäri̧ri̧ cjiamȩrȩ daea̧dique pio cüdë ca̧ omȩ pio ju̧i̧ chjiari gito ana̧ri̧ jo̧rȩtachea oa. Tjamo̧ davä. Coa a̧dë ja̧boa̧rä judi, ji̧dë u̧i̧ gito ana̧ri̧ jo̧rȩta̧täremȩrequede. Jabo coabo cjäri̧ri̧ cjia daea̧ tara, jabechji̧ cjatäcjiarea̧ yürüa̧dejȩ. 28Ja̧di tara jo̧ȩra̧pe chjadütämi̧ cjiareconȩ mȩnȩro̧ cjatäcjie jo̧rȩtapea̧ oa, ma̧ chiadëri̧ cjiari̧ jo̧rȩtapea̧ oa. Ado mȩnȩro̧ ja̧di dari̧ jo̧rȩta̧ oaiä, peaja̧di cjatäcjie jo̧rȩtarea̧ daparequede pio cüdë. 29Ja̧di tara yo̧requededibe ca̧ oti̧. Judi pio dibëiäpȩ go̧düdäräa̧rä, jabechji̧ ma̧ chiadëri̧ cjiaji̧ri̧rȩ jeachji̧jo̧ȩ. Dibëa̧ omȩde. Ano̧mȩ Jechu pio ju̧i̧ ja̧ oa ja̧bepamȩde. Ado ja̧di dari̧ ja̧bepaji̧ri̧ pio ji̧ri̧ ütëbodärä oa ba chia da matäreji̧ri̧renȩro̧jȩrȩ cja̧rȩmȩ oa a̧dë jo̧rȩtarea̧ decjiari̧. 30Danȩrȩ, Eparodito judi Quiricho pio ju̧i̧ ja̧ oa ja̧bepe cjiamȩrȩ ja̧botea̧de. 'Jabo ja̧bopai̧ dari̧ cjiaquëda' quëna̧mȩborë chjadëri̧ a̧dorëremȩdique. Pio mȩnȩro̧ a̧dotärea̧ ji̧ a̧dorea̧ dadëa̧renȩro̧coe, jabo judi chjadëri̧ ano̧ mire a̧doa̧dique ja̧bopai̧ dari̧ cjiamȩborë. Ja̧di tara jabechji̧ ba chia dachji̧jo̧ȩ.
©2021 Global Partners, All Rights Reserved