Cori̧tio Ma̧ȩ 2 4

Quiricho pio ju̧i̧ ja̧ mu̧i̧tjoi̧ judiro̧ ma̧ȩdë oa a̧de a̧ra̧ano̧dë madirȩ, jabo ma̧ȩ chjadëi̧ pio ju̧i̧mo̧i̧ a̧ra̧ano̧dirȩ

1Danȩrȩ ca̧ oti̧, Ütë tjamo̧ judi ibë cjäri̧ri̧ cjia daea̧ oaiä, yürürëremȩdiibe pio yoa ja̧beparea̧ ba chia tjamo̧ oa. Ado pio ju̧i̧iä järidëpe bagadë marea̧rȩ, jabo ji̧dë ma järiji̧ri̧rȩ ja̧beparea̧rȩ pio ju̧i̧ ja̧ oa. 2Ado a̧ro̧rȩ ja̧beparä, jabechji̧ chjai̧dë oa japadërea̧rȩ, jabo eami̧ti̧ chjai̧dë oa chjuari̧ jiadarea̧ro̧jo̧ȩ. Jabechji̧ pumȩ judiro̧ idi̧ dari̧ goadi japea̧ pio ju̧i̧ japadë marea̧rȩ. Ado pumȩ pio ji̧ri̧ u̧i̧padë marea̧ro̧jȩrȩ, jabo jabechji̧ Ütë tjamo̧ ja̧ ma̧ȩ oa coëma cjiari̧ a̧ra̧ano̧rea̧ro̧jȩrȩ, teracaba ma̧ȩ oa a̧de mirerea̧ decjiari̧. Jabechji̧ ado cja̧rȩmo̧ ma̧ȩpe järea̧mi̧ dari̧, tjaoë ma̧ȩpe järea̧mi̧ dari̧ a̧ra̧ano̧dë marea̧ro̧dibe, jabo jabechji̧ go̧ȩpea̧ duri pio ju̧i̧mo̧i̧ a̧ra̧ano̧rea̧ro̧dibe, a̧de a̧ra̧ano̧dëji̧ri̧rȩ. Ado a̧ro̧rȩ Ütë tjamo̧ ja̧ dachoro ja̧di dari̧ a̧ra̧ano̧a̧ oaiä, ‘jabechji̧ tjamo̧i̧ cjiari̧ baämȩ ma̧ȩ maea oa a̧ra̧ano̧diro̧ibëda, ma̧ȩ chjádë yürüdë madiro̧ibëda’ quëna̧ jo̧rȩtaji̧ri̧rȩ da maeadiro̧ibe chjadëri̧ jo̧rȩtaji̧ri̧ judiro̧. 3Tjamo̧ davä, coëma cjiari̧ a̧ra̧ano̧rea̧ro̧dibe ma̧ȩ chjadëi̧ pio ju̧i̧. Jabo a̧ro̧rȩ ja̧di dari̧ a̧ra̧ano̧a̧räbo, goadia̧ oa cjiami̧ dari̧ cjiade ma̧ȩ üdë o ji̧ri̧iä, bucho ana̧ aeno̧a̧ oa cjiapaji̧ri̧ pio ji̧ri̧iä. 4Jabechji̧ Ichiae judi da coto tänȩmi̧ dari̧ japa madejȩrȩ pio jiro pumȩ ji̧ri̧, quëna̧dëji̧ri̧ ja̧ chji̧ pio ju̧i̧. Jabechji̧ judiro̧ coëma cjiari̧ baämȩ no̧mi̧ da oa dachea oa, judiro̧ ji̧dë ma bagönȩmi̧ darä cjo̧ro̧pea̧ oa, da coto tänȩmi̧ dari̧ japa madejȩrȩ. Tjamo̧ davä. Quëna̧dëji̧ri̧ pio judiro̧ Jechu pio ju̧i̧ chjiari ma̧ȩ oa bapë ta̧rëchea oa, judiro̧ tatami̧ damȩ ma̧ȩ pio ju̧i̧ quëna̧chea oa, da coto tänȩmi̧ dari̧ japadejȩrȩ pio yoa chirirä cjo̧ro̧ji̧ri̧ ja̧ ütë pio judi. Jabechji̧ a̧ro̧rȩ ma̧ȩ chjadëi̧ oa a̧ra̧ano̧räbo, a̧ro̧rȩ a̧dë chjäte tatari̧ cjiamȩ pio ju̧i̧ chjiari ma̧ȩ pio ju̧i̧ a̧ra̧ano̧räbo, ta̧rëdë madiro̧ibe. Tjamo̧ davä. A̧ro̧rȩ Quiricho pio ju̧i̧ chjiari a̧ra̧ano̧räbo, a̧ro̧rȩ Ütë tjamo̧ pio judimi̧ damȩ pio ju̧i̧ chjiari a̧ra̧ano̧räbo, cjäri̧ madiro̧ibe, bapë ta̧rëdë madiro̧ibe. 5Jabechji̧ a̧ro̧rȩ ma̧ȩ chjadëi̧ pio ju̧i̧ a̧ra̧ano̧rä, pumȩ judiro̧ pio ibëiäpȩmo̧ ba chia dapea̧ oa a̧ra̧ano̧dë marea̧rȩ, jabo Jechu Quiricho pio ju̧i̧ chjiarimo̧i̧ a̧ra̧ano̧rea̧rȩ. Ütëborë, ‘Ano̧mȩ tjamo̧ pio judimo̧dida’ quëna̧ jo̧rȩtapea̧ oa a̧ra̧ano̧rea̧rȩ, pumȩ judiro̧ pio ju̧i̧iäpȩmo̧ ma chjacjiamȩri̧ ni̧bäpea̧ oa. Jabechji̧ Jechu judi ibë chjätärea̧ yürüa̧ oaiämo̧i̧, jabechji̧ dibëa̧ mu̧i̧tjoi̧mi̧ dari̧ cjiadiäji̧ri̧rȩ a̧ra̧ano̧rea̧ro̧dibe. 6Jabechji̧ Ütë tjamo̧ judi chjö̧na̧i̧ oa pearä judirä pareaparërea̧ ji̧, jabechji̧ judi ni̧bärërea̧ ma̧ȩ oaiä tata mape bagarëremȩde ma̧i̧ da bagönȩ marërea̧ ji̧. Ado peaja̧dimi̧ dari̧ japarëremȩdiibe pio ibëiäpȩmo̧. Jabechji̧ bagönȩmi̧ darä jo̧rȩta marëreji̧ri̧rea̧rȩ. Tjamo̧ davä. A̧ro̧rȩ pearä judi dabadëa̧ oaiä, a̧ro̧rȩ Quiricho pio ju̧i̧ dabadëa̧ oaiä, jabechji̧ a̧dë chjäte bagönȩmi̧ darä jo̧rȩta marëreji̧ri̧rea̧rȩ, damirerea̧mi̧dërä. Jabo ¿tjana̧ japarëremȩdiibe Ütë tjamo̧ judi? Tjana̧ japadë, jabechji̧ tatami̧ darä jo̧rȩta tänȩrëremȩdiibe. Tjamo̧ davä, tatami̧ darä jo̧rȩta tänȩrëremȩdiibe a̧ro̧rȩ Quiricho pio ju̧i̧iä chjadëri̧ dabarea̧ dapea̧ oa, a̧ro̧rȩ Quiricho pio ju̧i̧iä Ütë tjamo̧ ja̧ jauëchjarea̧ pio ju̧i̧ chjiari dabaparea̧ dapea̧ oa. Tjamo̧ davä. A̧ro̧rȩ ma̧i̧ da bagönȩmi̧ darä jo̧rȩtarërea̧ ji̧, jabechji̧ pearä tata mape baga tänȩrërea̧mi̧ tatami̧ darä jo̧rȩta tänȩrëremȩdiibe Ütë tjamo̧ judi, a̧ro̧rȩ Quiricho pio ju̧i̧iä Ütë tjamo̧ ja̧ chjacjiamȩrea̧ pio ju̧i̧ chjiari chjadëri̧ dabaparea̧ dapea̧ oa.

