Taruparea̧ Ma̧ȩ 50

Gitori̧ jo̧rȩtarëreji̧ri̧dirȩ Jacobo ja̧ u̧ri̧ judiro̧ jäjarea̧rë ja̧boa̧ oaiä

1Ado Joche judi jibëa̧ ama̧i̧rea̧ ja̧ yuroro juchatura̧ cjiamȩrȩ ya i̧bu chjaorëremȩdejȩ ja̧boa̧mȩ oa. Ya i̧bu chjaoa̧dejȩ jibëa̧ chamacho oa, ejaro cjiamȩrȩ. 2Ja̧dëa ji̧ Joche judi yo̧a̧dejȩrȩ chjaparȩji̧ri̧ pio ji̧ri̧ jibëa̧ ama̧i̧rea̧ ja̧ icjara oa chjadëri̧ jëdano̧tä chjaodëri̧ tapuchjape jächea oa, jere mape jächea oa. Jabechji̧ jibëa̧ joarea̧ra̧ pio ju̧ri̧ra̧ chjadëri̧ joatä yo̧rëremȩdejȩrȩ. 3Ado chjaparȩji̧ri̧ pio judiro̧ 40 do nöta ja̧beparëreji̧ri̧dirȩ Jacobo pio ju̧i̧rea̧ ja̧ icjara oa chjadëri̧ jëdano̧pea̧ oa. Ado Jacobo pio judi ja̧boa̧ oaiä, ejichio pio judiro̧, Ejitoräpȩ cjo̧ro̧ji̧ri̧ pumȩ pio judiro̧ 70 do nöta ejaro cjiaji̧ri̧rȩ jo̧rȩtarëreji̧ri̧diro̧jo̧ȩ.

Canaa̧räpȩ jäpea̧ ji̧ cjo̧dërëremȩdejȩ Joche judi pjarao̧ pio ju̧i̧iä

4Ado pio jiro japamitë chjätä ëte Joche judi yo̧rëremȩdejȩrȩ pjarao̧ ju̧i̧ a̧doji̧ri̧ pio ji̧ri̧:

—Danȩrȩ, mȩnȩro̧ pio coa cjäri̧ri̧ cjia darä judi, jabechji̧ ma̧ȩ yürütä earequededibe pjarao̧ pio ju̧i̧. 5Danȩrȩ, ca̧ ama̧i̧rea̧ judi jabë ja̧bodëa̧rä, ja̧di ta̧rëri̧ yo̧mȩrȩ yo̧a̧rea̧dique. “Danȩ ca̧ ja, cüdë ja̧boa̧rä, jabechji̧ cüdë jëdano̧a̧ ta̧dë cjararäpȩ ju̧ri̧ na̧ra̧tä earequedemȩ Canaa̧ quȩmȩ chiriräpȩ. Mȩnȩ coa chjadëri̧ ta̧rëdiäpea̧ oa, jabechji̧ tjamo̧i̧ cjiari̧ yo̧tä earequedemȩ teracabari̧ yo̧rea̧ decjiari̧” yo̧mȩrȩ yo̧a̧rea̧dique ca̧ ama̧i̧rea̧ judi. Ado ja̧dëa ji̧ cüdë, ja̧di ta̧rëri̧ yo̧mȩrȩ dëbë yo̧a̧rea̧reconȩ. “Aja̧ ama̧i̧, mȩnȩ yo̧a̧mi̧ ta̧rëdiäparequede. Tjamo̧i̧ cjiari̧ yo̧requedemȩ ama̧i̧, teracabari̧ yo̧rea̧ decjiari̧” yo̧a̧rea̧reconȩ. Ja̧di tara pjarao̧ pio ju̧i̧ yo̧tä earequededibe ibë järea̧ yürütä ibëa̧ ama̧i̧rea̧ pio ju̧i̧ chjadëri̧ na̧ra̧pea̧ oa. Ado ja̧dëa ji̧ pio ju̧i̧ na̧ra̧ duri oa, jabechji̧ ado chjereno̧ ma̧na̧parea̧rȩ —yo̧mȩrȩ yo̧rëremȩdejȩrȩ pjarao̧ ju̧i̧ a̧doji̧ri̧ pio ji̧ri̧iäpȩmo̧ Joche judi.

