Ütararea̧ Ma̧ȩ 27
27
Jochue judi mitëa̧ oa cjiade icharaita pio ji̧ri̧ ano̧ mire tjamo̧ ëba tai̧pea̧ oa
12Ado Jeova judi yo̧rëremȩdejȩ Moiche ju̧i̧:
—Danȩ, Abarimi quȩmȩ ya̧mi̧ oa buatä earequedemȩ cüdë icharaita pio ji̧ri̧iäpȩmo̧ yürüa̧ chiri pio ju̧i̧ chjadëri̧ dapea̧ oa. 13Ado chiri oa da ëte, jabechji̧ ja̧boparenȩ. Na̧ ütëti̧rea̧rȩ cjiamȩräpȩ baäparenȩ na̧ ayima̧i̧ Aro̧ pio judi baäa̧mi̧. 14Jabechji̧ mȩnȩro̧ yo̧a̧ri̧borë pio coaiäpȩmo̧ ba chia jo̧rȩtatärea̧ ji̧, Chi quȩmȩ chiri maearäpȩ pio ju̧ri̧ ba chia jo̧rȩtatärea̧ ji̧, cjäri̧ marenȩro̧coe, ba chia jo̧rȩtadëa̧renȩrocoe, jabo jiada̧renȩro̧coe Cada quȩmȩräpȩ ju̧ri̧. Ado coa jiada̧ oaiä, jabechji̧ chiri chjadëräpȩ go̧düdärärea̧ yürüdëparequedemȩ. Tjamo̧ davä. Icharaita judiro̧ ütëborë Mariba quȩmȩ uiräpȩ ju̧ri̧ pio coaiäpȩmo̧ ma̧ȩ goaedëti̧ oa yo̧rërea̧ ji̧, ui decjia oaiä ma̧ȩ goaedëti̧ oa yo̧rërea̧ ji̧, ado cüdë ta̧dëri pio judiri ui oa tuti yürürërea̧ ji̧, jabechji̧ ca̧ jauëchja pio ju̧i̧ chjiari chjadëri̧ yo̧tärea̧ ji̧, mȩnȩro̧ yo̧a̧ri̧borë chjadëri̧ yo̧dëa̧nȩrȩ. Ado pio ju̧i̧iä yaba̧, jabechji̧ yu̧a̧rea̧ dadëparenȩ —yo̧mȩrȩ yo̧rëremȩdejȩ Moiche ju̧i̧ Jeova judi.
15Ado Moiche judi goë cjo̧dëmȩrȩ yo̧a̧dejȩ:
16—Jeova, Ütë tjamo̧renȩ. Pio mȩnȩ yürüa̧rämo̧ quirë baä quirë baä cjiarea̧ darea̧rȩ. Pio mȩnȩ jȩoa tänȩa̧rämo̧ cjo̧ro̧rea̧ darea̧rȩ. Ado pio ju̧i̧iä goë cjo̧dërequedemȩ ado cja̧rȩmo̧ tjamo̧ yo̧mȩ pio ju̧i̧ ano̧ mire mitëpea̧ oa. Jabechji̧ cüdë tjamo̧ yo̧mȩrȩ cjiarërea̧ ji̧, ado cja̧rȩmo̧ oa ano̧ mire mitëtä earequedemȩ, icharaita pio ji̧ri̧ chjadëri̧ jidapea̧ oa, pio ji̧ri̧ chjadëri̧ yabo ëba baämi̧ dari̧ ëba cjo̧ro̧pea̧ oa. 17Aja̧, icharaita pio ji̧ri̧ chjadëri̧ a̧dopea̧ oa, pio ji̧ri̧ eadëji̧ri̧ pio ji̧ri̧ chjadëri̧ ëba acji tai̧pea̧ oa goë cjo̧dërequedemȩ Jeova, pio jiro üi̧ oa mitëtä. Jabechji̧ na̧ pumȩ judiro̧ ovejami̧ darë oëra̧ti̧ oa chjätäti̧ cjiami̧ dari̧ cjiachea oa, tjamo̧ jidamȩ decjiaji̧ri̧mi̧ dari̧ cjiachea oa, jabechji̧ goë cjo̧dërequedemȩ, judiro̧ chjadëri̧ jida̧ oa cjiapea̧ oa.