7Ado danȩrȩ ca̧ oti̧, Ütë tjamo̧ judi pio ibëiäpȩmo̧ yürüa̧ ja̧beparea̧ pio ju̧i̧ chiaji̧ri̧pea̧rea̧rȩ. Ma̧ȩ chjadëi̧ pio ju̧i̧ a̧ra̧ano̧rea̧ oa chiaji̧ri̧pea̧rea̧rȩ. Tjamo̧ davä. A̧dë chjäte ba chia tjamo̧ pio ju̧i̧ chiaji̧ri̧pea̧rea̧rȩ. Jabo cjäri̧ marea̧rȩ jabo, ju chiadë marea̧rȩ. Jabechji̧ dabu yocodëmi̧ dari̧ cjiarea̧rȩ. Danȩrȩ, dabu yocodë üdë, dabu maeara̧ japea̧ oa cjia oaiä chjuadëde. Chjaodëri̧ goërë bagapai̧ dade. Ado peaja̧dimi̧ dari̧ cjiarea̧rȩ. Ju chiadërea̧rȩ. Jabo a̧ro̧rȩ ju chiadëji̧ri̧rȩ cjo̧ro̧räbo, ju chiadëji̧ri̧rȩ a̧ra̧ano̧dë marea̧rȩ, jabo Ütë pio judiri ma̧na̧mȩ ju chiarea̧ra̧ pio ju̧ri̧ra̧ a̧ra̧ano̧rea̧ro̧dibe, Ütë tjamo̧ pio ju̧i̧ chjiari ana̧ri̧ na̧rȩji̧ri̧rȩ. ‘Jabechji̧ Ütë tjamo̧ pio judi tjamo̧dida, tjamo̧ ja̧bepamȩ pio judidida’ quëna̧ na̧rȩrea̧mi̧ dari̧ a̧ra̧ano̧rea̧ro̧dibe ca̧ oti̧. 8Tjamo̧ davä. Ju chiadëji̧ri̧ pio ji̧ri̧iä ana̧ri̧ ja̧bepade Ütë tjamo̧ judi pio ibëiä. Danȩrȩ, chjai̧dëri̧ chjätäpea̧ üdë acji jana̧mi̧ dari̧ jape chjaodiibe a̧ro̧rȩ eami̧räpȩ järä. Jabo ja̧di dari̧ japaräbo, jabechji̧ boë cjaeämi̧ dari̧ japadëdiibe. Boadärämi̧ dari̧ japadëdiibe. Jabechji̧ ji̧dë ma jidatarea̧ro̧jo̧ȩ Ütë tjamo̧ pio ju̧i̧. Tjamo̧ davä. A̧ro̧rȩ ana̧ri̧ jo̧rȩtapai̧ daräbo, ‘Chia chia, tjana̧ japatäreji̧ri̧cjivaa̧ro̧ yaba̧, ma̧i̧ dari̧ japadiro̧ibëda, yö̧ta dari̧ chjätärea̧ dapacjivaa̧ro̧ yaba̧’ quëna̧ jo̧rȩtapai̧ daräbo, jabechji̧ a̧ro̧rȩ bücjüri̧ cjia tjamo̧pe bagatärea̧ ji̧, jabechji̧ ‘Ütë tjamo̧ judi chjadëri̧ a̧dopadiibëda’ quëna̧ jo̧rȩtaji̧ri̧rȩ jidatarea̧ro̧jo̧ȩ. 9Jabo dëdë ca̧ oti̧, ji̧dë ma conȩdadiro̧ibe. Ji̧dë ma arë cürëmi̧ dari̧ japadiro̧ibe ibëa̧ icjara oa daburäpȩmo̧. Jabo Ütë tjamo̧ judi a̧dë cjarapadë madiibe. ‘Aja̧, Ütë tjamo̧ judi a̧dë baäa̧ jirodiibëda’ quëna̧pai̧ daräbo, jabechji̧ a̧dë cjarapadë madiibe. Ado peaja̧di ja̧bo tänȩrea̧ yürüdëdejȩrȩ ibë ja̧bo tänȩtämi̧ cjiaji̧ri̧ pio ji̧ri̧iäpȩmo̧. 10Jabechji̧ a̧ro̧rȩ eami̧räpȩ järä, ‘jabechji̧ Jechu pio ju̧i̧ ja̧bo tänȩrërea̧mi̧ ja̧bo tänȩpai̧ dadiro̧ibëda’ quëna̧ jo̧rȩtaji̧ri̧rȩ cjo̧ro̧rea̧rȩ, conȩda̧ oa cjiaji̧ri̧rȩ. Jabo ibë ja̧bo tänȩpai̧ daräbo, jabechji̧ Jechu pio judiri ma̧na̧mȩ cjo̧ro̧rea̧ra̧ pio ju̧ri̧ra̧ ji̧dë ma cjo̧ro̧tämi̧ cjiarea̧rȩ a̧ro̧rȩ Jechu pio ju̧i̧ chjiari ana̧ri̧ na̧rȩpea̧ oa, pio judiri ma̧na̧mȩ na̧rȩrea̧ maeara̧ na̧rȩpea̧ oa.