6Ado pjarao̧ judi Joche ju̧i̧ ma̧ȩ chjadürëremȩdejȩ:

—Jabechji̧ jävä. Na̧ ama̧i̧rea̧ pio ju̧i̧ chjadëri̧ na̧ra̧pea̧ oa jävä. Na̧ ama̧i̧rea̧ judi mȩaiä yo̧rërea̧mi̧ jape jävä —yo̧mȩrȩ ma̧ȩ chjadürëremȩdejȩ Joche ju̧i̧ pjarao̧ judi.

Canaa̧räpȩ järëreji̧ri̧dirȩ Jacobo ju̧i̧ na̧ra̧pea̧ oa

7Ja̧di tara Joche judi Ejito chiriri pio judiri go̧dürëremȩde Canaa̧ quȩmȩ chiriräpȩ jäpea̧ oa, jibëa̧ ama̧i̧rea̧ pio ju̧i̧ na̧ra̧pea̧ oa. No̧i̧dërë ëba jäa̧diro̧jo̧ȩ. Pjarao̧ pio ju̧i̧ a̧doji̧ri̧ pio judiro̧ ëba järëreji̧ri̧diro̧jo̧ȩ, Ejito tjamo̧ cjo̧ro̧ji̧ri̧ pio judiro̧borë. 8Jacobo pio ju̧i̧rea̧ ja̧ pumȩ judiro̧, Joche ja̧ pumȩ pio judiro̧, jibëa̧ oti̧borë jäa̧ maeadirȩ. Jibëa̧ bori̧ pio ji̧ri̧mo̧i̧ a̧dë jäa̧diro̧jȩrȩ jibëa̧ bacabo, jibëa̧ ovejabo. Goche quȩmȩräpȩ cjiadiäa̧ji̧ri̧ oa a̧dë järëreji̧ri̧diro̧jȩrȩ. 9Ado guadia pio judiro̧borë järëreji̧ri̧dirȩ no̧i̧dë tjamo̧rȩ. Aja̧, jibëa̧ yae charara̧ pio ju̧ri̧ra̧ jäa̧dirȩ. Jabechji̧ ütararea̧mi̧dëri̧ järëreji̧ri̧dirȩ pumȩ judiro̧.

10Ado judiro̧ Goreja Ata quȩmȩräpȩ go̧düdäräa̧rä, Joroda̧ quȩmȩ bea oëräpȩ go̧düdäräa̧rä, jabechji̧ a̧doparëreji̧ri̧dirȩ Jacoborea̧ pio ju̧i̧ chjadëri̧ jo̧rȩtapea̧ oa. Aja̧, ejaro cjiaji̧ri̧rȩ, odai̧ tarari̧ jo̧rȩtaji̧ri̧rȩ a̧doparëreji̧ri̧dirȩ 7 do nö̧ta. 11Ado ju̧ri̧pȩ cjo̧ro̧ji̧ri̧ judiro̧, Canaa̧ quȩmȩräpȩ cjo̧ro̧ji̧ri̧ pio judiro̧ ma̧i̧ dari̧ ejaro cjiaji̧ri̧ oa daea̧ oaiä, ana̧ri̧ jo̧rȩtaji̧ri̧pea̧dirȩ. 'Chia chia, Ejitoräpȩ cjo̧ro̧ji̧ri̧ judiro̧ ja̧di dari̧ ejaro cjia jirodiro̧da, jibëa̧ pumȩ judiro̧ a̧dë ja̧boa̧ oaiä ana̧ tjamo̧ri̧ jo̧rȩtaji̧ri̧rȩ japa jirodiro̧da’ quëna̧ jo̧rȩtaji̧ri̧pea̧dirȩ. Ado pio ju̧i̧iä ano̧ mire quȩpea̧diro̧jo̧ȩ pio jiro chiri oa. Jabechji̧ Abe Micharai quȩra̧ pio ju̧ri̧ra̧ ano̧ mire quȩparëreji̧ri̧diro̧jo̧ȩ pio jiro chiri oa, bea Joroda̧ oëräpȩmo̧ a̧rȩmȩ chiri oa.