18Ado Jeova judi dëbë yo̧rëremȩdejȩ Moiche ju̧i̧:
—Aja̧, ta̧rërequedemȩ. Ado dane, Nu̧ quȩmȩ pio ju̧i̧ ja̧ joja pio ju̧i̧ mitëtä earequedemȩ, Jochue quȩmȩ pio ju̧i̧. Aja̧, ca̧ Tjo chiamȩde. Pio ju̧i̧ mitëpea̧de ano̧ mire tjamo̧ cjo̧ro̧mȩ tänȩpea̧ oa. Pio ju̧i̧iä na̧ ichira̧ idatä earequedemȩ jibëa̧ tjübë oa.#27:18 Aja̧, Jochue ja̧ tjübë oa idarëremȩdejȩ Moiche judi jibëa̧ ichira̧ chjadëri̧ na̧rȩpea̧ ji̧ Ütë tjamo̧ judi mitëa̧ pio ju̧i̧ chjiari. 'Aja̧, Jochue pio ju̧i̧ mitëa̧diji̧da, pio judi ano̧ mire tjamo̧ ëba tai̧mȩ pio judidida' quëna̧pea̧ oa, ja̧di dari̧ japarëremȩdejȩ. 19Ado ja̧di dari̧ japea̧ duri oa, Ereacha pio ju̧i̧ ja̧ dëbëräpȩ, tjamo̧ goë tuti ja̧bepamȩ pio ju̧i̧ ja̧ dëbëräpȩ cjia tänȩjo̧ȩ, icharaita ütëbo ja̧ dëbëräpȩ ju̧ri̧. Ado ja̧di dari̧ japa ëte, jabechji̧ ütëborë ta̧rëri̧ chjadëri̧ yo̧jȩrȩ pio ju̧i̧ chjiari, judi ano̧ mire ja̧bepapea̧ pio ju̧i̧ chjiari. 20Mȩnȩ tjamo̧ yo̧mȩrȩ cjo̧ro̧rërea̧ ji̧, pio ju̧i̧iäpȩmo̧ ano̧ mire cjiadiämi̧ dari̧ cjia tänȩtä earequedemȩ, icharaita judiro̧ pio ju̧i̧ chjadëri ano̧ mire ta̧rë ja̧bopea̧ oa. 21Ado Jochue judi tjamo̧ri̧ dabatämi̧ cjiarä, 'Aja̧, ¿Jeova judi yö̧ta dari̧ jo̧rȩtadida, ¿yö̧ta dari̧ japatä eadicoada' quëna̧ jo̧rȩtarä, jabechji̧ Eleacha pio ju̧i̧ goëdepea̧de. Ado pio ju̧i̧ ja̧ dëbëräpȩ cjiapea̧de, tjamo̧ goë tuti ja̧bepamȩ pio ju̧i̧ ja̧ dëbëräpe. Ado ja̧dëa ji̧ cüdë Uri quȩmȩ ta̧dë#27:21 Uri̧ quȩmȩ ta̧dë boi̧chji̧ pio ju̧i̧iä Jeova judi daba tänȩrëremȩdejȩ tjamo̧ goë tuti ja̧bepamȩ pio ju̧i̧iäpȩmo̧. Aja̧, jënȩ jo̧rȩta̧ pio ju̧i̧, jënȩ ütarë jo̧rȩta̧ pio ju̧i̧ daba tänȩrëremȩdejȩ. Jabo a̧ro̧rȩ tjamo̧ri̧ dabadërea̧rȩ. 'Aja̧, ja̧di dari̧ japea̧dida, ja̧di dari̧ dabarea̧ yürüa̧diji̧da' quëna̧ dabadërea̧rȩ. Ado pio yaba̧mi̧rä japadëde Ütë tjamo̧ judi. Jabechji̧ pio ju̧i̧ ja̧ ma̧ȩ oa irä goarea̧rȩ yaba̧. pio ju̧i̧iä yo̧pareconȩ Ereacha pio ju̧i̧. Aja̧, dabarea̧ yürüpareconȩ judi Jochue pio ju̧i̧ goë yo̧pea̧ oa. Ado ja̧dëa ji̧ Jochue pio judi chjadëri̧ daba tänȩpadejȩrȩ icharaita ji̧ri̧. 'Aja̧, Jeova judi ja̧di dari̧ japatä eadiibëda' quëna̧rea̧mi̧ dari̧ daba tänȩpadejȩrȩ.
22Ado Jeoba judi yo̧a̧mi̧ japarëremȩde Moiche judi. Jabechji̧ Jochue pio ju̧i̧ cjia tänȩrëremȩdejȩ Ereacha pio ju̧i̧ ja̧ dëbëräpȩ, tjamo̧ goë tuti ja̧bepamȩ pio ju̧i̧ ja̧ dëbëräpȩ. Icharaita judiro̧ ütëbo ja̧ dëbëräpȩ cjia tänȩrëremȩdejȩ. 23Ado ja̧dëa ji̧ Jeova judi yo̧a̧mi̧ jibëa̧ ichi oa idarëremȩdejȩ jibëa̧ tjübë oa. Ado ütëborë ta̧rëri̧ yo̧a̧dejȩrȩ Moiche judi: “Danȩrȩ, pio cüdë tjamo̧ yo̧mȩrȩ ja̧beparërea̧ ji̧, pio cüdë tjamo̧ ëba tai̧mȩrȩ cjo̧ro̧rërea̧ ji̧, jabechji̧ pio yodëje ano̧ mire ja̧bepapade," yo̧mȩrȩ yo̧rëremȩdejȩrȩ Moiche judi icharaita pio ji̧ri̧iäpȩmo̧ Jochue pio ju̧i̧ chjiari.
Currently Selected:
Ütararea̧ Ma̧ȩ 27: Pume
Highlight
Copy
Compare
Share
Want to have your highlights saved across all your devices? Sign up or sign in
©2021 Global Partners, All Rights Reserved