11Jabechji̧ a̧ro̧rȩ jabë cjo̧ro̧rea̧ chiaji̧ri̧borë, ‘jabechji̧ eami̧ doro chjaodëri̧ ja̧bo tänȩa̧ oa cjiapai̧ daa̧ro̧da’ quëna̧ dabarea̧rȩ ca̧ oti̧, a̧ro̧rȩ Jechu pio ju̧i̧ chjiari ji̧dë ma a̧ra̧ano̧riä cjo̧ro̧a̧ oaiä. Jabechji̧ Ütë tjamo̧ pio judi chjai̧dë oa chjätärea̧ yürüa̧ oaiä, jabechji̧ ana̧ri̧ na̧rȩrea̧ darea̧ro̧jȩrȩ pumȩ pio ji̧ri̧ Jechu pio ju̧i̧ chjiari. ‘Aja̧, Jechu judi tjamo̧ri̧ bëdüa̧dida, ado pio judiri ma̧na̧mȩ cjo̧ro̧rea̧ra̧ pio ju̧ri̧ra̧ cjo̧ro̧diro̧da, pio judiri ma̧na̧mȩ ju chiarea̧ra̧ cjo̧ro̧diro̧da’ quëna̧rea̧mi̧ dari̧ na̧rȩrea̧rȩ ca̧ oti̧, ja̧borea̧ chiamȩ icjarara̧ pio ju̧ri̧ra̧. 12Ado pio ju̧i̧iä a̧ro̧rȩ, Quiricho ja̧ mu̧i̧tjoi̧ pio judiro̧, ji̧dë ma chjai̧dë oa chjätäräbo, a̧ro̧rȩ eami̧ doro chjaodëri̧ ja̧bopai̧ daräbo, jabechji̧ pio mȩnȩro̧ bucho ana̧ cjo̧ro̧rea̧ chiaji̧ri̧pea̧nȩrȩ, a̧ro̧rȩ ji̧dë ma a̧ra̧ano̧riä cjo̧ro̧a̧ oaiä.