12Ado Jacobo ja̧ u̧ri̧ pio judiro̧, jabechji̧ jäjarë pio jibë yo̧rërea̧mi̧ japarëreji̧ri̧dirȩ. 13Ara järëreji̧ri̧diro̧jo̧ȩ jibëa̧ icjara oa Canaa̧ quȩmȩräpȩ. Ado Macapera quȩmȩ chiri boi̧chji̧räpȩ go̧düdäräa̧ ji̧, jabechji̧ na̧ra̧diro̧jo̧ȩ ta̧dë cjararä, Mamare quȩmȩ to chjiaräpȩmo̧ cjiamȩ ta̧dë cjararä. Ja̧di dari̧ japea̧dirȩ. Abaraa̧ judi itita quȩmȩ pumȩ pio ju̧i̧iä gatëa̧ ta̧dë cjararä, pumȩ ji̧ri̧ na̧ra̧pea̧ oa gatëa̧ ta̧dë cjararä, Epjono̧ quȩmȩ pio ju̧i̧iä gatëa̧ ta̧dë cjararä, na̧ra̧rëreji̧ri̧diro̧jo̧ȩ. 14Ado Joche judi jibëa̧ ama̧i̧rea̧ pio ju̧i̧ na̧ra̧ duri oa, ado chjereno̧ baärëremȩde Ejitoräpȩ jibëa̧ pumȩ pio ji̧ri̧ nö̧ta, pio jȩa ëba jäa̧ji̧ri̧ pio ji̧ri̧ nö̧ta.

Cjatäcjie jo̧rȩtami̧ dari̧ ni̧bä chjaorëremȩdejȩrȩ jibëa̧ oti̧ ji̧ri̧ Joche judi

15Ado jibëa̧ ama̧i̧rea̧ judi ja̧boa̧ duri oa, Joche ja̧ oti̧ judiro̧ uapaji̧ri̧pea̧diro̧jo̧ȩ jibëa̧ ayi̧ma̧i̧ pio ju̧i̧. Ado jibëa̧ dëbëti̧ra̧ chia ni̧bä chjaoji̧ri̧pea̧dirȩ Joche pio ju̧i̧ chjiari. Aja̧, ibëa̧ ama̧i̧ judi ja̧boa̧ oaiä, ‘jabechji̧ bape chjaopai̧ dadiibëda, a̧ro̧rȩ pio ju̧i̧iäpȩmo̧ chjai̧dëri̧ japea̧ ba oa bape chjaopai̧ da jirodiibëda, jabechji̧ goadi ërecjiamȩrȩ jo̧rȩta jirodiibëda’ quëna̧ jo̧rȩtaji̧ri̧rȩ ni̧bä chjaoji̧ri̧pea̧dirȩ. 16Ja̧di tara ma̧ȩ chjadürëreji̧ri̧diro̧jo̧ȩ Joche ju̧i̧. Ja̧di ta̧rëri̧ yo̧mȩ ma̧ȩ oa ma̧ȩ chjadüa̧diro̧jo̧ȩ:

—Danȩ ibëa̧ omȩ Joche, ibëa̧ ama̧i̧rea̧ judi ja̧bobea yaboi̧, 17jabechji̧ pio mȩaiä cjo̧dëtä yo̧rëremȩdiibe. Jabechji̧ mȩnȩ pio ibëiäpȩmo̧ cjäri̧ri̧ cjia datä eamȩrȩ yo̧a̧diibe. Mȩnȩ chjadëri̧ cjatäcjie jo̧rȩtatä eamȩrȩ yo̧a̧diibe a̧ro̧rȩ pio mȩaiäpȩmo̧ chjai̧dëri̧ japea̧ pio ju̧i̧ chjiari. Aja̧, mȩnȩ bape chjaodëtä yo̧rëremȩdiibe. Ja̧di tara cjo̧dërea̧ro̧mȩ pio ibëiäpȩmo̧ cjäri̧ri̧ cjia datä, mȩnȩ duridëparȩmi̧ dari̧ a̧dë jo̧rȩtatä a̧ro̧rȩ pio mȩaiäpȩmo̧ chjai̧dëri̧ japea̧ pio ju̧i̧ chjiari. Aja̧, cjätäcjie jo̧rȩtatä na̧ ama̧i̧ ja̧ Ütë pio ju̧i̧ ja̧ mu̧i̧tjoi̧ pio ji̧ri̧iäpȩmo̧ —yo̧mȩ ma̧ȩ pio ju̧i̧ ma̧ȩ chjadürëreji̧ri̧diro̧jo̧ȩ Joche pio ju̧i̧iäpȩmo̧. Ado Joche judi pio jiro ma̧ȩ oa ta̧rëa̧ oaiä ejaro cjiamȩpea̧de.

18Ja̧dëa ji̧ Joche ja̧ oti̧ judiro̧ jäa̧diro̧jo̧ȩ. Ado Joche ja̧ dëbëräpȩ juchatura̧ tjätjäpë china̧därärëreji̧ri̧dirȩ jibëa̧ daito oa daburäpȩ yuro. Ado yo̧a̧diro̧jo̧ȩ:

—Jana̧rea̧rȩ, mȩaiä ta̧rëra̧pea̧rea̧rȩ. Mȩnȩ jo̧rȩtami̧ japavä. Jabechji̧ 'Joche ja̧ mu̧i̧tjoi̧täreji̧ri̧a̧ro̧da' quëna̧ jo̧rȩtarea̧rȩ —yo̧ji̧ri̧rȩ yo̧rëreji̧ri̧diro̧jo̧ȩ Joche ju̧i̧.

19Jabo Joche judi dëbë yo̧mȩrȩ yo̧a̧dejȩrȩ:

—Cjäri̧ ma ca̧ oti̧, jaboti̧ri̧ uapadëchji̧coe. Bape chjaodëparequededibe. Ütë tjamo̧ pio judide tjamo̧ bape chjaomȩ judi, cüdëdë. 20Ado dëdë, pio mȩnȩro̧ chjai̧dëri̧ japarëreji̧ri̧renȩro̧coe, jabo danȩrȩ, chjadë mape jämi̧ dari̧ cjiadiäa̧de Ütë tjamo̧ pio judi tänȩa̧ oaiä. Jabechji̧ ja̧di dari̧ japarëremȩde Ütë tjamo̧ judi pumȩ no̧i̧dërë ta̧mȩcho̧ pio ju̧i̧iä ja̧bochea oa. Ja̧di tara pumȩ no̧i̧dërë ja̧botärea̧ ji̧, ta̧mȩcho̧ pio ju̧i̧iä ja̧botärea̧ ji̧, jabechji̧ chjadëri̧ cjo̧ro̧ baädirȩ yaba̧. 21Danȩrȩ ca̧ oti̧, dibëa̧ chji̧ oa bücjü ma cjiari̧ jo̧rȩtadëchji̧vä. Chjadëri̧ jidaparequededibe dibëa̧ bori̧ pio ji̧ri̧bo —yo̧mȩrȩ ni̧bä chjaorëremȩdejȩrȩ jibëa̧ oti̧ ji̧ri̧ Joche judi. Jabechji̧ pio ji̧ri̧ cjäri̧ri̧ cjia damȩrȩ ni̧bä chjaorëremȩdejȩrȩ ma̧ȩ goae tjamo̧ra̧ judiro̧ cjatäcjie jo̧rȩtarea̧mi̧ dari̧.

Joche judi ja̧boa̧de

22Ado Joche judi, jabechji̧ cjo̧ro̧ cjiamȩrȩ cjo̧ro̧rëremȩde Ejitoräpȩ. Jibëa̧ ama̧i̧ pio ju̧i̧rea̧ ja̧ u̧ri̧ pio ji̧ri̧ nö̧ta cjo̧ro̧rëremȩde jënȩ ütama̧i̧ tjamo̧pea̧rä yuro. Ado 110 ui goamȩpea̧rä, jabechji̧ ja̧boa̧de. 23Jabo ja̧bobea yaboi̧, irä darëremȩdejȩrȩ jibëa̧ u̧ri̧ ja̧ bori̧ pio ji̧ri̧, pio ji̧ri̧ ja̧ jadama̧i̧ pio ji̧ri̧bo, jibëa̧ taru pio ji̧ri̧. Aja̧, Epjarai̧ pio ju̧i̧ ja̧ u̧ri̧ ji̧ri̧ daea̧dejȩrȩ, ado pio ji̧ri̧ ja̧ jojada pio ji̧ri̧bo. Ado Manache ja̧ ja pio ju̧i̧ ja̧ u̧ri̧ ji̧ri̧, Maquiri quȩmȩ pio ju̧i̧ ja̧ u̧ri̧ pio ji̧ri̧ peaja̧di daea̧dejȩrȩ jënȩ ja̧bobea yaboi̧. Ado pio jiro bori pio ji̧ri̧ mitërëremȩdejȩrȩ jibëa̧pe bagari̧.

24Ado ja̧dëa ji̧ Joche judi yo̧rëremȩdejȩrȩ jibëa̧ oti̧ ji̧ri̧:

—Danȩrȩ, cüdë ja̧bopea̧ ji̧ querediärequede ca̧ oti̧. Jabo danȩrȩ, chjadëri̧ jidapadidibe Ütë tjamo̧ judi. Pio yoa chiriri pio judiri chjadëri̧ go̧dü tänȩpadidibe mȩnȩro̧ ado chjereno̧ baädäräpea̧ ji̧ Ütërë Abaraa̧ pio ju̧i̧iäpȩmo̧ yo̧rërea̧ chiriräpȩ. Tjamo̧ davä. Icha pio ju̧i̧ yo̧rërea̧ chiriräpȩ ju̧ri̧, Jacobo pio ju̧i̧ yo̧rërea̧ chiriräpȩ ju̧ri̧ baä tänȩpadidibe chjadëri̧ —yo̧mȩrȩ yo̧rëremȩdejȩrȩ jibëa̧ oti̧ ji̧ri̧.

25Ja̧dëa ji̧ a̧de yo̧mȩrȩ ji̧dë u̧i̧ ni̧bä chjaorëremȩdejȩrȩ jibëa̧ pumȩ ji̧ri̧ Joche judi:

—Ado danȩrȩ, Ütë tjamo̧ judi dibë pio jiro chiriräpȩ baärea̧ yürüro, pio yoa chiriri pio judiri go̧dürea̧ yürüro, jabechji̧ ca̧ icjararemȩ pio ju̧i̧ goa baätä eamȩrȩ yo̧requededibe ca̧ oti̧. Tjamo̧i̧ cjiari̧ yo̧tä earequededibe teracabari̧ yo̧rea̧ decjiari̧ —yo̧mȩrȩ yo̧rëremȩdejȩrȩ.

26Ado Joche judi ja̧boa̧de. Ejitoräpȩ ja̧boa̧de. Ui ji̧ra̧ri̧ goamȩrȩ, 110 ui goamȩrȩ ja̧boa̧de. Ado Joche ja̧ icjararemȩ üdë chjaodëri̧ jere mape bagachea oa, jabechji̧ chjaparȩji̧ri̧ pio judiro̧ jëdano̧rëreji̧ri̧diro̧jo̧ȩ jibëa̧ joarea̧ra̧ pio ju̧ri̧ra̧, tapuchjape bagachea oa. Ado ja̧di dari̧ japa ëte jabechji̧ chjadëri̧ boearëreji̧ri̧diro̧jo̧ȩ icjararemȩ oa na̧ra̧rea̧ to cjararä.

Currently Selected:

Taruparea̧ Ma̧ȩ 50: Pume

Highlight

Compare

Copy