13Danȩrȩ ca̧ oti̧, cja̧rȩmȩ üdë, Ütë tjamo̧ ja̧ ma̧ȩ oa go̧ȩparëremȩ pio judi ja̧di ta̧rëri̧ go̧ȩparëremȩde: “Aja̧, cüdë Ütë tjamo̧ pio ju̧i̧iäpȩmo̧ quëna̧mȩpea̧ tara, jabechji̧ pio ju̧i̧ chjiari ni̧bärequede yaba̧ o ji̧ri̧iäpȩmo̧” yo̧mȩrȩ go̧ȩparëremȩde. Ado danȩrȩ ca̧ oti̧, peaja̧dimi̧ dari̧ japarea̧rȩ. Peaja̧di ni̧bärea̧rȩ. Jabechji̧ a̧ro̧rȩ Ütë tjamo̧ pio ju̧i̧iäpȩmo̧ quëna̧ji̧ri̧pea̧ tara, peaja̧di ji̧dë ma a̧ra̧ano̧ji̧ri̧rȩ cjo̧ro̧rea̧rȩ, pio ju̧i̧ chjiari ni̧bäji̧ri̧rȩ. 14Jabechji̧ tjamo̧ri̧ dabarea̧rȩ ca̧ oti̧. Ütë tjamo̧ judi ibëa̧ Ano̧mȩ Jechu pio ju̧i̧ bëdü tänȩa̧ pio ju̧i̧ chjiari tjamo̧ri̧ dabarea̧rȩ. Ado a̧ro̧rȩ Jechu pio ju̧i̧ nö̧ta cja̧rȩmȩpe baga̧ji̧ri̧ oa, peaja̧di tjamo̧ri̧ bëdü tänȩpadiibe ütara̧ doro. Tjamo̧ davä. Bëdü tänȩpadiibe. Ado pio dibë nö̧ta jadü cjiarea̧mi̧ dari̧ cjiadärä tänȩpadiibe pio ju̧i̧ ja̧ dëbëräpȩ ju̧ri̧. 15Aja̧ ca̧ oti̧, pio mȩnȩro̧ dami̧ti̧ chjadë oa chiapea̧ oa, dami̧ti̧ chjai̧dë oa chjätärea̧rȩ pio dibë chjadëri̧ a̧dopea̧ oa, Ütë tjamo̧ pio judi chjacjiamȩri̧ ni̧bäa̧ oa cjiapea̧ oa. Jabo jabechji̧, a̧ro̧rȩ ji̧dë ma a̧doa̧ oaiä, ji̧dë u̧i̧ goëje ji̧ra̧ tjamo̧pe bagapadirȩ Ütërë cjäri̧ri̧ cjia da̧ chja̧oerä ano̧ mire cjo̧ro̧paji̧ri̧ pio judiro̧. Ado pio judiro̧ ji̧ra̧ tjamo̧pe baga̧ oaiä, jabechji̧ ji̧dë u̧i̧ ana̧ri̧ chjacjiamȩri̧ ni̧bäa̧ oa cjiapade Ütë tjamo̧ judi. Aja̧ ca̧ oti̧, pio ju̧i̧ tjamo̧ri̧ dabarea̧rȩ. Ado pio ju̧i̧iä cjapiri̧ cjiarea̧mi̧dëri̧ ni̧bärea̧rȩ.

16Ado pio ju̧i̧iä aeno̧dëri̧ cjiarea̧rȩ a̧ro̧rȩ ja̧bepapea̧ ji̧. Tjamo̧ davä. A̧ro̧rȩ Ütë tjamo̧ judi ütara̧ doro ibë tjamo̧ri̧ bëdü tänȩpa tara, a̧ro̧rȩ pio ju̧i̧ nö̧ta a̧dëräpȩ cjo̧ro̧pea̧ pio ju̧i̧ chjiari dabaji̧ri̧pea̧ tara, jabechji̧ aeno̧dëri̧ cjiarea̧rȩ a̧ro̧rȩ ja̧bepapea̧ ji̧. Jabechji̧ ji̧dë ma a̧ra̧ano̧tämi̧ cjiarea̧rȩ, a̧ra̧ano̧ ano̧rea̧ decjiari̧. Jabechji̧ ibëa̧ icjara üdë ji̧dë ma ütama̧i̧pe baga̧räbo, a̧ro̧rȩ ju chiadëpe baga̧räbo, jabechji̧ ibëa̧ tjo üdë doti̧mi̧ ji̧dë u̧i̧ peaja̧ mape jämi̧ dari̧ cjiade Quiricho pio judiri ma̧na̧mȩ cjo̧ro̧rea̧ pio ju̧i̧iä, Ütë tjamo̧ judi ju chiarea̧ yürüa̧ oaiä. 17Tjamo̧ davä. A̧ro̧rȩ pio yoa chirirä cjo̧ro̧a̧ nö̧ta, dëdë, ma̧i̧ da tjamo̧ oa chjätärea̧rȩ chjai̧dë pio ju̧i̧. Jabo ana̧ tjamo̧ri̧ jo̧rȩtadëreconȩ jabo. Jabechji̧ goarijäpade. Jabomo̧ japamitë boi̧chji̧mi̧ dari̧ tararea̧rȩ. Ado danȩrȩ, a̧ro̧rȩ chjai̧dë oa chjätäa̧ üdë, jabechji̧de. Jabechji̧ pio ju̧i̧iä ji̧dë ma jëdano̧a̧ oa cjiami̧ dari̧ cjo̧ro̧rea̧rȩ ca̧ oti̧, a̧ro̧rȩ a̧dë chjäte ba chiamȩ pio ju̧i̧ mitërea̧ dapea̧ oa, a̧dë chjäte tatari̧ cjiamȩräpȩ pio ju̧ri̧ bucho ana̧ cjo̧ro̧rea̧ dapea̧ oa. 18Ado pio ju̧i̧iä jabechji̧ ana̧ri̧ jo̧rȩtadërequede a̧ro̧rȩ chjai̧dë oa chjätäa̧ pio ju̧i̧ chjiari. Tjamo̧ davä. Pio ju̧i̧ ana̧ri̧ jo̧rȩtadërequede, jabo ji̧dëri̧ a̧ro̧rȩ a̧dëräpȩ mitëpea̧ pio ju̧i̧ jo̧rȩtarequede. Tjamo̧ davä. Darea̧mi̧dë pio ju̧i̧ ana̧ri̧ jo̧rȩtarequede ca̧ oti̧. Jabechji̧ a̧ro̧rȩ pio yoa chirirä daea̧ üdë, goarijäpade. Yuropapade. Jabo ibëa̧ dachora̧ darea̧mi̧dë pio judi, a̧ro̧rȩ mitëpea̧ pio judi, jabechji̧ bucho ana̧ cjiadiäpade. Pio ju̧i̧iä ana̧ri̧ jo̧rȩtadërequede chjai̧dë oa chjätäpea̧ ji̧.

Currently Selected:

Cori̧tio Ma̧ȩ 2 4: Pume

Highlight

Copy

Compare